Keluaran 3:6 - Eipomek

⁶ Nyabukce, Allah arye Musa biti, ayupu ton nyabuk. “Nara, an apu yapu Abraham ap, Isak ap, Yakub ap ati, sik melipnin yangalamsinye bira, na akunume.” Nyabukura, Musa arye, ‘Se’ tenen, el urasin lelipdobuk. Winibuka deiyok ara, ‘Kume Allah ara, na ilil’ tenen, ‘Kum eiptinye’ tenen, lelipdobuk. El ilil weik ubuk.

Keluaran 3:6 交叉參考

Kejadian 12:1

Aminyan ara, Allah el si Yahweh arye, Abram biti nyabuk. “Abram anda, an ulyam mutuku ap, an yala nang ap, an ni koprop aik unyak nang ap, anggun mapu silip nirya batakuka, narye nuknamkin mutuku binalame,” nyabuk.

Kejadian 12:7

Abram bira More mutuku biyukba, Allah el si Yahweh arye, Abram dam yanuka tikukce, ayupu nyabuk. “Abram, ance deipminyeba, dadeipdanin balamica ani, dadeipdanin binamak mapu ati, amutuku nirya arepnamne,” nyabuk. Amutuku ara, Allah arye, Abram dam yanuka tikukce, ayupu nyabuka ati, Abram birye, Allah el si Yahweh ati, el si erena ap, el arena ap ati, pala keil dobukabukce, keil yangapdeibuk.

Kejadian 17:3

Nyabukura, Abram kekebukce, ‘Se, na ni Allah ati, si ereipnun’ tenen, tuku deice sakuka mabukce, kisok kanupdongobuk. Winibukopura, Allah arye, ayupu ton dukdongopbuka nyabuk.

Kejadian 24:12

Winibukce, Allah el si Yahweh ati, morobuk. Na ni Allah, an si Yahweh ati moropmakine. Anda na deiyoknye Abraham arye si erekulul Allah, ance melipnutumba, ‘Isak dopnamtu kil eiptinye’ tenen, moropmakine. Tonda, na deiyoknye Abraham biti, ‘Bico tenebuka meliptume’ tenen, moropmakine.

Kejadian 26:24

Alukunyan noutam ara, lengdar mapmok deice arye Allah el si Yahweh arye yanuka nyabuk. “Anda ilil una kume. Nara, an ni koproba Abraham birye, si erebuka kilamnuknye Allah unune. Nati, pil dolamnuknye Abraham biti, kanye deiamsirye, nyalin yupu nyalamsa ati, narye melipkineba, ance deipminyeba, dadeipdanin balamikca ani, aminyan dortalak nirya unamak ninye, an mapu pia weik unamake. Tonda, anti teleb kipdeipkiniba, telebuk unalame,” Allah arye, Isak biti nyabuk.

Kejadian 28:13

Tonda, ayo moromna lilun tam ara, Allah el si Yahweh arye, ei tikukce, nyabuk. Nara, an apu koproba Abraham ap, an ni koproba Isak ap arye, na si erenurudaknye, Allah, na si Yahweh aunune. Anda amapmalam sukum arye, otam nirya arepnamkine. Tonda, ance deipminba, dadeipdanin banamak nang babye, atuku talipnamake.

Kejadian 28:17

Nyabukce ilil ubukba, ayupu ton nyabuk. “Se, amutuku ara, weik mambul mutuku atia. Ara, talye mutuku kum bukni, Allah el ulyak atonun, tonda im deice welebana bisik bublan dam atonun ulule,” nyabuk.

Kejadian 31:42

Ura, na apu koproba Abraham arye, si erelamuk Allah, tonda na ni koproba Isak arye, ‘Elda weik mambule’ tenen, si erelamuk Allah ara, elce kum meliamnutu toura, na kele. Ance nati, “Talya urdemuk bilyame,” nyapnutumba, talye urdemuk winiptinye. Aning-aning nirya kum winipnutue. Bukni, Allah arye, na ikin ulamnuk ning ap, na babye taruk arye, weik pil dolamse ning ap, dinulule anya arye, ambusum lukunyan noutamak elce anti wenepmakile.” Yakub birye Laban biti, yu ubukba, nyabuk.

Kejadian 32:9

Utenebukce, ‘Allah melipnutu’ tenen, Allah ati morobuk. Elce morobuk yupu ara, ani. “Se, na ni Allah, na apu yapu Abraham ap, Isak ap, an siuk erebuka, si erelamkirik Allah ulyame. Na nie, anda Yahweh arye nyapnulume, ‘An mutuku koproba tamubuka biminyopura, an yala nang ap neika unamlume. Winipminyopura, narye melikiniba, telebuk unalame,’ nyapnulume.

1 Raja-Raja 18:36

Elia Allah el yupu lak nyananye, aning nirya akunum winibuka sirya dakukopura, sik Israel nang arye, Allah el si erena ati, si eren keting, kam tuba ulamle ning obuka arelamik keting akunum ubuk. Ati Elia birye pala keil lelebuka yangeiamuk dam tikilbiyukce, Allah ati morobuk. Elia birye nyabuk. “Nun ni koprop Allah an si Yahweh ati moropkine. Anda, nun deiyok nang Abraham ap, Isak ap, Yakub ap ati pia kalikuka melilamlumba, sikce an si erepnin yangalamkike. Na ni Allah anti moropkine. Asum ara, ‘Awinipman ning dinmak ninye nirya arye kel biknamak’ tenen, moropkine. Ara, winipmap ning nirya ara, ance nyapdeiamnulum atonunuk winipmane. Israel ninye dam ulyam Allah ara, an tonoka. Tonda, nara an amu tam unirye, an pil donanye unune. ‘Arup sum ara aning nirya kel biknamak’ tenen, moropkine.

1 Raja-Raja 19:13

Elia anyabuk yupu akunum kekebukopura, el ongolamuk cang baju kwiribuka, asok deice siknipdongobuk. Akunum siknipdongobukopura, akeil deiya unmokak arye kubuka, akeil dupak binuka tikukba, ninye yupu atonun arye nyabukba kekebuk. Ara, “Elia anda yata deiyok ati, amutuku yanmalam do?” nyabuk.

Nehemia 9:9

Nyabikce, ayupu ton dukdongobuka nyabik. Allah ance nun apu yapu Mesir mutuku noutam pil dolamikce, ikin kanye bobuka ulamik talak ara, an elilamlumce kel bikamlume. Tonda, nun apu yapu laut mekwen Teberau dam engebuka malye yupu nyanmekba, kekamlume.

Ester 3:4

Ura, atalak-atalak nirya ara, el winibuk ning nirya ati, sik yuk deiyok nang arye Mordekai biti, “Yata deiyok ning ati, nun ni Raja Ahasyweros yupu yaniltaleam do?” nyabuka asipdeyik bukni, elda pia kum kekelamuk. Tonda elce, “Kume, nara Yahudi yalanye ununa ati ara, talye tukwak nang ati, gutam tuku dipdongobuka, kisok kanupdongobuka, si kum ereptinye,” nyabuk. Nyabukura, sikce ayupu bobuka, Mentri Haman dam nyalbiyik. Ayupu laka nyabika deiyok ara, ani. Ara, Mordekai birye, “Nara Yahudi yalanye ununa ati ara, talye tukwak ninye ati, gutam tuku dipdongobuka, kisok kanupdongobuka, si kum ereptinye,” nyabuk. Ati ara, sikce, ‘Binuka nyabikba, Haman birye ayupu bikuka kekebukce, yata yupu nyapnamle do?’ tenen, nyalbiyik.

Mazmur 132:2

Tonda, Raja Daud birye, Allah Yahweh anti, nyalin yupu ton nyapdeipkuke. Allah anda, aning-aning nirya deice tam talibuka umince, Pia Mikip Weik Allah ulyame. Tonda, ance nun apu koproba Yakub biti, pia melilalumnye ulyama ati, Daud birye, “Winipnamne,” nyabuka, nyalin yupu nyapdeiamkuk. Nyabuka, Daud birye nyapdeipkuk yupu ara, ani.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Keluaran 29:45

Winibuka unirye, nara, na mapu koprop Israel ninye, sik unyak kan-kan uk unamne. Na ap, sik ap, neika unamabe. Nara winibuka unirye, sik ni koprop, Allah Yahweh uniba, sikda na mapu koprop unamake.

Keluaran 3:16

Nyabukopura, ayupu ton nyabuk. “Ura, bimince, Israel nang wisi-wisi nang, deiyok nang nirya bulubuka deipmince, nyapnamlyame. Nun apu yapu pununa ninye, Abraham ap, Isak ap, Yakub ap, kalikuka meliamukba, el si erelamik Allah Yahweh arye, na dam yayukce nyapnuk. Ura, sik Mesir mutuku ninye arye, ikin ning weik, anggun nong deice delilamsikba, mambul kanye bomlum ning ara, na tuba elinun anya arye, na kele.

Keluaran 33:20

Nyabukce, ayupu ton nyabuk. “Na dirina ap, na teleb unun ning ap, eipnalam bukni, na urasin ara, ance lakoprop kum eipnutume. Ara, talye ati kume. Deiyok ara, na urasin lakoprop kibuka eipnutunye bira, yata wiribuka kam tuba uptu do? Kume, anye bira dibina uka,” Allah arye nyabuk.

Keluaran 4:5

Kama dayukba, Allah el si Yahweh arye ayupu ton nyabuk. “Awinipnamle ning ara, winipminba Israel ninye eibicopura, ‘E diba, nun ni koproba Allah, Musa dam yanuka tikukba eibuka ati, dib nyapmasile. Dipkoprop Allah el si Yahweh arye, nun apu yapu nang Abraham ap, Isak ap, Yakub ap ati, kalikuka melipnin yangalamuk Allah ara, Musa dam akunum yanuka tikukba eibuke,’ utenebuka, kel biknamake.” Allah arye nyabuk.

Yeremia 24:7

Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.

Yeremia 31:33

Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.

Yeremia 32:38

Wini talak ara, sikda na mapu koproba unyakbuk, nara anggun ni koproba Allah unamne. Naryuk anggunti, kalekuka melisinirye, teleb kilinamsine.

Yehezkiel 11:20

Aning nirya wininamna deiyok ara ani. Ara, sik anang ara, na Allah arye, “Aning ara wininamlume, aning ara pia kum wininamlume,” nyapdeipse yupu nirya ara, pia dobuka talibikirye, moubuka teninamake. Tonda, aninguk talibikirye, moubuka unamake. Winibuka, teleb kilisinyeba, diksukum ubicopura, sikda dipkoprob na mapu koproba unamake. Tonda, na Allah ara, anggun ni koproba, pia unamne. Sikda, na siuk erebuka unamake.

Matius 17:6

Allah arye nyabukba, Yesus el mapu awinilye nang kekebikce, ilil weik ubukba, kanupdongobikce tukwak amubuka mabik.

Matius 22:32

‘Abraham ap, Isak ap, Yakup ap, si erenyak Allah ara, na aunune,’ nyabuk. (Keluaran 3:6) Anggun tenipdelulume. Nun kele. Musa arye ayupu nyapdeibuk talak ara, Abraham ap, Isak ap, Yakup ap, sik nong akunum diamik. Dibice ninye arye Allah si kum ereptinge bukni, Musa arye, “Awinilye nang, Allah el si erenenyake,” nyabuka deice arye, ‘Anang ara tuba kam unyake’ tenen, tuba bikinyabe. Allah arye diamice ninye kum talilule. Kam unyak ninyeuk talilule. Aning ati ara, anggun Saduki nang arye, ‘Diamice ninye ila tamubuka kam kum buknamake,’ tenemunya ara, anggun pia malye tenelulume. Aning ara, dib kume. Walwal aryuk tenelulume. Yesus arye sik Saduki yala nang ati nyabuk.

Markus 12:26

Yesus ayupu nyabuk ning ara, yupu tonap, nyabuk. “Winira, ‘Diamikce ninye kam kum buknamake,’ tenelulum ning ara, laka nyapnusine. Musa sekamuk yupu noutamak ara, tatca bok ning kan-kan uku buk dinmokak, Allah arye Musa nyabuk yupu ara, kum nyalamlumce aning kel kum kiplum do? Tatca bok ning kan-kan uku buk dinmokak, Allah arye Musa ati nyabuk. ‘Abraham ap, Isak ap, Yakup ap, si ereninyak Allah ara, na unune,’ nyabuk.

Lukas 20:37

Winira, ‘Diamikce ninye kam kum buknamake,’ tenemunya ara, laka nyapnusine. Musa sekamuk yupu noutam ara, kirikna taica ning kan-kan uku buk dinmokce, Allah arye Musa ati nyabuk yupu deice arye kel bikilulume. Musa arye, Allah ati ayupu nyamuk. “Abraham ap, Isak ap, Yakup ap arye, Allah el si erenyake. (Keluaran 3:6) Erenyakura, Allah arye akekelule,” nyabuk ara nun kele. Musa arye ayupu nyabuk talak ara, Abraham ap, Isak ap, Yakup ap, sik nong akunum diamik. Dibikce ninye arye Allah si kum erepting bukni, Musa arye, “Awinilye nang, Allah si erenyake,” nyabuk. Ayupu nyabuka deice arye, awinilye nang ara sik kanya im deice tuba kam unyak ning ara, bikinyabe.

Lukas 5:8

Simon ap, el kayapu nang nirya ap arye, amekin bal weik dopropmekce ngalukunmek. Ngalukunmekba, Simon Peterus arye aning nirya eibuk ati Yesus dam mek liya yo deice kutam dipdongobukabukce Yesus ati yupu nyabuk. “Se, na deiyoknye Yesuso, nara malye wininanye ununa anya arye na batakuka yukak binulyame” nyabuk.

Rasul 7:32

El nyabuk yupu ara, ani. ‘An apu yapu talyamik akarye si erelamik Allah ara, na unune. Abraham ap, Isak ap, Yakup ap, sik talyamik akarye si erelamik Allah ara, na unune, nyabuk.’ (Keluaran 3:6) Nyabukura, Musa kekebukce ilil weik ubukura, ‘Tonap aning kum dipdenune,’ tenebukce yok sirim talibuk.

Rasul 7:34

Na mapu Israel ninye Mesir mutuku unyakbuk, sik nong deice ikin ning delinyakce daraldongonyaka ara, na dipkoprop elinune. Tonda, sik ikin kanye bobikce malye nyanyak ning ara, na kekepsirye, ‘Sik lyepnamne’ tenen, kolukuka yanmane. Ati, wini talak ara, narye tamubuka Mesir mutuku dopkwetepnamakine, nyabuk.’ (Keluaran 3:5-10) Allah arye Musa ati nyabuk yupu ara, Stefanus arye dobuka aSandeheren nang ati nyabuk.

Ulangan 6:3

“Anggun Israel ninyeo, na yupu moubuka kekepnululume. Anyapnusin yupu nirya ara, moubuka kekepnumunce, pia talibuka wininamlume. Winipmunyopura, amutuku noutamak unamlum talak nirya ara, aning-aning nirya telebuk unamsile. Tonda, anggun ni koproba Allah, el si Yahweh arye, anggun apu yapu ati, nyalilamuk touk, anggun yala nang amutuku weik ubikirye, bona utotoa talin nang weik unamlume. Ara, Allah arye domon yupu nyabuka deice, amutuku ara, sapi basam weik ulamlaba, moum yung weik upnamle. Tonda, mong mek ap arepsiniba, dipmunyopura, kanye deibuka unamlume. Adomon yupu deiyok ara ani. Amutuku noutamak upnamle ning nirya ara, weik uplirye, telebuk unamla ati nyapsine.” Musa birye, Israel ninye ati nyabuk.

Ibrani 11:16

Bukni, aning ara pia kum winilamikbuk, ‘Nunda pia teleb mutuku, im deice mutuku binuka unamap’ tenen, weika arye patalamukba, kintinibuka dinauk ulamik. Aning ati ara, Allah arye aninye ati, pia teleb weik asik akunum kintinibuka ati, alye una kum diparyuk, “Aninye ara, na mapu kopropa unyake. Nara, sik Ni Kopropa Allah unune,” nyalule.

Ibrani 12:21

Winilamikba, amutuku uamuk ning nirya ara, pia mambul ulamukba, sik kisok kwisi mek bongobukba, ilil weik ubuk. Musa babye aning nirya eibukce nyabuk. ‘Se, na ilil weik upmanila ati, na nong nirya sirim talipmanile,’ nyabuk. (Ulangan 9:19)

Wahyu 1:17

Anye epsirye, mambul kanye bobuka, ‘Si erebuka kipnun’ tenen, el yan dam bisirye, gutam ap, kisok ap, tuku deice dipdongobuka buksirye, pia yupu kum asa bukse. Winibuka buksibuk, anye el sirik taruk arye, na nong deice deibuka talipnukce, ayupu nyapnuke. Ara, ani. Anda ilil una meme. Aning-aning nirya, min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya, akunum kum uplye talak babye, na pia kam unamne anya arye, nara Sirya Dakna Deiyoknye unune.

Hakim-Hakim 13:22

Akunum tenebuka, kel kibukopura, Manoa birye el kil ati nyabuk. “Se akilo tuba, nunce Allah el nong eipmanama ati, wini talak dipkoprob dipnaname,” nyabuk.