Ibrani 1:2 - Eipomek

² Winilamuk bukni, wini talak ara nun sirya talak unyaba noutamak ara, Allah arye nunti, el Mi Kopropa deice arye, nyasulule. Allah arye el Mi Kopropa ati, ‘Aning-aning nirya dobuka arepniba, weik ninye deiyoknye ulirye, aning nirya pia talinamle’ tenen, wibuka deibuk. Tonda, Allah arye im ap, tukwak mutuku ap, aning-aning nirya ap, elce nyapdeibukba, el Mi Kopropa pil dobuka deice arye kintinipdeiyamuk.

Ibrani 1:2 交叉參考

Kejadian 49:1

Aminyan talak ara, Yakub birye el mapu nirya ati yukubukba, yayikopura, elce sikti, nyabuk. “Aminyan talak winipnamsil ning laka nyapnusina ati, na dam bulubuka bukmunyeba, ayupu nyapdeipnusine. Narye nyapsinye touk unamluma atia,” Yakub birye nyabuk. Nyabukopura, ayupu nyabuk.

Yesaya 2:2

Tonda, sirya daknamle talak ara, Allah el si erena ati, domik aik tuba aubuk mutuku deice ara, weik mambul mutuku unamle. Mutuku-mutuku nirya, weik mutuku aubuk bukni, amutuku tonok ara, weik mambul mutuku kipnamle. Yerusalem mutuku dana-dana tam bukuk mutuku ara, mitik mambul bukni, amutuku tonok ara, weik mem mutuku erebuka tiknamle. Winibuka tiklyopura, mutuku dana-dana unyak ninye, ayala-ayala nang yupa weik tonun, bulubuka amutuku dilyanamake.

Yesaya 44:24

Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.

Yesaya 45:12

Na Allah arye, tukwak mutuku, mutuku-mutuku nirya kwepdeipsirye, ‘Amutuku noutam ara ninye unamak’ tenen, tukwak ninye ayala-ayala nirya kwepdeipse. Tonda im deice ap, im noutam ulul ning nirya babye, naryuk, kwepdeipsirye, kurya nirya na tenepse touk deipseba tikilule.”

Yesaya 45:18

Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.

Yeremia 48:47

Na Allah arye, ayupu nyapmasina nirya ara, dipkoprob winipnamle. Bukni, doyanamle talak ara, narye Moab mutuku noutam nirya ap, Moab mutuku unamak nang ap ati, tuba tamubuka, teleb kipdeipnamnarya! Ayupu nirya ara, na Allah Yahweh arye, akunum nyapdeipmasina ati, aning nirya ara, dipkoprob nong upnamle! “Ati ara, na Allah Yahweh arye, sik Moab nang ati, wenebuka opnamne ning ati ara, akunum nyapsine. Ton ap dukdongobuka kum nyapnusine. Akunum nyapne. Allah Yahweh arye nyabukba, nabi Yeremia birye sekuk.

Yehezkiel 38:16

An Gog ap, an tam yin talen nang ap arye, na mapu koproba, sik Israel yala nang dam binuka ona ati sik mutuku banamlume. Amutuku banamluma ara, winipmanto weik kumanya ap, mok ap yanulye talak yangalamle touk ubuka, anggun nirya yamunce, Israel nang dam yanuka opnamlume. Na Allah arye tenyamse talak dam akunum kiplyopura, narye an ap, an tam nang ap dopdeipniba, ‘Naʼ tenen, mutuku ap, ‘Naʼ tenen, nang ap, anggunce binuka opnamlume. Narye an deice, Israel nang ati wenepnirye, oplopnyopura, sik dana-dana tam unyak nang yuk-yuk ning nirya, narye winipnamne ning winipniba, eibikcopura, ‘Se, Allah ara, dipkoprob pia mikip weiknye ulule. Elda, malye winin ning pia kumce, pia teleb leknye ulule. Aning ara akunum eibuka bikmabe,’ tenepnikirye, na Allah ati, moubuka biknamniake.

Daniel 10:14

Ati, na an dam yanamna deiyok ara, ani. Ara, sirya talak, an mutuku nang, sik Israel nang ara, sik dam winipnamle ning ati, laka nyapkinyeba, moubuka kel biknamlama atia. Ara talye ati kume, anda lengdar mapmoma deice arye eipmalam ning ara, atalak winipnamal ning ati kume. Aning nirya ara, aminyan talak, sirya daknamle talak yanamle ning ati, aning tukwak upmauba, lengdar deice arye eipmalame,” nyabuka, malaikat deiyoknye Mikhael birye, nyapnuke.

Daniel 2:28

Bukni, Allah im deice ululnye birye, duknun ning nirya ara, elcuk talibuka ulirye, lak kilisulul ati, duknuna ning ap, aminyan talak winipnamle ning ap ati, elcuk lak lepkutue. Wini talak ara, weiknye Nebukadnesar, an kel biknamnilyame. Allah arye lengdar mana ning aripkuka deice arye, aminyan dowinipnamkil ning ati, akunum lak lepkuke. Ati ara, lengdar maplum ning ap, tonda, ‘Lengdar do, dipdip do?’ tenena deice, eiplum ning ap, nong ara, narye lak nyapnukine.” Daniel birye nyabuk.

Hosea 3:5

Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.

Mika 4:1

Aminyan doryanamle talak winipnamle ning ara, ani. Allah Yahweh el si eren aik domik mutuku ati, ninye mutuku-mutuku nirya arye, ‘Se, yuk mutuku ara, mitik mambul bukni, amutuku ara, weik mambul mutuku ulule,’ tenenamake. Allah el si eren aik domik mutuku erepdeipliba, yuk mutuku nirya ara, amutuku amu tam atonun unamle. Winipliba, im sirya, mutuku sirya nirya, daunyak ninye arye, amutuku uk, yanganamake. Amutuku yacopura, Allah el siuk erenamake.

Bilangan 24:14

Nyabukopura, Bileam birye ayupu ton dukdongobuka Balak biti nyabuk. “Wini talak ara na mutuku uk tamubuka binune. Bukni, na mutuku min kum binmanye talak ara, Israel ninye arye, Balak an taliplumba unyak ninye ati, aminyan talak ikin ning sik nong deice deipnamak ning ara, laka nyapnukine,” Bileam birye Balak biti nyabuk.

Matius 13:39

Wa deiyoknye lik tenebukce, malye yo duk dokuknye bira, ara, Isa Mutuku Dongonye eltia. Wa noutamak dokamik ning wisibukura, kwinibikce, bulubuka tonok ak deibik talak ara, sirya daknamle talak winipnamle ning ati nyapmanue. Koun ning wisibuk ning bulubuka tonok ak deibik ning ara, na im deice pil don nang, sik malaikat arye winipnamak ati nyapmanue.

Matius 17:5

Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

Matius 21:38

Dopdeibukba, awa tuku tia talibuka pil dolamik nang dam yanganmokba, eibikce nyabik. “Awa tuku deiyoknye dipliba, el punupnamlanye bira, el mi koprop ayanmala atia. Aning ati ara, nunce el opnamabe. Obibyopura, awa tuku nun damanguk dobuka talipnamabe,” nyabik.

Matius 26:63

Asipdeyuk bukni, Yesus ara yupu tonap tamubuka kum nyabukce, tunim abuk. Winibukopura, ila tonap Allah arena ati, aweik deiyoknye, Kayapas birye, Yesus ati asipdeyuk. “Allah arye dinmasilak unmalama ati, talya yupu nyana kum, dipkoprop ninguk nyapnusilame. ‘Ninye weik lyeplirye, sik kanye talima talinamle’ tenen, Allah arye wipdeiyamuknye, Mesias bira, an aulyam do? Tonda, Pia Teleb Etekdopnye Allah ara, anuk el Mi Koprop ulyam do?” nyabuka asipdeyuk.

Matius 28:18

Yesus sik dam yayukce ayupu nyabuk. “Im deice ulye ning ap, tukwak mutuku ulye ning nirya ara, Allah arye na amu tam akunum deipnuke. ‘Aning-aning nirya talibuka weik ninye deiyoknye unamle’ tenena ati, Allah arye el mikip weike akunum arepnukba, talinune.

Matius 3:17

Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.

Markus 1:1

Allah el Mi Koprop, Yesus Kristus ap, ninye lyena ati el laka teleb yupu deiyok kouna ara, ani.

Markus 12:6

Winilamik bukni, sirya ara, tonok dopreipmantonye ubuk. Wa tuku deiyoknye, el mi koprop anya arye, pia bico tenelamuknye ulamuk. Adeiyoknye birye, ‘Na mi koprop anya arye, na wa tuku tia talinyak nang arye kibuka dopnamake,’ tenebukce dopreibuk.

Markus 12:7

Dopreibukba, awa tuku pil dolamik nang dam yanganmokbuk, eibikce nyabik. “Awa tuku deiyoknye diplibuk, el punupnamlanye bira, ayanmal ani. Aning ati ara, nunce el opmabye. Obibyopura, awa tuku nun bidamang kipdopnamabe,” nyabik.

Yohanes 1:10

Ninye Kanye pum tam Dirina Arina Deiyoknye bira, tukwak mutuku noutamak yanuka ulamuk. Kanye Talima pum tam Dirina Deiyoknye birye, tukwak ulul ning nirya ara, el pil dobuk deice aryuk kwepdeibuk bukni, dib tenena kum, talye tukwak mutuku ninye arye, ‘E, anye bira ani’ tenen, moubuka kum bikamik.

Yohanes 1:14

Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.

Yohanes 1:3

Yupu nyanyapnye, elce aning-aning nirya kwepdeibuk. Yata ning do nirya, Allah arye kwepdeibuk ning nirya ara, Yupu nyanyapnye, pil dobuk deice arye aning-aning nirya kwepdeibuk. Aulul ning yala-yala nirya ara, Yupu nyanyapnye, elcuk aning-aning nirya kwepdeibuk. Yuknye birye, tonok ning babye kum kwepdeibuke.

Yohanes 13:3

Yesus ara, akunum kel bikamuk. Ara, ‘Allah el ulyak arye yase touk, tuba tamubuka el dam welepnamne. Na ni koprop arye, aning-aning nirya na amu tam akunum deipmanilba, na mikip deice arye aning-aning nirya malye kibuka bisiptinye,’ akunum tenyamuk.

Yohanes 13:32

Na winipnaman deice arye, Allah el si weik arye erebikirye, kibuka si erenamaka anya arye, Allah arye nati pia teleb kipdeipniliba, na si babye weik arye erenamake. Allah arye anirya winipnamala ara, adiparyuk minopce winipnamale.” Yesus arye nyabuk.

Yohanes 15:15

Ura, talye pil melin ninye ara, sik deiyok nang arye tenenyak ning ap, wininyak ning nirya ap, kum kel bikinyake. Ati wini talak arye diprongobuka, dolyanamsil talak noutamak ara, narye sikti, “Na amu tam pil melin ninyeuk unyake,” kum nyanamasine. Na Ni Koprop Allah arye nyapdeiyamnukba, bikamse ning nirya ara, narye anggunti akunum laka peterelamsise ati, wini talak ara, narye anggunti, “Aninye na weitcapu koprop unyake,” nyabuka akunum nyapsine.

Yohanes 16:15

Na Ni Koprop Allah arye talilul ning nirya ara, dipkoprop na ninguk ulule. Adeiyok ati ara, min nyapmanue. Ara, Allah El Dib Kanye arye, na yupu ap, na wininun ning ap dobuka, anggunti laka peterenamsile.

Yohanes 17:2

Ance nati, Weik Ninye Deiyoknye winina deiyok ning arepnulum deice arye, ninye mutuku-mutuku nirya ati, sik deice tam upniba, sikda na amu tam unyake. Winibdeipnuluma ara, talye ati kume. Ara, ance, ‘Na akunum wipdeiyamse ninye, na mi ati areamse ninye nirya ati ara, bol koplobuka pia kam una deiyok ning arenamle’ tenen, ance nati, ninye deiyok ning areamnulume.

Yohanes 3:16

Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke.

Yohanes 3:25

Atalak ara, Yohanes peterebuk yupu kekelamik nang ap, tonok Yahudi yalanye ap, yupu deice arye derelanmek. Yupu deice arye derelanmeka deiyok ara, Farisi nang arye, ‘Allah derepsilyak’ tenen, “Mem pil dona atonun ning ara, taruk mek likna ara, winibuka, winibuka taruk mek likinamlulume,” nyabuka, peterelamik ning ati, tonok kanye bobuka kum winilamika ati, ayupu deice arye derelanmeke.

Yohanes 5:26

Aning ara talye kum nyapsine. Deiyok ara, na ni koprop Allah kam una deiyok ning talibuka ulye touk, elce aribukba, el Mi Koprop babye atonun kam una deiyok ning talibuka ulule.

Yohanes 5:27

Tonda, el Mi koprop ara, Ninye Mi Koprop Atonunye ulula ati, Allah arye ninye ati yupu bokolina deiyok ning dobuka, el mi deice akunum deibukba, el mi arye aning talibuka pil dolulce, ninye ati yupu lipsisikuka bokolisulule.

Yohanes 9:29

Nun kele. Allah arye Musa ati, yupu nyamukba, kekebuka sekeipsuk bukni, anye Yesus ara, el deiamik mutuku, el mutuku koprop ara nun walwale,” nyabik.

Rasul 10:36

Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”

Rasul 2:17

‘Allah el nyasilya ara, aning-aning nirya kum upnamle talak akunum dam uplyopura, narye ninye mutuku-mutuku nirya ati, na Dib Kanye weika arye arepnamne. Sik mapu ap, sik kil mapu ap, arye, Allah el yupu lakak ani, nyanamake. Sik kam nang ara, tuba bukmakce diparyuk lengdar atonun ning eipnamaka deice arye, na yupu laka nyanamsine. Sik wisi nang ara, lengdar mapmakce deice arye, na yupu laka nyanamsine.

Roma 1:4

Yesus Kristus ara akunum dipmok bukni, Allah arye Yesus ati tamubuka kam bukeibuka deice arye laka kipdeipsuke. Ara Allah El Dib Kanye mikip deice arye nyapsuke. “Yesus ara Allah el Mi Kopropa ulule. Allah el malye winina kumce, pia telebuk ulul touk, el mi kopropa Yesus babye, malye un ning tonok babye kum winilirye, pia diksukumuk ulule. Elda pia mikip weik unamle,” nyabuka, laka kibuka ayupu laka nyapsuke. Lakak kibuka deipsuknye bira, yuknye kume. Elda, nun Deiyoknye Yesus Kristus el tonok ulule.

Roma 8:17

Aning ati ara, ayupu ton nyapsine. Nunda, Allah el mapu kopropa unyaba anya arye, el tenyamsuk touk, el talilye ning bokuka arenamsile. Allah arye el talilul ning bokuka, el mi kopropa Kristus ati arenamle touk, nun babye atonun tonap, bokuka arenamsile. Malye nang arye Kristus ati, ‘Nun like’ tenen, el nong deice ikin ning delilamik touk, nun nong deice ikin ning delisinyake. Ati, Kristus ikin ulamuk touk, nun babye atonun, ikin unyaba anya arye, wini talak Kristus weik mambulnye, pia teleb ubuka ulul touk, aminyan talak nun babye, teleb kipdeipsilyopura, el ap neika atonun, mambul weik pia teleb nang unamabe. Paulus birye, sik Roma mutuku ninye ati, nyabuk.

1 Korintus 2:7

Kume, nunce weik kel bikne yupu nyanyaba ara, Allah minop talak arye duknyamuk ning ati nyapsine. Allah arye aning-aning nirya min kum kwepdeiamuk talak arye, nunti utenyamsuk. ‘Aweik kel bikne ning deice arye, na ap, na mapu ap, talima dukdongobuka ulamibya ani, na pia teleb unye touk, sik babye, atonun teleb kipdeipnirye, na ap neika unamake. Winipnyopura, aninye ereipnamne,’ Allah arye, aning tenelamsuke.

1 Korintus 8:6

Sik dib tenena kum ninye ara, wininyak bukni, nun dib tenenyap nang ara, nun kele. Nun Ni Koprop Allah, el tonok ulule. Yuk ton pia kume. Elda Kam Una Deiyoknye ulula anya arye, el deice aryuk aning-aning nirya kintinipdeiamsuke. Winipsuka ati ara nunce, ‘Nun kam unyaba ara, Allah el si erena ap, el piluk dona ap ati, wininamabe’ tenen, unyabe. Aning atonun, nun Weik Ninye Deiyoknye tonokuk ulule. Elda, Yesus Kristus ulule. Allah arye nyabukba, Yesus pil dobuka deice arye, aning-aning nirya kintinibuka deiamsuke. Tonda, Yesus el pil dopsuka deice aniryuk, lyepdeipsuka ati, el mikip deice aryuk kam unyabe.

Galatia 4:4

Isa Mutuku Dongonye ap, mer nirya ap, sik amu tam ulamuburye, tukwak mem ninguk talibuka ulamubu bukni, Allah arye, ‘Atalak ani,’ tenyamuk touk akunum winibukopura, Allah arye el Mi Kopropa dopdeipsuke. Allah el mi Yesus dopdeipsukba, Allah El Dib Kanye mikip deice arye tonok kil arye ami deibuk. Akil arye Allah el mi deibuk talak ara, nun Yahudi yala ninye nirya, Allah arye, “Aning ara wininamlulume, aning ara kum wininamlulume,” nyapdeibukba, Musa sekamuk yupu talibuka ulamuburye, amem yupu amu tam atonun ulamupe. Aning atonun, ami Yesus babye, Musa sekamuk yupu amu tam ulamuk. Musa sekamuk mem yupu amu tam bukuka ulamubu bukni, Allah arye el mi dopdeibukba, atalak yayuka deiyok ara ani. Ara, Allah arye nunti, ‘Musa sekamuk yupu, mem yupu amu tam unyak ninye ara, deknamne.’ Na Mi Kopropa arye aninye deklirye, mem ning amu tam unyakak arye lobuka lyepnirye, ‘Na mapu kopropa unamak’ tenen, diba tenenyak ninye ara, teleb kipdeipnamne. ‘Winipnyopura, narye sikti, kintinyamse ning nirya arepniba, sikce dopropnamak,’ tenyamsukce, el mi Yesus dobuka areamsuk.

Efesus 1:10

Allah kanye deiyamukce, winibuka tenyamuk. ‘Kume, na tenyamsi talak akunum uplyopura, yata ning do nirya, tukwak ulul ning nirya ap, im deice ulul ning nirya ap, dopropnyak arye, tonok Weik Deiyoknye, Yesus Kristus, el amu tam deipnebuk, aning nirya talibuka, teleb kibuka neiktoto unamle. Kristus ara, aning-aning nirya deice tam ulirye, weik Ninye Deiyok kibuka talinamle,’ Allah arye, tenyamuke. Allah minop talak tenyamukce, aning nirya duknyamuk bukni, wini talak akunum lakak kipdeipsuk ning ara, akunum nyapsine. Na Paulus birye, nyapsine.

Efesus 3:9

Tonda, Allah arye, tenepnuke. ‘Paulus bira, na yupu laka nyabuka peterenamle,’ tenepnuke. Aning ara, ani. ‘Ninye nirya moubuka kekenamak’ tenen, Allah arye, ninye lyena ati, bico tenepsilirye, el kanye aryuk pil donamsil ning ara, ‘Paulus bira, “Allah arye, winibuka, winibuka wininamsile,” nyabuka, peterenamle’ tenen, wipdeipnuke. Allah arye, aning-aning nirya kwepdeiyamuk deiyoknye birye, ninye lyena ati tenyamsuk ning ara, dungnyamukce el demuk kel bikamuk. Aning nirya duknyamuk bukni, Allah arye nati, ‘Aning laka nyapnyopura, Paulus kekeplirye, aninye nirya ati laka nyabuka peterelbinamle’ tenen, wipdeipnuke. Na Paulus arye, nyapsine.

Ulangan 18:15

Ati, aning kum bukni, nun ni koproba Allah Yahweh arye, minop talak na Musa wipdeiamnuk atonun, nun ni koproba Allah, el si Yahweh arye, nun Israel ninye noutamak arye, na unya atonye, tonok ton wipdeipnamsile. Ara, Allah el nyalye yupu kekeplirye, sikti, laka nyanamla deiyoknye wipdeipnamsile. Wini talak, na Musa unye atonun, aminyan talak anye bira, Allah el yupu laka lena deiyoknye unamsile. Anye akunum wipdeiplyopura, anye nyaplye yupu kekebuka, unamlulume.

Ulangan 31:29

Aning babye, talye ati kume. Deiyok ara, na kele, na dipnyopura, narye anggunti, ‘Aning ara meme,’ nyabuka, peterelamsise ning ara, batakmumce, yuk malye bisikuk binuka, pia malye-malye weik wininamlume. Tonda, Allah arye, ‘Aning ara, pia malye ning ati, na like,’ tenelye ning babye, aminyan talak, talye luba kibuka wininamlume. Ara, anggun bidamang taruk arye, kintinip deipmunce, puturubuka deipnamlum ning ati ara, Allah el si Yahweh arye, anggunti, pia malye kanye bobuka, yu kanye bopnamsile. Winipmunyopura, Allah arye anggun wenena ati, weik kanye imun ning, anggun nong deice deipnamsile.” Musa birye nyabuk. Atalak ara, Musa ayupu nirya, Israel ninye nirya kekenmikak nyabuka, sirya dakuk.

Ulangan 4:30

Ura, luba kina meme. Malye winipmunyopura, ikin ning weik upsiliba, anggun kanye talima pum tam arye, ‘Se, yata wiripnamap do?’ tenen, malye kanye bobuka upmunyopura, anggun ni koproba Allah, Yahweh ati, pia se tenepnamlume. Yahweh el dam tamubuka yanamlulume. El ti, diba tenebuka, pia tenenauk upmunce, el yupu kekebuka dobolyamunyopura, Allah el si Yahweh arye anggunti, tuba tonap melinamsile.

Ibrani 1:5

Ura, ‘Allah el Mi Kopropa ara, weik mambule. Sik malaikat ara, mitik mambul uka,’ nyapmasina ara, deiyok ton nyapnusine. Anggun ton teneipdelulume. Allah el im deice pil don nang malaikat weik aunyakba, sik kan-kan arye, yata malaikat ati wibukabukce, anyapnusin yupu nyabuk do? Kume, anyapnusin yupu ara, sik malaikat ati kum nyalamuk. Allah arye nyabuk yupu ara ani. ‘Anda na Mi Kopropa ulyame. Winira, nara an Ni Kopropa unune. Allah arye nyabuk.’ (Mazmur 2:7) Tonda, anyapnusin yupu babye, Allah arye sik malaikat ati, pia kum nyalamuk. Ayupu ara ani. ‘Nara, anye el Li Kopropa unamne. Anye bira, na Mi Kopropa unamle.’ Allah arye nyabuk. (2 Samuel 7:14) Allah arye sik malaikat nirya ati, ayupu pia kum nyabuka anya arye, sikda mitik mambul bukni, Allah el Mi Kopropa ara, weik mambul ulule.

Ibrani 1:8

Allah arye, el im deice pil don nang malaikat ati, ayupu nyapdeibukba, el amu tam talye pil don nang atonun unyak bukni, el Mi Kopropa ati ara, yupu yuk nyabuke. Allah arye el Mi Kopropa ati, nyabuk yupu ara, asukum deipnusine. Ara, Allah arye nyapdeibukba, Mazmur buku noutamak arye, sekamik yupu ara ani. ‘Anda Allah ulyame. Ance ninye nirya ap, aning-aning nirya ap talibuka, weik deiyoknye unamlam talak ara, an talipnamlam ning ara, pia kum dankunamle. Sirya dakna kum, pia aunamle. Aning-aning nirya talibuka, weik deiyoknye unamlama deiyok ara, pia teleb ubuka diksukumuk unamlama atia. Aning nirya talipmince, pia diksukumuk unamlame.

Ibrani 11:3

Ura, Allah arye el yupu uk nyabukce, adiparyuk aning-aning yala-yala nirya kwepdeibuk. Ara, nun asing arye elinyap ning nirya memebuka delina ning ati ara, asing eipmanto ning dobuka, aning deice arye kum kwepdeibuk. Aning kum bukni, el yupu nyabuka mikip diparyuk, aning-aning nirya kwepdeibukba, anyapmok touk kikliman kibuk. Aning nirya ara, diba tenenyaba deice arye, kekebuka kel kinyabe.

Ibrani 2:3

Malaikat arye, nyalamik yupu mitik mambul bukni, ayupu yanilamik ninye ati, ‘Dauplye,’ tenena kum arye, wenebuka olamuk. Anang olamuka anya arye, wini talak weik mambul lyena ning kintinipsuk ning ara, ‘Mambul kume’ tenen, batakipyopura, Allah arye nunti, ‘Dawaplye. Sikti kum wenepnamne,’ tenepnamsil do, kum do? Kume, aning kum winipmanto ati, Allah arye ninye lyena ati kintinipsuk ning batakipyopura, dipkoprop opnamsile. Ayupu nyapmasina ara, nun Deiyoknye Yesus arye, ninye lyena ati, kai teleb yupu deiyok koubuka minyuma arye laka nyalamukba, el yupu kekelamik nang arye, nun dam yangalamikce nunti, “Yesus arye nyalamuk yupu ara, ani-ani,” nyabuka, nun dam laka nyabuka lak koprop peterelamsike.

Ibrani 3:6

Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.

Ibrani 4:14

Allah dan tam, ninye dan tam ansinilina deiyoknye bira, Yesus eluk ulule. Weik mambulnye Yesus ara, Allah el Mi Kopropa ulule. Elda Allah el ulyak im deice noutamak akunum biyuk. Aning ati ara, nunce diba tenebuka, ninye kekenyakak arye, laka nyanyap yupu nirya ati, batakna kumce, pia talibuka unamabe. Batakna kum diparyuk, diba tenebuka unamabe.

Ibrani 5:8

Yesus ara, Allah el Mi Kopropa ulul bukni, el nong deice ikin ning weik ulamukba, donmok deice, ‘Allah arye tenelye touk, aninguk kekepnirye, aninguk talibuka unamne’ tenen, kel kilamuk.

Ibrani 7:28

“Nun malye unyaba, patasilye touk melibuka lyesulule,” nyapmanu ara, deiyok ton ani. Ara, Musa sekamuk yupu deice arye nyalul touk, ‘Allah ap, ninye ap ansinilina deiyok nang kibuka apil donamak’ tenen, wibuka delinyake. Bukni, anang ara, sik babye tukwak nang anya arye, malye winipmanto nang ton unyake. Bukni, Musa sekamuk yupu, mem yupu akunum aribukba, daulamuka ani, keting tamun yupa weik akunum ubukba, aminyan ara, Allah arye, el winiryuk nyalilamsuk yupu deice arye, el Mi Kopropa wibuka deibukba, nun ap, Allah ap, ansinilina weik deiyoknye usulule. Yesus ara, malye winin ning kum winipmantonye ulule. Allah arye elti, pia teleb updeibukba, malye winin ning tonok babye kum winilule ati, pia telebnye ulule.

Ibrani 7:3

Tonda, Melkisedek bira, el li ap, el lin ap, el yala nang ap, elce deibukba, dadeipdanin balamik ninye ap nirya ara, kel kum biklamike. Tonda, sikce el deibik talak ap, el dibuk talak ap ara, kel kum biklamik. Aning ati ara, Allah el Mi Kopropa arye ninye ap, Allah ap dana-dana Ansinilina Deiyoknye pia unamle touk, el Melkisedek babye, atonun ansinilina deiyoknye pia unamle.

Ibrani 9:26

Sik tukwak ninye bukni, Allah arena ati, deiyok nang arye, tuba-tuba arilbalamak touk, Kristus arye aning kum winibuk. Kristus ara, anang arye tuba-tuba arenauk, winilamak touk, el babye atonun winiptopura, like tonok talak deice aryuk, el bidamang nong dobuka, Allah ati kum areamtue. Aning kum bukni, weika arye tonap, im deice wekelbalamtue. Ara, Allah arye aning-aning nirya kwepdeibuk talak arye dipdongobuka, anoutam talak nirya ara, ila tuba tonap, weika arye im deice wekelbalamturye, Allah ati areamtue. Bukni, wini talak ara, sirya talak dam akunum ubukba, Kristus ara, like tonok talak deice arye akunum yayuke. Kristus yayuka deiyok ara ani. Ara, el bidamang, el nong kopropa dobuka, Allah ati akunum aribuka deice arye, nun punupsuke. Malye nang arye elti, obika deice arye, ninye malye wininyak ning nirya ara, akunum kum kipdeipsukce, nun punupsuke.

1 Peterus 1:20

Allah arye, aning-aning nirya min kum kwepdeiamuk talak ara, ‘Yesus arye ninye lyepnamle’ tenen, akunum wibuka deibuk bukni, winira sirya talak ara, anggun lyena ati akunum lakak arepsukbuk, kel kibape.

2 Peterus 3:3

Ara, weik mambul tenenamlum yupu ara ani. Ara, sirya talak Yesus tamubuka yanamle talak, dam akunum uplyopura, Yesus el yupu ati, lyab-lyab nilik-nilik abuka nalisice nang yanganamake. Lyab-lyab nyabuka, nilik-nilik asinyakce, sik malye pataplye ninguk tenebuka, pia malye-malye wininamake.

Yudas 1:18

Sik anang arye nyabik yupu ara, ani. “Aminyan sirya talak ara, ngalukuka nalisice nang ara, sik kanye talima noutamak, malye ning pataplye ninguk tenebikirye, ‘Allah elda talinye’ tenen, yaniltanamake. Malyeuk wininamake,” nyabuka, sik Rasul nang arye nyalilamsike.