An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.
Lukas 1:32 - Eipomek32 Ami ara aning-aning nirya deice tam ululnye, Allah im deice ulirye, aning-aning nirya talilulnye bira, el mi kopropa unamle. Ami ara weik mambulnye anya arye, eibikirye, ‘Ara Allah el mi kopropa ulule,’ nyanamake. Ami ara el apu kopropa Daud, Israel ninye nirya talibuka weik ninye deiyoknye ulamuk touk, el babye, Allah mikip areplibuk, Israel ninye nirya talibuka, weik ninye deiyoknye unamle. 參見章節 |
Lukas 1:32
39 交叉參考
Min talak ara, Allah Yahweh, ance nun deiyoknye Daud biti, nyalin yupu deice arye, “Pia dipkoprob, ninye deiyok talibuka un ning ara, arepkinirye, erepdeipnamkin,” nyabuka, nyalin yupu deice arye, akunum nyapdeiamlume. Allah ance, anyalin yupu deice arye, akunum nyapdeialum ati, aning ara, pia kum bataknamlame. Allah ance ayupu ton nyaplume. “Daud ance deipnalam mapu kan-kan arye, Israel yala nang, anggun ninye deiyoknye raja kina ati, ninye ton, pia wipdeipnamne.” Tonda, Daud ance biknulyame, Israel yala ninye deiyoknye kina ati, weik teleb bun ning, el si takhta deice ara, ance deipnalam mapu kankan arye, tonoknye ton wipdeipnyeba, atakhta deice buklirye, Israel yala nang nirya talinamle.
Tonda, ance delinamlam mapu nirya ara, na Allah arye, ‘Aning ara, wininamlume. Aning ara, pia kum wininamlume,’ nyalin yupu deice akunum nyapdeipse yupu, an mapu arye, moubuka talibikirye, pia diksukumuk winibikceura, anang babye tuba erelinamne. Sikce, Israel nang nirya talipnamake. Tonda narye, ‘Teleb winina ati, aning ara wininamlume. Diksukum winin ning ati, winibuka-winibuka wininamlume,’ nyapdeiamsise yupu ara, Daud ance delinamlam mapu ati peterepnibuk, sik kekebikirye, aninguk talibuka telebuk winibiceura, sik ap, tonda sikce delinamak mapu ap, Israel yala nang talibikirye, ninye deiyok nang, raja-raja unamake. Raja kibikirye, Daud an ninye deiyok kina ati bun ning, el si ara takhta, deice bukikirye, Israel nang talipnamake.”
Ara ani. Aning nirya akunum winibikura, Daud birye deibukba, dadeipdanin yangalamik nang arye, pia teleb ulamlinye deiyoknye, erepdeipnamake. Allah arye, anggun Yudea tam ululum nang ati, weik arye bico tenesulule ati, el teleb kanye deice aryuk, pia diksukum ululnye erepdeiplyeba, anye bira, sik ninye deiyoknye Raja kibuka unamle. El anye birye, el mutuku nang nirya ati, bico teniplirye, pia moubuka talipnamle. El anye bira, diksukum winin ninguk talibuka, pil donamle. Tonda, sik kum bukni, minop arye teleb piluk talibuka doplirye, ninye yupu ara, diksukum kibuka bokeipnamle! Allah arye nyapdeipnukba kekepsirye, na nabi Yesaya birye nyapne.
Ara ani. Dipkoprop, anggunda, na nyapdeipsise yupu moubuka talepmunce, dobolbamunyopura, ninye deiyoknye, Raja Daud birye, amutuku nirya talibuka winilamuk touk, aminyan talak, yuk deiyok nang, Raja-Raja nang ap, tonda sik amu tam pil dona deiyok koubuka talinyak nang ap, Daud bitonun Raja nang ap, tonda, Yehuda yala nang ap, Yerusalem mutuku weik asik noutam unyak nang ap, amutuku bisik bublan wekelyanganamake. Ara, minop talak sik neika, Yerusalem mutuku weik asik domikce, weik keil poka antanap dongobuka domikce, apoka noutam bisik botopdeiamika nirya ara, abisik wekenamake. Tonda, sik Raja-Raja nang ap, sik amu tam pil dona deiyok nang ap arye, sik ninye olbana ati, tuku deice ban ning, el si kereta kuda perang ap, kuda basam ap, aning deice bukikirye, binamake. Tonda, Yerusalem mutuku ara, lo mutuku pia kum upnamle. Ninye pia weik tonun, amutuku yanuka, pia aunamake. Doupnamle talak nirya ara, Yerusalem mutuku noutam ara, ninye pia aunamake.
Allah Yahweh arye nyapsile. An Yehuda yala nang unyakak talibuka, Raja kiplumce, ninye talibuka ulyamnye bira, narye nyapnukin yupu moubuka kekepnulyame. Anda, an apu koproba Daud birye, ninye deiyoknye kina ati, weik bun ning, el si tahkta deice bulamuk touk, wini talak ara, an ton aning deice bulyamce, amutuku nang nirya taliplyame. Ati, an ap, an amu tam pil donyaka deiyok nang ap, ance taliplyam nang nirya ap ara, moubuka kekepnamlulume.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
Aning atonun ton, weik ninye deiyok kil, Seba mutuku talyamuk kil arye, ‘Raja Salomo weik kel arye nyalulul yupu ara, na ton kekeptinge’ tenen, pia karen mutuku bukni, el mutuku batakuka Salomo dam kekelbiyuk. Winibuka ati, Allah arye ninye nirya bokuka wenepnamle talak ara, akil tikukaplirye, anggun atalak winimunye ninye ati, “Anggunda pia malye ulamlum nang atia,” nyapnamsile. Na dipkoprop nyapsine. Akil arye karen mutuku arye, ‘Salomo yupu kekepnun’ tenen, biyuk. Dipkoprop ara Salomo mitikto kelnye bukni, nada, weik kelnye birye anggun kan-kan akunum yasi bukni, tuba nati diba kum tenenululume. Ati aning ara, Seba mutuku talyamuk deiyok kil arye, anggun wini talak winilulum nang ati, wenepnamsile. Yesus arye sik Farisi nang ap, Musa sekamuk yupu peteren nang ap ati, nyabuk.
“Anggun malye ning nirya batakmunba, mek sirika dem dongosunun bukni, nada mitik mambulnye anya arye, aminyan talak yanamla weik deiyoknye bira, elda weik mambulnye. Nada, mambulnye kum ati, pia malye piluk bukni, el sandal koulongon tapu narye kum loploptinye. Aminyan yanamlanye bira, el mikip pia weik ati, elce Allah El Dib Kanye arenamsile. Narye mek sirika, dem dongopsiniba, anggun nong nirya mek singilamle touk, aminyan yanamlanye bira, el mikip pia weike ati, elce Allah El Dib Kanye arepsiliba, anggun kanye talima nirya talinamsile. Uku arye malye ning dilamle touk, Allah El Dib Kanye arye, anggun malye winin ning nirya dobuka, kum kipdeipnamsile.
Asipdeyuk bukni, Yesus ara, yupu tonap, tamubuka kum nyabukce, tunimanauk ubuk. Winibukba, ila tonap, Allah arena ati, aweik deiyoknye birye, Yesus ati asipdeyuk. “Ninye weik lyeplirye, sik talima talinamle deiyoknye, Mesias nyanyapnye bira, an aulyam do?” Tonda, “Si erekinyapnye malye winin ning pia kum winilulnye, Pia Etekdopnye Allah ara, anuk el Mi Koprop ulyam do?” nyabuka asipdeyuk.
Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle.
Asipdeyukba, malaikat arye tamubuka Maria ati nyabuk. “Allah El Dib Kanye an nong deice deipkilirye, Allah el mikip ara, kanya atonun an nong deice unamkile. Winipnamkila deice arye, mi bominya ani, aminyan talak, malye winin ning tonoknye babye, pia kum wininamle mi deipnamlama ati, ninye nirya arye, ‘Ami ara, Allah el Mi Koprop,’ tenebuka nyanamake.
Zakaria arye ayupu nyabukopura, el mi Yohanes deipmoka ati, ayupu nyabuk. Na mi Yohanes ara, nun Lyena Deiyoknye ati, el yanamle bisik menekuka kintinilinalama ati, yuk nang arye, ‘Allah aning-aning nirya alip tam ulirye, weik mikip ulinye bira ara, el yupu laka nyalulnye nabi bira, Yohanes el ulule,’ nyanamkiake.
Utenebuka nyanmeka ati, Yohanes arye aninye ati nyabuk. “Anggun malye ning nirya batakmunyeura, mek dem dongosunun bukni, nara mitik mambul tonye binya arye, aminyan talak yanamlanye deiyoknye bira, elda weik mambulnye. Nara, mambulnye kuma ati ara, pia malye piluk bukni, el sandal kulongon tapu narye kum loploptinye. Narye mek dem dongosinibuk, anggun nong nirya mek siknilamle atonunuk, aminyan yanamlanye bira, el mikip pia weike ati, elce Allah Dib Kanye arepsilyeura, anggun kanye talima nirya talinamsile. Uku arye malye ning dilolamle touk, Allah El Dib Kanye arye, anggun malye winin ning nirya dobuka donoksilirye, kum daneipnamsile.
Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.
Yesus arye ayupu nyabukura, awekmek nang arye nyabik. “Allah arye nyapdeibukura, Musa arye sekeiyamsuk yupu noutamak arye peterelamsikba, kekelamupe. Ara, Allah arye, ‘Ninye Lyepnamle’ tenen, wipdeibukce, dopdeipsuknye, ‘Kristus ara, elda pia kam unamlanye,’ nyabuka peteresinyake. Ati ara, ance, ‘Ninye Mi Koprop Atonunye adiparyuk ereipnamniyake,’ nyapsilam ning ara, yata deiyok ati ayupu nyapmasilam do? Tonda, ‘Ninye Mi Koprop Atonunye,’ nyapsilamnye bira, yatanye biti nyapsilam do? Elda yatanye ulul do?” nyabuka asipdeyik.
Akil arye Paulus ap, nun nirya ap ati dobolbalamsukce, weik yupu arye nyalamuk. “Allah pia mikip weik ulirye, aning-aning nirya bisilul deice arye ulul Allah ara, anang ara, el pil melibuka don nang unyakce, ‘Allah arye Yesus ati dib tenebibya deice aryuk lyesulul,’ Yesus arye lyesulul yupu laka nyanmasiake,” nyabuka akil arye pia nyalamuk.
Bukni, Daud ara, aminyan ak, winipnamuk ning ati, laka nyalamuknye nabi ulamuk. Tonda, Allah arye Daud biti, ‘Dipkoprop winipnamne,’ nyapdeibuk yupu deice arye ayupu nyabuk. ‘Daud elce deiplibuk, dadeipdanin balamica ani, sirya tam deipnamak mi ara, Daud el ulye touk, ami babye, erebuka weik ninye deiyoknye kipdeipnamne,’ Allah arye nyabuk. Allah arye nyapdeibukura, Daud kekebukce akunum kel kiyamuk.
Yesus Kristus ara akunum dipmok bukni, Allah arye Yesus ati tamubuka kam bukeibuka deice arye laka kipdeipsuke. Ara Allah El Dib Kanye mikip deice arye nyapsuke. “Yesus ara Allah el Mi Kopropa ulule. Allah el malye winina kumce, pia telebuk ulul touk, el mi kopropa Yesus babye, malye un ning tonok babye kum winilirye, pia diksukumuk ulule. Elda pia mikip weik unamle,” nyabuka, laka kibuka ayupu laka nyapsuke. Lakak kibuka deipsuknye bira, yuknye kume. Elda, nun Deiyoknye Yesus Kristus el tonok ulule.
Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.
廣告