Lukas 1:6 - Eipomek

⁶ Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.

Lukas 1:6 交叉參考

Kejadian 17:1

Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.

Kejadian 6:9

Anyaka ara, Nuh el winilamuk ning ati sekeipsine. Nuh bira, pia diksukumuk ulamukce, el ulamuk talak ulamik nang arye, elti, ‘E, el malye ulye ning ara, ani, ani’ tenen, nyapmanto kum ulamik. Tonda, Allah arye, tenyamuk touk, Nuh bira diksukumuk ulamukce, Allah ap kanye dukdongopbuka telebuk ulamuk.

Kejadian 7:1

Nuh birye apil dopra ulamuka ani, aminyan talak ara, Allah el si Yahweh arye, nyabuk. “Winira akunuma. An ap, an mapu silip nirya ap, anggun nirya adopmalum mek lia yo aik wekelbilulume. Wini talak ulamak ninye nirya kum bukni, an tonok ara dipdekisiba, diksukumnye ulyama ati, anyaik weklyame.

1 Raja-Raja 15:5

Allah arye Abiam wipdeiamuka ara, talye ati kume. Ara, Raja Daud el teleb winilamuk deice arye, Allah el kanye pia teleb kipdeiamuka atia. Tonda, Allah Yahweh arye, “Aning ara, wininamlume, aning ara, kum wininamlume,” nyapdeiamuk yupu ara, Raja Daud birye, ayupu moubuka taleamukce, anyapdeiamuk touk winilamuka atia. Bukni, Daud el tonok malye winilamuk ning ara, Het yala nang, el si Uria, el tibuk malye ton uamuk. Ara, Daud birye, Uriah el kil alubuka doprobuka deice arye, pia malye winilamuk.

1 Raja-Raja 9:4

Salomo an babye, an ni koproba Daud birye, duknuna kumce, kanye diksukumuk ulamukce, na nyapne yupu uk kekebuka ulamuka atonun wininamlyame. Tonda, narye, ‘Aning ara wininamlyame, aning ara kum wininamlyame,’ nyapse ning ara, aninguk moubuka talipmince, unamlyame.

2 Raja-Raja 20:3

Raja Hizkia engen dol-dol deice arye nyabukce, Allah ati morobuk, “Na ni Allah Yahweh, ance nati tenepnulume. Na nimalyap arye, kanye amu tam kibuka unirye, antibuk tuba talikunune. Yuk talye ning ati, si pia kum erelamse. Tonda, ance nyapdeipsulum yupu uk, moubuka talipsirye, an piluk akunum donune. Tonda, na ni Allah, yuk ning tenina kumce, an teneminye piluk, pia pi deibuka donune,” nyabuka morobukce, engenmok.

2 Tawarikh 17:4

Isa si pia kum erelamuk bukni, el li koproba Allah el siuk erelamuk touk, Yosafat babye Allah el siuk erelamukce, Allah atibuk, Yata winipnamne do?’ tenen, asilelamukce, morolamuk. Atouk, Allah arye, “Aning ara wininamlume, aning ara pia kum wininamlume,” nyapdeiamuk yupu talebuka ulamuk. Tonda, el tuba kam ulamukce pil dolamuk talak ara, Israel tam mutuku noutam ulamik nang arye, malye-malye weik ulamik ning ton, aning atouk kum ulamuk.

Ayub 1:1

Ninye tonok Us mutuku ulamuknye, el si ara, Ayub nyalamiknye bira, Allah ati, ‘Elda weik mambulnye’ tenen, Allah el siuk erelamukce, Allah nyapdeiamuk ninguk talibuka ulamukce, el tibuk moubuka tenelamukce, malye un ning dam arye batakuka, pia diksukumuk ulamuk.

Ayub 1:8

Nyabukopura, Allah el si Yahweh arye tamubuka Isa Mutuku Dongonye ati nyabuk. “Anda na amu tam pil donanye Ayub bira elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, el Ayub atonun kum unyake. Na pil donanye Ayub pung telebuk ulul atonun ton kum unyake. Elda na siuk erenilirye, malye un ning tonok ning babye pia kum winilule,” Allah arye nyabuk.

Mazmur 119:6

Se, na ni Allah, ance nyapdeiamsulum yupu nirya, moubuka talepnirye, teleb winin ninguk, winipnin banamne. Winibuka unyopura, nara ilil una ap, alye dakna ap ara, pia kum unamne.

Lukas 1:7

Diksukumuk ulamrikura, Elisabet ara, you kil ulamuka ati ara, sik mapu ton kum delilamrik, you uk ulamdika ani, akunum wisi danamrik mapu, kum deipmanto uamrik.

Lukas 16:15

Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule.

Lukas 2:25

Sik Yerusalem mutuku birik talak ara, tonoknye el si ara Simeon, Allah pia talibuka diksukumuk ulamuknye aunmok. Simeon ara, Allah lyepsilirye, nun talima ap, nun Israel tam nirya ap, pia talinamsil talak ara, ‘Wini talak yanamle do, yata talak do?’ tenen, pia kintinibuka dilamuk. Winilamuka anya arye, Allah El Dib Kanye arye Simeon ati, el mikip weik areamukura, ulamuk.

Rasul 2:25

Minop talak Daud arye Yesus ati ayupu nyabuka sekiamuk. ‘Na ni Allah na urasin dam pia dinune. Na sirik tam ulula ati, ‘Elce na melipnamnil’ tenen, na ilil una kum ap, kanye bokoltona kum unamne.

Rasul 23:1

Paulus tikukce, aYahudi yala nang, sik yupu bokolina deiyok nang, weik nang ara, Sandeheren nyalamik nang ati, kanye deibukce, sik urasin damuk pia dinmok. Dinmoka ani, ayupu nyabuk. “Na kayapu, Allah arye dinululbuk, na kam unye talak nirya babye, wini talak ababye, diksukumuk unune. Allah arye, ‘Winipnalyame,’ nyapdeipnuk pil nirya ara, akunum teleb kibuka dolamsirye sirya dakmane. Ati, na kanye noutamak ara, ‘Malye winipse do, kum do?’ tenen, pia kum bokoltonulule,” nyabuk.

Rasul 24:16

Aning dib tenebuka talinuna ati, ‘Na pia kum tenipdanamne’ tenen, tonda, na kanye talima noutamak arye, ‘Malye winin ning ton duknupnamne,’ kum tenenune. Aning nyana kumce, ‘Na kanye talima lamabuka unyopura, pia telebuk unamne’ tenen, Allah ap, yuk nang ap dinikcak arye, na damang pia moubuka kalikdanuka unune.

Rasul 8:21

Allah dinmakilak, winipmalama arye, an kanye malye kipmakil ati ara, nun adonmap pil ara, bokuka arepkenemeba, an ton kum pil doptume.

Roma 8:4

Yesus dibuka deice arye, malye una deiyok ning akunum malye kibuka deiyok ara nyapnusine. Ara, Allah el kanye ara, ‘Tukwak ninye nirya arye pia diksukumuk unamake, tenyamse ning ara, kum winipmanto unyaka anya arye, Yesus pia diksukumuk unmalyani, aminyan talak malye nang arye obikiba, dipnamla deice arye, tukwak ninye sik malye una deiyok ning nirya adiparyuk wenepnirye, kum kibuka deipnamne,’ tenyamuk. Nun malye una ning ati, nun bidamang aryuk kum malye kiptibye. Ati, Yesus pil dopsuka deice arye, malye una deiyok ning kum kilina pil akunum sirya daksuke. Allah arye nun lyena ati, aning nirya pil dopsuka deiyok ara nyapnusine. Ara, Allah arye, ‘Ninye kanye talima pum tam malye una deiyok ning arye talilulba, kum wininamak bukni, na Dib Kanye el mikip deice melilyeba, sikda diksukumuk wininamak,’ tenyamsuke. Utenyamsuka deice arye, Kristus arepsukba, lyepsuke. Ati wini talak nun diba tenenyap nang ara, nun talima pum tam malye un ning aupmasilya babye, aning deice arye kum unyabe. Nunda Allah El Dib Kanye mikip deice arye melisilyeba, telebuk unyabe.

1 Korintus 11:2

Na kayapo, na winilamse ning ap, anggunti peterelamsisiba, kekelamlumce, na peterelamsise touk tuba tenepmunce, aninguk talibuka dobolbaluluma ati, narye, “Telebe, anggun teleb winilulume,” nyapsine.

2 Korintus 1:12

Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.

Ulangan 5:33

Anggunce si erelamlum Allah, el si Yahweh arye anggunti, “Aning wininamlule. Aning ara, pia kum wininamlume,’ nyapdeipmasil yupu nirya ara, aninguk moubuka talipmunyopura, kam unamlume. Tonda, Allah arye anggunti, winiryuk arepmasil mutuku binuka, amutuku nirya malye kibuka, talipmunce, unamlum talak ara, ayupu uk talibuka winimunyopura, anggun keting tamun yupa weik tonun arepsiliba, pia telebuk unamlume.” Musa birye, sik Israel nang ati nyabuk.

Pilipi 2:15

Winibuka wininamluma deiyok ara, nyapnusine. Ara, winipmunyopura, Allah el mapu kipsilyeba, umunce, malye winina pia kum upmunyopura, ‘Yuk nang, malye yupu anggun deice kum deipsitinge’ tenen, nyapsine. Wini talak unyak ninye ara, pia malye ning talibuka, malye ninguk tenebuka, malye-malye unyak bukni, na nyapmasin touk diksukumuk upmunyopura, yuk nang, sik malye wininyak ning ara, anggunak bol kum doupnamsile. Im deice noutamak kurya tiklirye, dirina weik ulamle atonun, anggunce Allah el kam una yupu talibuka, peterena ap, el yupu dobolbana ap, umunye ning ara, wini talak pia malye wininyak ninye kan-kan noutamak, dirina atonun unamlume.

Kolose 1:22

Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.

1 Tesalonika 3:13

Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.

2 Peterus 3:14

Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.

1 Yohanes 2:29

Anggun kele, Yesus ara malye ning tonok babye kum winilule. Pia telebuk ulula ati, el mapu ababye telebuk unyake. Ara, yata nang do, nirya, sik teleb-telebuk unyak ninye ara, sik nong ara kam ulamik bukni, sik kanye tenen ning ap, sik talima ap, dipna atonun ulamukbuk, Yesus lyepsukce kam bukeipsuka ati, wini talak ara, telebuk unyake, nyapne. Ara, nun nirya babye wininyaba ati, na Yohanes arye nyapne.

1 Yohanes 2:3

Allah arye, “Wininamlulume, aning ton kum wininamlulume,” nyalul yupu nirya kekebuka, dobolbalamibya deice arye, ‘Allah ap, nun ap, neika unyabe,’ tenenyabe. Ara kanye bokoltona kumce, ‘Dipkoprop el ap unyabe,’ tenenyabe.

1 Yohanes 3:7

Na mapu kekeplulume. Yuk nang arye, ‘Nun peterenyap deice arye, nun tamuk dobolyasitinge,’ tenesinyak ninye nirya ati, siktilila yupu kum kekenamlulume. Yata ninye do, nirya, sik unyak ning diksukumuk ubuka unyak ninye ara, teleb nanguk unyake. Ara, Yesus el bidamnye diksukum ulye touk, unyake.