Ura, Allah el yupu lak nyana deiyoknye, nabi tonoknye el si ara, Elia ulamuk. Elda Tisbe mutuku anye ulamuk. Elda Tisbe mutuku ulamuka ani, el weik mutuku tam ulamukak ara Gilead mutuku nyalamik. Anye bira, atalak ninye deiyoknye Raja Ahab dam yanuka nyabuk. “Allah el si Yahweh, elda dipkoprob kam tuba ulirye, Israel ninye ati pia kalikuka melilule. Tonda, nara el amu tam unirye, el piluk donune. El Allah dipkoprob ulula ati, el deice arye nyapkine. Wini talak arye diprongobuka doyanamle talak nirya ara, keting tamun winilye deice arye, mok pia kum cenamle. Aketing tamun winilyeto deice arye, dou pia maplirye mok cena kum unamle. Narye nyapnye talak uk mok cepnamle. Narye kum nyapyopura, mok purye tonok babye, ton kum saknamle. Ati anda moupnalyame,” Elia birye Raja Ahab biti nyabuk.
Lukas 1:17 - Eipomek17 Minop arye, Allah yupu lak nyalamuknye, nabi Elia, Allah El Dib Kanye mikip deice arye, Allah yupu peterelamuk touk, ami neplyopura el babye, atouk wininamle. Yesus ara, aminyan yanamla ati, ami arye minop menekuka kintinilinamle. El ulya deice arye, sik Israel nang arye, sik mapu nirya ati, bico tenebuka kanye deibuka unamake. Tonda, sik Allah yupu yanibuka malye ulamice nang ara, ami el winilamlya deice arye, sik malye wininyak ning batakikirye ila tamubuka, Allah diba tenebuka, diksukum unyak nang weik kel arye unyak touk, Allah el tamuk kipropnamake. Awininamla nirya ara, Yesus arye talinamle ninye kintinilina ati wininamle.” Amalaikat arye ayupu nirya Zakaria ati nyabuk. 參見章節 |
Lukas 1:17
38 交叉參考
Nyabuk bukni, Elia birye tamubuka Ahab biti, “Kume, narye Israel ninye ati malye kum kililamse. Bukni, Ahab an ap, an mapu ap, angguncuk malye kililulumba, Israel ninye ikin kanye weik bobuka unyake. Ara, an ap, an mapu ap arye, isa el si Bahal ati, el si eremunya deice arye, Israel ninye ati pia malye kipdeiplume. Tonda, Allah el si Yahweh arye, ‘Aning ara wininalum, aning ara kum wininalume,’ nyapdeiamuk ning ara batakuka, pia malye ninguk winilyame.
Elia adiparyuk Ahab unmokak Nabot wa win dam bayuk bukni, Ahab minop arye eipmokce, nyabuk. “Anda na oldananye atonun tenekunune. Anda na like. Bukni, nati enmanilam ning ara, akunum eipmanilame,” nyabuk. Nyabuk bukni, Elia biryopura, “Dipkoprop enmakina ani akunum eipkine. Ance apia malye ning winiminyeba, Allah el si Yahweh arye, ‘Aning ara na like, aning ara pia malye,’ tenepmakile. Amalye ning winipmalam ning ati, Allah el si Yahweh arye, ‘Ahab dam bimince, narye el wenena ati winipnamne ning ara, lak nyalbinulyame,’ nyapdeipmakila ati, nyapkine,” nyabuk.
Ansinibuka birikopura, nabi Elia birye, Raja Ahasia biti nyabuk. “Allah Yahweh arye anti nyapkile, ‘Anda ninye winipnulyame, nyan yupu laka nyana ati, nyapminba, isa si Bahal-Zebub Ekron mutuku isa si sibuka moron ati, wipdeipminba, banyak nang ara, yata deiyok ati nyalyam do? Israel mutuku noutam ara, sik melinanye Allah ton, kum ulula ati, talye isa ati asilbinamik do? Ance nyaplumba, anang ara, Ekron mutuku isa ati morolbinmik ning ati, anuk dikulul ning ara, pia kum kwetnamkile. Anuk dinmakilba, amapmalamak arye kum buknalame. Asukumuk dipnalame!” nabi Elia birye nyabuk.
Diba, Allah Yahweh anda, nun apu yapu Abraham ap, Ishak ap, Yakub ap, tonda nun apu yapu Israel nang nirya ap ati melilamukba, sikce kanye deibuka an si erelamkik. Ati nun ni koproba Allah, ance an mapu koproba ati melipminba, wini talak sikce teleb ning dobuka an si erebuka kina ati talye dem arepnamkiyak ning atouk, aminyan talak babye winibikirye, pia ati unamakʼ tenen, moropmabe. ‘Winipnamtingʼ’ tenen ati, ance sik melipnamlyame. Tonda sik an mapu koproba ati, melipminyopura, sikce antibuk nun ni tenenamkiake.
Aning nirya akunum winibuka, sirya dakik ning ara, Raja Hizkia ap, el taleamuk mutuku noutam ulamik nang ap, sik nirya arye kanye weik deibik. Ara, sikcuk kum bukni, atalak aryuk Allah arye, el tenen nang melina ati, el mikip deice arye melibukura, sik nirya arye, apil nirya minop dobuka sirya dakik. Ati ara, sik nirya kil-kil asa, kanye deibik.
Yata nang do nirya, sikce, ‘Kume, Allah arye nyasulul yupu atonun kibuka, pia teleb wininamne. Pia teleb, weik kelnye wininamne,’ tenenyak nang nirya ara, minop weik mambul unamak ning ara, ani. Ara, Allah ati, ilil tenebikirye, elce nyasulul yupu moubuka talinyakce, dobolbanamake. Wininamaka deice arye, weik kel nang unamake. Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, dobolbanyak nang ara, yata ning do nirya, nong noutam ning moubuka tenebikirye, telebuk wininyake. Dipkoprop teleb ning ara, ninye tukwak nang nirya arye, Allah ati, “Anda pia telebuk ulyame,” nyabuka, el si erenauk wininamake. El si erena ara, pia kum batakanamake.
Ton deiyok ning ara, ani. Ara, ‘Aminyan talak kam unamak Israel yala nang ara, sik apu yapu arye, malye weik ulamik touk, kum wininamak’ tenen, ayupu nyapdeipsuke. Ara, minop talak ulamik Israel yala nang ara, pia mandipna kanye bolamikce, Allah arye nyapdeiamuk yupu kum kekepmanto ulamik. Winilamikce, ‘Allah arye nyapdeipsuk yupu ara, nun lik’ tenen, elce nyapdeiamuk yupu nirya, yaniltakanauk ulamikce, sik kanye arye tenelamik ninguk, winilamik. Tonda, sik minop talak ulamik Israel nang, sik talima noutam ara, Allah ati, tuba-tuba diba tenebuka kum ulamik. Sikda, ton talak ara, diba tenyamika ani, aminyan talak doupnin bayikopura, tonap Allah ati, diba tenena kumce, bataknauk ulamik. Sik talima noutam ara, ‘Allah arye, “Aning wininamlume, aning ara pia kum wininamlume,” nyapdeiamsuk yupu ara, pia moubuka talinauk unamabe,’ kum tenelamik. Ati, Allah ati batakamikce, yuk talye ning ati, “Nun ni bira ani,” nyabuka, isa siuk erelamik.
Tonda, atalak ara, anggun walwal deice ululum nang ara, nukmunce, ‘E, deiyok ara, ati nyabuka’ tenen, moubuka biknamlume. Tonda, yata nang do, anggunce, ‘Kume aning ara, nun like. Aning ara, kume, se aning winipsutua,’ nyabuka, malye weik nyalulum nang ara, teleb kipdeipsiniba, aminyan talak ara, peteren nang arye peterepsikceba, tuba tamubuka, ‘Aning moubuka peterepsutue’ tenen, kanye deibuka ubikirye, sik babye moubuka biknamake.
‘Na dam tamubuka yanamak’ tenen, bico tenelamsirye, lo weik arelamsise bukni, na dam tamubuka, kum yangalamluma ati, se anggun Israel ninye umunyak nirya ara, narye wenepnamsine. Ati, anggunce, ‘Se, awinipnamsil ning ara, aminyan nun ni bira, Allah arye weik wenepnamsil’ tenen, kintinibuka unamlulume. Tonda, anggun Israel ninye nirya ara, ‘Se, nun ni koproba Allah ap, epdanamabe’ tenen, kanye moupmunce, ikin kanye bobuka unamlulume.
‘Sik Allah yupu laka nyalamik nang arye nyalilamik yupu kekebuka, diba teneptibye,’ tenemunyopura, anyapnusin yupu ton diba tenepnululume. Ara, nabi nang arye, ‘Aminyan talak Elia atonunye yanamle,’ nyalilamiknye bira, ara ninye mek dongolamuknye, el Yohanes ati, ayupu nyalilamik. Elia atonunye bira, Yohanes atia.
Anye Yohanes ara, elda talinye kume. Allah yupu laka nyalamuknye nabi Yesaya arye, “Bisik Kintinilinanye yanamle,” nyalilamuk touk, anye bira Yohanes ayanmale. Yesaya arye domon yupu nyalilamuknye ara, ani. ‘Na Allah ara, na yupu laka nyalinanye birye, mok cena ap, ninye ap, kumak arye, ayupu nyanamle. Winibuka nyanamle. “Ninye Deiyoknye nun ni Allah yanamla ati, bisik punguk yalinamlulume. Nun Deiyoknye binamle bisik ara, punguk yabuka kintininamlulume,” nyanamle.’ (Yesaya 40:3)
Zakaria arye ayupu nyabukopura, el mi Yohanes deipmoka ati, ayupu nyabuk. Na mi Yohanes ara, nun Lyena Deiyoknye ati, el yanamle bisik menekuka kintinilinalama ati, yuk nang arye, ‘Allah aning-aning nirya alip tam ulirye, weik mikip ulinye bira ara, el yupu laka nyalulnye nabi bira, Yohanes el ulule,’ nyanamkiake.
Allah el mapu kililamsuk nyapmasina ara, talye ninye arye deibiceba, dadeipdanin yangalamak ninye atonun ati kume. Tonda, ninye sik kanye aryuk, ‘Mapu deipnuyap,’ tenelamak atonun winina deice arye kume. Tonda sal arye, ‘Nun kilapu arye mapu deipnamsiyak,’ tenelamaka atonun ati kum nyapne. Aning kum bukni, aninye nirya ara, Allah arye sikti, ‘Na mapu unamak’ tenen, wipdeiamsuk deice arye, Allah el mapu koprop kililamsuke.
Anggun babye anggun kele. Narye anggunti nyapsise. “Allah arye wipdeibuknye, Ninye Lyena Deiyoknye, Kristus ara, na Yohanes kum unune. Allah arye, ‘Ninye Lyenanye aminyan yanamla ati, kintinilin pil donamle’ tenen, na dobuka minopce dopdeipnuke. Weik mambulnye Kristus ara aminyan yanamle,” nyapsise.
Nyapnuka ati, adiparyuk ninye wipdeipsirye, ‘An Peterus dobuka boyanamkiak’ tenen, ninye wibuka dopkwetepse. Winira, akunum yanmalama ati, telebe nyapkine. Ati, winira Allah el unmalce dinmasil damuk unmabe. Ara, ‘Allah arye anang nyapnamle’ tenen, nyabukura, kekeplum yupu nirya ara, ‘Nun nyapsiminyeura, kekepnuyabe. Allah arye yata yupu nyapnamsil do?’ tenen, bulubuka wekmabe.” Kornelius arye Peterus ati nyabuk.
Kume. Nun tukwak unyap ninye nirya ati, adiparyuk oplopsutu bukni, minop talak ara, ‘Aninye ati, sik malye ning namin kipnirye, namin arye unamne. Winipnyopura, na pia telebnye unye ning, eibuka kel biknamniyake. Sirya talak ara, aninye ereipnirye, pia teleb kipdeipniba, sik ap na ap neika unmabe,’ tenyamsuk. Utenyamsuka ati, adiparyuk wenebuka kum oplomsuke.
Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.
Aning mitik tonun, yatanye do nirya, mambul un ning, malye ning yala-yala nirya ati, bataktopura, teleb pil donanye unamle. Winipmanto ara, elda weik aik pum dekna weik ning ulye touk, weik mambul pil talibuka dopmantonye unamle. Atonye, el deiyoknye Allah arye anye biti, el malye winin ning kum kipdeiplyopura, anye biti teleb kipdeipnamle. Teleb akunum winibdeiplyopura, weik mambul pil aning-aning nirya talibuka, el li koprop ati, teleb pil melibuka dopmantonye unamle.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.