Aning atonun Yerusalem mutuku ulamik nang weik nang ara, tapu koubukabikce, Babel mutuku bobiyuk. Ara, Raja Yoyakim ap, el amu tam weik deiyok nang ap, el yin talin ati deiyok nang ap, talye yin talibuka mikip deibuka oldan nang ap, aning-aning ayala-yala nirya kintinina deiyok nang ap, ikin ning, urasin teleb ning pil dona deiyok nang ap, tomobuka bobiyik. Anang nirya ara, ninye ara yupa weik, sepuluh ribu nang tapu koubukabikce bobiyik. Anang, bona weik talin nang ap, ikin pil dona deiyok nang nirya ap, aik dona kel nang ap, nirya Babel mutuku bobiyik. Batakuka biyik nang ara, mikip kum mitang ninye ap, talye bona utotoa talina kum ninye ap, kum bobiyik. Anang ara, Yerusalem mutuku noutamakuk batakikba daulamik.
Matius 1:12
20 交叉參考
Ura Babel mutuku nang arye, Yehuda tam ninye obuka sirya dakikce, sik ninye deiyoknye el si Yoyakim ap, tuba kam ulamik nang ap dobuka, tapu koubukabikce, Babel mutuku bobiyikce, asukumuk deiamik bukni, atalak arye, dipdongobuka keting tamun 37 akunum ubukopura, Babel ninye deiyoknye birye, Yehuda deiyoknye Yoyakim lopdeibuk. Ara, owala noutam bukni, tanggal 27 deice arye, Raja Yoyakim lopdeibukba, amutuku wenena aik deiamik noutamak arye, anyaik batakuka buru tam biyuk. Atalak ara, Babel mutuku ninye deiyoknye, el si Raja Erwil-Merodakh birye deiyok kibuka, Babel mutuku ninye deiyoknye tikukce amutuku taleamuk. Babel mutuku ninye deiyoknye kiamuk talak arye, bico tenebukce, Yoyakim lopdeibuk.
Ura, Raja Yoyakhin birye, Raja ulamuka ani, atalak noutamak arye, sik Babel tam yin talin nang arye, yana Yoyakhin taleamuk nang nirya malye kibikce, Raja Yoyakhin ap, elce taleamuk nang weik tonun ap, tomobuka bobukce, tapu koubuka, sik pia karin mutuku tamubuka bobiyik. Bukni, Yoyakhin birye deiamuk mapu ara, tekbarye nang ulamik. Anang sik si ara, ani. Sealtiel ap, Malkhiram ap, Pedaya ap, Senyazar ap, Yekamnya ap, Hozama ap, tonda Nedaya ap ulamik.
Ati ara, akunum deiyok koupnuyika ati, Yosadak el mi Yesua bira, Allah el aik pum tam pil melibuka dona deiyoknye ulamuka anya arye, el ap, el kwit capu nang ap, tonda Sealtiel el mi Zerubabel ap, el kwit capu nang nirya ap, sik nirya arye pil deiyok koubik. Sik minopce dobik pil ara, Israel ninye ati bico tenebuka pia meliamuk Allah, el si erena ati, keil yangapdeibik. Aning deiyok ara, ‘Allah ati si erebibyeba, nun malye winin ning namin kipnamsil’ tenen, kam ning obuka, akeil pala kibuka yangeiamik deice, uku sekuka dongonamikak ati kintinibikce, ila tamubuka dobik. Akeil pala kibuka yangapdeibik ning ap, akeil yangeibik deice uku sekuka kam ning obuka dongobik ning ap ara, minop talak Allah el pil dolamuknye Musa birye, “Allah el si erebuka arena ati, keil pala yangeipmunce, el arin ning aning, aning arenamlulume. Tonda, Allah el arena ati, winibuka-winibuka arenamlulume,” nyabuka sekeiamsukce, el buku noutamak deiamuk touk winibik.
Ayupu nyaprikba, ninye si Sealtiel el mi Zerubabel ap, tonda Yosadak el mi Yesua ap arye, anyaik dona ati, deiyok kouna deiyok nang kiprikba, Allah el si eren aik, Yerusalem mutuku noutamak, pil tuba tamubuka dopnin balamik. Tonda, Allah el yupu lak nyana deiyok nang arye ton, melibuka pil dopnin balamik.
Asekeipne ning ara, imam-imam nang ap, sik Lewi yala nang ara, Babel mutuku nang arye bobalamikba, daulamika ani, aminyan talak ara Sealtiel el mi Zerubabel ap, Yesua ap, sik ulamik mutuku koproba tamubuka yayik talak ara, anang ap neika yayik. Sik si ara ani. Seraya ap, Yeremia ap, Esra ap, sik nirya Yerusalem mutuku tamubuka yayik.
Nara Allah Yahweh arye, pia kam ununa ati, na si deice arye, pia dipkoprob nyalin yupu uk nyapdeipsine. Ara, Yehuda yala nang talibuka ulamuknye, Raja Yoyakim, el mi Raja Yoyakhin biti nyapne. Lak kilina ati, na sirik taruk duk deice, cincin dongolamsiba, ninye nirya aning eibikirye, ‘E, anye bira, dipkoprob weik deiyoknye Raja ulule,’ tenenyake. Anda, acincin atonun dongoptumce, na taruk duk deice dongopnutuma babye, aning dobuka donoknamtinye. Deiyok ara, anda Raja weiknye ulyam bukni, wini talak ara, aning ara, an dam arye dopropnirye, donoknamkine.
Ati ara, yuk nang eipsikirye, nyanamsiake. “Se, Raja Yoyakin bira, tuku arye dobuka telebikirye, memenyak ning, mek yun makau ara, apanci el memena deiyoknye birye, ‘Aning ara, malye ati, ‘Na like,’ teneplyopura, ‘Naʼ tenen aik deiamlibuk, atalak arye, adiparyuk amakau dobuka coploplirye, bai tam donokolule. Aning atonun, Raja Yayakhin dobuka donoknamake. Ninye arye elti, ‘Nun ning,’ kum tenenamake. Ati Yoyakhin el ap, el mapu nirya ap ara, yata ati, yuk yu weik nang arye, sik nirya bobinuka, pera mutuku, sik minop talak kum bikamik mutuku noutam donokikiba, dabinuka unamak do?” nyanamsiake.
Tonda, Allah Yahweh arye nyapsile. “Amutuku taleamuka deiyoknye, Raja Yoyakhin bira, ninye arye, sik mapu tonok babye, kum delinyak nang atonun ulamuk. Tonda, anye el kam ulamuk noutam nirya ap, el pil dolamuk ning nirya ap ara, nong ton kum ubuk. Talye dem ulamuk. Deiyok ara, ani. El Raja Yoyakhin bira, elce deiamuk mapu nirya, pia kum danin balamika ani, tonoknye babye, teleb kum winilamik. Sik kan-kan arye, tonoknye babye, sik apu koproba Raja Daud, ninye deiyok kibuka, amutuku taleamuk touk, amutuku ap, amutuku nang ara, Yoyakhin elce deiamuk mapu arye, kum talilamik. Sik nirya ara, Yehuda mutuku talina ati, ninye deiyoknye kibuka, Raja taleamuk mutuku ap, amutuku nang ap, pia kum talilamik. Sikce ton, Raja kum ulamik. Ati, amutuku Raja-Raja nang, sik si sekelin buku deice, seklalum ning ara, ani. Yoyakhin bira, el mapu kumnye biti, el Raja kibuka taleamuk ning ara, nong ton kum uamuk,” nyabuka seknamlume. Allah arye na Yeremia biti, akunum nyapdeipnuke.
Allah Yahweh arye, “Na si eren aik uluplobik ning ara, tuba tamubuka dopnululume,” nyapdeibuk talak ara, Raja Darius birye, ninye deiyoknye kibuka, Persia mutuku ulamik ninye nirya taleamuk talak ara, keting tamun like bitinye kibuk. Aketing tamun deice aryuk, wala ara nakub wala kibuk. Awala deice keting noutam tonok, tanggal 1 kibuk sum ara ani. Asum ara, Allah Yahweh arye, Yehuda mutuku ulamik ninye noutam arye, Gubenur kibuka taleamuknye, el si ara Sealtiel, el mi Zerubabel ap, tonda, Allah el si eren aik noutam talibuka, pil dona deiyok nang, sik imam-imam weik deiyoknye kibuka ulamukce, taleamuknye, el si ara Yosadak, el mi Yosua ap ati, “Sik dam nyalbinulyame,” nyabuka, nabi Hagai dam yanuka nyapdeibuk.
Ara, Allah el yupu laka nyana deiyoknye, nabi Hagai dam yanuka, nyabuk yupu nirya ara, Hagai birye Zerubabel ap, Yosua ap, tonda Israel yala ninye, Babel mutuku wenenak delilbinamika ani, tamubuka yayik ninye nirya ap ati, Allah Yahweh arye, nabi Hagai dam nyabukba, nabi Hagai birye binuka, laka nyabuk yupu, sik nirya arye kekebik. Kekebikce, Allah ati ilil ubukba, ayupu uk, moubuka taleamikce, pia ulamik.
Allah arye, Yehuda tam ninye talina ati, deiyok kibuka taleamuk deiyoknye, Gubenur Zerubabel, el kanye talima noutamak, pil dobukba, adiparyuk, ‘Winipnamne’ tenen, kanye talima erebukce, kil-kil ubukba, pil dolamuk. Atonun tonda, Allah el si eren aik noutam talibuka, pil don nang, sik weik deiyoknye, el si ara Sealtiel, el mi Yosua, el kanye talima noutam pil dobuk. Tonda, Israel yala ninye, Babel mutuku wenenak delilbinamika ani, batakikura, tamubuka yayik ninye babye, sik kanye talima noutamak pil dobuk. Winibuka ati, sik anang nirya tabakuka, tonok kanye bobuka ulamikce, sik ni koproba Allah Yahweh, el si eren aik lipsisikuka dona ati, yanuka bulubuka, pil neika dolamik. Ara, aning-aning nirya, talibuka deice tam ulirye, im deice yin talibuka unyak malaikat nirya, sik weik deiyoknye Allah, aninye nirya arye, ‘Allah el si eren aik, tamubuka dopnuyap’ tenen, bulubuka yayik. Anyaik lilsisikna ati, pil dolamik.
Allah arye, nabi Hagai biti, nyabuk. “Ance ninye si Sealtiel birye deibuknye, el si ara, Zerubabel biti, yupu nyalbinulyame. Anye bira, Gubenur kibuka, Yehuda mutuku unyak ninye taleamuknye Zerubabel ap, tonda Yosadak deibuknye, el si Yosua ap, nyalbinulyame. Yosua bira, na Allah si eren aik pum tam talibuka, pil donyak nang, sik weik deiyoknye, imam Yosua biti nyapkine. Tonda, Babel mutuku arye batakuka, Yerusalem mutuku dam yangalamikce, tuba kam unyak Israel yala ninye nirya ap, wekuka kekenamakcak, ayupu ara, binuka nyapnulyame.” Allah arye, nabi Hagai biti nyapdeibuk.
Winipnamne talak ara, ninye si Sealtiel birye deibuknye, Yehuda mutuku noutam talibuka ululnye, Gubenur Zerubabel an tonok ara, ‘Na mi koprop atonunye unalam’ tenen, ereipnamkine. Na mikip deice arye, an uk erepdeipkiniba, ninye deiyoknye kibuka unalame. Ara, talye ati kume. Narye, ‘Wininamne,’ tenelamse ning nirya ara, narye anti mikip arepkiniba, ‘Apil uk talibuka donalam’ tenen, nyapkine. ‘Wininamle’ tenen, wipdeiamkisirye, akunum akuamkisa ati, Allah ati, apiluk donamlame. Winipmanto ara, ninye deiyok nang arye, taruk duk deice dongonyak ning, el si cincin, aning deice sik si sekikirye, mambul surat sekna ning deice, ataruk dongon ning darapdongobikiba, sik si laka upliba, ninye nirya eibikirye, ‘E, ara dipkoprob nun ninye deiyoknye birye, asekne ning dopdeipsuke’ tenen, kel biklamak touk, winipnamkine. Ara, na Allah arye, mikip an deice arepneba, na tenyamse piluk, teleb ubuka dopminyopura, ninye nirya arye, ‘E, ara Allah arye tenyamuk touk pil dopmale,’ tenen, kel bikinamake. Allah arye ayupu nyapkile.” Allah arye nyapdeibukba, nabi Hagai birye, Gubenur Zerubabel ati, nyabuk. Ayupu ton nyabuk. “Allah arye ayupu nyapkile. ‘Aning nirya ara, na talye ati kum nyapsine. Ara, na Allah Yahweh, aning-aning nirya talibuka, deice tam Weik Erenanye unirye, im deice yin talin malaikat nirya, sik weik deiyoknye birye nyapmakina ati, ayupu nirya ara, dipkoprob nong upnamle.’ Allah arye, na nabi Hagai biti, ayupu laka nyapdeipnukce, ‘Yehuda tam talibuka ululnye, Gubenur Zerubabel biti, laka nyalbinulyame,’ nyapdeipnuka ati ara, ayupu nyapkine.” Nabi Hagai arye, Gubenur Zerubabel biti nyabuk.
Aning ati ara, Abraham arye deibukba, dadeipdanin yangalamika ani, Daud deibuk talak deipdanin yangalamika ani, yupa ara, 14 kibuk. Tonda, Daud arye deibukba, dadeipdanin yangalamika ani, Babel mutuku nang arye, Israel ninye tapu koubuka bobiyik talak ababye, deipdanin yangalamika ani, yupa ara, 14 ton kibuk. Atonun ton, Israel ninye arye, Babel mutuku batakuka, sik mutuku kopropa tamubuka biyik talak ara, anyapce deipdanin yangalamika ani, Yesus Kristus deibuk talak ara, deipdanin yangalamika ani, yupa ara, 14 ton kibuk. Yesus Kristus delina ara, ‘Allah arye wibuka deibuk touk, tukwak ninye nirya lyeplirye, sik kanye talima talinamle’ tenen, deiyamuk.
廣告