Tonda, sik talye-talye yupu uk nyakce nang ara, sik wenena ati, yupu kum kipdeipminba, ‘Talye lup nang ulamak touk, upnamak’ tenen, moropkine na nio. Ara, sik anang arye, ‘Nunda dipkoprob uk kibuka, wininyap nang,’ nyabuka, erelakirye, nunti malye kisinyakce, malye yupu nyasinyak nang nirya ati, nyapkine. Pia maknya kintinikirye, kwalinyaka deice arye, nunti, nalisinyake.
Kolose 1:5 - Eipomek5 Yesus Kristus diba tenemunce, yuk diba tenen ninye ati, bico tenebuka kanye arisilibuk, umunya ara, talye ati kume. Winiluluma deiyok ara, Allah arye, ‘Aninye ati teleb ning ap, pia kam una deiyok ning ap, arenamne’ tenen, kintinibuka im deice moubuka deiamsuk ning ara, anggunce, ‘Pia kam una deiyok ning ara, nun dipkoprop dolonamabe’ tenen, kanye teniltona kum aniryuk, pia kintinibuka dinauk ululume. Winiluluma ati, Yesus diba tenebuka, yuk ninye ati bico tenelulume. Allah arye kintinibuka deiamsukce, aminyan arenamsil ning yupu ara, asurat noutamak arye nyapmasin ning nirya ara, Allah el pia dipkoprop yupu, ninye lyen yupu, el laka teleb yupu peterelamsik noutamak arye, akunum kekelamlume. 參見章節 |
Kolose 1:5
33 交叉參考
Anggun taliplum ning ara, dekukapmunce, yo bok doropmunyeura, talye bona utotoa talina kumnye ati arenamlume. Anggunce anggun ning ati wasia, malye upmanto kum ning kintinilinamlulume. Ara, Allah arye mambul tenelye ning ara, im deicauk moubuka deilinamlulume. Anggun mambul ning ara, tukwak mambul ninguk bulubuka, ‘Na’ tenen, kum deilinamlulume. Tukwak mambul ning nirya ara, sisilya rang ap, sing arye dina ap, yuk nang arye dolona ap deice arye, malye kiplyeura, kum danalule. Tonda, upula don nang arye, sik buplan kukuka wekikirye, ubula dolonyake. Bukni, im deice moubuka deilinamlum ning ara, malye pia kum unamle.
Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”
Nyabukce, awekmek nang dipdeyukce, ‘E ton tam nang Saduki nang wekmake, ton tam Farisi nang wekmake’ tenen, kel kibukce, aSandeheren nang kekenmekak ayupu weik arye nyabuk. “Na kayapu, na apu yapu Farisi nang ulamik atonun, na babye Farisi nang atonun unune. Na kayapu, na apu yapu Farisi nang ulamik touk, na babye, Farisinye unune. Nara, kanye teniltona kumce, pia kanye talima lamabuka, ‘Allah arye akunum diamice nang kam bukipnamle sum ara, dan talak winipnamle do?’ tenen, kanye deibuka pia dipra unune. Aning dib tenenuna ati ara, arup arye anggunce yupu lepsisikuka bokolinmanulume,” Paulus arye nyabuk
Tonda, narye Allah ati, kanye tenildena kumce, pia kanye talima lamabuka, dipra unun ning ara, aYahudi yala deiyok nang babye, atonun lamabuka dipra unyake. Ara, Allah el yupu nyasilya atonun, telebuk ulamice nang babye, ayupu yanibuka malye-malye ulamice nang babye, Allah arye akunum diamice ninye nirya kam bukeipnamle sum, ‘Yata talak winipnamsil do’ tenen, dinauk unyabe.
Ayupu bitinye ara, pia kum nyanamap bukni, diba tenebupa deice, Allah arye nunti, “Sikda diksukum ninye unyake,” tenebuka teleb kibuka deipsuk ninye ara, ayupu nyanyabe. Ara, ‘Allah arye ninye lyena ati nyasulul yupu ara, akunum dam usulule. Ayupu ara, anggun talima pum tam akunum ulule. Anggun yupu kopropa aryuk, “Nun ni Allah lyepsilyame,” nyabuka moroptume.’ (Ulangan 30:14) Ayupu nyanyabe. Nyanyaba deice, “Anggun yupu kopropa aryuk nyaptume,” nyapmasin yupu ara, yuk yupu kume. Ara, nunce peterenyap yupu, “Yesus ati diba tenebibya deice, Allah arye lyelosulule,” nyabuka, peterenyap yupu ati nyapmasine.
Wini talak ara, tukwak mutuku unamap talak ara, mambul ning ton winilye pia wininamle. Ara, dib tenena ap, ‘Aminyan talak ara, Yesus arye, dolyanamsile’ tenen, batakana kum aniryuk, pia dinauk una ap, yuk nang ati bico tenebuka melina ap, ara awinilye ning pia aunamle. Awinilye aupmal bukni, weik mambul ning ara, yuk nang ati bico tenebuka melinauk ulule. Na Paulus arye, nyapsine.
Se, na kayapo, tukwak mutuku unyap talak noutamuk, Kristus lyepsilirye, melinamsil bukni, aminyan sirya talak ati ara, ‘Melibuka kum lyepnamsile,’ tenebuka dib teneptibyetoura, weik kanye imun upsute. Arup nyapmasin yupu ara, dipkoprop kum ulul bukni, Kristus arye, aminyan winipnamle talak ati kum lyepsetuopura, ninye mutuku-mutuku nirya, nun dib tenenyap ninye ati bico tenepsitinge. Ara, yuk ninye ati, mitika arye, bico tenipting bukni, nun dib tenenyap ninye ati weik arye, bico tenepsitinge. Deiyok ara, ani. Yesus arye, sirya talak kum lyepnamsutuopura, yuk nang nirya arye nunti, ‘Se, sikda talye ninguk dib tenenyaka anya arye, talye-talyeuk unyake. Ati sik bicoe,’ tenepsitinge. Bukni, Allah arye, dipkoprop Yesus kam bukibuk anya arye, yuk nang arye nunti, ‘Talye nang’ tenen, bico kum tenepsitinge. Kristus dipkoprop lyesulul ati nyapsine.
Nun peterenyap yupu ara, ani. Allah ap, ninye ap insinibuka teleb una ati deiyok yupu ani. “Ara, Allah arye tukwak ninye nirya, sik malye wininyak ning ati, ‘Namin kibuka kum daneipnirye, ila tamubuka ton kum tenepnirye, sik malye ning ati kum wenebuka opnamne’ tenen, Kristus dopdeipsukba, Yesus arye el ninye lyena pil dopsuka deice arye, Allah arye ninye mutuku-mutuku nirya ap, el ap ansinibuka neika teleb ulisulule.” Ayupu nirya laka nyabuka laka peterelbana ati, Allah arye nun wibuka deipsukbuk, apil talibuka donyabe.
Tonda, tilila yupu kum nyanyap bukni, pia dipkoprop ninguk nyana ap; Allah el mikip arisilibuk, adeice arye moubuka pil dona ap; aning-aning nirya wininyabe. Anirya ara, yin nang arye, taruk dana-dana tam yin talibuka olbalamak touk, malye winina pia kum, diksukumuk unyaba deice arye, Allah el pil donyabe.
Sik nirya arye winibuka unmeka deice arye, Allah el kai teleb yupu nyasilye touk, winina kum bukni, ayupu yaniltanmekbuk, narye eibuka kel bikcopura, sik nirya kekenmek akuk, Peterus biti nyabuka wenepse. “Peterus amio, anda Yahudi yala nang arye deipkikba, Yahudi yalanye ulyam bukni, an uminye ning ara, Musa sekamuk yupu ap, yuk mem yupu ap, sik Yahudi yala ninye arye diba tenebuka winilamak touk kum ulyame. Anda, yuk yala ninye, Yahudi yala kum ninye arye, aning nirya tenena kum arye, talye luparabuka winilamak touk ulyame. Winibuka uminya anya arye, anda yata ati Yahudi yala nang arye diba tenebuka wininyak ning dobuka, yuk yala ninye, Yahudi yala kum ninye sik nong deice delilyam do? ‘Yahudi yala kum ninye ap neika ansinibuka kum dipnune’ tenen, leibuka binmalama deice arye, malye winipmalame. Wininmalama ati wenepkine.” Na Paulus birye Peterus biti nyabuka wenepse.
Winibuka tenepsikce, nun kan-kan duknubuka yayik bukni, sikce, “Ura, ‘Allah el kanye deipsutu’ tenen, den bola mouse sekna ap, yuk mem pil dona ara weik mambule,” nyalamsik ning ara, tonok ning babye kum kekebupe. Sik nyalamik yupu seklamupa ara, ‘Ninye lyena ati, Allah el kai teleb yupu, dipkoprop ning uk, sik Galatia mutuku tam ninye arye, yuk talye yupu tabakna kum arye, dipkoprop ninguk tuba talinamak’ tenen, sik duknubuka dilyasik nang nyalamik yupu seklamubu.
Anggunce winibuka wininmalum bukni, nunda aning kum wininyabe. Nunda, Allah El Dib Kanye mikip arye melisilyeba, Yesus ati diba tenenyaba deice arye, ‘Allah arye nunti, “Sikda diksukum ninye unyake,” nyabuka teleb kipdeipnamsil’ tenen, diba tenenyabe. ‘Winibuka dipkoprop unamsile’ tenen, diba tenebibirye, ‘Diksukum kipdeipnamsil ning ara, dan talak winipnamsil do?’ tenen, kanye deibuka pia dinauk unyabe.
Ara, anggun Yunani ninye, Efesus mutuku ululum ninye ara, Allah el dipkoprop yupu peterelamsikba, kekeplum deice arye, Allah arye anggun ap, Kristus ap, talima dukdongopdeipsuke. Allah el laka teleb yupu, ninye lyen yupu kekebuka, dib teneplum talak ara, Allah arye, “Na Dib Kanye arenamsine,” nyabuka nyalilamsuknye bira, anggunti arepsukbuk, anggun talima pum weksuke. Winipmanto ning ara, ninye arye, ‘Na basam kele kipnamak’ tenen, amul seklamak atonun, Allah El Dib Kanye dopropluma deice arye, akunum lak kipsukba, elce, ‘Na’ tenen, ninye akunum ululume.
‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Tonda, Allah el laka teleb yupu, Kristus yupu ati, ‘Dipkoprop moubuka kel kinamabe’ tenen, pia piribuka kel kipra banamlulume. ‘Kristus el yupu pia teleb,’ tenenauk umunye talak nirya ara, weik kele arye peterelana ap, ‘Mankau arye malye winibibyak’ tenen, “Kanye mouplulume,” nyabuka wenelana ap, pia melipdanuka unamlulume. Tonda, winibuka wininamlum talak noutamak nirya ara, minop seklamik yupu, buku Mazmur Allah yupu mot ap, anggunce sekuka nyalulum Allah yupu mot ap, Allah el si erena ati, arisilye mot nirya ap, nyanamlulume. Amot-amot nyanamlum talak ara, anggun kanye talima noutamak arye Allah ati, “Telebe,” nyabuka tenenamlulume.
Ara, nunce Allah el yupu peterelamsupubuk, anggunce kekelamlum talak ara, anggunce ayupu ati, utenelamlume. ‘Kume ayupu ara, talye tukwak ninye arye nyanyak yupu kumde. Ayupu ara, dipkoprop Allah el yupu uka’ tenen, dololamlume. Nunce peterelamsupu yupu ara, dipkoprop Allah el yupu anya arye, teleb winilamlume. Anggunce Allah ati, diba tenelulum ninye anggun talima noutamak arye, Allah el yupu arye pil dosulule. Anirya ati ara, nunce Allah ati, moronyap talak nirya ara, anggunti tenebibirye, Allah ati, “Telebe,” nyabuka morosenyabe.
Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.
Allah arye tilila yupu pia kum nyalule. Aning-aning kabul kum kwepdeiamuk talak ara, “Bol kobuka pia kam una deiyok ning arepnamsine,” nyabuka nyalilamsuke. Nun nirya arye, kanye teniltona kum aryuk, ‘Dipkoprop pia kam un ning arenamsil’ tenen, dib tenebuka dinauk unyabe. Wininyaba deice ara, nun dib tenen ning ap, kel bikinyap ning ap, ulule. Yuk deiyok ton kume.
Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.
Ilil kum unamsil bukni, anggun talima noutamak ara, ‘Yesus Kristus na Deiyoknye eluk unamnile’ tenen, wibuka kintinilinamlulume. Anggun kanye talima ara, Yesus deiceuk delinamlulume. Sik asilenamsiak nang nirya ati ara, ‘Allah arye lyepnamnil’ tenen, ‘El deice kanye delinuna ara, laka nyabuka deipnamne’ tenen, kintinilinamlulume. Yesus el lyen yupu laka nyanamlum bukni, yuk nang nirya ati, si erebuka, nimalye aryuk nyanamlulume.
廣告