Lukas 1:15 - Eipomek

¹⁵ Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle.

Lukas 1:15 交叉參考

Kejadian 12:2

Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.

Kejadian 48:19

Yusup birye nyabuka piripdeyuk. Bukni, el li koprop arye nyabuk. “Kume, na ni mio. Na kele. Na mangkau kanye bobuka kum winipne. Min yuma deiplum mi Manasye ara el ton weiknye uplirye, mapu dadeipliba, dadeipdanin balamikca ani, dotalak unamak ninye ara, weik upnin banamake. Winiplirye mitikto mambul unamle bukni, el weit koproba Epraim bira, mambul weiknye unamle. El du koproba, deice tam atonun uplirye, elce deipliba, dadeipdanin balamikca ani, doupnamak ninye ara, ayala-ayala weik upnin banamake.

1 Tawarikh 17:8

Ati ara. Na Allah arye yate mutuku do nirya balamlum talak nirya ara, narye melilamkise. Tonda, anti, Anye opnuyap,’ tenelamkik nang nirya babye, narye sik kanye walwal kipdeipnarye, melilamkise deice arye, sik anang nirya obuka sirya dakamlume. Narye anti weik tonun kanye deipkise. Ati ara, ‘Tukwak mutuku ninye deiyok nang winilamak atonun nang, unamleʼ tenen, narye an erepdeipmakine. Amutuku nang nirya arye an si bikinamkiyake.

1 Tawarikh 29:12

Yata teleb ning do nirya, ninye arye talibuka isa mutuku dongonye unyak ning nirya ap, dekna weik ning ap, ancuk tukwak nang ati arelyame. Tonda teleb diksukum unyak ning ap, ninye tukwak nang ati, yuk mutuku nang arye, sik si kel bikikirye, ‘Se, anang ara mambul weik unyake,’ tenen ning deiyok ning babye, an taruk aryuk aresilyame. Bukni, aning-aning nirya ara, an mikip aryuk talilyame. Tonda, aning nirya ara an uk, an mikip weik deice aryuk, ‘Winipnamne,’ teneplum ning nirya ara, an tenepminye touk ulyame. Aning nirya talibuka umince, yata nang do nirya, ninye deiyok kina ap, mikip kina ap ati nirya ara, ancuk erelilyame.

Mazmur 22:9

Sik diba tenena kum ninye arye, nyaninyak bukni, na ni Allah na kele. Diba, na ni Allah ance na nin mun pum bomnuk talak melilamnulumba, deiamnuke. Tonda, ance na nin melilamlumba, elce nati moum dilamse talak arye, dipdongobuka teleb kibuka kaliklamnukba, teleb aryuk nepra balamse.

Yeremia 1:5

‘Yeremia, an nin mun pum tam, min kum kintinip deiamkise talak ap, tonda, an nin birye kum deiamkuk talak arye, na Allah arye anti, ‘Doryanamle talak ara, narye wininamne ning, anye Yeremia biti, laka nyaipneba, daunamak ninye ayala-yala nirya ati, na yupu laka nyananye, nabi unamle’ tenen, akunum kintinipkisirye anti wipdeiamkise,’ nyabukce, Allah arye na Yeremia biti nyapnuke,” nyabuk.

Yeremia 35:6

Nyapse bukni, sik anang nirya arye, nati tamubuka nyapnik. “Kume na nio, anggur mek ara, nun kum dinyabe. Deiyok ara, nun apu koproba Rekhab birye deiamuk nye, nun apu koproba Yonadab birye, ayupu nyapdeipsuke. “Nun Rekhab yala nang ap, nunce deibibiba, dadeipdanin banamak Rekhab nang nirya babye, anggur mek pia kum dinamabe,” nyabuka, yupu akunum nyapsukce, yupu sekamsuka ati, nun atalak unyap Rekhab nang babye, ayupu nyapdeiamsuk touk, “Wini talak babye, ayupu talibuka unyabe. Ati, anggur mek kum diptibye,” nyabik.

Imamat 10:9

Harun, an ap, ance deiamlum nang, an mapu ap, sik nirya ara, kanye walawalan anggur mek, yu mek do, yuk yala kanye walawalan mek do, dipmunye talak ara, na Allah ap, ninye ap ansinilina aik pum tam ara, pia kum wekelyanganamlume. Anyapmasin ning kum kekemunce, talye lubakibuka anyaik wekmunyopura, anggun adiparyuk dipnamlume. Ayupu nyapdeipsin ning ara, anggun ap, anggunce deipmunyeba, dadeipdanin banamak nang, sik imam-imam nang ap nirya ara, pia kum bataknamlume. Ayupu dem nyapdeipdanin bamunce, pia talibuka wininamlume. Ayupu ara, pia kum bataknamlume. Allah arye nyabuk.

Zakaria 9:15

Winipnamle talak ara, dipkoprob aning-aning nirya deice tam talibuka, mikip weik talibuka ululnye Allah Yahweh, im deice unyak malaikat nirya, sik weik deiyoknye ulula anya arye, el wibuka deiamuk ninye ara, el mikipnye amu tam ulamikiba, el nong arye lelildongonamle. Adeice arye, sikce sik mal olan nang nirya obuka, sirya daknamake. Ara, ‘Ninye opnun,’ tenepne talak ara, tapu arye keil kirikdongobuka, bobanmana ani, akeil mikip upnopura, ninye nong deice dobuka opdandenamak bukni, Allah el ‘Naʼ tenen, ninye ara, melipliba, amal olan ninye malye kibikirye, obuka sirya daknamake. Winipmanto ara, ninye arye yu lelamle mek dibikiba kanye teleb ning wangabikiba, malye kibuka, lukparabuka ninye talye olamak touk upnamake. Winipmaka deice arye, obice nang, sik ining ara, pia weik binamle. Winipmanto ara, Allah arena ati, kam ning obikirye, Allah si eren aik pum tam deiamice, marikna deice ining likililamak atonun, ining weik binamle. Tonda, yangalin makau pum tam, ining dikdongobikiba, langdilamle touk, sik mal olan nang arye, omice nang ining ara, weika arye binamle.

Lukas 1:14

Allah el kanye ara, ‘Ami ara weik mambul,’ tenelule. Ati ara, ami ulya deice arye, kanye weik deipmince, kil-kil upkilibuk unamlame. Tonda, an kil arye ami deiplyopura, ninye weika arye ami ati, kanye pia deipnamake.

Lukas 7:28

Yesus arye nyabukopura, ayupu ton dukdongobuka nyabuk. “Aning ati ara, na dipkoprop nyapsine. Minop dorapce dipdongobuka wini talak nirya, kilapu nirya arye delilamik nang nirya ara, mitikto mambul winilamik bukni, Yohanes eluk ara, pia weik tonye ulule. Ara, minop talak ulamik nang ara, Musa sekamuk yupu uk kekebuka, aninguk talibuka ulamika atia. Bukni, ninye mek dongolamuknye Yohanes ati ara, Allah el kanye ara, ‘Elda, mitik mambul,’ tenelule. Ara, nara Ninye Lyena Deiyoknye, tukwak mutuku min kum yanamse talak ara, na yangana ati, Yohanes arye na laka nyalinanye ulula ati, elda mitik mambule. Wini talak arye, dipdongobuka dotalak nirya ara, Allah ninye nirya lyeplirye, talinamle talak weknamak nang noutamak ati, yuk nang arye aninye nirya ara, ‘Weik mambul,’ pia kum tenenyake. Kum tenenyak bukni, na dipkoprop nyapsine. Allah el kanye ara, ‘Im deice welepnamak ninye nirya ara, weik mambul unyake,’ tenelule, ‘Yohanes ara, teleb pil dolul bukni, elda mitik mambuluk ulule,’ tenelule. Deiyok ara, tukwak pil donyak nang ara, mitik mambul bukni, im deice welebana ara, weik mambul ati nyapsine,” Yesus arye nyabuk.

Lukas 7:33

Amapu lik uplibuk, bataklamak touk, anggun babye, atonun ulalume. Ara, Yohanes arye, dina teleb ning roti ap, anggur mek ap, kum dilamukura, elti, diba tenena kum nang arye, “Anye bira, isa arye el kanye talima talibuka ulule,” nyanyake.

Yohanes 5:35

Yohanes ara, winipmantonye ulamsuke. Elda, weisa updeibiceura, dirina yiplya arye ninye elilamak touk ulamuk. Winilamukce, el nyalamuk yupu, dirina atonun kibukba, anggunce kanye deibuka, el yupu ara, tia talak ati kekelamlume, nyapsine. Yesus arye nyabuk.

Rasul 2:4

Sik nong deice bukukura, Allah El Dib Kanye sik talima wekuka langdibukura, talibuka arye, sik nirya ara, yuk-yuk mutuku nang yupu arye nyanmek. Ara, Allah El Pia Teleb Dib Kanye arye yupu nyana deiyok ning aribuka atonun, sik yuk-yuk mutuku nang yupu nyanmek. Sik nyanmek yupu ara, kum kel kiyamik yupu bukni, yuk-yuk mutuku kili sal yupu nyanmek.

Galatia 1:15

Winibuka daulamse bukni, atalak noutamak ara aning kum tenelamsibuk, Allah ara na nin deipnuk talak arye, ‘Anye bira na ning,’ tenyamnukce, wipdeipnuke. Winipnuka anya arye, elce bico tenyamnukce, el kanye aniryuk yukupnukce, lyepnuke. Tonda, Allah arye nati, ‘Anye bira, na yupu dobuka, Yahudi yala kum ninye ati peterelbinamle’ tenen, el mi kopropa Yesus pil dopnuka deice arye, winiryuk kanye talima arepnuke. Winipnuk ati, el mi kopropa Yesus arye winilul ning ara, laka nyalamnukce, na talima noutamak arye pil dolamnukba, na winilamse ning deice arye laka kipdeipnuk. Winipnukopura, narye, ‘Se, yatato pil donamne do? Tonda, yatato yupu peterenamne do?’ tenen, yuk nang dam binuka kum asilamse.

Efesus 5:18

Ara, kanye wangalamak mek dibikcopura, sik kanye wangabikiba, talye yolana ap, malye-malye winina ap, wininyaka anya arye, mek dibibyeba, kanye wangapsiliba malye winina ara, meme. Aning kum wininamlum bukni, Allah El Dib Kanye arepsukbuk, nun kanye talima wekuka usilinye birye, ‘Allah El Dib Kanye arye, nun kanye talima talisilye deice arye, el mikip kipdeipnamsile’ tenen, el amutamuk unamlulume.

Yosua 3:7

Asum ara, Allah el si Yahweh arye, Yosua biti nyabuk. “Minop talak, narye Musa meilyamsiba, pil mikip arye dolamuk touk, an babye, narye melipnamkine. Aning ara, ‘Israel ninye nirya, kel biknamak’ tenen, arup arye deiyok koubuka, narye an weiknye kipdeipnamkine. Winipkiniba, Israel nang nirya arye anti, ‘Se, Yosua bira mambule, Yahweh arye melilule,’ tenebikirye, an yupu kekenamkiyake,” Allah arye, Yosua biti nyabuk.

Yosua 4:14

Asum ara, Allah arye Musa biti, meliyangalamuka atonun, Allah el si Yahweh arye, Yosua biti melibuk deice arye, Israel nang nirya ara, Yosua biti, ‘Se, elda pia weik mambulnye,’ tenelamikce, Yosua kam ulamuk talak nirya ara, anyuk tenelamik. Sikce, ‘Musa bira, pia weik mambulnye,’ tenelamika atonun, ‘Yosua babye, elda pia weik mambulnye,’ tenelamikce, Yosua eililamikce, sik ilil ulamuk.