Mazmur 91:1 - Eipomek

¹ Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.

Mazmur 91:1 交叉參考

Mazmur 121:5

Allah Yahweh arye, nun damak ausilirye, melibuka dinamsile. Tonda, nun ni Allah Yahweh aniryuk, nun dobukapsilirye, nun diksukum tamuk kalikinamsile. Ara, winipmanto ara, keting deiplye talak, weik yo tikamlyak, amu tam keting koak bulamaka atonun, Allah Yahweh arye, erebuka deice tam uliba, nunda el amu tam unamabe.

Mazmur 17:8

Na nio, ance nati, pia bicoe tenenilyama ati, ‘An asing koproba arye dimince, kalikinamlam touk, nati melibuka kaliknamnilam’ tenen, moropkine. Atonun, an dam ton deipnimince, kalekuka lyenamnilame na nio. Winipmanto ara, ayam arye, el mapu dobuka, el pol amu tam deiplirye, kalikuka irilamle touk, ‘Ance nati, an dam deipnimince, kalikinamnilam’ tenen, moropkine.

Mazmur 25:13

Petereliba, kel bikikcopura, anang ara, teleb kiplyopura, sik wininamak ning nirya ara, nong kipliba, pia telebuk unamake. Tonda, sikce deibikiba, dadeipdanin banamak mapu nirya ara, Allah arye wibuka areamsuk mutuku noutam nirya, sikce talibuka, asukumuk pia unamake.

Mazmur 27:5

Ara, urdem ati kume. Na kanye imun ning upnile talak nirya ara, ‘Allah arye nati, kalikuka melinamnile’ tenen, unune. Ara, ikin ning nirya, na dam yanamle talak nirya ara, Allah arye melibuka lelipdongopniliba, el amu tam unamne. Allah arye melibuka lelipdongopnilirye, na bobuka, mutuku deice delilbinamnile.

Mazmur 31:20

Bukni, nun ni Allah, anda weik tonun bico tenesilyam ning ara, nukman kumto ulule! Ara, anti, pia diba tenebuka, ‘Allah arye nyasilye yupu moubuka talibibirye, dipkoprob uk wininamabe,’ tenen, anti ilil tenenyak nang ati ara, ance, ‘Sik ti, aminyan talak arepnamne’ tenen, pia teleb ning akunum kintinibuka deilisilyame. Tonda, ikin uplye talak ara, sikce, ‘Kume, Allah damuk bipyeba, elcuk melibuka kalikinamsilʼ tenen, an dam tuba banauk unyak nang ati, pia teleb kipdeipnamsilame. Tonda, anti diba tenekinyak nang ara, ance sikti, lak arye teleb kilinamlam talak ara, yuk-yuk nang nirya eibikirye, biknamake.

Mazmur 32:7

Na ni Allah, anda nati, ‘Ikin ning doplyak’ tenen, melibuka lyenilyame. Ance nati, ‘Kanye imun ning, el deice uplyak’ tenen, na dam umince lyenilyame. Ance na opmanto talak nirya, melibuka lyenilyama ati ara, yuk ninye eibikirye, na dana-dana tam yakirye, antibuk, pia kanye deibikirye, “Se, Allah arye, nun kwit lyelolula ati ara, aning ara pia telebe,” nyabuka, kanye lon mot nyanyake. Anti si erekinyake. (Sela)

Mazmur 36:7

Tonda, weik mutuku lokmanto kum deice arye, pia abulamle touk, ance diksukum winin ninguk winilyam ning ara, min kum winipmanto. Malye winina pia kumce, telebuk winilulum ning ara, pia wininamlume. Winipmanto ara, weik laut mekwen kaurwe kum nukman ulamle touk, ance, ‘Winipnamne, winipnamne,’ tenepmince, winilyam ning nirya ara, ninye arye kum biktibye. Diba, nun ni Allah Yahweh, yata ning do nirya ara, bai tam talye kam ulye ning babye, tukwak nang nirya babye, ancuk melibuka lyelyame.

Mazmur 52:8

Allah arye anti, wenebuka opkilyeura, sik diksukum unyak nang arye eipkikirye, ‘Se’ tenen, mambul kanye bobuka, ilil pia weik unamle. Tonda, anda, malye winina deiyoknye biti, eipkikirye, akutubuka nalinamkiake.

Mazmur 57:1

Raja Daud birye, aMazmur mot yupu ara, sekuk. Ara, Israel nang peterena ati, sekukce, Allah yupu mot nyana deiyoknye biti, arebuk. Amazmur mot yupu, el lelim ara, yuk mot el si ara, ‘Obuka sirya dakana kume,’ akunum nyanyaba atonun kibuka, nyanamabe. Daud birye aMazmur mot yupu sekuk talak ara, ara Raja Saul birye, ‘Daud opnamne’ tenen, eibuka dobolamukba, Daud birye, bikbik abuka weik keil deiya pum tam wekukce, dungnubuka unmok talak arye amot sekuk.

Mazmur 90:1

Allah el pil donanye Musa arye, Allah ati morobukce, mot sebuk. Diba na ni Allah Yahweh, anda nun damak umince, minop arye melilyangalamsuluma ani, pia ati, melipnin banamsilame.

Kidung Agung 2:3

Se, na dopnamnilamnye bira! Wel anto nang ton, yupa pia weik daunyak bukni, sik nirya ara, mitik teleb unyake. Bukni, sik kan-kan noutam ara, anda urasin pia telebnye ulyame. Winipmanto ara, bai tam talye tiklamle yo kan-kan noutam ara, pia duk teleb moulamle yo el si ara, Apil yo tikturye, pia teleb ulamle atonun, yuk wel nang ara, mitik teleb unyak bukni, anda pia teleb ulyame. Tonda, winipmanto ara, ayo si Apel yo dam keting koa buktiniba, elce lelipnutuba, keting buppu arye kum dipnutue pia kanye deibuka uptinye. Na dopnamnilamnye bira, aning atonun, an dam unye talak nirya ara, anti pia kanye deibuka unune. Apel yo duk diptiniba, to weik nyapnutuba, kanye deibuka ulamtinye touk, an ap neika unimnye talak ara, pia kanye deibuka unune.

Yesaya 25:4

Aning babye talye ati kume. Deiyok ara, ance sik mikip mitang nang ap, aning-aning kum talikirye, pia bona utoto kum nang ap ara, ancuk sikti, kalikuka melinauk ulyame. Ati, ‘Elcuk melibuka kalikinamsilʼ tenen, an damuk wekelyanganyake. Aning-aning nirya patanauk unyak nang, sik bona utoto kum nang ara, sik kanye imun ning uplyopura, sikce an damuk wekelyakirye, tunim nyabuka talibukba, telebuk unyake. Weik kumanya ap, mok ap, yanganmalya babye, ancuk sik lelildongonanye ulyame. Tonda, keting buppu weik yu ning upmalya babye, ancuk sik lelilongonanye ulyame. Tonda, pia malye yu nang arye olyanamak talak ara, weik kumanya ap, mok ap arye yangalamle touk ubuka, olyanamak talak ara, ancuk sik mikip kum nang ati, kalikisilyame.

Yesaya 32:2

Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.

Yesaya 8:14

“Anggun Yahudi yala ninye nirya ara, anggun telebuk unamluma ati, melibuka kalikinamsinanye, na tonoka. Bukni, nara yan dum duklamle keil atonun ununa ati, winipmanto ara, ninye arye bisik bakce talak ara, keil arye yan dum dukliba, kote saklamak touk, narye wenepnamsin talak ara, anggun Yehuda yala ninye ap, Israel yala ninye ap, atonun winipnamsine. Ara, narye wenen ning weik, anggun deice arepsinyeura, anggunce, ‘Se,’ tenen, kanye imun upsilirye, talima uk dinamsila ati, nyapsine. Aning atonun winipmanto ara, ninye arye, ‘Kapang youpnamle’ tenen, mana wena wemicak, kapang mangkau arye, balibuk youlamle touk, narye wenen ning weik, anggun deice arepsinyeura, anggun Yerusalem mutuku umunye ninye nirya ara, mana wena youpliba, nurulamle touk, winipnamsile. Aning akunum nyapsine.

Ratapan 4:20

Allah Yahweh, elce, ‘Anye bira, ninye deiyok kibuka, ‘Naʼ tenen, nang Israel nang talibuka Raja unamleʼ tenen, wipdeiamuknye bira, nun mal olan nang arye tomobik. Nun Raja ati ara, nunce, ‘Kume, elda erebuka, nun deice tam atonun kiplyeba, nunda el amu tamuk unamabe. Elcuk kalekuka melinamsile. Winipsilyeura, yuk mutuku nang yala-yala nirya, sik noutam ubibya babye, telebuk unamabe,ʼ tenelamupu. Utenelamupu bukni, el babye, nun mal olan nang arye yanuka tomobik. Ara, ninye arye tuku pum tam weik bisik palibikceba, bai tam kam ning mangkau yangalamicak, atuku pum saklyeba tomolamak touk, tomobik.

Yehezkiel 11:16

Wini talak, amutuku unyak nang arye, ayupu nyanyaka ati, an Yeheskiel birye, amutuku nang ati, nyapnulyame. Kume, aning-aning nirya talibuka, Pia Mikip Weik Ulul Deiyoknye, Allah ara, ayupu nyapsile. Dipkoprob ning ara, min talak ara, sik yala nang ap, sik kwitcapu ap, weik tonun, yuk pera mutuku, dawangapdanmanto ulamik. Narye sik wenena ati, anang dobuka bobisirye, pia karin, yuk-yuk mutuku noutam deipseba, daulamik. Winilamik bukni, sikda yuk mutuku nang noutam daulamik talak nirya ara, naryuk sik Israel nang nirya ati, pia melibuka kaliklamse. Sik wenena ati, tiya talak, pera mutuku noutam deipseba, daulamik bukni, wini talak ara, sik dobuka, tuba tamubuka, anggun mutuku koproba, boyangasunune.

Hakim-Hakim 9:15

Nyabik bukni, tace ning arye tamubuka ayo nirya ati nyabuk, “Yo anggunce dipkoprop, ‘Eluk nun deiyoknye Raja tiknamsile,’ tenepnumunyopura, adiparyuk anggun nirya bulubuka na amu tam tikilyanganamlulume. Bukni, anggunce, ‘El kum,’ tenepmunyopura, na tace noutamak arye, uku yalirye dipliba, weik cang yo, si ara aras yo, Libanon mutuku tikilye yo nirya uku dipnamle.” Adomon yupu nirya ara, Yotam birye Sikem mutuku ninye ati nyabuk.