Mika 7:7 - Eipomek

⁷ Sik malye-malye wininyak ninye nirya ara, wininamak bukni, na nabi Mika binyuk ara, aning kum wininamne. Nun ni koproba Allah Yahweh, el tibuk, dib tenenuna ati, ‘Elcuk melibuka lyelonamnile’ tenen, el tibuk dib tenebuka kintinip deibuka dinamne. Winipnirye, Allahuk pia moronamne. Moropnyopura, kekeplirye, lyelonamnile.

Mika 7:7 交叉參考

Kejadian 49:18

Nyabukopura, Allah morona ati nyabuk. “Se, na ni Allah, ‘an dem aryuk lopdeipnimince, melinamnilam’ tenen, dinauk ukunune,” nyabuk. Nyabukopura, ayupu ton nyabuk.

Mazmur 109:4

Na ning ara, aning ati, bico tenebuka telebuk unun bukni, sikce nati, minin yupu weik arye nyaninyake. Tonda, sik ikin uplye talak ara, narye, ‘Anda Allah arye, anang melipnamlam’ tenen, sikti, Allah moronune.

Mazmur 130:5

Aning atonun, na nong ap, na kanye talima ap nirya ara, anti kintinipnirye, ‘Allah Yahweh, yata talak yanuka melibuka lyepropnamnil do?’ tenen, dinauk unamne. Na ni Allah an yupu ara, pia teleb yupu ulula anya arye, Allah arye “Winipnamsine,” nyabuka, nyalin yupu deice arye nyapsuk ning atibuk, ‘Dan talak arye wiripnamnil do?’ tenen, dinauk unamne. ‘Ayupu moubuka tenepnirye, telebuk unamne’ tenen, an yupu deice na kanye delinune.

Mazmur 25:5

Atonun, Allah ance, “Diksukum winin ning ara, ani,” nyabuka peterepnimince, ‘An minop menekuka baminyopura, nara an aminyan tam moubuka dobolbanamne’ tenen, moropkine na nio. Deiyok ara, ancuk, melibuka lyelonilyama ati, Allah an siuk erekunune. Atalak-atalak nirya ara, beren tam arye dukdongobuka, keting noutam nirya ap, lukunyan talak ap ara, ‘Allah ancuk, lyenamnilam’ tenen, morokunune na nio.

Mazmur 37:7

Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.

Mazmur 38:15

Bukni, wini talak ara, na ni koproba Allah, el si Yahweh, ‘Elcuk lyepnamnila ati, dan talak arye yanuka lyepnamnil do?’ tenen, el tibuk dinauk unune. Na kele. Yuk nang nirya ara, kum melipnitinga ati, na kele. Anda Allah, aning-aning nirya deice tam erebuka, Pia Mikip Weiknye ulyama ati, ancuk yanuka lyepnutume.

Mazmur 50:15

Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

Mazmur 65:2

Nun nirya arye, “Nun ni Allah antibuk, nun deiyoknye pia teleb ulyame,” nyabuka, Sion mutuku noutamak arye, an siuk pia erenamkiyabe. Tonda, nunce anti, “Nun ni koproba Allah, el siuk erebibirye, el yupu kekebuka unamabe. El amu tam ubirye, el piluk donamabe,” nyabuka, nyalin yupu deice arye nyabupu touk, dipkoprob aninguk, talibuka wininamabe.

Mazmur 85:5

Aning ati ara, nun ni Allah, anda nun Lyena Deiyoknye usilyama ati, ‘Ance nunti, ila tamubuka teleb kipdeipsutum’ tenen, moropkine na nio. Tonda, nunce malye weik ulamupu ning ati, na ni an pia yu upkuk ning ara, ‘Dauplye’ tenepmince, namin kipsulumce, kum kipdeipsulum’ tenen, moropkine na nio.

Yesaya 12:2

Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Yesaya 17:7

Sirya tam nang wenepnamne talak ara, atalak unyak nang nirya ara, sik ni koproba Allah, sik nong ati kintilina deiyoknye biti, moubuka tenenamake. Tonda, Israel nang pia melilulnye, malye una kumce, pia Diksukum Ululnye, Pia Teleb Leknye, el tibuk, diba tenebikirye, moubuka bikinamake. Sikce ni koproba Allah ati, ‘Se, melipsilyame,’ nyabuka, moronamake.

Yesaya 25:9

Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!

Yesaya 45:22

“Anggun tukwak mutuku, mutuku-mutuku nirya ululum ninye, anggun malye ululum ning nirya batakuka, na dam anyuk yanganamnulume. Winipmunyopura, narye anggunti lyelonamsine. Winipnamlum nyapmasina ara, urdem ati kume. Deiyok ara, na ununa atonunye bira, yuk Allah ton, kum ulule.

Yesaya 8:17

Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.

Ratapan 3:24

Aning ati ara, na kanye noutam ning ara, utenebuka nyanune, “Allah Yahweh, elda na ni koproba Allah unulula ati, yuk ning ton kum patanulule. ‘Elcuk, pia melinamnilarya,’ tenenuna ati, el deiceuk na kanye talima nirya ara deipnamne,” nyanune.

Daniel 3:17

Nyabikce, ayupu ton nyabik. “Nun kele, nun talibuka si erenyap Allah ara, nun ap unyaba ati, weik uku buk noutamak dongopsiminya babye ara, Allah arye lyepdopnamsile. Ati, na ni ance, ‘Winipnamane,’ tenepsiminyopura, telebe dawinipsilyame,” nyabik.

Hosea 12:6

Allah arye, Yakub biti nyabuk yupu ara, ani. “Nara Allah, na si koproba ara, Yahweh unune. Nara, aning nirya talibuka, deice tam erebuka, Pia Mikip Weiknye unune. Nara, im deice unyak yin talin malaikat nirya ara, sik deiyoknye unune. Na si koproba ara, Allah Yahweh unune.

Yoel 1:19

Ati, na ni Allah Yahweh anti, ‘Ancuk melipsutume’ tenen, moropkine. Ara, maning palamle mutuku nirya ara, akunum sesal lebuka koluprople. Tonda, yo noutamak nirya ara, akunum koluprople. Winipmala ati, uku ina ibikiba, uku buk dilirye, buppu epmalye maning nirya kolubuka, sulsaklamle atonun, akunum winipmasile.

Habakuk 2:1

Nara, ‘Allah arye nati, yata yupu tamubuka nyapnamnil do?’ tenen, dinirye kekepra unamne. Winipmanto ara, ninye kalikna deiyoknye birye, ninye dina ati, kalikna aik, cang aik domica, dup weleplirye, ‘Yuk nang pera mutuku arye yanamak do?’ tenen, dana-dana tam kalikuka dilamle atonun, unamne. Dipkoprop ara, narye Allah ati, ‘Yata deiyok ati, sik Kasdim mutuku ninye wiplumba, amalye nang arye, nun Israel ninye ati, wenepnamsiyak do?’ nyabuka asisinyak ning ara, ‘Allah arye, yata yupu nyapnamnil do?’ tenen, kekenmanirye dinune.

Habakuk 2:3

Lengdar deice arye eiplum ning ara, ‘Dan talak arye winipnamle do?’ tenen, kalikmince dinamlame. Anggunce, ‘Min winina kumce, yata ati sik upmal do?’ tenen, kum unamlyame. Narye, ‘Aminyan doyanamle talak ara, winipnamle,’ nyapkise ning ara, tilila kum nyapmakine. Narye, ‘Atalak winipnamle,’ tenelamse touk, akunum uplyopura, dipkoprob nong lak upnamlarya. Sik kum upnamle ati, moubuka dinmamunce, kalikuka dinamlume.

Bilangan 5:28

Bukni winipmanto ara, akil ap, yuknye ap, ton dipkoprob neika kum epdanuka mamdiceura, malye kum upnamle. El winina deice arye, malye kum kipdayuka ati, sik mek dipnamle deice arye sulongon ning ara, akil el dam kum yanamle. Tonda, el daunamle talak nirya ara, mapu ton pia delinamle.