Nehemia 13:15 - Eipomek

¹⁵ Atalak ara, narye dinmasiba, Sabat sum deice arye, yata barye nang do, Yehuda yala ninye weik arye, anggur tapu duk purulamikce, pil dolamikak eipse. Allah arye, “Sabat sum deice ara, pil tonok ning babye kum donamlulume,” nyapdeipsuk bukni, aninye arye yanibuka, ayupu kum kekelamike. Ton yuk ninye ara, gandum ap, anggur tapu duk ap, ara yo duk ap, yuk aning-aning nirya ap dobuka, keledai basam balye deice libuka deipmekce, Sabat sum deice arye Yerusalem mutuku yanganmek. Winipmekba narye eipsirye, “Yata ati Sabat sum deice arye, aning ara dekelyanganmalum do?” nyabuka wenepse.

Nehemia 13:15 交叉參考

2 Tawarikh 24:19

Allah arye sikti, yu tenebuka anye, ‘Anang ara tamubuka, na tam kipdopnamakeʼ tenen, Allah arye el yupu laka nyana deiyok nang, nabi-nabi nang dopdeibukba, sik aninye dam yayikce, “Anggun malye ululum ning ara, batakmunce, tamubuka Allah dam yamunyakarye, el siuk erenamlume,” nyabuka laka nyalamikce, wenelamik. Wenelamik bukni, sik amutuku ulamik nang arye anyalamik yupu ati, ‘Nun lik ati kum kekenamabeʼ tenen, ayupu pia kum kekelamik.

Nehemia 10:31

Tonda, nun dana-dana tam unyak ninye, yuk-yuk yala nang arye, nun pil kum donyap sum, Sabat sum deice ara, dekna ning, talye bona do, din ning do nirya, ‘Aning-aning deknuyap’ tenen, nun dam boyasicopura, nunce kum deknamabe. Ara, nun ni koproba Allah el si erena ati, mambul sum, Sabat sum deice arye pil kum donyaba ati, dekna ning boyasica babye, nun kum deknamabe. Aning atonun, an Allah arye, ‘Arup sum ara, na mambul sum anya arye, asum deice arye, na si erepnamnulume,’ nyapdeipsulum sum nirya ara, atonun wininamabe. Pil dona ap, dekna ap kum winipnamabe. Tonda, keting tamun nukdebuka, nakub barye keting tamun deice arye, talye wa wibuka, linamabe. Bukni, keting tamun nukuka tekbarye akunum uplyopura, tahun ketujuh (7) nirya ara, nun winiryuk wa kum wipnamabe. Tonda, nun wa tuku noutam ara, yala kum koupnamabe. Talye awamlye ninguk, talye palamle ning libuka dinamabe. Ara, mince nyapdeiamsulum touk, keting tamun tekbarye deice arye, nun tuku ap, wa ap nirya ara, dikdik sena atonun kipnamla atia. Tonda, yuk nang arye, nun uang yo bok do, yata ning do, tia ati dopropsik ning ara, tekbarye keting tamun deice arye, ‘Aning dauplye. Nun ning, tia ati dopromsulum ning nirya ara, tuba tamubuka arena kume,’ nyapnamabe.

Nehemia 10:32

Tonda, an Allah arye nyamsulum touk, kekebuka wininamabe. Ara keting tamun, keting tamun nirya ara, nun dekna deiyok ning, el si ara perak, tonok ning bokuka, seper tiga bokuka, arenamabe. Ara winipmanto 4 gram kintinip deibibirye, Allah el si eren aik lipsisikildeilina ati, Yerusalem dolinamabe.

Nehemia 13:16

Aning atonun, Tirus mutuku nang ton sik mining dam Yerusalem mutuku noutam aulamik nang arye, mek pum bal ikan ap, tonda yuk-yuk yala ning ap, sik talibuka ulamik ning nirya ara, Sabat sum deice arye boyanganmika ara, ‘Yudea tam ninye sikce deknamsiyak’ tenen, boyayik.

Nehemia 13:21

Winilamikopura, narye anang ati ayupu ton nyabuka uapse. “Anggunda talye kanye bobuka kalikilulum do? Yata deiyok ati, nun cang keil poka dam malulum do? Sabat sum deice arye amutuku noutam akunum yangana ati, kum wekelyatume. Tonap aning atonun winipmunyopura, na mikip arye wenepnamsine,” nyapse. Nyapsiba, ayupu kekebikce, asum arye dipdongobuka dotalak nirya, Sabat sum deice ara, kum dekelyangalamik.

Nehemia 9:29

Israel ninye malye weik ulamik talak ara, sikti, ance asilen ning areplumce, “Narye, ‘Aning ara wininamlume, aning ara kum wininamlume,’ nyabuka nyapse Mem Yupu, tuba tonap kekebuka dobolbanamlume. Winipmunce, teleb unamlum bukni, kumopura, wenenamsine,” nyapdeiamlume. Nyabuka wenelalum bukni, mandipna kanye bobuka kwalilamikce, an nyalalum yupu yanibikce, sikce tenepne ninguk winilamik. Ance nyalalum yupu talye yaniplobuka bisina uk ulamik. Bukni, yatanye do nirya, ance, ‘Aning ara wininamlume, aning ara kum wininamlume,’ nyapdeiamsulum yupu, moubuka kekeplirye, dobolbilyopura, anye bira dipkoprob kam unamle. Bukni, atalak ara, Israel nang arye, mandipna weik ulamikce, ‘Allah el yupu ara pia kekena kumce wininamabe,’ nyaltaklamikce, an tam donga anipna arye, yuk tam kilolamik. An yupu kum moubuka taleamika deice arye, pia malye weik ulamike.

Ayub 39:12

El asapi basam ati, ance teneminya ara, ‘Na wa win dam bilirye, gandum nong libuka boyanganamnile,’ tenelyam do? Tonda, ‘Gandum sekuka, asapi deice dipminba, boyanuka deipkiliba, sung-sunga wibuka lapnamak’ tenen, ‘Boyanganamnile,’ tenelyam do? Ayub, anda aning kel bikaminyopura, nyapnamanilyame.

Mazmur 50:7

Tonda, Allah elcuk nyalule. “Sik Israel yala nang nirya ara, narye nyapnamsin yupu ara, moubuka kekepnululume. Narye, ‘Sik Israel yala nang ara, ‘Naʼ tenen nang unyak’ tenen, ayala nang nirya wipdeiamsise. Nara, anggun ni koproba Allah unune. Ati, anggunce na siuk erenululume. Ati ara, anggunce malye-malye weik winilulum ning ara, narye lakak aryuk laka nyapsinirye, anggunti wenepnamsine.

Keluaran 31:12

Allah el si Yahweh arye Musa biti nyabuk.

Keluaran 31:16

Nyabukce, ayupu ton nyabuk. “Israel yala ninye, sik dadeipdanin banamak ninye nirya ati, ‘Asum ara weik mambul sum’ tenen, pil dona kum diparyuk, si erenamnulume. Ara, narye anggunti, ‘Wininamlulume,’ akunum nyapdeipsise ati, aning ara yupu talipdaburye, tonok kanye bobuka nyapdeibupu yupu ulula anya arye, aning pia kum bataknamlume.

Keluaran 34:21

“Like nakub barye sum ara, anggun pil donamlulume. Bukni, like tekbarye sum ara pil dona kume. Asum ara dikdik uk senamlume. Wa win talak babye, wa wina lin talak babye, tekbarye sum ara pil kum donamlulume. Dikdik senuk unamlulume,” Allah arye nyabuk.

Keluaran 35:2

Naku barye (6) sum noutam nirya ara, talye kanye bobuka, anggun pil koproba uk donamlulume. Bukni, tekbarye (7) sum ara, pil yuk-yuk ning nirya pia kum donamlulume. Anggun pil koproba batakuka, anggun adiparyuk, dikdik senamlulume. Asum ara, na Allah Yahweh si erena ati, kintinip deipse sum ati, anggunce, ‘Asum ara, pia mambul teleb sum, Allah el sumuk,’ tenepmunce, na siuk erenamnulume. Bukni, yatanye do nirya, tekbarye (7) sum noutam pil donmalinye bira, wenebuka opnamlume.

Amsal 28:4

Yatanye do nirya, sik ninye deiyok nang arye, “Aning ara wininamlulume, aning ara kum wininamlulume,” nyalice yupu ati, ‘Ayupu ara nun like’ tenen, yaniltalamak nang ara, winilamice deice arye, dipkoprob pia malye winin nang ati erenyake. Ara, talye ati kume. Ninye neika teleb ubuka una ati, “Wininamlulume, aning ara ton pia unamlume,” nyabuka delinyak yupu ati, yaniltana uk unyak ninye ara, pia malye ninguk, talibuka unyak nang arye, wininyaka ati nyapne. Bukni yata ninye do nirya, ninye neika teleb ubuka una ati, “Wininamlulume, aning ara ton wininamlume,” nyabuka delinyak yupu ati kekebikirye, ayupu uk talibuka diksukumuk unyak ninye ara, wininyaka deice arye, wenena yupu yaniltana uk unyak nang ap, malye ning talibuka unyak nang ap ati, yupu sekenyake.

Yesaya 58:13

Na Allah Yahweh arye, nyapsine. Narye, na si erena ati, narye wipdeiamsiseba, dikdik sen sum, Sabat sum akunum uplyopura, anggunce nati kibuka, na si erenamnulume. Asum deice arye, anggun patan ning tenebuka, yuk-yuk talye pil ton, kum donamlulume. Tonda, asum ara, yuk-yuk pera mutuku kum banamlulume. Tonda, asum deice arye, talye-talye yupu kum peterenamlulume. Ati, ‘Asum ara, weik mambul sum,’ tenebuka kintinipmunce, na siuk erenamnulume. Tonda anggunce, ‘Allah arye, dikdik sen sum arelamsuk ning ara, pia telebe. Allah Yahweh, el sum ara, weik mambul sum ati, asum ara, nun kanye deibabe,’ tenebuka umunyopura, narye teleb kilinamsine. Asum ara, ‘Naʼ tenen, sum anya arye, talye pil dona ap, talye-talye yupu nyana ap, pia kum wininamlulume.

Yeremia 17:24

Anggun apu yapu winilamik bukni, narye nyapsine. Na Allah arye nyapdeipsise yupu nirya ara, moubuka talipnamlume. Tonda, Sabat sum ara, Yerusalem mutuku bisik bublan arye bona bobuka, abisik wekelbana kum wininamlume. Aning kum bukni, Sabat sum noutam ara, ‘Naʼ tenen sum ati, na si eren sum ulula ati, anggunce talye pil nirya ara, asum deice arye, pil kum donamlume. Winipmunyopura, teleb ning ton arepniba, anggun dam yanamle.

Yeremia 17:27

Bukni, anggun Israel yala nang ara, na Allah arye, “Aning ara, wininamlume. Aning ara, pia kum wininamlume,” nyapdeipsise yupu uk, moubuka kum talipmunyopura, ikin ning arepniba, sik dam yanamlarya! Ara, narye, “Sabat sum ara, nati kintinip deipnutumce, talye pil dona kumce, dikdik sepmunce, na siuk erepnamnulume,” nyapdeipsise yupu ap, tonda, “Asum noutam ara, yata yala bona nirya babye, bobamunce, Yerusalem mutuku bisik bublan wekelbana kume,” nyapdeipsise ning bukni, anggunce na yupu kum kekepnumunce, yanipnumunyopura, narye anggunti, weik tonun wenepnamsine. Ara ani. Yerusalem mutuku weik asik wekelban bisik bublan nirya ap, tonda ninye deiyok nang, Raja nang unyak weik aik nirya ara, uku deipyopura, aning-aning nirya dibuka, sirya daknamle. Winiplyopura, adinamle uku ara, pia kum tangapmanto upnamake. Pia dinauk unamle! Na Allah arye nyapsine.

Yeremia 42:19

Nyapmasila ati, na Yeremia birye anggunti, ayupu tonap nyapsine. Anggun nirya moubuka kekepnululume! Allah Yahweh arye, anggun Yehuda mutuku tuba aululum nang nirya ati, akunum nyapmasile. Allah arye, anggunti, ‘Sikda Mesir mutuku bana kume!’ nyabuka, akunum nyapdeipmasile. Ati ara, na Yeremia birye anggunti, asum deice arye, akunum laka kibuka nyapmasine. ‘Allah arye wenebuka opsilirye, sirya daknamsilʼ tenen ati, anggunda Mesir mutuku bana kume,’ akunum nyapsine.

Yehezkiel 20:13

Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.

Amos 8:5

Tonda, anggun malye ululum ninye arye, anggun bidamang ati nyalalulume. ‘Anango, wala winiryuk tiknamle talak upliba, Allah el si erenyap talak ara, dan sum akunum kum datuba, nunce tonap tuba tamubuka, nun gandum minop dektibye do?’ Tonda, anggun ayupu nyabuka nyalulume. ‘Allah si erena ati, pil dona kum diparyuk, dikdik senyak sum, Sabat sum ara, dan talak sirya daknamle do? Sabat sum akunum sirya daktuba, nunce nun gandum duk dektibirye, deken ning dopropnamabe,’ tenelulume. Tonda, deken ning, ‘Weik doproptibye’ tenen, gandum duk lun ning ara, mitik ning aryuk lululume. Mitika aryuk lululum bukni, ‘Aning dekena ati, yo bok weik tabakuka arepsululume,’ nyabuka morolulume. Tonda, gandum duk sak libikirye, timbangan deice delinyak talak ara, anggun timbangan ara, tilila ninguk kiklilulume. Aning dipkoprob ikin ara, kum nyalulume. Winimunya deice arye, anggun mutuku ninye ati, tilila yupu uk nyalulume. Anggunce, ‘Kume, gandum duk el ikin ara, mitik anun uka,’ nyaplobuka, tilila yupu nyapmunce, sik ning talye ubula dobuka dilulume.

Mika 6:3

Allah Yahweh arye, Israel ninye ati nyabuk. Anggunda, na mapu koproba Israel ninyeo, narye anggun dam, yata malye ning winyamsise do? Tonda, narye yata ikin ning, anggun dam arye winilamsiba, anggunce kanye imun kanye bobuka ulamlum do? Narye yata winilamsiba, anggunce nati, lik kanye bobuka, unululum do? Winimunye ning ati, anggunce na dam, ayupu laka nyapnamnulume.

Rasul 2:40

Nyabukce, wenena ap, laka lena ap, weik nyabuk deice arye anang ati nyabuk. “Anggunda anang atalak pia malye wininyak ninye kan-kan arye, lyepdamunce, Allah dam banamlume.” Nyabuk ning ara, ‘Allah arye oplyak’ tenen, yupu sekuk.

Rasul 20:21

Yahudi yala nang ap, Yunani yala nang ap ati, ‘Moubuka tenepnamak’ tenen, nyalamse. ‘Anggun malye ulalum ning ap, anggun talima noutamak malye tenelulum ning ap, batakmunce donga tamubuka, Allah tam kipmunyeura, nun deiyoknye Yesus ati, dib teneplulume,’ nyabuka laka nyalamsise.” Paulus arye nyabuk.

Galatia 5:3

Tonda, ayupu ton nyapsine. Yatanye do nirya, Musa sekamuk yupu, mem yupu deice nyasilye touk, ‘Den bola mouse ning sekna deice arye, Allah lyepnamnile’ tenen, diba teneplirye, aning deiceuk el kanye delilulnye bira, adiparyuk Musa sekamuk yupu nirya talibuka dobolbanamle. Amem yupu nirya talibuka dobolbanamle. Ton yupu talibuka, ton yupu ara batakuka kum uptue.

Efesus 4:17

Ara, na kayapu, anyapnusin yupu ara, talye ati kum nyapsine. Kume, nara nun Deiyoknye Kristus, el pil melina deiyoknye ununa deice arye, ayupu nyapdeipnusine. Anggun Yahudi yala kum nang ara, dib tenena kumce, anggun kanye talima noutamak talye-talye tenenyak nang deice arye, malye-malye winilamak touk, anggun Efesus mutuku nang arye, sik talye nang wininyak atonun tuba kum wininamlume.

Ulangan 8:19

Musa birye, Israel ninye ati nyabuk. “Ura kekepnululume. Anggunce, anggun ni Allah el si Yahweh ati, talye kanye bobuka, luba kina meme. El ti pia dib kum tenepmunyopura, anggunce tuba tamubuka yuk talye ning ati, ‘Nun ni koproba,’ nyabuka, aning si erepmunce, aning dam gutam tuku dipdongopmunce, el siuk erebuka kipmunyopura, ikin weik upnamsile. Ara, anggunce, talye ning si tamubuka erepmunyopura, Allah arye anggunti, weik arye wenebuka oplopsiliba, dipmunce, anggun nong kum danamsile.

1 Tesalonika 4:6

Ninye talye yoldalamak ning ap, aning-aning nirya pia pataplibuk, ‘Talya parapkabuka winipnun’ tenena ap ati ara, anggunce yuk nang nirya ati, talye minina yupu nyana ap, malye kilina ap, kum wininamlulume. Nunce anggunti akunum peterepsupu. “Yata ninye do nirya, anyapmasin malye ning ap, aning atonun ning ap, akunum winipmacopura, aminyan ara, Allah weik arye wenebuka opnamle,” nyabuka wenelamsupu.