Mika 5:2 - Eipomek2 Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake. 參見章節 |
Mika 5:2
57 交叉參考
Minop talak Mesopotamia (atau Padan-Aram) mutuku batakuka Kanaan mutuku tam tamubuka yanganmapu talak ara, bisik noutam tuba banmapu talak ara, na kil Rahel dibukba, na ikin kanye bobuka engepse. Rahel dibukak ara, Kanaan mutuku tam noutam bukni, mutuku si Eperat mutuku dam dibuk. Dibukba, asukumuk el nong dobuka tuku lukse. Ara, Eperat mutuku bisik kup-kup na kil Rahel tuku lukse.” (Amutuku tonok bukni, si bitinye nyalamik ara, Betlehem mutuku ton nyalamik.)
Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.
Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.
Winibuka ati, Israel ninye sik kan-kan noutam, Musa birye, ‘Anang ara, yupu lipsisikna deiyok nang ubikirye, Israel ninye sik deiyok-deiyok nang unamakʼ tenen, dipsukum ubuka, teleb ulamik nanguk dipdeyukce, wibuka erepdeibuk. Israel ninye, sik yupa ara, seribu (1.000) nang bokdeibukce, sik yupu lipsisikna deiyoknye ton wipdeibuk. Atonun ton, Israel ninye ton, seratus (100) nang bokdeibukce, sik deiyoknye ton wipdeibuk. Atonun ton, lima puluh (50) nang ati, sik deiyoknye ton wipdeibuk. Tonda 10 nang ati, sik deiyoknye ton wipdeibuk.
Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.
Narye, ‘Dipkoprop Daud bira, Israel ninye, anggun ninye deiyoknye Raja unamle’ tenen, wipdeiamse. Tonda ‘Yin talin nang, sik weik deiyoknye unamle’ tenen, wipdeiamse. Ara, talye ati kume, Daud erepdeipsiba, aning nirya winilamuk ning deiyok ara ani. Ara, Daud erepdeipsiba, el winilamuk ning ara, ‘Ninye nirya eibikirye, na si ap, na mikip ap, moubuka kel biknamniak’ tenen, winyamse.
Aminyan talak nirya ara, sik amutuku unamak nang, talipnamaka deiyok nang ara, sik mutuku nang kan-kan aryuk, ninye deiyok kibuka talibikirye, unamake. El aninye deiyok kibuka talipnamsilanye bira, na dam talye lukparabuka yanganamle. Narye elti, yukupnyopura, adiparyuk, na dam talye lukparabuka yanganamle. Na siuk erenamnile. Anggun ton tenipdelulume! Ara, narye lo kum areptinyopura, yatanye birye ton, el kanye aryuk tenipturye, mikip dobuka, na dam yatu do? Kume, ara kum winipmanto. Wini talak ara, anggun Israel nang ara, na mapu koproba kipsiniba, unamlume. Tonda, nara anggun ni koproba unamsine.” Ayupu ara, na Allah Yahweh arye, akunum nyapdeipsine.” Allah arye nyabuk.
Aning winipmasila ati ara, nun nirya arye piribibirye, Allah Yahweh ati, dib tenebuka dobolbanamabe. Ara, nun ni koprop Allah ati, ‘Se, dipkoprob anda pia mambul weiknye ulyame,’ nyabuka, el tibuk, si erenamabe. Batakna kumce, Allah ati dib tenebuka dobolbalamipya ani, dipkoprob Allah arye, nun melina ati, asum-asum nirya beren tam talak keting panalyangalamle atonun, Allah arye nunti, yanuka melinamsile. Aning atonun winipmanto ara, weik dou malamlya ani, sirya talak ara, mok weik arye cepliba, tukwak mutuku nirya, teleb ulamle touk ulirye, nunti melipsilirye, teleb ulinamsile. Nabi Hosea birye nyabuk.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Se, anggun Yerusalem mutuku ululum ninye, malye-malye weik winilamluma deice arye, mi bomice kilapu arye, ikin kanye bobuka, ngalukuka ulamak atonun, anggun babye akunum winilulume. Talye ati, engebuka kum ngalukululume. Wini talak ara, anggun umunye mutuku arye batakuka, pata mutuku binuka, tia talak ati, unamlume. Unmamunya ani, Babel mutuku ninye arye anggunti, malye kipsikirye, anggun nirya tapu koubuka, adiparyuk Babel mutuku bobinamsiyake. Bobinuka dadeiamsikiba, daulamunye bukni, aminyan talak ara, na anggun ni koproba, Allah Yahweh arye, apera mutuku dabinuka ulamunye buk, anoutamak narye lyebuka dopropnamsine. Ara, anggun mal olan ninye noutam arye, lobuka bataksinirye, lyepropnamsina ati, nyapsine.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Yesus deiyamuk mutuku ara, Yudea tam noutamak bukni, mutuku si ara, Betlehem mutuku deibuk. Yesus deibuk talak ara, amutuku nirya weik ninye deiyok talibuka ulamuknye, el si ara Raja Herodes ulamuk. Yesus akunum deibukopura, kurya ning min arye kel kibuka balamik nang, keting yangan tam arye, weik mutuku si Yerusalem mutuku dilyayik.
‘Allah arye Betlehem mutuku ati nyabuk. “Yudea tam noutamak aubuk mutuku nirya ara, mitik mambul mutuku bukni, Betlehem mutuku ara, pia weik mambule. Ara, Betlehem mutuku noutamak unyak ninye kan-kan arye, weik ninye deiyok unamlanye deipnamake. Anye bira, domba basam teleb ubuka weilamlanye atonun, Allah el mapu Israel ninye ati, bico tenebuka, ‘Wininmale’ nyabuka, pia talinamle. Aning ati ara, Betlehem mutuku ara, weik mambul mutuku nyapne,” Allah arye nyabuk.’ (Mika 5:2)
Anang nirya ara, ‘Pilatus arye Yesus opnusil’ tenen, minina yupu arye ayupu nyabik. “Yesus ara, el malye ulya deice arye, nun mutuku noutamak unyak ninye nirya eibikirye sik nirya malye wininamake. Elce malye winilisulule. Tonda, nunce Kaisar yo bok arilamap ning ara, ‘Aning kum wininamabe,’ nyabuka yupu sekeldongosulule. Tonda, Allah arye dopreipliba ninye weik lyeplirye, talinamle deiyoknye, ‘Mesias ara, na unune,’ Yesus arye nyalule. Mesias ara, Raja atonye unamle ati, ayupu nyasilya deice arye, ‘Nara, weik ninye deiyoknye, Raja atonunye unune,’ nyasulula anye arye, aning ara, pia malye.” Sik anang arye minina yupu deice arye nyabik.
Allah yupu sekamsika noutamak arye yata nyasulul do? ‘Ninye Lyena Deiyoknye, Kristus yanamle,’ nyanyaknye bira, ‘Daud el yala nang arye deipnamake.’ Tonda, ‘Nun apu Daud, el ulamuk mutuku koprop, Betlehem mutuku arye yanamsile,’ nyalula anya arye, anye Yesus ara, yata wiribuka Kristus uptu do? Aning ara kume,” nyabik.
Ati ara, anggun ap ululum nang noutam arye, ninye deiyok ning talibuka upmanto nang, teleb nang akunum wipdeipmamunye nang ara, narye anggun awipdeipmamunye nanguk dopropnirye wipdeipniba, sikce anggun talipsikiba unamlume. Anggunce akunum wipdeiplum nang ara, kel bikin ning ara, weik tonun kel bikamik nang, tonda min arye pil dolamik nang, tonda moubuka tenebikirye, pia teleb ubuka, pil dolamikce nang kintinipmalum nanguk dopdeipsise. Anang aryuk, sik ninye deiyok talibikirye, anggun Israel ninye deice tam ubikirye, talinamsiyake. Sik anang arye, yupa yuk-yuk bukni, anggun Israel ninye yupa weik aunmalum touk noutam arye, seribu nang ton bokuka, yuk-yuk kibikirye talinamake. Tonda, anggun noutam arye ton deiyok nang arye, anggun kan-kan arye, seratus nang ton bokuka, yuk-yuk bokdeibikirye talinamake. Aning atonun, tonda lima puluh nang ton, bokuka, yuk-yuk bodeibikirye talinamake. Tonda, yuk deiyok nang arye, sepuluh nang ton bokuka, yuk-yuk bokdeibikirye talinamake. Tonda, yuk deiyok nang ton wipdeipniba, anggun yala yuk-yuk aumunya atonun, anggun deiyok talibuka un nang ton wipdeipniba, sikce talipsikiba unamlume.
Allah el Mi Koprop Yesus ara, aning-aning deice tam ulirye, weik mambulnye ulya ara, deiyok ton nyapnusine. Ton ning ara, Allah arye aning-aning nirya, min kum kwepdeiamuk talak ara, Yesus elda, akunum minop arye aulamuk. Tonda, Allah arye nyalyeba, Yesus el pil dobuka el ulya deice arye, aning-aning nirya ara, kum danipnin balule. Yesus el ulula deice arye, aning-aning nirya, teleb ubuka kamuk ulule. Yesus el ulye ning ap, mikip weik ulye ning ap, el nyale yupu ap, adeice arye im deice tam ulye ning ap, tuku tam mutuku ak ulye ning nirya ap, teleb kibuka kamuk ulule. Elce aning nirya kum taliptuopura, aning yala-yala nirya kum datue.
Na Yohanes arye ayupu seksene. Ara aning-aning nirya kum uamuk talak, Allah el Kam una Yupu dobuka yanamuknye, Yesus ulamuk. Im deice ei ulamuka ani, tukwak mutuku yayuk talak ara, aulamukce, yupu nyalamukbuk, kekelamubu ning ap, nun asing arye elilamubu ning ap eibuka, nun taruk arye talilamubu ning ap ara, aning-aning nirya ara, anggunti laka nyabuka peterenyabe. Apeterenyaba ara, Kam Una Deiyoknye, Yesus, elti, nyasinyabe.
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.
Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”
Minop talak ara, ninye deiyok nang, Raja nang arye, Israel tam nirya min kum taleamik talak ara, ‘Malye ning ani, teleb ning ani,’ nyabuka, yupu bokolina deiyok nang arye, amutuku nirya talibuka, yupu bokolilamik. Atalak noutam ara, dina patana weik deiyok koubuk. Ara, Israel ninye ulamikak nirya, din kum danin balamukba, aninye nirya, din patalamuk. Winibuk talak ara, Yehuda tam noutam bukni, ninye asik dobuka ulamik mutuku si, Betlehem mutukunye, el si Elimelek, ulamuk. Tonda, el kil Naomi ap, el mapu bitinye ap, sik mutuku ara, Betlehem ulamik. Amutuku ulamik bukni, din patalamukba, Elimelek ap, el kil ap, el mapu bitinye ap nirya, Betlehem mutuku arye batakuka, Moab mutuku binamikce, ulamik.
Nyabukopura, sik amutuku deiyok talibuka ulamik nang ap, anyasik ban bisik dam poka bublan dam bulamik nang ap arye, nyabik. “Diba, nunce akunum eipkiyabe. ‘Allah el si Yahweh arye, teleb ubuka melinamkil’ tenen, nunce moronamkiyabe. Ara, ance dopmalam kil Rut bira, minop ulamrik kilapu, Rahel ap, Lea ap arye, mapu weik delilamrikba, ‘Israel ninye weik kipnin balamik atonun, wininamkile’ tenen, moronamkiyabe. Tonda, Allah arye melipkiliba, Efrat mutuku tam noutam ara, anda weik bona utoto talinanye unalame. Tonda, Betlehem mutuku noutam unyak ninye nirya arye, ‘An si kel bikikirye, elda weik mambulnye, tenenamkiyak’ tenen, moronamkiyabe,” nyabik.
Nyabukabukce, ayupu ton dukdongobuka nyabuk. “Allah arye, weik meliamsuk bukni, wini talak ara, anggun Israel nang arye, ‘Nun ninye deiyoknye, Raja ton wipdeipsutuba, nun talipsutue’ tenen, moroplume. Anggun ni Allah arye, anggun kanye imun ning ap, ikin ning ap ulalum noutamak arye, lyepropsuk bukni, ‘Deiyoknye Raja arepsutume,’ nyabuka moropmaluma deice arye, anggun ni Allah, si akunum yanipmalume. Aning moropmaluma ati, anggun ap, anggun mapu ap nirya, anggun yala si ap, anggun bona ap aumunye touk, yuk-yuk kibuka, Allah Yahweh el dam yayululume,” Samuel birye nyabuk.
Efrata yalanye, el si ara Isai, elce deiamuk mi ara, Daud ulamuk. Isai bira, Yehuda noutam bukni, mutuku si ara, Betlehem mutuku noutam ulamuk. Isai elce deiamuk mapu ara, pinbarye (8) mapu deiamuk. Atalak ara, ninye deiyoknye, Raja Saul akunum tikamukce, yupu nyalamuk talak, Isai bira, el akunum pia wisi danamuk.
Aning atonun, kambing basam moum yung arye, memebik din, el si keju, takubarye ara, (10) bobinuka, yin talen nang, sik yupa weik seribu (1.000), sik yupu nyana deiyoknye, el dam bobinuka arepnulyame. Winipminyopura, an du yapu ati, ‘Sikda yata wiribuka unyak do?’ tenen, sik deiyoknye asipdenulyame. Asipdeminyeba, tonda, sik ap epdamunyopura, sik wininyak ning nirya bikminyopura, na dam tamubuka, lak nyalyanunilyame. Nyapniminyopura, narye, ‘Wini talak ara, akunuma, el du yapu dam binuka, eipmal ning ara, teleb aryuk unyakba, eipmalce, yanuka lak nyapnile,’ tenepnamne.
Ati ara, Daud el duknubuka, ulul keil deia nirya ara, anggunce moubuka dipdemunce, bikmunyopura, anggun adiparyuk tamubuka, na dam nyalyanamnulume. Yanuka, nyapnumunyopura, anggun melipsiniba, na ap neika binamabe. Winipmanto, Daud el Yehuda mutuku noutam, tuba unmalyopura, amutuku ninye pia weik ulamtinga babye, amutuku noutam ara, Daud el ululak moubuka, elbinamne.” Saul birye nyabuk.
Nyabukce, ayupu ton nyabuk. “Anggun mapu ton nang ara, sik deiyoknye, el yin talin nang deiyok nang kibikirye, yuk talye yin nang, yupa seribu (1.000) nang talipnamake. Ton nang ara, yupa lima puluh nang (50) talipnamake. Anggun mapu ton nang ara, anggun deiyok kibuka talipnamsilanye, Raja arye, pil pia aruklamliba, el wa winamake. Ton nang ara, el din ning min yuma libikce ning ara, aminyan talak, el din ning ati delilbinamake. Ton nang ara, el ninye ona ati mal ap, yin ap, topnong ap, parang ya ap, memen nang upnamake. Ton nang ara, el kuda libuka, tuku deice balamle kereta ati, memen nang ap upnamake. Sik ninye deiyoknye, Raja arye el amu tam bikikirye, ikin ning, sik nong deice deipnamle ati nyapsine.”
廣告