Ibrani 4:9 - Eipomek

⁹ Bukni, Allah arye, aning nirya akunum ubukba, aminyan talak tonap, “Asum ani,” nyabuka anya arye, adeice arye kel kinyabe. Allah el mapu ati, dikdik sena kintinipsuk mutuku ara, tuba aulyeba, dolonamake. Ara, Allah arye like tekbarye deice arye, pil dopra balamuka ani, tekbarye sum akunum ubukba, dikdik seamuk touk, adikdik sena atonun ton, tuba aupmasile. Allah ati diba tenenyak ninye arye, adikdik senak weknamakca.

Ibrani 4:9 交叉參考

Mazmur 47:9

Allah ara, im deice ulirye, ninye deiyoknye mambul bun ning, el si tahkta deice buklirye, ninye ayala-ayala nirya ati talilule. Pia telebak buklirye, mutuku-mutuku nirya unyak ninye nirya ara, talibuka usulule.

Keluaran 16:30

Allah arye nyabuka ati ara, atekbarye sum noutamak nirya ara, pil pia kum dolamikce, dikdik senauk ulamik.

Yesaya 11:10

Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.

Yesaya 57:2

Akunum dibice nang ara, sikda teleb aryuk, dikdik selbanyak ati, ikin kumce, teleb ukirye, talye kanye bobuka, tunim abuka unamake. Yata nang do nirya, sikda, Allah arye, ‘Aning ara wininamlume, aning ara pia kum wininamlume,’ nyasilye yupu moubuka talibikirye, diksukumuk unyak nang ara, ikin kanye bona ap, kanye tenina ap pia kumce teleb ukirye, sik mapmace talak ara, sik amsuna deice arye, dikdik sebikirye, teleb kibuka manyake.

Matius 1:21

Maria arye sal mi deipnamle. Deiplyopura, el si Yesus nyapnamlyame. Yesus nyapnamlama deiyok ara, ‘Elda Ninye Lyenanye ulule,’ tenena ati nyapnamlyame. Allah el mapu nirya sik malye wininyak ning ap, malye tenenyak ning ap ati, ‘Allah arye wenebuka oplyak’ tenen, Yesus arye aning nirya kum daneiplirye, ninye weike lyepnamla ati, ami el si Yesus nyanamle.” Malaikat arye Yusuf ati nyabuk.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

Ibrani 11:25

‘Teleb ning ara, Mesir mutuku nang arye, Allah el na tenen ninye, Israel ninye nirya ati, ikin ning sik nong deice delilamak touk, na nong deice delina babye telebuka. Malye wininyak ninye arye kanye deibuka, malye-malye wininyak ning ara, tia talak ati, na ap winiptibye bukni, aning ara teleb kum ati, kum wininamne,’ tenyamuk.

Ibrani 3:11

Winibuka malye weik winilamika ati, narye sirya talak ulamik ninye ati, yu weik ulamnukce atalak noutamak ara, ayupu ton nyapse. “Atalak malye winin ninye nirya ara, narye sik ap, na ap dikdik sena ati, kintinipdeipsi mutuku ara, sik pia kum dolonamake,” nyapse. Allah arye, Israel ninye ati nyabuk. (Mazmur 95:7-11)

Ibrani 4:1

Ura, na kayapo, Allah arye el mapu nirya ati, “Na ap, neika dikdik sena ati, kintinipdeipsise mutuku ara, dolonamlulume,” nyabuka, nyalilamsuk yupu tuba aupmasila anya arye, aning ati ara, kanye moubuka unamabe. Ara, aminyan talak nun kan-kan arye tonoknye ati do, tonok kil ati do, Allah arye, “Kume, aninye ara, na nyamse touk kum wininyaka anya arye, na ap neika dikdik sena ati, kintinipdeipsi mutuku ara, kum dopdoptinge,” nyabuka, ‘Yupu lepsisikuka bokeipsilyak’ tenen, kanye moubuka unamabe.

Ibrani 4:10

Allah arye dikdik sebuk atonun nyapmana ara, laka nyapnusine. Ara, Allah el pil dolamuka ani, sirya dakukopura, dakukce dikdik sebuk touk, yata ninye do nirya, Allah arye dikdik sena ati, kintinideipsuka dolonyak ninye arye, sik pil donyak babye batakikirye, dikdik senamnyake.

Ibrani 4:3

Ura, nun akunum diba tenenyap ninye ara, Allah arye nyalilamsuk atonun, dikdik sena ati, kintinipsuk mutuku ara, wekenyabe. Allah arye nyabuk ning ara ani. ‘Malye winilamik ning ati ara, yu weik ulamnuk talak ara, ayupu ton nyapse. “Atalak malye unyak ninye nirya ara, na ap dikdik sena ati, kintineipsi mutuku ara, pia kum dolonamake,” nyapse. Allah arye, Israel ninye ati nyapdeiyamuk.’ (Mazmur 95:11) Allah arye ayupu nyabuk bukni, ayupu nyabuk talak ara, elce aning-aning nirya memebuka, sirya dakuk talak arye ayupu nyabuk. El pil nirya akunum sirya dakukce ayupu nyabuk.

Ibrani 4:8

Ura, Allah arye, “Na ap dikdik sena ati, kintinipdeipsi mutuku ara, yuk ninye ton dopdobikirye, weknamakca,” nyapmasunu ara, talye ati kum nyapsine. Yosua bira menekuka balamukba, Israel ninye arye, adikdik senak akunum weknamtingtoura, Allah arye aminyan talak noutam arye, yuk sum ati yupu kum nyapdeiyamtue.

1 Peterus 2:10

Minop ara, pia mambul ninye kum ulalum bukni, wini talak ara, ‘Allah arye el ‘Na’ tenen ati, el mapu akunum kipdeipsuke. Aning atouk, minopce wenena kum arye, namin kipsilirye, talye melibuka lyesulul ning, minop talak kum dololalum bukni, wini talak ara, aning akunum dololulume.

Wahyu 14:13

Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse.

Wahyu 21:4

Allah arye aninye nirya ati, kanye imun ning nirya kum kipdeipliba, pia telebuk unamaka anya arye, tuba tonap pia kum engenamaka ati, sik asing maka cepdeipnule. Minop talak ulamuk ning nirya, akunum kum danmala ati, dipna ap, ninye dipnaba engena ap, kanye imun upsiliba engena ap, uk disilya deiyok ning nirya ap, amalye ning nirya ara pia kum upmala ati, tonap pia kum unamle,” Allah arye nyabukba, kekepse.