Mika 5:5 - Eipomek

⁵ Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.

Mika 5:5 交叉參考

Ayub 5:19

Anya arye, tuba-tuba ikin ning nun damuk like nakub barye uplyopura, lyesulule. Atonun, like tekbarye talak usilye ning babye, lyepdopsiliba kam uk unamlume.

Mazmur 72:7

Na ni Allah, ance elti, melipminya deice arye, elce talinamle ninye arye, diksukum teleb winin ninguk, pia ati upra banamake. Tonda, nun mutuku noutamak pil donamap ning nirya ara, ‘Awala-awala nirya mapbabiba, pia telebuk upra balamlya ani, sirya dakna talak babye, tuba telebuk unamsil’ tenen, moropkine.

Amsal 30:18

Weik mambul ning winilye ning ap, tonda dumbarye ap ati, ‘Se, sik wininamak ning ara, yata wiribuka winipting do?’ tenen, deiyok ara pia kum tenepse.

Amsal 30:29

Tonda, tukwak mutuku noutamak ara, dumbarye talye kam ning ton mikip arye yaribuka, sik tenepmace sukumuk banyake.

Amsal 6:16

Allah Yahweh arye, ‘Aning ara pia na like,’ nyapdeiamuk ning ara, deiyok nakub barye ulule. Tonda, deiyok tekbarye ning ton, ‘Aning ara pia na like,’ nyapdeiamuk ning ara, nyapnusine.

Penghotbah 11:2

Anggun talilulum ning noutamak arye bokuka, ninye tekbarye atonun ap, tonda ninye pinbarye atonun ap, bokuka arepnamlume. Wininamluma deiyok ara, ani. Ara, aminyan talak weik ikin upnamsil ning ara, ‘Atalak ara, aikin ning yanamle. Yuk talak ara, aning yanamle’ tenen, kel kum biktuma ati nyapsine. Ara, anggunce, anggun ning koproba bokuka yuk nang ati, melibuka arepmunyopura, aminyan talak anang arye, anggun ikin ning dopropmunye talak, anggun arelamlum nang arye melipnamsiaka ati nyapsine.

Yesaya 14:25

Narye, ‘Winipnamne,’ nyapdeipse ning ara, ani. Asyur mutuku nang bukni, na kanye deipse mutuku, Yudea tam mutuku noutam unyak nang ara, opnirye kum kipdeipnamne. ‘Naʼ tenen mutuku, Yudea tam noutam unyak Asyur nang ara, Yudea mutuku deice opnirye, bataklopnamne. Asyur mutuku nang arye, na mapu koproba, Israel nang ati, obikirye ikin ning weik, sik nong deice delinyak ning nirya ara, kum kipdeipnamne. Tonda, sik Asyur nang opnamne deice arye, sikce ikin ning dobuka, Israel nang deice deibikce, ikin pil dilamik ning ara, aning babye dopropnirye, kum kipdeipnamne.

Yesaya 44:28

Anggunda Babel mutuku ninye deiyoknye Kores biti, ‘Se, elda weik mambulnye,’ tenelulum bukni, elda na amu tamuk ulule. Ati, narye Babel mutuku ninye deiyoknye, el si ara Raja Kores wipdeipsirye nyapse. Winipmanto ara, domba weina deiyoknye ulamle touk, narye nyapniba, Kores birye na mapu Israel ninye talibuka unamle. Aning ara na tenepse touk apiluk donamnile. Narye el kanye talima tamuplyopura, Raja Kores birye, ‘Yerusalem mutuku asik nirya ara, tuba tonap lipsisikuka dopnamlume,’ nyapdeipnamle. Tonda na Allah, na si eren aik ati, ‘Anyaik ayukumna ati keil deibuka domik ning ara, tuba tonap punubuka dopnamlume,’ nyapdeipnamle. Ayupu nyaplyopura, apil donamake.

Yesaya 59:19

Tukwak nang mutuku sirya, im sirya nirya ara, Allah arye sik malye winilamik ning ati, wenebuka opnamle. Akunum winiplyopura, keting kumulban tam unyak nang arye, aning eibuka, kel bikikcopura, Allah Yahweh el mikip weik nyalul si ap, el ap ati ara, ilil weik unamake. Aning atonun, sik keting panalyangan tam unyak nang nirya ara, Allah Yahweh, el pia teleb ulye ning ap, el weik dirina ap ulya ara, eibikirye, ilil weik unamake. Allah Yahweh, el bikbik abuka yanamla ara, winipmanto, weik balamle mek deice, weik kum mikip yalirye, yanuka lontik abliba, mek silong bukuka welelamle touk ubuka, mikip arye bikbik abuka yanamle. Aning nirya ati ara, tukwak nang mutuku sirya im sirya nirya ara, elti, ilil weik unamake.

Yesaya 65:8

Na Allah Yahweh arye nyapsine. “Winipmanto ara, ninye arye anggur tapu duk mouamlya dakikirye, malye ning batakuka, teleb ning wibuka dololamak touk, Israel ninye na wipdeiamse ninye noutamak arye, malye unyak nang ara wibuka bataknamne. Bukni, na si erebikirye, teleb unyak nang ara, lyebuka dopropnamne.

Yesaya 7:14

Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

Yeremia 33:15

Atalak ara, Daud birye deiamukba, dadeipdanin yanganyak nang, sik kan-kan noutam arye, narye tonoknye wipdeipnamne. Ara, pia diksukumuk talibuka wininamlanye wepnirye, ‘Elda ninye deiyoknye, Raja ton unamleʼ tenen, anye wipdeipnamne. Aninye deiyoknye bira, elce pia teleb, diksukum piluk donamle. Tonda, ninye yupu bokolin talak ara, dipkoprob ninguk nyaplirye, yupu bokolinamsile. Amutuku noutam diksukum dem teleb arye winibuka pil donamle.

Amos 1:3

Allah el si Yahweh arye, nyabuk. “Sik Damsyik mutuku ninye arye, tuba-tuba weik malye wininyaka ati, dipkoprob narye, sik amutuku ninye nirya ati, wenebuka opnamne. Anggunti bico tenenuna anya arye, sik malye winin ning, weik winilamik ning ara, minop talak arye, adiparyuk wenebuka kum omse. Bukni, sik Damsyik mutuku ninye aryuk, Gilead mutuku ninye ati, weik yu upliba, weik arye onyake. Winipmanto ara, ninye arye, ‘Gandum duk kwapnamak’ tenen, ikin ning dobuka, gandum duk deice deibikirye, teiklamak touk, sik Damsyik ninye arye, ‘Naʼ tenen, ninye, Geleat mutuku noutam unyak ninye ati, ikin ning weik, sik nong deice delinyake. Ati, na Allah arye Damsyik mutuku unyak ninye nirya ati, wenebuka opnamne. Aning kum bataknamne,” nyabuk.

Amos 1:6

Allah el si Yahweh arye, ayupu ton nyabuk. “Sik Gasa mutuku ninye arye, tup-tupa weik arye malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiamsirye adiparyuk wenebuka kum omse bukni, wini talak ara, sik malye winin ning weik, wininyaka ati, aninye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Gasa ninye ara, ‘Naʼ tenen, ninye, sirya obikce, tapu koubuka boyanamikce, bobuka yuk ninye dam, uang yo bok deklamik. Abobinamik nang ara, sik Edom mutuku nang ati, ‘Anang obuka, sirya dakupurye boyapu nang ara, deksululume,’ nyabikba, Edom mutuku ninye arye, ‘Naʼ tenen, ninye ati, deklamik. Akunum Edom mutuku nang arye dekikopura, sik pil dona ati bobuka, sik mutuku bobinamika ati, sik Pilistin yala ninye nirya wenebuka opnamne.

Zakaria 10:11

Weik mekwen deiamlirye, bisik sekdongamliba ninye eibikirye, ‘Se, yata wiriptibye do?’ tenen, imun kanye bobuka engenamake. Winipnamak bukni, narye melibuka lyepsinirye, weik laut mekwen noutam kumanya dopneba, mek deibuka lontik-lontik abuka, weik arye panalamle ning ara, tunim alamle touk upnamle. Winipnamle talak ara, aninye imun kanye bobuka unamak bukni, aminyan talak narye melibuka lyepniba, kanye deibikirye, sik mutuku koproba tamubuka yanganamake. Tonda, minop talak, weik mek el si Nil mek pum uamukak, narye melipsiba, amek cebuka mikukura, koubuka yanamik touk, aminyan talak babye, narye melipniba, Nil mek pum wamlye cepropliba, amek koubuka, sik mutuku koproba tamubuka yanganamake. Adeice arye, Asyur mutuku nang kanye talima erenyakce, erepdanuka kwalilanyak nang ara, narye sik talima mitang kibuka deipniba, na amu tam unamake. Tonda, Mesir mutuku nang arye, ‘Nunda mikip weik nang unyabe’ tenen, pia weik mutuku talilamik ning ara, na mikip arye aning nirya kum kipdeipnamne. Winipniba, Mesir mutuku ninye deiyok nang arye, talilamik mutuku ara, tonap pia kum talinamake. Talyauk unamake.

Zakaria 10:3

Ayupu talye nyaltakansinyaka ati, Allah Yahweh arye nyabuk. Na wipdeiamse ninye, anggun talipsika deiyok nang, anggun deiyok nang ati yu unulule. Ati, sik anang ara, wenebuka opnamne. Bukni, Yehuda yala ninye diamuk, ‘Naʼ tenen, ninye unyaka ati, na Allah Yahweh arye, aninye nirya ati, pia melinamne. Nara Allah Yahweh, aning-aning nirya, talibuka deice tam Weik Erenanye unirye, im deice yin talin malaikat nirya talinune. Sik weik deiyoknye unune. Ati, sik Yehuda yala ninye nirya ati kalikuka melinamne. Adeice arye, sikda kuda basam balye deice bukuka, ninye olbana ati kintinibuka delilamak touk, narye anggun Yehuda yala ninye ati, mikip weik arepsinirye, teleb kipdeipnamsine.

Zakaria 12:6

Yuk mutuku yu nang arye, ‘Yerusalem mutuku yanuka olbinuyap,’ tenepnamak talak ara, sik Yehuda noutam unyak yala nang nirya ara, mikip weik arepnamne. Ara, winipmanto ning ara, uku sekna ati, asing tilibikceura, ‘Uku seknamakʼ tenen, yo bobuka, uku sekikceba, uku minopce dilamle atonun, sik Yehuda tam nang babye, sik dam winibuka deipnamne. Winipmanto ning ton, ninye arye upna ubikirye, gandum kouamikca eipnukca ati, uku minopce balamak touk, Yudea tam nang ati, winipdeipnamne. Winipnamne talak ara, sik Yudea tam nang nirya arye, sik dana-dana mutuku sirya, im sirya nirya daunyak nang ara, ‘Opnamabʼ tenen, yakceura, Yudea tam nang arye anang nirya obuka, kum kipdeipnamake. Ara, sirik tam bisik yanamak nang babye, kwanim tam bisik yanamak nang babye, sik nirya obuka, sirya daknamake. Bukni, sik Yerusalem mutuku arye weik asik domika nirya, yu nang arye obikceba, asik oldem upnamle bukni, atalak ara, sik Yehuda yala nang ara, tamubuka tonap, amutuku noutamuk unamake. Asukumuk sikda namin arye dakeiam asa, teleb deice aryuk unamake.

Zakaria 9:10

Allah arye nyabuk, “Epraim yala yin talin nang arye, ninye olanmace talak bukikirye, balamle kuda basam arye, libuka tuku deice balamak ning, mal olalbalamak kereta ap, kuda basam ap nirya ara, na Allah arye kum kipdeipnamne. Tonda, Yerusalem mutuku nang balye deice bukuka, banyak kuda basam nirya babye, kum kipdeipnamne. Tonda, ninye olana ati, bolamak yin nirya ara, yuk ninye on ning, ayala-ayala nirya ap, cebuka atu atonun kiplopnirye, kum kipdeipnamne. Aning ara talye ati kum nyapsine. Ara, Israel ninye anggun ninye deiyoknye, na Allah arye, anggun nirya ati, talye kanye bobuka, teleb unamlum talak arepnamsina ati, nyapsine. Ara, ‘Anggun ap, mutuku-mutuku nirya daunyak ninye ap, tonok kanye bobuka, dukdongobuka unamlum’ tenen, ayupu nyanamsine. Otam deibuk laut mekwen ap, atam deibuk laut mekwen ap, anoutam dipdongobuka unyak ninye nirya ara, na Allah aryuk talinamne. Tonda, Efrat mek dam arye dipdongobuka, mutuku sirya, dana-dana nirya, naryuk talinamne.”

Zakaria 9:13

Na Allah arye, anggun Yehuda yala ninye nirya ati, na ninye on yin atonun kipdeipnamsine. Anggun Israel ninye ara, na ninye on mal atonun kipdeipnamsine. Tonda, anggun Sion mutuku ululum ninye ara, na ninye on parang ya atonun kipdeipnamsine. Winipsinyopura, anggun nirya arye, sik Yahudi yala kum ninye, Yunani yala ninye unyak mutuku olbinamlulume. Minop talak obuka, sirya daksik ninye ara, anggunce obuka malye kipnamlulume. Na Allah arye, Israel yala ninye ap, Yehuda yala ninye ap nirya ati, nyapsine,” Allah arye nyabuk.

Lukas 2:14

“Allah weiknye im deice ululnye bira, pia telebe. Yata ninye do nirya, Allah arye kanye deilinamle ninye nirya ara, teleb updeiplibuk, mambul kanye bona kum arye, kanam kanye bobuka telebuk unamake,” nyabik.

Yohanes 14:27

Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Wahyu 17:14

“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.

Wahyu 19:14

Anye bira, kurun kuda deice bukmokce menekuka banmokba, Allah el im deice tam yin talin malaikat nirya arye, el aminyan tam yanganmekak eipse. Ayin talin malaikat babye kurun kuda balye deice bukuka, el aminyan tam yanganmekak, eipse. Sik baju ara, pia teleb namin baju, kurun baju ongopmekak, eipse.