Hosea 13:15 - Eipomek

¹⁵ Kanye imun ning, anggun nong deice deilinamsina ara, ani. Yuk Israel ninye ayala-yala nirya, mitik anun arye, teleb ulamik bukni, anggunda Efraim yala ninye, anggun nirya ara, pia telebuk ulamlume. Winibuka ulamunye ani, na Allah Yahweh, keting yangan tam arye, weik buppu kumanya mikip dopdeipnamne. Adopdeipnamne kumanya mikip arye, pata mutuku arye, yanuka dopliba, anggun taliplum mutuku ubuk mek pu ap, amutuku uamuk mekwen ap, ‘Mek kwen deipnamsil’ tenen, anggunce tuku palyamlum bisik nirya ara, mek kwen cepropliba, mek kum danin banamle. Tonda, anggun mutuku noutam arye, ‘Nun dekna weik ning ara, anyaik pum tam dongobuka deibibyeba, yu nang arye, kum yanuka dalubuka dopropsiting’ tenen, dolamlum asik nirya ap, anyaik noutam deililamlum ning nirya ara, narye lo arepneba, yu nang yakirye, aning nirya ubula doprobice deice arye, narye kum kipdeipnamne. Aning nirya kum kibuka delinamne talak ara, anggun pia teleb ning, dekna weik ning, tonok ning babye kum bataknamne. Aning nirya kum daneipnamne.

Hosea 13:15 交叉參考

Yehezkiel 19:12

Aninye deiyoknye birye, el weik kama talebuka ulamuk bukni, aning anggur tapu nirya ara, Allah el yu weik ubukba, elcuk aning anggur tapu palibuka, tuku pum tam arye, anggur tapu ap, el yating ap welebukce, erebuka tuku deice poubuk. Tuku deice poubuka dopkwetebukba, atalak ara, weik kumanya, keting yangan tam arye, puabuka deice arye, anggur tapu yo deiyok ap, duk pia teleb ning nirya ara, koulubuka, tuku deice sakuk. Winibuk talak ara, anggur tapu yo taruk nirya ap, duk nirya ap ara koulubuk. Winibukopura, anggur tapu yo ap, duk ap, koulubuk ning ara, uku arye yanuka, dibuka sirya dakuk. Allah arye, Yeheskiel biti nyabuk.

Yehezkiel 17:10

Tonda, tenipdenamlulume. Ara, Rajawali maka bitinye ning arye, anggur tapu kwinibuka, yuk wa win dam kouplyopura, asukumuk dipkoprob, el yating pulpula arye, tuku pum tam weklirye talibuka, mikip upnamle do? Teleb kipdeiplirye, adiparyuk kam upturye, pabuka weik upnamle do, kum do? Tonda, dabu tam arye, weik keting deibuka, buppu arye koululamle touk do? Atapu kum daksaktu do? Kume, anggur tapu, koubikak aryuk, adiparyuk koulubuka kum datue. Aning nirya ara, anggun walwal bukni, na Allah arye, bikinune.

Yeremia 4:11

Atalak akunum yalyopura, “Yehuda yala nang ap, tonda Yerusalem mutuku unyak nang ati, tukwak ulul buppu weik kumanya ara, anggun dam pu abuka yangalamle,” nyabuka, laka nyabikiba kekepnamake. Akumanya ara, talye balamle ning yalirye, pu abuka dopnin balamle touk, kumanya kum yanamle.

Kejadian 49:22

Yusup, an yala ninye ara, mitik mek balamle mek lilun anggur tapu paplirye, nepnin balamlya ani, duk weik mouplirye, ninye dolamak poka deice balirye, el bok arye singiplirye, duknulamle touk unamake.

Kejadian 41:52

El sal mi bitinye deibuk talak ara, Yusup birye, “Amutuku noutamak ara, imun kanye bobuka, ikin weik ulamnuk bukni, winira Allah arye melipmanile deice arye, na mapu deibuka, telebuk unune,” nyabukce, “Ami el si ara, Efraim,” nyabuka si dobuk.

Nahum 2:9

Sik amutuku nang, akunum bikbik abuka bindobikcopura, sik mal olan nang arye, nyanamake. “Ura, amutuku nang arye, ‘Dokolanunaʼ tenen, dekna weik ning perak ap, emas ap ara, yanuka alubuka doproplulume! Atalak ara, anggun mal olan nang arye, “Kume, amutuku noutam talibuka ulamik bona yala-yala nirya ara, pia weik arye, nukmanto kum ulule. Dipkoprop adekna weik ning, dokola deililamik ning nirya ara, min kum kum danamle! Aning yala-yala nirya ara, nukmanto kum upmala atia!” nyanamake.

Hosea 10:1

Allah arye nyapdeibukba, nabi Hosea birye sekuk yupu ara, ani. Anggun Israel nang nirya ara, minop talak anggur tapu pia weik moulamle atonun ulamlume. Bukni, winibuka telebuk upnin balamik talak ara, sikce, ‘Talye ning si erenamapʼ tenen, isa si erena ap, isa arena ap ati, sikce pala keil dobuka, yangapdeiamikce, mesba-mesba weik tonun kintinip deiamik. Atonun, sik Israel nang telebuk upnin balamik touk, ‘Isa Asyera si erenamapʼ tenen, lak kin ning, el si ‘tugu berhalahʼ, cang weik yo weik tonun tonap ikukabikce, isa si erena ati moulamikce, aisa mer si erelamikce, malye weik ulamik.

Hosea 9:11

Israel nang nirya, sik mambul weik tenenyak ning nirya ara, kum danamle. Winipmanto ara, im noutam lakuka balamle maka, lakuka pia bileba, kum elilamak touk upnamle. Winipnamle talak ara, anggun yala kilapu nirya ara, mi pia kum bopnamake. Winibikirye, mi ton kum delinamake.

Hosea 4:19

Sik Israel ninye arye, pia malyeuk wininyakce, Isa Mutuku Dongonye si erenyaka ati ara, na Allah arye, weik wenen ning, sik nong deice deipnamne. Winipmanto ara, weik kumanya mikip asa puplirye balamle talak ara, mikuka sesal selamle yo bok, lakuka balamle touk, na Allah arye sik Israel ninye ati, weik arye wenebuka oplopnirye, sirya daknyopura, dipnamake. Sik ap, sik talinyak ning ap nirya ara, kum daneipnamne. Sik dipnamak talak ara, sikce, ‘Se, talye ning, Isa Mutuku Dongonye siuk erenyaba ati, wini talak ara, Allah arye wenebuka opmasile’ tenen, kel bikikirye, sik aninye nirya, alye weik daknamake. Bukni, na Allah arye, aninye dipkoprob opneba, ninye weik arye dipnamake. Allah arye nyabuk. Ara, Allah Yahweh arye, nabi Hosea biti, ayupu nirya laka nyapdeibukba, nabi Hosea birye ayupu sekuk.

Daniel 11:8

Aning akunum winiplyopura, el adiparyuk el mutuku, Mesir mutuku tamubuka bilirye unamle. El mutuku tamubuka bilyopura, sik iknapye tam nang, sik si erelamak isa mer, sik urasin atonun puturubuka deiamik ning babye, alubuka, el mutuku tamubuka bobinamle. Tonda, sik Siria mutuku nang, ‘Nun ni yapu aniʼ tenen, talye ning bukni, isa si erelamik ning, urasin atonun kibuka, dekna teleb weik ning, emas ap, perak ap arye, memebuka deiamikce, isa si erelamik ning nirya ara, dobuka sik mutuku, Mesir mutuku bobinamake. Winibikcopura, yata wiribuka keting tamun nirya ara, utam mutuku, Mesir mutuku talibuka, unamle Raja arye, iknapye tam, Siria mutuku Raja kipnamak deiyok nang ati, ‘Dauplye, sik talye daunamakʼ tenen, kum olbanamle.

Yeremia 51:36

Ati ara, Allah Yahweh arye, sik Yerusalem mutuku ninye ati, nyabuk. “Narye pia dobuka, sik melibuka kwang dakna ati, sik Babel mutuku nang arye, anggun Yerusalem mutuku ninye olyangasinyaka ati, wini talak ara, sik Babel tam ninye ati, wenebuka opnamne. Winipnamne talak ara, sik Babel mutuku noutam dinyak mek pu ap, balamle weik mek nirya ap ara, adiparyuk cepdeipyopura, sisal lepnamle.

Yeremia 20:5

Narye sikti, bataksineba, Babel mutuku nang arye, Yehuda tam unyak nang, tuba kam ninye nirya tomobikirye, sik dekna weik ning ap, ‘Weik mambul ning’ tenen, ‘Naʼ tenen, delilamik ning ap, tonda, sik minop talak ninye deiyok nang, Yehuda tam taleamik Raja nang arye, moubuka delilamik bona ning nirya ap, aning nirya, ubula doprobikirye, Babel mutuku uk bobinamake. Ara, anggun deipkirikdop nang arye, taleamik ning ap, anggunce talibuka winilulum ning nirya ap dobuka, sik Babel mutuku bobinamake.

Yesaya 41:16

Winipmanto ning ton nyapnusine. Ara, gandum duk ninye arye yupnukca ati ning yangabuka deibikirye ninye taruk dana-dana talibuka lulukikiba el kala biriring albalule. Anggunce anggun mal olan nang ati, winipra banamlume. Winipmanto ning ara, gandum duk teikikiba, bama saklibuk, weik kumanya mikip yalirye bobuka, talye-talye bobalirye, bataklamle touk, anggunce, anggun mal olan nang ati atonun upra banamlume. Winibuka winipmunyopura, nara anggun ni koproba Allah, na Yahweh atibuk kanye deibuka, si erenamnulume. Nara Allah, Pia Telebnye unirye anggun Israel ninye ati, kalikuka melisunune. Ati ara, anggunce, ‘Se, nun ni Allah ara, pia teleb, weik mambulnye ulule,’ nyabuka na si erenamnulume.

Yesaya 17:13

Diba, sik ona ati, yuk mutuku nang yanamak ning ara, mek obuka yangalamle touk kibuka, lelim weik nyabikirye yanamake. Winibikce talak ara, Allah arye sik yuk mutuku arye yanamak nang ati, yupu weika arye nyabuka wenepnirye, yupu sekdongopnamle. Winiplyeura, sik ayanganamakce nang nirya ara, kwarabuka karen-karen uk bikbik abuka bindopnamake. Sik anang ara, an dum duk koproba wepdobikirye, el kala batakikceba, kum arye bobuka balamle touk wininamake. Tonda buta ara, kumanya yalirye, pu abuka bobalamle touk, anang babye atonun upnamake.

Yesaya 14:21

Ati, wini talak ara, anggun nirya kekeplulume! Raja Babelnye, elce deiamuk mapu ap, elce deibukba, dadeipdanin yangalamik nang nirya ap ara, anang nirya ara, sik ona ati, akunum kintiniplulume! Ara talye ati kuma. Raja Babel birye deibukba, dadeipdanin yangalamik nang nirya ara, anggun ni yapu arye, malye winilamik ning ara, pia weik ati, anggun mapu nirya obobyeba, dipnamake. Ara, min obuka sirya dakmunyeura, sikce deiamik mapu ara, aminyan talak, sik yala nang ton weik upnin bakirye, ninye deiyok nang tuba kibikceura, tonap, mutuku sirya, im sirya nirya, talipnamakca! Ayala nang arye, ninye deiyok kibikcopura, tukwak mutuku sirya, im sirya nirya noutam arye, weik asik ton dobikirye, daunamaka ati nyapne. Ati, Raja Babel, el yala nang nirya, anggunce obuka, sirya daknamlume!

Mazmur 109:13

Aninguk kum bukni, tonda sikce nati, ‘Daud birye deiamuk mapu nirya ap, sikce deiamikba, dadeipdanin yangalamik nang nirya babye, adiparyuk diptingura, kum datinge,’ tenebikirye, nyaninyake. El mapu nirya arye, akunum diamik mapu nirya ap, sik amapu nirya arye, deibikceba, dadeipdanin banamak mapu nirya ap, minop diptingce, kum datingura, Daud el yala ap, el si ap ara, pia kum upnamle. Ara, yuk nang arye, Daud el yala si, tuba kum tenenamake. ‘Daud el yala ap, el si ap, pia kum uptuba lubakinamake,’ tenebikirye, nyaninyake.

Mazmur 1:4

Bukni, sik malye winin ninguk, tenebuka upra bace ninye ara, kumanya balirye, pubuka dopliba, sing-singa lakuka balamle atonun unamake. Adeice arye sik ap, sik wininyak ning nirya ap ara, kum danamle.

Ayub 18:16

Sik malye uning talibuka unyak nang ara, sik apu yapu akunum deiamik. Sik ton dibikcopura, mapu ton pia kum deilinamake. Ati, winipmanto ara, weik yo tikamtua babye, tuku pum tam, el yating binamuka nirya ara, kouluplyeura, ayo koululamle. Tonda, ayo taruk dana-dana tam binamuk ning nirya ara, adiparyuk kouluplirye, tobuka poupnamle ati, mitik yo ton kum panamle. Atonun, sik anang nirya ara, pia kum danamake.

Ulangan 33:17

Yusup yala nang, sik mikip ap, sik mambul unamak ning ap ara, weik sapi basam yim ning, min yuma deibice ning, mikip weik ning atonun ulule. Ninye arye tapu kirikuka, kum weipmanto bai sapi basam, yim ning ara, el yang yu weik upmalya arye, ninye lukuka olamle. Aning atonun, Yusup yala nang, mikip weik ubikirye, sik mal olan nang ton obikirye, malye kipnamake. Yusup yala nang arye, yuk mutuku ninye, mutuku sirya, im sirya unyak ninye nirya babye, dipdongobuka, obuka sirya daknamake. Yim sapi basam arye, el yang bitinye arye, ninye lukuka olamle atonun, winipnamake. Tonok yang ara, Yusup el mi Efraim birye deibukba, dadeipdanin yanganyak yala nang, beribu-ribu nang unyake. Bitinye yang ara, Yusup el mi Manasye birye deibukba, dadeipdanin yanganyak yala nang, beribu-ribu nang unyake. Aning ara, kum nukmanto bukni, sik yin talin nang arye, pia weik arye upnin banamake. Musa birye, Yusup yala nang ati, nyabuk. Ara, ‘Allah arye, sik Yusup yala ninye melipnamleʼ tenen ati, morobuk.

Kejadian 48:19

Yusup birye nyabuka piripdeyuk. Bukni, el li koprop arye nyabuk. “Kume, na ni mio. Na kele. Na mangkau kanye bobuka kum winipne. Min yuma deiplum mi Manasye ara el ton weiknye uplirye, mapu dadeipliba, dadeipdanin balamikca ani, dotalak unamak ninye ara, weik upnin banamake. Winiplirye mitikto mambul unamle bukni, el weit koproba Epraim bira, mambul weiknye unamle. El du koproba, deice tam atonun uplirye, elce deipliba, dadeipdanin balamikca ani, doupnamak ninye ara, ayala-ayala weik upnin banamake.

Kejadian 41:6

Ajagung tekbarye teleb ning aupmok bukni, sirya talak adeiyok tonok bukni, jagung duk tekbarye tonap moupmok. Moupmokbuk, laka ubukba, keting yangan tam arye weik kumanya dobukba, silal lebukabukce, ajagung duk malye ubuk.

Yesaya 27:8

Allah arye el mapu Israel nang ara, sik malye ulamik ning ati, yupu bokuka arebukce, sik wenena ati ara, sik mutuku noutam arye inibuka donokukba, yuk pera mutuku nang arye yanuka, obuka sirya dakikce, tuba kam ulamik Israel nang ara, sik unyak pera mutuku tamubuka binuka, tapu koupdongobikba, ikin weik daulamik. El mapu, Israel nang inibuka yuk mutuku nang unyak donokona ati ara, winipmanto keting panalyangan tam ulul kumanya, pia weik buppu kum nun mutuku noutam yangalamle touk, Allah arye pera mutuku yu nang dopdeibukba, yayikce dopdakuka binamik.

Yeremia 4:12

Ara talye kumanya kume. Mikip weik kumanya ara, Allah elcuk nyaplyeba yalirye, el mapu, sik Yehuda yala nang ap, Yerusalem mutuku unyak nang ap, sik wenena ati, dopnamle.

Yeremia 51:1

Allah Yahweh arye nyabuk. Ara narye lo arepniba, yu weik yin talin nang arye, Babel mutuku tam unyak nang ati olyanganamake. Winipmanto ara, mikip weik kumanya weik tonun dopkwetepniba, kum doplirye, aning-aning nirya dakuka bataklamle touk, upnamle. Ara, ayu yin talin nang arye, Babel mutuku yakirye, amutuku noutam unyak nang nirya ap, Kasdim mutuku nirya ara, adiparyuk yanuka, obuka sice buklopnamake.

Hosea 2:3

Anggun malye weik winimunye ning nirya, kum batakmunyopura, na Allah arye, anggun baju ongomunye ning nirya kwiripsiniba, winiryuk deiamsik talak, urdem nong banang ulamlum touk unamlume. Tonda, ninye bin tonoknye ton, mek pia kum arye, tuku nirya kel-kel alulul mutuku noutam uliba, mek patalye deice arye, imun kanye bobuka diplamle atonun, narye anggunti, bataksinirye, anggun nong deice ikin ning weik deipsinyopura, dipkoprob imun kanye bobuka, unamlume.

Yunus 4:8

Keting akunum panalyayukura, Allah arye kumanya weik, buppu ning dopkwetebukba, keting panalyangan tam arye, weik kumanya welebukce, kumanya dobuka yayuk. Akumanya dobukce, keting tin weik deibuk deice arye, Yunus kisok buppu arye, biribiri abuka, dipmanto ubuk. Awininmok deice arye, el dipmanto ubukce, tonda el kisok nirya, uku dipmanto ubuk. Winibukba, ‘Na kam unye ning ara, kume, dipnune,’ tenebukce, nyabuk. “Weik teleb ning ara, dipnune. Kam una ara, na like,” nyabuk.

Kejadian 41:23

Moubukura, sirya talak, ajagung yok deice bukni, jagung duk tekbarye tonap moubuk. Moubukura, keting panan talak arye buppu weik kumanya dobukba, silal sebukabukce, urasin pia malye weik ubuk.