Kolose 1:2 - Eipomek

² Asekeipsinam surat ara, anggun Kolose mutuku umunye ninye ati sekeipsiname. Anggun Kolose mutuku ninye ara, Allah diba tenyamlum ati, el mapu kipdeipsuke. Winipsuk ati, anggunda malye una kum aryuk, diksukumuk ululume. Anggunda, Yesus Kristus ati diba tenebuka, el ap kanye talima dukdongobuka ululume. Nun Ni Kopropa Allah arye, anggun Kolose mutuku dib tenelulum kili sal ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba weik arye tabakuka arenamsil’ tenen, anggun Kolose mutuku ululum kili sal ati Allah morosunune.

Kolose 1:2 交叉參考

Mazmur 16:3

Tukwak mutuku noutamak unyakce, ance, ‘Wininamlulume,’ nyapdeiamsulum yupu talibuka, diksukumuk wininyak nang ara, pia kanye delinune.

Rasul 9:13

Yesus arye nyabukura, Ananias arye tamubuka nyabuk. “Anti dib tenelamkik nang Yerusalem mutuku unyak nang ati, anye birye ikin ning weik deililamuk. Tonda, el winilamuk ning nirya sikce nyabikura, kekepse.

Roma 1:7

Ati na kayapo, anggun Roma mutuku ululum nang kan-kan arye, Allah bico tenepsukce, ‘Na mapu unamak’ tenen, wibuka deiamsuk ninye, anggun nirya ati, asurat sekeipsine. Nun ni Allah ap, nun Deiyoknye Yesus Kristus ap, ‘Sik bitinye arye bico tenesirikirye, sik kanye aryuk melisirikirye arenamsil’ tenen, Allah morosunune. Tonda, nun ni Allah ap, nun Deiyoknye Yesus Kristus ap arye, anggunti melisirica deice arye, olana ap, walana ap, ikin kanye bona ap nirya, kum upliba, ‘Sik nirya kanye deibuka, lamapdongobuka neika unamak’ tenen, anggun Roma mutuku umunyak arye, dib tenelulum ninye nirya ati, Allah morosunune. Na Paulus birye nyapsine.

1 Korintus 4:17

‘Na wininye touk anggun babye, atonun wininamlulume,’ tenenun ati ara, narye Timotius dobuka, anggun dam dopdeipnusine. Timotius ara, pia kanye deibuka bico tenenun ati, elti, na mi atonun tenenune. Nun Deiyoknye Yesus el pil dona ati ara, pia batakana kumce, etekdop asa pil dolinye ulule. ‘Luba kina kum, aninguk wininamak’ tenen, Timotius arye, anggunti peterelyanamsile. Ara, na Paulus ap, Yesus Kristus ap, kanye talima dukdongobuka pia diksukumuk unye ning nirya ara, tuba tamubuka tonap peterepsilyopura, kel kinamlulume. Na wininye ning ap, narye mutuku-mutuku nirya dib tenebuka unyak ninye ati peterenye yupu ap ara, ansinibuka ulule. Timotius arye, anggun dam yalyopura, ayupu uk peterenamsile.

Galatia 1:3

Nun Deiyoknye Yesus Kristus ap, nun Ni kopropa Allah ap, sik bitinye arye, anggun Galatia mutuku tam diba tenelulum ninye ati, bico tenesirikirye, sik kanye aryuk melisirice ning ara, ‘Walana kumce, kanye deibuka telebuk unamak’ tenen, arisirikce ning deiyok ning ap, arisururak ning, ‘Aning nirya ara, tuba-tuba weika arye tabakuka arenamsirak’ tenen, Allah morosunune.

Galatia 3:9

Allah arye Abraham ati ayupu nyabuka anya arye, Abraham birye Allah ati, weik arye dib tenyamuk. Winibuka deice arye, Allah arye Abraham biti, teleb kipdeiamukce, diksukum kipdeibuk touk, wini talak babye yata ninye do nirya, Allah ati diba tenenyak ninye nirya ara, Allah arye teleb kilisulule. Allah el kanye aniryuk, nun diba tenenyap ninye ati, diksukum ninye kilisulule.

Efesus 1:1

Telebe, na kayapu, na Paulus birye, asurat sekeipsine. Allah arye, nati tenyamnukce, wipdeipnuk atonun, Yesus Kristus el yupu dobuka peterelbana ati, deiyok kounanye, Rasulnye unune. Asurat ara, anggun Efesus mutuku umunce, Allah ati dib teneplumba, elce wipdeipsuk ninye ati sekeipsine. Anggunda, Yesus Kristus ap talima dukdongobuka umunce, pia batakana kumce, eluk talibuka umunye ninye ati, asurat sekeipsine.

Efesus 6:21

Ara, na kayapu, nun weit atonunye Tikikus, nun Deiyoknye Yesus ap, kanye talima dukdongobuka ulirye, batakana kum, pia pi dobuka Yesus ati pil dolule. Tikikus birye, na wininye ning ap, imun unulul ning ap, nirya ara, anggun kekena ati, anggun dam yalirye, laka nyapsiliba kekepmunyopura, na unye ning nirya kel biknamlume.

Pilipi 1:1

Nun kayapu telebe. Nun bitinye Paulus ap, Timotius ap, asurat sekeipsiname. Nun bitinye ara, Yesus Kristus nun talima talisilya deice, el amu tam unyamce, el yupu uk kekebuka, el piluk donyame. Asurat ara, anggun Pilipi mutuku umunce, Yesus Kristus ati diba teneplumce, eluk talibuka, diksukumuk umunye ninye ap, Allah yupu peterena nang sik melina deiyok nang ap, Allah yupu aik pil melina don nang ap, anggun nirya ati, ayupu sekeipsiname.

1 Peterus 1:2

Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.

2 Peterus 1:2

Anggun nirya ara, Allah ap, nun Deiyoknye Yesus ap, akunum kel biknamluma anya arye, ‘Yesus ap, Allah ap, anggun ap, kanye dukdongobuka ululuma deice arye, telebuk unamlulum’ tenen, Allah morosunune. Ara, Allah arye bico tenepsilirye, talye melibuka arisulul ning ap, Allah ap, neikauk teleb ubuka umunce, teleb kanye bobuka una ati arisulul ning ap, ‘Weik upnin banamsil’ tenen, Allah morosunune.

Yudas 1:2

‘Allah arye wininamsil’ tenen, morosunun ning ara, laka anye nyapnusine. Ara, Allah bico tenepsilirye, yu ubuka wenena kum arye, ‘El kanye aniryuk melisilyeba, teleb kanyeuk bobuka telebuk unamlulum’ tenen, Allah morosunune. Tonda, ‘Anggun kanye, Allah el nong deiceuk deipmunce, yuk nang nirya ati bico tenebuka, melilanauk wininamlulum’ tenen, Allah morosunune. Allah wenena kum arye, talye melisilye ning ap, kanye deibuka unamlulum ap, bico tenebuka melilanauk wininamlulum ap, Allah deice anggun kanye deipnalum ning ap, ‘Anirya ara, weik upnin banamsil’ tenen, Allah morosunune.

Wahyu 1:4

Amapo, na Yohanes arye, anggun Asia tam noutamak bukni, Allah diba tenebuka, tekbarye mutuku ululum ninye ati, “Telebe,” nyapsince, abuku sekeipsene. Na Yohanes arye, anggun Asia tam ululum ninye ati tenenirye, Allah morosunun ning ara, nyapnusine. Ara, Allah el kanye aryuk bico tenesilirye, melisilye ning ap, kanye imun kanye bona kumce, kanye deibuka teleb una ati arisilya deiyok ning ap, ‘Weika arye arenamsile’ tenen, Allah morosunune. Anyapmasin ning arenamsiak ninye ara nyapnusine. Allah ara, minop talak akunum ulamuka ani, anoutam talak ulirye, aminyan sirya talak ara, yanamlanye birye arenamsile. Tonda, aning-aning deice tam ulirye, weik Ninye Deiyoknye una ati, weik buna ning deice bukliba, el urasin tam ara, Allah el melina dib kanye tekbarye bunyake. Sik adip kanye arye ton arenamsiake.