Matius 1:20 - Eipomek

²⁰ Utenyamuk bukni, Yusuf aning ati, kanye talima ikin kanye tuba ubuk talak ara, mapmokak, Allah el im deice pil donye malaikat arye, Yusuf el lengdar mabuka deice arye yanuka laka nyabuk. “Daud el yala nang arye deipkuknye, Yusufo, Maria el mi bobuka ara, ninye arye kuma. Allah El Dib Kanye mikip deice arye mi bobuke. Aning ati ara, ilil una kume. Maria talya mangkau asa dopnalame.

Matius 1:20 交叉參考

Kejadian 31:11

Eipseura, Allah el im deice pil dolulnye, Malaikat arye, ‘Yakubo,’ nyabuka yukupnukura, narye, ‘Aunmane,’ nyapsiba, Allah arye nyapnuke.

Kejadian 46:3

Nyabukura, Allah arye nyabuk. “Nara Allah unune. An ni koproba Isak birye, si erelamuk Allahuk unune. Mesir mutuku koulukuka bana ati, ilil una pia kume. Deiyok ara, oumutuku bimunyeura, narye amutuku noutamuk pia teleb kipdeipnamkine. Narye meliamkiniba, an mapu arye deibikiba, dadeipdanin banamak ninye nirya, pia weik upnin banamake.

1 Raja-Raja 17:13

Nyabuk bukni, Elia birye tamubuka akil ati nyabuk. “Akilo, anda yata ati ilil upmakilba teniltona uk unmalam do? Ilil una ara kume. Ance nyapmanilam touk binuka winipnalam bukni, minop ning ara, narye moropmakin touk an upmakil ning ara mitik anun bukni, anoutam arye dopmince, roti mitik anun dabuka, na dam boyanulyame. Winipminyopura, aminyan ara an ap, an mi ap ati, yuk ning ton dabuka boyanulyame.

1 Raja-Raja 3:5

Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

Mazmur 119:125

Nara, an amu tam unirye, an piluk donanye ununa anya arye, ance, “Wininamlulume. Aning ara, kum wininamlulume. Teleb winina ara, ani,” nyalisilyam yupu nirya ara, kel kipnamne. Ance nyalisimin yupu, nong deiyok noutam ning babye, ‘Pia dipkoprob moubuka kel biktinye’ tenen, patanulul ati, ‘Moubuka kel bikna deiyok ning arepnamnilame’ tenen, moropkine na nio.

Mazmur 143:8

Ati na nio, na patapnil ning ara, ani. Ara, ance nunti, “Weik tonun bico tenepsinirye, pia teleb kilinamsine,” nyapdeiamsulum ning ara, dipkoprob aning nirya, tuba wininamsilame. Ati ara, narye beren tam talak nirya ara, aninguk tuba-tuba tenenune. Ara talye ati kume. Deiyok ara, ani. Ara, narye anti, ‘Allah aryuk, pia melinamnil’ tenen, pia diba tenekunune. Na talima nirya ap, na kanye ap, nong ap, ‘Na ni Allah, ancuk melinamnilam’ tenen, an deiceuk delikunune. Ati ara, ance nati, “Teleb bisik asukumuk binalame. Teleb winin ning ara, ani,” nyabuka, peterepniminba, dipkoprob teleb bisik biktinyopura, abisikuk binamne na nio!

Mazmur 94:19

Na talima noutam ikin unilye talak ara, Allah ance, na talima melipniminba, tonap tamubuka, kanye deibuka unune.

Amsal 12:5

Diksukum unyak ninye arye, ‘Aminyan talak wininamabe,’ tenebuka, winipnin banamak ning ara, teleb winin ninguk tenebikirye, unamake. Bukni, sik malye ninguk talibuka unyak ninye arye yuk nang ati, ‘Wininamlulume, wininamlume,’ nyabuka nyanyak yupu ara, tilila ninguk ulule. Malye winin ninye arye, tenenyak ning nirya ara, tilila ninguk ulula anya arye, aninye arye nyanyak yupu ara, pia kum kekenamlulume.

Yesaya 26:3

Allah ance nyapdeiplum ninguk, ‘Aninguk talibuka unamne,’ teneplirye, talimak deipnirye, moubuka talibuka telebuk uplinye bira, ance anye el talima noutam ara, ilil asa una kumce, teleb kanye deipnirye, tunim nyabuka una deiyok ning areminba, telebuk unyake. Winiminya deiyok ara, sik anang arye, antibuk, teniltona kumce, diba tenekinyaka ati, ance sikti, teleb kililyame.

Yesaya 30:21

Atalak noutam ara, anggun nirya ara, bisik banmamunce, walwalapdamunye talak ara, anggun balye tam arye do, anggun urasin tam arye do, dibuka kekepmunyopura, Allah arye anggunti, “Teleb banumunye bisik ara atia, abisikuk melibuka banamlume,” nyabuka lak nyapnamsile. Ati el yupu nyapliba, kekenamlume.

Yesaya 51:7

“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.

Yesaya 7:13

Nyabukura, nabi Yesaya birye, tamubuka nyabuk. Se, nun apu koproba, Daud birye deibukba, dadeipdanin yangalamlum ninye nirya ara, kekeplulume. Anggunce yuk nang ati, ‘Derepsicak do?’ tenena kumce, winililulum ning ara, mitik malye winilulum bukni, ‘Allah arye derepsilyak do?’ tenena kum diparyuk, elti, winililulum ning ara, pia malye weik anya arye, yata ati winilulum do?

Yesaya 7:2

Atalak ara, yuk nang arye, Daud el yala ninye dam yupu nyalbiyikce, “Kume, sik Aram mutuku ninye ap, Efraim yala ninye ap ansinibuka, ‘Yehuda yala ninye opnamap’ tenen, warikil yanmasiake,” nyabuka, laka nyanmek. Nyabikba, sik deiyoknye Raja Ahaz birye kekenmokce, el ap, el tam ninye nirya ap, ikin kanye bobikce, sik ilil ubuk. Ara, Israel tam ninye arye, sik mutuku warikilyanganmeka ati, Yehuda tam ninye nirya ara, sik deiyoknye Ahaz ap, ilil ubukba, kanye talima nirya sirim talibukce, yo tikamli bukni, kumanya yanuka dopliba, loklamle touk winibuk.

Yeremia 31:22

“Israel nango, anggun yata wiribuka talak tonap, daumunce, ‘Allah el dam tamubuka binamap do, kum do?’ tenen, tuba walwal usulul do? Anggunda, na nyapsise yupu moubuka kum taliplume. Winipmanto ara, tonoknye birye deibuk kilmu, el li koprop ati, tilila yupu nyaplirye, batakuka malye mutuku balamle atouk ululume. Bukni, nara Allah Yahweh arye, tukwak mutuku noutamak ara, winiryuk ning kintinibuka kwepdeipnamne. Ara, tuba tamubuka tonap, lo ton arepnyopura, Israel ninye ayala-yala nirya arye, tuba tonap, na dam tamubuka yakirye, nati kanye deibuka, telebuk unamake. Na talibuka, na siuk erepnamniake.” Allah arye sik Israel ninye ati nyabuk.

Yeremia 33:26

Aning atonun, na mapu koproba, Yakub birye deiamukba, dadeipdanin banamak nang ap, tonda Raja Daud birye deiamukba, dadeipdanin banamak nang ati, ‘Winipnamsine,’ nyapdeiamuk yupu deice nyapdeipsise ning ara, punubuka kum bataknamne. Ayupu babye, pia talipnamne. Ati, Raja Daud birye deiamukba, dadeipdanin banyak nang kan-kan arye, tonoknye Raja wipdeipyopura, na mapu koproba, pia talipnamle. Ara, sik apu yapu mambul weik nang, Abraham ap, Isak ap, tonda Yakub ap, sikce deiamikba, dadeipdanin, banyak nang nirya ara, Daud el tamnye birye, pia talipnamle. Deiyok ara, narye na mapu koproba ati, bico tuba tenenune. Sik malye winilamik ning ati, adiparyuk wenebuka optinye bukni, aning kumce, na kanye aryuk, bico tenepnirye, sik malye ning namin kibuka kilipnamnarya. Winipnyopura, na mapu ara, telebuk kipdeipniba, minop talak, pia teleb ulamik touk, tuba tonap, telebuk kipdeipniba, telebuk unamake.

Yeremia 40:9

Mizpa mutuku yayikopura, Gedalya birye, sik ayayik nang ati, nyabuk. “Anggunda, Babel nang ati, ‘Se, sikce talipsiktingba, nunda sik amu tamuk ubirye, sik pil melibuka winina ara, ‘Nun lik,’ tenena kume. Sik Babel mutuku nang malibuka pil dona ati, ilil tenena kume. Anggunda, nun mutuku asukumuk unamlum bukni, anggun nirya ara, Raja Babel, el amu tam pil don nanguk unamlume. Aning umunyeura, anggun nirya ara, teleb unamlume.”

Yoel 2:28

Allah arye Israel ninye ati nyabuk. “Na tenepse talak, akunum dam uplyopura, narye anggun tukwak ninye nong deice, na Dib Kanye arepnamsine. Arepnamne talak, anggunce deipnamlum sal mapu ap, kilmapu ap nirya ara, na yupu nyapniba, kekebikirye, sikce laka nyanamake. Tonda, sik wisi-wisi nang unam noutamak arye, tonok-tonok nang ton, lengdar deice mabikirye, na arenamne ning lak kipniba, eibikirye, ayupu ton laka nyanamake. Tonda, wel nang, sik deice arye dotalak unamle ning, sik dam arepneba, sikce kel kibikirye, laka nyanamake.

Bilangan 12:6

Birik talak ara, Allah el si Yahweh adiparyuk sik bitinye ati nyabuk. Kekenurume! Anggun noutamak nara Yahweh, na yupu laka nyalulnye ton aulyopura, el kel kina ati, kum mapmalye talak ara, el kanye talima noutamak laka nyaniba kekelule. Tonda, lengdar maplya deice arye, na wininye ning laka nyaniba, eibuka kel bikilule. Tonda, kum mamlye talak bukni, mambul yupu nyapnyopura, kekenulule. Tonda, yuk talye nang nirya ara, aning nirya kum eibuka kel biksiting bukni, narye arepneba, na pil donye birye mambul ning dilyalirye, narye elti, na yupu laka nyalinune.

Matius 1:18

Yesus Kristus delin talak winibuk ning ara ani. Yusuf birye, ‘Maria dopnamne’ tenen, moun akunum dolamuk bukni, min kum domukce, neika min kum ulamdikbuk, Maria mi bobuk. Maria mi bobuka ara, Allah El Dib Kanye arye mikip aribuka deice arye, mi bobuk.

Matius 2:12

Arebuka mapmekba, lengdar deice, Allah arye anang ati nyabuk. “Anggun tamubuka ban talak ara, Herodes dam bisik bana kume. Yuk bisik arye anggun mutuku kopropa tamubuka binamlulume,” nyabukba, kekebikce yuk bisik biyik.

Matius 2:13

Sik kurya dipnin yangalamik nang, Yesus delin aik, akunum batakuka biyikopura, lengdar deice arye, Allah el im deice pil donanye malaikat arye, Yusuf ati ayupu nyabuk. “Herodes arye, ami oplyak anya ati, bukmince ami ap, el lin ap bobuka, Mesir mutuku bobilyame. Herodes arye, ‘Ami opnamne’ tenen, pia enamla ati, Mesir mutuku bimince, daulaminya ani, narye yukupkinyopura, tamubuka amutuku yanamlyame,” nyabuk.

Matius 2:19

Yusuf bira, Mesir mutuku noutamak daulamuka ani, Herodes akunum dibukopura, Allah el im deice pil donanye malaikat, lengdar deice Yusuf ati nyalyayuk.

Matius 2:22

Daulamik bukni, aminyan talak Israel tam tamubuka biyuk bukni, “Herodes dibukba, el talyamuk pil pununa ati, winira el mi Arkelaus arye, Yudea tam talibuke,” nyabikba kekebukce, ‘Anye birye opsilyak’ tenen, ilil weik ubukba, ‘Yudea tam kum binune,’ tenebuk. Tonda, Allah lengdar deice arye, “Yesus oplyak ati kanye wisiplyame,” nyabuka ati, Yusuf kekebukce, Yudea tam kum bukni, Galilea tamuk tamubuka biyuk.

Matius 27:19

Pilatus arye, ‘Yesus yupu lipsisikuka bokeipnun’ tenen, ninye yupu lipsisikuka bokolinanye bunak deice bukmokak, el kil arye yupu nyapdeibukura, yuknye birye ayupu nyalyayuk. “Kao, anye Yesus ati ara, ninye yupu bokuka kum wenepnulyame. Na lengdar mapmanu deice arye pia ikin upmanila ati, anye bira el malye ning ton dipkoprop kum ubuka anya arye, bataknauk upnulyame. Tonap elti, yupu talibuka kum bokeipnulyame,” nyabuk.

Matius 28:5

‘Akilapu ara, lukdanuka ilil uplyak’ tenen, aim deicanye malaikat arye akilapu ati nyabuk. “Anggun lukdanuka ilil una kume. Na kele, sik yu nang arye wanwanun yo deice opmeknye Yesus ati enmalume.

Lukas 1:19

Nyabukura, amalaikat arye tamubuka nyabuk. “Nara, talinye kume. Na si ara, Gabriel unune. Nara, Allah damak unirye, Allah elce dopkwetepmanilura, laka teleb yupu nyalyanmakine.

Lukas 2:4

Aninye nirya biyik touk, Yusuf babye, Daud yalanye anya arye, Galilea tam ulamuk mutuku Nasaret batakuka, Yudea noutamak Daud yala deiyok kouna ati, Betlehem mutuku biyuk.

Rasul 5:19

Wenena aik dongobik bukni, alukunyan noutamak arye, Allah el im deice pil donanye malaikat tonok yayukce, awenena aik buplan kukuk ak arye, anang nirya dobuka buru tam bobiyuk.

Wahyu 19:7

Ati ara, nun nirya arye kanye deibuka, pin-pin asa arye elti, ‘Anda pia telebe,’ nyabuka si erenmabe. Deiyok ara, Domba Mi Atonye, el kil dopmanto talak, akunum yanmala anya arye, elce dopnamal kil ato ninye ara, sik kanye talima nirya akunum kintinipmake.

Hakim-Hakim 13:3

Winibuka daulamdika ani, tonok sum ara, Allah el pil donanye malaikat akil dam yayukce nyabuk. “Allah arye nyapmakile. ‘Uku daupra yangaminye talak nirya ara, mi kum bomince, mi kum delilyam bukni, wini talak ara, an mi bominya ani, sal mi deipnalame.’ Allah arye nyapmakile,” nyabuk.