Ibrani 2:10 - Eipomek

¹⁰ Yata ning do nirya, aulul ning nirya ara, Allah el si erena ap, el kina ap, ati ulule. Tonda, Allah arye aning-aning nirya kwepdeibukba, el mikip deice aryuk ulule. Allah arye, ‘Na mapu weika arye lyepnirye, na pia teleb ununak neika unamap’ tenen, kintinina ati, pil dolamuk ning ara, pia teleb piluk dolamuk. Ara, Allah el mapu lyena ati, Ninye Lyena Deiyoknye Yesus ara, el nong deice ikin ning weik deibukba, kanye imun kanye bobuka ulamuk. Ulamuka deice arye, Yesus el talima wisibukba, Allah arye Yesus ati, pia teleb kipdeibuk.

Ibrani 2:10 交叉參考

Kejadian 18:25

Se, na nio, sik teleb wininyak nang ap, malye wininyak ninye ap, likina kumce, talye mangkau arye, oltakana ara, kum winipnalam darebe. Yata deiyok ati, teleb ninye ap, malye ninye ap atonunuk winipnamalam do, tenepne. Tukwak mutuku im sirya, mutuku sirya nirya unyak nang ati, Yupu Bokolina Deiyoknye birye, diksukum ning kum winipnamalam do? Na kanye ara, telebuk winipnalame,” nyabuk.

Amsal 16:4

Ayupu ara talye ati kum nyapsine. Allah Yahweh arye, ‘Wininamne, wininamne,’ tenebuka, winilul ning nirya ara, minop talak arye, ‘Aning ara winipnamne,’ tenyamuk touk, aning-aning nirya kwepdeibuk ati, aning nirya telebuk ulule. Ara, malye ubuka unyak nang arye wininamak ning babye, Allah arye, ‘Winibuka malye upnin banamake’ tenen, akunum kintinibuka tenelamuk bukni, aminyan sirya talak ara, Allah arye amalye unyak ninye ati, wenebuka oplirye, uku dilye mutuku dopkwetepnamle.

Yesaya 43:21

Aninye ara, kwepdeipsirye, ‘Narye sikti, kanye deipniba, sikce na si erebuka mot senamniyake. Winibuka nyalamikiba, yuk mutuku ninye kel biknamak’ tenen, Israel ninye kwepdeipse. Allah arye nyabuk.

Yesaya 55:4

Narye, ‘Dipkoprop Daud bira, Israel ninye, anggun ninye deiyoknye Raja unamle’ tenen, wipdeiamse. Tonda ‘Yin talin nang, sik weik deiyoknye unamle’ tenen, wipdeiamse. Ara, talye ati kume, Daud erepdeipsiba, aning nirya winilamuk ning deiyok ara ani. Ara, Daud erepdeipsiba, el winilamuk ning ara, ‘Ninye nirya eibikirye, na si ap, na mikip ap, moubuka kel biknamniak’ tenen, winyamse.

Hosea 8:10

Sikda, yuk pera mutuku nang ati, ‘Melipnamsiakʼ tenen, dengna ap, teleb ning ara, weik tonun binuka arenyak bukni, wini talak ara, narye anang nirya bulukapnirye, tonokak deipnirye, sik anang ati wenepnamne. Wenepnamne talak ara, pia una kum bukni, adiparyuk sik yuk-yuk mutuku ninye deiyok Raja nang ap, sik amu tam deiyok-deiyok nang ap arye, ‘Nunti dengna weik tonun arelyanganamsulume,’ nyabuka, ikin ning, sik Israel nang deice deibikcopura, sikda, ‘Se, yata wiriptibye do?’ tenen, kanye imun weik bobikirye unamake. Deiyok ara, aminyan talak, Asyur mutuku ninye deiyoknye Raja arye, sikti, ‘Dengna weik arelyanganamlume,’ nyaplirye, sikti, ikin weik deipnamla atia.

Mika 2:13

Atalak ara, narye lyepsinirye, bobinamsine. ‘Sik wenena ati, yuk pera mutuku bobiniba unamake,’ tenebuka kintinipsiba, yuk mutuku ninye arye, sik malye kibika deice arye, anggun nong bobuka binamsikba, ulamlum mutuku arye bobuka, yuk teleb mutuku bobinamsine. Winipnamsen talak ara, yuk mutuku ninye arye, tapu koubuka, sikce bobinamsik mutuku noutamak arye, batakuka, anyasik-anyasik bisik bublan nirya, kukuka binamlume. Winibuka binamlum mutuku ara, anggun minop talak arye, ulamlum mutuku noutam uka. Narye arepsisiba, anggunce doproplumce, ulamlum mutuku, anggun mutuku koproba ati nyapsine. Anggun mutuku koproba tamubuka yanamlum talak ara, na Allah Yahweh, aniryuk anggun ninye deiyoknye, Raja talibuka unamsine. Ati anggun bimunce, unamlum mutuku ara, na Allah aniryuk, ‘Teleb bisik ara asukum,’ nyabuka melipsiniba, banamlume. Allah arye laka nyapdeibukba, nabi Mika birye sekuk.

Bilangan 7:15

Tonda, sapi basam yim winiryuk nepmalye ning tonok ap, domba basam yim tonok ap, tonda yim domba mi keting tamun tonok kiamuk ning ap, kintinibuk. Akam ning nirya ara, ‘Allah si erepnun tenen, aning nirya boyanuka arebukba, imam nang arye uku dabik.

Lukas 13:32

Nyabikura, Yesus arye anang ati tamubuka nyabuk. “Herodes ara, tenepce arye talye yupu nyaltakalulnye ati, na nyapnusin yupu dobuka, el dam laka nyalbinamlulume.” “Yesus arye anti nyakelule, ‘Narye, arup ap, ambusum ap, orsum ap ara, ninye talyamuk isa yakuka dolkwetena ap, ninye uk kwetena ap, unamne. Winipnin balamnya ani, na tenepse pil sirya binuka daknamne,’ nyalule. Yesus arye ayupu nyapdeibuk. Ayupu bobuka, Herodes dam nyalbinamlulume,” Yesus arye nyabuk.

Lukas 2:14

“Allah weiknye im deice ululnye bira, pia telebe. Yata ninye do nirya, Allah arye kanye deilinamle ninye nirya ara, teleb updeiplibuk, mambul kanye bona kum arye, kanam kanye bobuka telebuk unamake,” nyabik.

Lukas 24:26

Ninye weik lyeplirye, sik kanye talima talinamlanye, Kristus ara, elti, Allah arye utenebuk. Ara, ‘Sik malye nang arye el nong deice ikin ning weik deibiki bukni, donmalya ani, diplirye, kam bukuka pia teleb dirinak im deice welepnamle,’ tenyamuk ning ara, kum tenepmalumce nyapmanurum do?” nyabuk.

Lukas 24:46

Tonda, ayupu nyabuk. “Allah yupu noutamak nati sekamnik ning ara, ani. Ara ninye weik lyeplirye, sik kanye talima talinamlanye Kristus ara, el nong deice ikin ning weik deibiceura, daunmalya ani, diplirye, like winilye mapmalya, kam buknamle.

Yohanes 11:52

Tonda, Yesus arye Yahudi yala ninye, sik lyena ati dipnamuka ara, sik tibuk kum bukni, Allah el mapu yuk yala ninye nirya, mutuku-mutuku nirya, yuk-yuk daulamik bukni, sik ansinilina ap, talima dukdongobuka, tonok nong atonun kilina ap ati, Yesus dipnamuka ati ara, laka nyabuk.

Yohanes 19:30

Arebikbuk, Yesus arye, aning akunum mitik anun dibukopura, ayupu nyabuk. “Winira akunuma,” nyabukce, adiparyuk el ngang yalyaling apsakukce dibuk.

Rasul 3:15

Anggunce yupu nyapdeiplumura, kam una deiyok teleb ning arisulula deiyoknye, sik malye nang arye dobuka obik. Sik obik bukni, Allah arye anye Yesus el kam bukeibuk. Nunda, anirya dilamubu nang unmabe.

Rasul 5:31

Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.

Roma 11:36

Aning ara talye kum nyapne. Deiyok ara ani. Allah arye aning-aning nirya kwepdeiamukba, ulul ning nirya ara, Allah el mikip deice aniryuk tuba teleb ulule. Tonda, sirya talak ara, elcuk aning-aning nirya deice tam erebuka ulirye, aning nirya talinamle. Aning nirya ara, el ninguk unamle. Aning ati ara, ‘Ninye im sirya, mutuku sirya nirya arye el siuk erebikirye, Allah ati, “Elda pia telebuk ulule,” nyabuka nyanamak’ tenen, Allah moronune. ‘Dipkoprop anyapman touk pia aunamle’ tenen, Amin nyapne.

Roma 9:23

Kume. Nun tukwak unyap ninye nirya ati, adiparyuk oplopsutu bukni, minop talak ara, ‘Aninye ati, sik malye ning namin kipnirye, namin arye unamne. Winipnyopura, na pia telebnye unye ning, eibuka kel biknamniyake. Sirya talak ara, aninye ereipnirye, pia teleb kipdeipniba, sik ap na ap neika unmabe,’ tenyamsuk. Utenyamsuka ati, adiparyuk wenebuka kum oplomsuke.

1 Korintus 2:7

Kume, nunce weik kel bikne yupu nyanyaba ara, Allah minop talak arye duknyamuk ning ati nyapsine. Allah arye aning-aning nirya min kum kwepdeiamuk talak arye, nunti utenyamsuk. ‘Aweik kel bikne ning deice arye, na ap, na mapu ap, talima dukdongobuka ulamibya ani, na pia teleb unye touk, sik babye, atonun teleb kipdeipnirye, na ap neika unamake. Winipnyopura, aninye ereipnamne,’ Allah arye, aning tenelamsuke.

1 Korintus 8:6

Sik dib tenena kum ninye ara, wininyak bukni, nun dib tenenyap nang ara, nun kele. Nun Ni Koprop Allah, el tonok ulule. Yuk ton pia kume. Elda Kam Una Deiyoknye ulula anya arye, el deice aryuk aning-aning nirya kintinipdeiamsuke. Winipsuka ati ara nunce, ‘Nun kam unyaba ara, Allah el si erena ap, el piluk dona ap ati, wininamabe’ tenen, unyabe. Aning atonun, nun Weik Ninye Deiyoknye tonokuk ulule. Elda, Yesus Kristus ulule. Allah arye nyabukba, Yesus pil dobuka deice arye, aning-aning nirya kintinibuka deiamsuke. Tonda, Yesus el pil dopsuka deice aniryuk, lyepdeipsuka ati, el mikip deice aryuk kam unyabe.

2 Korintus 3:18

Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.

2 Korintus 4:17

Tonda, nun ilil arye malye kanye kum bonyaba deiyok ton ani. Ara, kanye imun kanye upsile ning nirya ara, dipkoprop tia talakuk usulule. Tonda, kanamuk usulule. Kanye imun ning usilya deice arye, aminyan pia kam unamabak ara, pia teleb unamsile. Aning ara, weik mambul anya arye, wini talak ikin usilye ning ara, nun kanye ara, ‘Aning nirya ara, dipkoprop pia kanam atonunuk usulule. Aning ara, mambul kume,’ tenenyabe. Weik mambul ning ara, Allah ap neika pia kam unyabbuk, weik mambul ning arenamsil ning ara, kum nukmanto, pia weik arye arenamsile. Ati tukwak mutuku unyap talak, ikin usilye ning ati, ‘Aning ara, mitik mambul uka,’ tenenyabe.

2 Korintus 5:18

Aning nirya ara, Allah elcuk pil dosilirye, aresulule. Minop arye Allah yuk, nun ninye nirya yuk-yuk ulamuburye, el ap neika kum upmanto ulamubu bukni, Allah arye nun lyena ati, Kristus dopdeipsukba, el pil dopsuka deice arye, el ap ansinibdeipsukce, teleb kipdeipsuke. Ati wini talak ara, el ap neika uptibye. Allah arye wipdeipsukce, ‘Aninye nirya arye, na Allah ap, ninye ap ansinibuka neika teleb una ati, na laka teleb yupu nirya laka nyabuka peterepra banamake,’ tenepsukce, wibuka deipsukce, apil arepsuke.

2 Korintus 6:18

Dopropsinirye, nara anggun ni koprop unamsine. Anggunda na mapu ap, na kil mapu ap unamnulume. Nara, aning-aning nirya bisibuka, deice tam mikip weik ununye birye nyapsine,” na Allah arye nyapsine. (2 Samuel 7:8) Allah arye nyapdeibukba, Samuel arye sekeiyamsuk yupu ara, na Paulus arye nyapsine.

Galatia 3:26

Ura, na kayapu, wini talak ara, anggunce Yesus Kristus ati diba tenepluma deice arye, Allah arye el mapu akunum kipdeipsuke. Wini talak ara, dipkoprop el mapu ululume.

Efesus 2:7

Ara, Allah arye, Kristus ap, kanye talima dukdongobuka kam bukeipsukce, im deice tam bukeipsuka deiyok ara, ani. Ara, Allah arye, utenyamuk. ‘Aninye lyepnirye, kam bukeibuka im deice deipnyopura, atalak arye, diprongobuka, aminyan doyanamle talak, sirya talak unamak ninye nirya, kel biknikirye, nyanamniyake.’ “Kume, nun lyena ati, Allah arye bico tenepsilirye, el kanye aryuk talye arisilye ning ara, nukmanto kume. Pia weik arye, talima aresulule. Kristus arepsukura, elce pil dobuka, lyepsuka deice arye, akunum laka kipsuka ati, aning akunum bikmabe,” nyabuka, ‘Na si erepnamniyak’ tenen, Allah arye, aning nirya pil dopsukce, lyepsuke.

Efesus 3:10

Atalak noutam nirya, Allah arye, ‘Wininamne,’ tenyamsuk ning ara, winira akunum lak kipmasile. Ara, ani. Allah arye, lyepsukura, elti, dib tenenyap ninye noutamak pil dosilye ning nirya arye, im deice unyakce, ninye deiyok nang ap, im deice mikip weik unyak nang ap, eipsikirye, ‘Se, Allah ara, aning-aning nirya moubuka teneplirye, pia weik mambulnye, ulule’ tenen, kel bikinamake.

Kolose 3:4

Winimunyopura, aminyan ara, Kristus arye, bol kobuka pia kam kilisululnye bira, Kristus tamubuka lakak nyasilyopura, Allah arye anggun ap, Yesus ap, lakak erepdeipsilirye, pia teleb kibuka, weik mambul kipdeipnamsile. Winipsilyopura, Yesus ap, weik dirina noutamak neika unamabe.

2 Timotius 2:10

Allah el yupu ara, kum sekdongopmanto ulula ati ara, yata ikin ning do nirya, kanye imun ning aupmanilya babye, aning tenena kum arye, apiluk donamne. Wininuna ara, talye ati kume. Deiyok ara, Allah arye minop talak, ‘Na mapu unamak’ tenen, wibuka deiamuk nang nirya ara, Yesus Kristus pil dopsuka deice arye, lyen ning kintinipsuk ning ara, ‘Dipkoprop dopropnamak’ tenen, apil kum batakanune. Tonda, ‘Doprobikcebuk, aminyan talak Allah arye teleb updeipsilibuk, oyanamle talak noutamak nirya ara, telebuk pia kam unamak’ tenen, ikin unilya babye, pi dobuka pia pil donune.

Ibrani 12:2

Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

Ibrani 6:20

Yesus ara, Pia Teleb Aik menekuka biyuk ning ara, nun lyena ati wekuk. Ura, Yesus ara, Allah dantam, ninye dantam, ansinilina weik deiyoknye akunum upsuke. Ara, Melkisedek arye apil dolamuk touk, Yesus ara, Melkisedek el yala atonunye ubukce, Allah ap, nun ap, teleb kibuka neika una ati, ansinilina deiyoknye pia unamsile.

Ibrani 7:26

Ura, nun malye winin ninye kum melipdanmanto unyaba ati, nun patasilye touk, anye birye melibuka lyesulule. Allah ap, ninye ap dana-dana ansinilina deiyoknye, nun deiyoknye Yesus ulul ning ara ani. Elda, pia malye una kumnye ulul ati, malye winin ning tonok babye kum winilule. Elda pia malye una kumnye ulya ati, sik malye winin ninye yuk, el pia yuk ulule. Aning-aning nirya outam aubuk bukni, Allah arye Yesus dobuka, im deice tam erebuka deibukba, weik mambulnye ulule.

Ibrani 7:28

“Nun malye unyaba, patasilye touk melibuka lyesulule,” nyapmanu ara, deiyok ton ani. Ara, Musa sekamuk yupu deice arye nyalul touk, ‘Allah ap, ninye ap ansinilina deiyok nang kibuka apil donamak’ tenen, wibuka delinyake. Bukni, anang ara, sik babye tukwak nang anya arye, malye winipmanto nang ton unyake. Bukni, Musa sekamuk yupu, mem yupu akunum aribukba, daulamuka ani, keting tamun yupa weik akunum ubukba, aminyan ara, Allah arye, el winiryuk nyalilamsuk yupu deice arye, el Mi Kopropa wibuka deibukba, nun ap, Allah ap, ansinilina weik deiyoknye usulule. Yesus ara, malye winin ning kum winipmantonye ulule. Allah arye elti, pia teleb updeibukba, malye winin ning tonok babye kum winilule ati, pia telebnye ulule.

1 Peterus 1:12

Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake.

1 Peterus 5:1

Anggun kan-kan unyak ati, Allah yupu aik talina deiyok nang ati, ayupu ton nyapnusine. Ara, na babye Allah yupu aik talina deiyoknye birye, na nyapnusin yupu kekebuka, ‘Wininamlulum’ tenen, moropsine. Tonda, Kristus nong deice ikin ning deibikbuk donmoka ani, obikbuk dibuka ara, na asing arye akunum eipse. Tonda, Yesus tamubuka yanamle talak, Allah arye weik teleb ubuka mambul ning ap, dirina weik ap, upnamsil talak ara, na ap unamabe. Aning nirya wininye deice arye, na Peterus arye moropsine.

1 Peterus 5:10

Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.

Wahyu 4:11

“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.

Wahyu 7:9

Aning nirya akunum winibuka, eipsopura aminyan eipse ning ton nyapnune. Ara, ninye pia yupa weik, ninye arye kum nukmanto ninye bulupmekak, eipse. Aninye ara, tukwak mutuku im sirya, mutuku sirya nirya noutamak arye, asukum-asukum arye, dobuka bulubuka wekmek ak eipse. Ara ninye ayala-ayala nirya ap, ninye yupu ayala-ayala nirya ap, weik mutuku ninye negara-negara nirya ap, noutamak arye bokuka wibuka deipmekba, bulubuka unmek. Sik nirya ara, weik Ninye Deiyoknye bun ning deice bukmoknye ap, Domba Mi Atonye ap, sik urasin tam tikmek. Pia kurun baju ongobuka tikmikce, ‘Nun Ni kopropa si erepnamap’ tenen, sik taruk arye, kelapa bok talipmekce, kwakdubuka, si erenmekak, eipse.