Mika 2:4 - Eipomek

⁴ Anggun erepdanuka kwalina deice arye winilamunyeura, narye ikin weik ning, anggun nong deice deipsiniba, dopropmunyopura, yuk ninye arye nyanamsiyake. “Kume, sikda teleb kibuka ulamikce, erepdanuka kwalilan nang bukni, wini talak ara, ikin ning dopropmake,” nyabuka, yep-yep nyapsikirye, malya kibuka, akutunamsiyake. Ton ning ara, sik akutunamsiak ninye arye, anggun malye winilulum nang ati, amot senamsiyake. “Sik malye weik winilamik ninye ara, Allah Yahweh, el mikip weik deice arye, sik ulamik mutuku nirya doprobuke. Aning atonun, sikce talibuka winilamik ning nirya ara, dalubuka doprobuke. Sik ulamik mutuku ap, sik talibuka winilamik ning ap, dalubuka doprobukce, sikti, ikin pil dibik nang ati, sik deice arebukba, wini talak ara, sik malye nang talilamik ning nirya ara, yuk ninye arye talinyake. Allah arye winibuka deice arye, sik malye weik winilamik ninye ara, ikin weik ning, sik nong deice delilule.” Nyabuka nyabikirye, sik bona kum ninye arye, sik bona utotoa talin nang ati, mot weibuka sepsikirye, akutunamsiyake.

Mika 2:4 交叉參考

2 Samuel 1:17

Daud engena asa deice arye, Saul ap, Yonatan ap ati, tenibukce, mot senmok.

2 Tawarikh 35:25

Nabi Yeremia birye, Yosia dipmok ning ati, ‘Anye telebe anya arye, si erebuka kipnuyapʼ tenen, mot tonok libuka nyanmok. Anyanmok mot ara, wini talak babye, Israel mutuku nang ara, Yosia el teneni talak ara, tuba amot nyanyake. Ara, mot teleb ubuka nyanyak nang ap, kilapu ap, sikce deiyok koubikiba, nyanyake. Amot nyanyak ning ara, mot buku sekenyak deice akunum sekik. Abuku si ati ara, ‘Ratapan Buku,’ nyanyake. Abuku noutam arye sekdeibuka anya arye, asukum arye nyanyake.

Ayub 27:1

Ayub birye tonap, dukdongobuka nyabuk yupu ara ani. “Kam una deiyoknye Allah bira, dipkoprob pia kam tuba ulule. Aning atonun, nara dipkoprob tilila yupu pia kum nyanamne. Bukni, Allah el si deice arye nyapne. Allah ara, weik erebuka, aning-aning nirya talilirye, pia mikip weik deiyoknye ulul bukni, na kanye ara, Allah elce na deice ara, dipkoprob teleb un ning ton, kum arenulula ati, na kanye talima noutam ara, uk dinilyeba, ikin weik unulule.

Yesaya 14:4

Atalak ara, Allah arye anggun Israel nang lyepropsilyeura, anggun Israel nang arye, Raja Babel biti nyabuka nalipnalume. “Babel mutuku taleamuk malinye bira, akunum sakmale! Raja birye nunti, yu ubukba, kwalibuka erepdayukce, nun deice ikin ning delilamsuk bukni, aning nirya ara, aminyan talak ton, pia kum upnamle. Elce tonap, ikin kum deipnamsile.

Yesaya 24:3

Allah elcuk mutuku sirya, im sirya nirya, tuku urasin ara tamupdeiplirye, malye kipdeipnamle. Tonda, talibuka nyiklopnamle. Allah Yahweh elce, ‘Aning ara akunum winipnamne,’ nyabuka laka nyapdeiamuka ati, aning nirya ara dipkoprob Winipnamle.

Yesaya 6:11

Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.

Yeremia 14:18

Weik ikin ning, sik nong deice yanamle ning ara, urdem ati kume. Deiyok ara, na Allah ati, si erebuka kininyak aik pum tam, pil dona deiyok nang, imam nang ap, narye yupu nyaipneba, na yupu laka nyana deiyok nang, nabi-nabi nang ap arye, pil teleb ubuka kum donyake. Narye, ‘Aning wininamlulume. Aning ara, kum wininamlume,’ nyapdeiamse atonun kum bukni, sik nirya pil donyaka ara, ‘Deiyok asukum’ tenen, kel bikna kum diparyuk, talye donyake. Wininyaka ati ara, narye lo arepneba, yu nang arye, Israel ninye ati yanuka obikiba, dipnamak ninye weik upnamake. Tonda, bai tam bindobice nang babye, parang ya arye, oplopnamake. Winibice nang, sik nong eipnamne. Aning atouk, sik weik asik dopra, ulamik mutuku noutamak babye, binuka eipnyopura, weik kanye imun din patana ap, uk dina ap deice arye, dipmakce ninye, sik nong dana-dana nirya, batakmace nang ara, eipnamne.” Allah arye nyabuk.

Yeremia 4:13

Dipdebuka, sik mal olan nang yangana ara, dua arye mutuku nirya lipdongobuka yangalamle atonun ubuka yanamake. Tonda, ninye olyangana ati, balye deice bukuka balamak ning, sik mal olan nang kereta-kereta kuda ara, kumanya mikip arye pu abuka yangalamle touk upnamake. Maka on maka, lakuka yangalula ara, sik arye yangalul bukni, akuda basam nirya ara, minop bikbik abuka yanganyake. Winibuka yakirye, se, nun nirya yanuka, obuka sirya daknamsiake.

Yeremia 6:12

Nyapnukopura, ayupu dukdongobuka nyabuk. “Na Allah arye, sik amutuku nang unyak asik ap, wa win sukum ap, sik kilapu ap, anirya ara bobinuka, yuk mutuku nang ati arepnamne. Na Allah ara, na mikip weik taruk erepdeipnirye, amutuku Israel nang wenebuka opnamna ati, nyapsine.”

Yeremia 8:10

Sik mutuku noutam uceba, anggunce, ‘Se aning ara, weik kel nang unyake,’ nyalulum nang ati ara, wenepnirye, narye lo arepnyeba, yuk nang arye, sik akunum domik kilapu nirya, narye yuk nang ati arepyeura, anang arye akilapu alubuka dopropnamake. Aning atonun, sikce wa tuku wilamice mutuku ara, na Allah arye dobuka, yuk nang ati arepnamnarya! Winibuka wenepnamsina deiyok ara, ani. Ara, anggun amutuku noutam ululum nang nirya ara, weik bona talin nang babye, amu tamuk mitikto unyak nang babye, ‘Se, aning-aning nirya, nun ton weika arye doproptibye,’ tenen, pia patasilyeba, enauk ululume. Tonda, anggunce, tenebuka aryuk nyabibyeba, ‘Yuk nang ning pia weika arye alubuka doprobibyeba, bona talin nang uptibyeʼ tenen, tilila yupu nyalulume. Ara talye daunyak nanguk kum bukni, anggun mutuku noutam, Allah si eren aik pum tam pil donyak nang, sik imam-imam nang babye, na yupu ap, aminyan upnamle ning ap ati, laka nyana deiyok nang, sik nabi-nabi nang babye, tilila yupu deice aryuk, nyabikirye, enyake.

Yeremia 9:10

Allah arye, na Yeremia biti, ayupu laka nyapdeipnukba, narye nyapsine. “Na yupu kekenululum nang nirya ara, engenauk umunce, ngalukunamlume. Ara, anggun umunyak weik bukuk mutuku nirya ap, bai mutuku ap, luh mutuku noutam palamle maning ap, mutmuta ap nirya ati tenepmunce, engenamlume. Ara, Allah arye anggun wenena ati, amutuku nirya malye kipdeipnamle. Winiplyopura, yata mutuku nang do nirya, sikce amutuku-amutuku noutam ton, kum banamake. Tonda, amutuku noutam nirya ara, ninye arye weilamak ning, sapi basam yupu ton nyanmaliba, kum kekenamake. Tonda, amutuku noutam nirya ara, maka yala-yala nirya babye, bai tam ulamle kam ning yala-yala nirya babye, bai sakuka pia yukak bidobikiba, kum upnamle. Ati anggun nirya arye, anggun mutuku ati tenipmunce, engenamlume,” nyapsine.

Yeremia 9:16

Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk.

Yehezkiel 16:44

Allah Yahweh arye, winipmanto yupu deice arye, nyabuk. Se anggun Yerusalem ululum nang nirya ati, winipmanto yupu deice arye nyapnusina ati, kekepnululume! Winipmanto yupu nyanyak nang arye, anggunti ayupu ton nyasinyake. Ara, “El nin ulamuk touk, el kilmu babye atonun ulule,” nyanyake. Winipmanto ara, nyanyak nang arye, anggun Yerusalem mutuku ululum nang ati, ayupu bobuka, anggunti nyanamsiake.

Yehezkiel 2:10

Ara, abuku atonun ning, kitipmok ning ara, na dam akunum deibukopura, narye dipdesibuk dana tam, dana tam nirya, alip tam ap, amu tam ap, nirya sekamik ning diamuk uamuk. Asekna ning deice sekamuk yupu ara, bouku sukubuka weik engenyak yupu ap, ikin upnamle yupu ap, mambul kanye bobuka nyalamak yupu ap, imun kanye bobuka engelamak yupu ap, sekdeiamuk ning upmokak eipse.

Yoel 1:13

Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.

Yoel 1:8

Ati, anggun Israel ninye nirya arye, ‘Se,’ tenebuka engenamlulume. Winipmanto ara, wel kil tonok, el dopnamne tenelamlinye dipliba, ‘Se, yata ati do?’ tenen, malye kanye boplirye engelamle touk, unamalume.

Amos 5:1

Allah arye nyabukba, Amos birye kekebuka sekuk yupu ara, ani. Allah arye nyabuk. Narye engena deice arye nyapnamasin ning ara, anggun Israel ninye ikin ning dopropmunce, imun kanye bopnamlum ning ati, laka nyapnusine. Ayupu ara, pia moubuka kekepnululume.

Amos 5:17

Tonda, anggur tapu duk wa win dam unmakce ninye nirya arye, sik ton engenamake. Ara, urdem ati kum engenamake. Deiyok ara, na Yahweh yanirye, anggun nirya wenebuka opnamsina ati, engenauk unamake. Ayupu ara, na Allah Yahweh arye, akunum nyapsine.

Mika 1:15

Se, anggun Maresa mutuku ululum ninyeo. Nun ni Allah Yahweh arye dopdopsilirye, anggun mal olan nang deice deipnamsile. Winipsiliba, amutuku nang arye, anggun Maresa mutuku ululum ninye ati, obuka sirya daksikirye, anggun aik ap, anggun mutuku nirya ap ara, alapdopnamsiyake. Winipsikcopura, Israel yala ninye, sik mikip weik deice arye talibuka, unyak ninye deiyok nang nirya ara, dopsikirye, tapu koubuka, Adulam mutuku dam bobinamsiyake.

Mika 1:8

Nabi Mika birye, ayupu nirya kekebukce, ayupu nyabuk. Se, Allah arye, Yehuda yala ninye ap, Israel yala ninye ap ati, weik tonun wenepnamla ati, na nabi Mika bira, weik kanye imun upmanile. Ara, se tenen, na kanye talima uk dinilya ati, na nong ara, baju ongona kum, talye bananguk banamne. Tonda, na yan ongon ning sandal babye, kwiribuka, urdem yan bananguk, yanibuka banamne. Engena ap, alye dakna ap deice arye, pia malye kanye bobuka banamne talak ara, nara bai kam ninye eiplirye, lukulalamla atonun unamne. Weik yupu arye, malye nyabuka ngalukunamne. Winipmanto ara, bip maka wena tapu youpliba, yupu weik arye ngaluklamle touk, engebuka malye nyanamne.

Mika 2:10

Amalye-malye weik winilulum ning nirya ara, malye winiluluma ati, wini talak ara, anggun ululum mutuku noutam nirya ara, batakuka bindopnamlulume. Ara, anggun malye winimunye ning dekna ati, anggun wini ulamlum mutuku nirya ara, akunum dopropsine. Amutuku noutam kanye deibuka ulamlum bukni, wini talak ara, amutuku ati, ‘Nun mutuku koproba ara, asukum’ tenen, kum nyanamlume. Ara, urdem ati, kum nyapsine. Anggun pia malye winimunya deice arye, amutuku noutamak nirya ara, malye ning weik, delilulume. Ara, na yupu yanilamluma deice arye, anggun ululum mutuku nirya ara, anggunce akunum malye kililamlume. Ati, anggunda amutuku noutam ara, pia kum unamlume. Amutuku ati, ‘Nun mutuku koproba asukum,’ nyabuka, tuba kum nyanamlume. Na Allah arye, amutuku dalubuka dopropnamsina ati, nyapsine. Winipnamsen talak ara, imun kanye bobuka unamlume.

Habakuk 2:6

Allah arye nyabuk. “Sik pia malye wininyak ninye nirya babye, Kasdim mutuku nang babye, yuk ninye arye, anang nirya ati, aminyan talak ara, ngilik-ngilik abuka, nalina yupu nyanamake.” Anggun malye weik winilulum nang ara, anggun babye, ikin ning delildalamlume. Aminyan talak ara, Allah wenepsilirye, obuka sirya daknamsile. Anggunce, yuk mutuku ninye, sirya obuka daklumce, sik ning dalubuka dololamlume. Tonda, winilamlumce, tilila yupu nyaplobuka, yuk ninye ning ubula dololamluma deice arye, bona weik dobuka, anggun mutuku tamubuka delilbalulume. Winibuka bona weik talilulum bukni, aminyan talak ara, anggun babye, imun kanye bobuka unamlume. Anggun malye-malye weik winilamlum ning ati, Allah arye wenepnamsilca.

Zefanya 1:2

Allah Yahweh arye, nabi Zefanya ati nyabuk. Ara, ani. “Na Allah Yahweh arye, tukwak mutuku ulul ning yala-yala nirya ara, kum kipdeipnamne, nyapsine.

Bilangan 23:18

Asipdeyukura, Allah arye, Bileam el dam nyapmok yupu uk, laka nyapdeibuk. El nyabuk yupu ara, ani. “Telebe narye doryanamle talak, winipnamle ning laka nyapnukine ati, Zipor el mi Balak, anda yamince, yanuka kekepnilyame,” nyabuk.

Bilangan 23:7

Atalak ara, Allah arye, Bileam biti arepmok yupu, dotam upre binamuk yupu ati, nyabuk. Elce nyabuk yupu ara, ani. “Keting yangan tam, Aram mutuku timur tam oulamsebuk, Moab mutuku ninye taleamuknye, ninye deiyoknye, Balak birye nyapnukba yase. Yasopura, Balak birye nati nyapnuk. ‘An yamince, Yakub birye deibukba, dadeipdanin yangalamika ani, wini talak unyak Israel ninye nirya ati, malye ulina yupu nyapminba, sik deice supnamalame,’ nyapnuke.

Bilangan 24:15

Nyabukopura, Bileam birye aminyan talak Balak birye taleamuk ninye winipnamuk ning ati, ayupu nyabuk. “Narye, Beor el mi Bileam birye nyapne. Nara, aning-aning el lina ati, asing arye teleb ubuka elinunye birye nyapnune. Na bidamang asing arye, dotalak winipnamle ning ati eipna arye, kel kina deiyoknye ununa ati ara, aning laka nyananye ununa arye nyapne.

Bilangan 24:3

Allah el Dib Kanye arye, Bileam talima pum tam yanuka wekukopura, el mikip deice Bileam birye doryanamuk talak, sik Israel yala ninye arye winipnamik ning ati, laka nyapdeibuk. Ayupu nyabuk, “Aminyan otam wininamle ning ati nyapnune. Nara, Beor el mi Bileam birye nyapne. Nara, na asing arye aning-aning teleb ubuka elinun ati, teleb ubuka eipna arye, aminyan winipnamle ning laka nyanunye birye nyapnune.

Markus 12:12

Yesus nyabukura, Allah el si erena aik pum bisik pil dona deiyok nang ap, Allah arye, ‘Aning wininamlulume, aning ara, kum winamlulume,’ nyabukba, Musa arye sekamuk yupu, mem yupu peterena deiyok nang ap, aYahudi yala sik deiyok nang ap, sik nirya arye utenebik. ‘E, Yesus arye domon yupu deice anyapmasila ara, nun wenena ati nyapmasile,’ tenebikce yu ubuk. Yu ubukura, ‘Yesus yata wiribuka opnamap do?’ tenen, yupu nyapra balamik. Bukni, atalak ara, Allah el si erelamik aik dam wekmek nang arye, ‘Yesus ara, teleb,’ tenelamikce elti, sik kanye deipmek. Sik kanye deipmek ati ara, sik Yahudi yala deiyok nang arye, ‘Yesus lak akarye obibipyebuk awekmek nang arye opsicak’ tenen, adeiyok nang arye Yesus asukumuk batakuka yukak biyik.

Ulangan 28:29

Winipsilya deice arye, yana keting noutam kipmalya babye, anggun asing arye moubuka elilkatana kumce, asing kun nang kulkakalamak atouk unamlume. Adeice arye, anggun ban bisik ara, bita kum elinamlume. Tonda, anggunce pil donamlum ning nirya ara, nong kum unamsile. Kum kilonamsile. Sik yuk nang arye, anggun ning nirya ton, atalak-atalak nirya, alulonamsiake. Anggun ning alubuka dopropnusice talak ara, yuk nang arye anggunti, kum melinamsiake.