Ester 9:4 - Eipomek

⁴ Persia pia weik mutuku-mutuku nirya ulamik ninye arye, Mordekai biti biklamik. Tonda, ninye deiyoknye Mordekai birye, pil dolamuk ning ap, winilamuk ning ap nirya ara, yuk nang arye laka nyalamikba, Persia pia weik mutuku noutamak ulamik ninye nirya kekenmmikce, ‘Se, anye dipkoprob weik mambulnye ulule,’ tenelamik. Mordekai bira tuba-tuba pia tabakuka, mikip weika arye upra balamuk.

Ester 9:4 交叉參考

2 Samuel 3:1

Raja Saul el mapu silip ap, el tam kiamik nang ap, Raja Daud el mapu silip ap, el tam kiamik nang ap nirya ara, keting tamun weik tonun ton, olana uk ulamik. Winilamik bukni, Daud el tam ara, mikip weik upnin balamuk. Bukni, Saul el tam nang ara, pia mikip kum upnin balamuk.

1 Tawarikh 11:9

Raja Daud daupra balamuk talak, mikip weik kipnin balamuk. Winibuk deiyok ara, Allah Yahweh aning-aning nirya talibuka, deice tam ulul mikip weiknye birye, Daud biti meliamukba winilamuk. Allah el mikip areamuka deice arye, Daud bira mikip weik kipnin balamuk.

1 Tawarikh 14:17

Aning nirya, Raja Daud birye winibuka ati ara, dana-dana tam ulamik ninye nirya arye, ninye deiyoknye Raja Daud, el si ara mutuku-mutuku nirya arye bikamik. Tonda, Allah el si Yahweh arye, amutuku noutam ati, ilil un ning deibukba, dana-dana tam ulamik nang, ayala-yala nirya ara, el Raja Daud biti, ilil weik ubukba, ‘Se,’ tenelamikce ulamik.

Ester 10:2

Persia mutuku ninye deiyoknye, Raja Ahasyweros birye, ikin weik pil ap, imun kanye bon pil ap, mambul pil aning-aning nirya ap, dolamuk ning ara, sik mambul ning sekna buku noutamak sekuka delilamik. Aning atonun, Raja arye utenebuk. ‘Mordekai erepdeipniba, na amu tam bukni, ninye deiyoknye unamle’ tenen, ereibukba, weiknye tikuka ulamuk ning nirya ap ati, tenebuka sekna ning buku noutamak sekdeibuk. Aning nirya ara, sik mambul buku noutamak sekuka deibik. Ara, yuk buku kume. Persia mutuku noutamak talibuka ulamik ninye deiyok Raja-Raja nang ap, tonda Media mutuku noutamak talibuka ulamik ninye deiyok Raja-Raja nang ap, sik nirya arye seklamik buku noutamak ton sekuka delilamik. ‘Aning nukibirye kel kipnuyabe,’ tenepmunyopura, amambul ning sekna ati, aminyan talak upra yangalamikba, sekda yangalamik ning ara, pia mambul buku noutamakuk, sekuka delilamik.

Mazmur 1:3

Allah yupu moubuka tenelulnye bira, el wininamle ning nirya ara, telebuk wininamle. Anye el wininamle ning nirya ara, winipmanto ninye arye mek kup-kup ak yo koubikiba paplirye, bok teleb kibuka paplirye, duk moun talak li nirya ara, batakna kumce, teleb kibuka duk moulule. Tonda ayo bok kolubuka, kum saklamla atonun, Allah ati diba tenelulnye birye, wininamle ning nirya ara, telebuk wininamle. Deiyok ara, Allah arye diksukumuk wininyak ninye ati melilamliba, telebuk wininamake.

Mazmur 18:43

Allah ance anang ati, kum kekeplumce, kum meliamluma ati, narye, mal olan nang nirya ara, obuka sirya dakse. Sikda, obuka malye kipse ati, winipmanto ara, kumanya yanuka, mikip arye dopliba, tuku sung-sunga nirya bobalirye, kum danin balamle touk, narye mal olan nang nirya obuka sirya dakse. Diba, winipmanto ara, ninye arye talye balamle ning do, malye kibuka akunum lyulul ning do, bisikak aupmaliba dobuka, bai tam dolamak touk, na mal olan nang nirya obuka, yuk pere sukum donokse.

Mazmur 92:13

Diba, sik malye tuba wininyak nang ara, kum danamak bukni, ance nunti, “Aning ara, wininamlume. Aning ara, pia kum wininamlume,” nyapdeiamsulum yupu uk talikirye, diksukum telebuk wininyak nang nirya ara, pia telebuk wininamake. Sikce unamak ning nirya ara, telebuk unamle! Ara, pia teleb cang yo, el si ara kurma yo palamle touk, unamake. Ara, winipmanto, Libanon mutuku noutam ara, weik yo, el si aras yo mikip arye tiklirye, cang ap, urasin teleb ap, ulamle touk, ance sik diksukum wininyak nang ati, telebuk winiliminyeba, pia telebuk unamake!

Keluaran 11:3

Ura, atalak ara Allah el si Yahweh arye Mesir ninye ati, sik talima noutamak pil dobukce, sik kanye tenen ning dangubuka, sik Mesir nang arye Israel ninye ati, ‘Teleb’ tenen, kanye deibik. Tonda, Musa bira Mesir mutuku ulamuk talak arye, sik weiknye Firaun el amu tam talye ulamik ninye nirya ap, Firaun el pil dona deiyok nang nirya ap, sik nirya arye Musa ati, ‘Elda telebnye anya arye, elda mambule’ tenelamikce, elti, si erelamik.

Amsal 4:18

Wininyak bukni, sik diksukumuk unyak ninye ara, beren tam keting yalye talak ara, sika arye dawaplya ani, keting deiplirye, dirin ulamle touk unyake. Sik dib tenen ninye ara, tonok sum berekna deice arye, keting deiplirye, dirina weik ulamle touk unyake.

Yesaya 9:7

Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.

Zefanya 3:19

Tonda, moubuka dilinamlulume! Doyanamle talak ara, yu nang arye, anggun Israel yala nang ati, ikin ning, anggun nong deice delilamsik ning ap, ikin pil aruk lamsik ning ap ara, anggunti olyangalamsik nang ap, naryuk amalye nang ati, obuka kum kipdeipnirye, malye kibuka bataknamne. Tonda, winipmanto yupu deice arye, nyapnusine. Ara, domba basam wein nang arye, yan bir yok cepmalye domba basam ara, bisik binmanto kum upliba, adeiyoknye birye, adomba basam iribuka bobalamak touk, anggun babye, winipnamsene. Ara, anggun Israel nang babye, nong mitang upsilye talak ara, anggunce, ‘Se, yata wiriptibye do? Yata ubuka bitibye do?’ tenen, walwal kipdanin balamluma nang nirya babye, na Allah aryuk lyepropsinirye, teleb kipdeipnamsine. Tonda, yuk pera mutuku nang arye anggunti, obuka malye kipsikirye, si mutuku bobinamsiakopura, narye anggunti, lopdeipsinirye, dobuka tuba tamubuka, anggun mutuku koproba boyanamsene. Tonda, malye nang arye, anggun mutuku noutam arye yaksikcopura, narye anggun dam yanuka, kaliksinirye, anggun bulubuka, anggun mutuku koproba tamubuka boyasinirye, teleb kilinamsine. Winipnamne deice arye, anggun Israel nang ati, malye yupu nyapnarye, nalibuka akutulamsikba, alye weik ulamsuk ning ara, kum daneipnamne. Narye anggunti, tamubuka teleb kipdeipsiniba, yuk tam nang eipsikirye, ‘Se, wini talak ara, sik Israel nang ara, pia telebuk unyake,’ tenepsikirye, anggunti si erenamsiake. Tonda, sik yuk-yuk mutuku daunyak nang arye, anggun Israel nang ati, ‘Se, sik aninye nirya ara, dipkoproba mambul weik nang unyake,’ nyabuka, kanye pia deipsikirye, si erebuka kinamsiake. Anggun ti, pia teleb yupu nyabicopura, mutuku sirya, im sirya unyak nang nirya, ayupu kekebikirye, anggun si bikinamsiake.

Matius 4:24

Yesus arye, ninye kwetepra daulamuk bukni, yuk nang arye, el winilamuk ning laka nyalbalamikba, Siria mutuku tam ulamik nang nirya ara, Yesus winilamuk ning kekelamik. Aninye nirya kekelamika ati, uk yala-yala nirya pia weike dilamukba, kanye imun ulamuk ninye, weik arye bobukabikce, Yesus dam boyangalamik. Ara, minop arye, weik uk dilamuk ninye ap, isa arye sik talima wekuka talyamuk ninye ap, walwal arye kanye wangalamak ninye ap, sik taruk yan nirya sesal selamuk ninye ap, Yesus dam boyangalamikba, Yesus arye aninye nirya, teleb ubuka kwetelilamuk.

Yosua 6:27

Aning-aning nirya winibuka deice arye, Allah el si Yahweh arye, Yosua biti meliamukba, atalak ninye nirya kekelamikce, Yosua el si weik arye, amutuku nirya kel bikamik.

1 Samuel 2:30

Nyabukabukce, ayupu ton dukdongobuka nyabuk. “Ati ara, nara Israel ninye anggun ni Allah, Yahweh, narye nyapkine. Minop talak arye nyalamse. ‘Eli an yala nang ap, sik mapu nirya ap, atalak-atalak nirya ara, na aik pum pil dokirye, natibuk si erenamniyake,’ nyalamse. Nyalamse bukni, wini talak ara, na Yahweh arye, aning batakuka, yuk yupu nyapkine. Wini talak ara, na kanye yuk upnile. Ara, yata nang do, nati kibuka, na si erenyak nang ati, narye sikti, erepdeipnamne. Bukni, yata nang do nirya, nati, ‘Elda mambul kume’ tenen kibuka, na si kum ereninyak ninye ati ara, narye sikti, ‘Dauaplye, sikda talye nang’ tenen, bataknamne. Sik ti pia kum melinamne.” Allah arye nyabuk.