Ura sik Asyur mutuku nang arye, Samaria mutuku obuka sirya dakikce, Israel tam nang bobiyikce pera mutuku deibik ning deiyok ara, ani. Sik Israel ninye uk Allah el si Yahweh arye, ‘Aning ara wininamlume, aning ara kum wininamlume,’ nyapdeiamuk yupu moubuka kum taleamikce, ayupu kum winilamikce, bataklamika atia. Tonda, Allah el si Yahweh arye, Musa biti ‘Wininamlyame, winipmunyopura, narye, winibuka melinamsine,’ nyabuka, nyalin yupu nyapdeiamuk yupu nirya ara, ‘Nun like’ tenelamikce yaniltalamik atia. Ayupu nirya ara kekebuka nimalye arye, kum winilamike, tonda ayupu moubuka kum dobolbalamik. Batakna uk ulamika ati, Allah arye, yu arebukba, sik Asyur mutuku nang arye, Israel ninye obuka sirya dakikce, Israel ninye weik arye, tapu koubuka pera mutuku bobinuka deibikba daulamik.
Daniel 9:5 - Eipomek5 Bukni, nun malye wininyap ninye ara, Allah ance nunti, “Aning winina meme,” nyapsulum bukni, aninguk tamubuka wininyabe. Tonda, ance, “Aning ara, wininamlulume. Aning ara, pia kum wininamlulume,” nyapsulum yupu yaniltabirye, batakanyabe. Winibya deice arye, an nyapdeiamsulum ning nirya ara, akunum batakupe. 參見章節 |
Daniel 9:5
31 交叉參考
‘Aning nirya ara, wininamlarya,’ nyapmasina ara, talye ati kum nyapne. Deiyok ara, narye, na mapu koproba Israel ninye ati wenepnirye, sik deice ikin ning deipnamne ara, sikce na dam malye un ninguk, pia talibuka unyaka atia. Ara, Israel ninye ara, sik apu yapu ati, Mesir mutuku noutam ikin weik ulamikba, narye lyebuka bobinamse bukni, atalak arye dipdongobuka, wini talak babye, sik ap, sikce deibikba, dadeipdanin balamik ninye arye, malye weik ukiba, na dam ati, yu kililamnik touk, sik atalak unyak ninye arye, tuba na damuk tuba yu kilininyake. Ati, sik dam arye wenebuka, kanye imun weik ning deipnamne.
Narye nyabuka moropse. “Se, na ni Allaho. Diba na ni Allah, nara dipkoprob mambul kanye bopnarye, alye weik upmanile. An morona ati ara, na kisok erebuka an dam dina ara, na pia ilil ati, kum winiptinye. Deiyok ara, nun malye unyap ning ara, pia weik tonun tabaknin basiliba, weik tonun nepnin basilirye weik usulule. Winipmanto ara, nun malye winin ning ati, adiparyuk wenebuka opnamsutum deiyok ning ara, nun kisok bisibuka, im deice binmanto akunum ulule,’ tenepne.
Se, na kele. Nun Israel yala nang, nun apu yapu nang, min talak ulamik nang ara, malye weik winilamik touk, nunda atalak unyap Israel nang babye, an yupu yanibibirye, malye winin ning weik wininyabe. Sik minop talak ulamik nang babye, nun atalak unyap Israel yala nang babye, ance, “Aning ara, wininamlume. Aning ara, pia kum wininamlume,” nyapdeiamsulum yupu batakuburye, malye weik winilamupu touk, tuba malye winin ning weik tonun tuba wininyabe.
Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, ancuk peterelamnulume. Ati ara, an yupu tonok ning babye ton, kum batakanune. Aninguk moubuka eipnirye, diksukumuk wininune. Ara, talye ati kume. Allah ancuk peterepnuluma atia.
Se, na ni Allah, nara an amu tam unirye, an piluk donun bukni, domba basam tonok wangamliba, el weina deiyoknye birye, ‘Na domba basam, dan mutuku ulul do?’ tenen, elamle touk, nara teleb ban bisik wangapnukba, malye kanye bobuka, ununa anya arye, ance elyanamnilame. Ara, talye ati kum bukni, ance, “Aninguk wininamlulume. Aning ara, kum wininamlulume,” nyapdeiamsulum yupu nirya, luba kum kinune. Ayupu ara, moubuka teninauk unune. Ati melibuka elyanamnilame na nio. Raja weik Daud arye, Allah morona deice arye, amot yupu nyabuka sekuke.
Winilamuk ning deiyok ara ani. Ara, winipmanto ara, nun nirya wanglamak domba basam atonun ulamupu. Nun malye ulamupa deice arye, nun kanye yuk-yuk tenilamuburye, bisik yuk-yuk tenebuka balamupu. Domba basam buru sakuka yuk-yuk dabalamak touk ulamupu. Allah Yahweh arye nun tukwak ninye malye winilamu ning ati opsutu bukni, nun malye winina ati, nun malye winilamu ning nirya dobuka, el amu tam pil dolamuknye, el nong deice uk deibuk.
Nun dam, akunum malye ulilamnyap bukni, ance, ‘Winipnamlume,’ nyapdeipsulum ning ara, batakaltakanauk unyabe. Tonda, yuk nang dam ara, nunce, ‘Kume, Allah Yahweh ara, nun walwale, el bisik kum dobolbanyabe,’ nyabuka batakanyabe. Nun ni Allah, an siuk erelamupu bukni, wini talak ara, an dam mal pipkuburye, nunda mandipna dobuka unyapce, pia yuk kwalin bisikuk akunum banyabe. Malyeuk winibibirye, yupu lipsisikuka bokolina deiyok nang dam bibirye, yuk nang ati, malye kum winipmakibuk, ‘Kume, sikda malye winipmake,’ nyabibirye, ‘Deiyok nang arye, anang wenepnamakʼ tenen, minin yupu arye nyanyabe. Allah anti, kum melibuka dobolyangakinyabe. Nunce yuk nang ati, nun kanye pum tam tenebibirye, ‘Ikin ning, sik deice akunum deilinamabeʼ tenen, yupu bokolina deiyok nang dam binuka, tenepce arye, talye tilila yupu uk nyabibiba, anang deice wenepnarye ikin ning delinyake. Adeice arye, an yupu yaninyabe.
Minopa donirye dipdongobuka wini talak babye, an Allah uminya atonunye ton ulamukba ninye elilamikce, laka nyalamikba, kum kekelamike. An tonok ulyama atia. Allah anti diba tenekinyak nang arye, ‘Allah aryuk melibuka lyepnamsile,’ tenekirye, kintinibuka dinauk unyak ninye ati, lyesilyamnye atonun ton pia kum ulule. An tonok ulyame.
Nyabukura, Yeremia birye, ayupu nyabuk. Se, nun ni Allah. Ance talye ati, kum nyapmasilame. Dipkoprop nun Israel ninye ara, malye-malye ning weik unyaba deice arye, akunum lak upsilak, yuk nang nirya eibikirye, “Diba, sik Israel ninye ara, malyeuk wininyake,” nyasinyake. Diba, nun ni Allah, nun babye malye wininyap ning, dekna arye wenepnamsilame. Nunce antibuk, malye wininyap anya arye, merekuka wenepnamsilame. Kumopura, an si ati, yuk nang nirya arye, malye nyapnamake. Nyabuka wenepnamsilam bukni, “Naio ance nunti, lyepropnamsilame,” nyabuka moropkiyabe. Ara, ‘An si tuba erenamkiap’ tenen, nyapkine.
Minop talak, anggunti bico tenyamsisirye, ‘Nuncuk anggun melibuka lyepropnamsiabe,’ nyabuka, kanye deiamlum nang nirya ara, anggunti akunum luba kipsikce, bindobike. Sik ayuk-yuk mutuku nang arye, anggun Israel nang ati, tonap tamubuka, pia kum teninamsiake. Sikce, ‘Anang ara, dauaplye,’ akunum tenesinyake. Aning babye, talye ati kum bukni, deiyok ara, anggun malye weik winilamlum ning ati, na Allah arye anggunti yu upnukba, ‘Ikin weik ning arepnuneʼ tenepsirye, anggun mal olan nang ati lo arepsiba, mikip arye opsika deice arye, wenepsise. Anggunce malye winin ning weik winilamluma ati ara, merekuka wenebuka opsise. Ara, anggunce pia malye weik winilamlum ning ap, malye-malye ning talibuka, pil dolamlum ning ati, ikin weik wenen ning arepsise.
Aning winipsa deiyok ara, talye ati kuma. Deiyok ara, sik amutuku ulamik nang arye, malye weik tuba-tuba winilamika ati, na yu ulamnuka deice arye winipse. Sik amutuku ulamik nang arye, sik si bikina kum ning bukni, talye isa ap, anye atonun, talye dewa ning ap, si erena ati, domba ato ning obuka arelyangalamikce, atalye ning ati, si erelamike. Atalye ning ap, isa ap ara, sik atalak Yehuda mutuku noutam ulamik nang babye, anggun atalak unmalum nang babye, anggun apu yapu min talak ulamik nang babye, aning nirya ara, anggun si kum bikamlume.
Bukni, Allah Yahweh elda, dib kopropnye birye, yupu nyapdeiamuk ning ara, na akunum yaniptapse. Ati, na nyanamne yupu ara, anggunce moubuka kekenamnulume. Ara ani. Se, mutuku-mutuku nirya ululum ninyo, bita dipdenululume. Nara, pia ikin weik ning, na nong deice upnile. Ati, na mapu wel nang ap, wel kilapu ap nirya ara, anggun mal olan nang dam bimunce, olalbinululume.
Allah Yahweh, elcuk na ati, pia moubuka kalikuka dinulule. Wininilirye, na nong noutamak nirya ara, bol teleb unulule. Tonda, na talima noutam ara, kanye nirya obinapna, ayanapna kibuka, na duk-duk noutamak welebinapna, kouluka yanapna kinulule. Ati nara, akunuma ninye ona atonun unune. Wininirye, ninye dibikirye, balamak aik dam atonun unune.
Bukni, Yerusalem mutuku noutam unyak nang nirya ara, narye, ‘Aning ara, wininamlume. Aning ara, pia kum wininamlume,’ nyapdeipse yupu nirya ara, ‘Nun like,’ nyabuka, yaniptabuka unyake. Sik yuk mutuku-mutuku noutam nirya unyak nang ara, malye una pia weik unyak bukni, sik Yerusalem mutuku unyak nang ara, pia malye ning, weik tabakuka pil donyake. Anya arye yuk-yuk mutuku unyak nang ara, mitik tonun arye malye unyak bukni, Yerusalem mutuku noutam unyak nang ara, narye, ‘Aning ara wininamlume. Aning ara, pia kum wininamlume,’ nyapdeipse yupu ap, ‘Teleb una ara ani, malye una ara, ani,’ nyapdeipse yupu ap, nirya ara, talye luba kibuka yaniptabikirye, pia malye weik unyake.
Yuk pera mutuku nang arye, anang tomobuka bobinuka, deipnamakak ara, amutuku-amutuku unamak Israel yala nang arye, dabinuka unamak talak ara, sikce nati kanye moubuka teninamake. Tenipnikirye, moubuka biknamniyak ara, ‘Se, Allah arye nunti, wenepsuk ning deiyok ap, elce nunti, talima uk dilamukba, ‘Na like,’ tenelamsuk ning ap, adeiyok ara, nun tia.’ Ara, nunce, nun talima noutam, Allah ati kanye pia kum deiamuba ati, el batakamuburye, talye isa ati wibuka, aning si erelamupu. Tonda, nunce pia malye un ning talibuka, winilamupu ning ara, dipkoprob malye ninguk winilamupu. Tonda, Allah arye, ‘Aning ara, na pia like. Aning nirya ara, mem ning anya arye, pia kum wininamlume,’ nyabuka, lak nyapdeiamsuk bukni, nunce amalye ninguk talibuka, winilamupa deice arye, Allah Yahweh arye wenepsukce, bataksuke. ‘Aning nirya ara, ila tamubuka teninamak’ tenen, winipsuke
Nun Israel yala ninye nirya ara, ance, ‘Aning wininamlulume. Aning ara, pia kum wininamlulume,’ nyapdeiamsulum ning ara, moubuka kekebibirye, moubuka kum talinyabe. ‘Allah nyapdeipsuk yupu, nun like’ tenen, anti balye tam kibuka, talye batakanyabe. Adeice arye, nun ni Allah, an dam malye winilikinyabe. Ara, an amu tam pil donanye Musa, el dam nyapdeiamlumba, sekamuk yupu buku noutamak, lak nyalamlum yupu ara, ‘Allah na yupu yanimunyopura, narye kanye imun weik ning, anggun nong deice delinamsine. Tonda, weik arye wenepsinirye, supdongopnamsine,’ nyapdeiamsulum ning ara, wini talak nun deice akunum yangalule. Ara, talye ati kume. Nunce pia malye winilamupu buk, ance nunti, ‘Malye uk wininamak’ tenen, supdongopsulume. Asupdeipsuluma deiyok ara, nun malye winilamupa atia.
“Ati ara, na ni Allah, ance aning-aning nirya talebuka, pia deice tam erebuka Pia Mikip Weik Deiyoknye ulyama ati, an siuk erenyape. Ance an mapu Israel ninye, Mesir mutuku noutamak ulamik talak ara, ikin weik asa ulamik bukni, an taruk mikip deice arye, bobuka yanamsulume. Ara, ‘Sikce na mikip ara, biknamak’ tenen, winyamlume. Ance weik mambul pil dolamluma deice arye, ninye weika arye, an siuk erenyake. An si ara, luba pia kum kipnamake. Tuba tenenauk unamake. Bukni, wini talak nunda tuba malye winibirye, an si yanikinyabe. Ara, nunce an nyapdeiamsulum touk, kum wininyaba deice, an dam malye wininyabe.
Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.
Allah Yahweh arye, minopce deiyok koubuka, ‘Israel yala ninye kekenamak’ tenen, nabi Hosea biti, ayupu nyabuk. “Hosea anda Israel ninye noutamak bimince, amutuku talye-talye yoltanyak kil, binuka dopnulyame. Akil binuka dopmince, akil arye deipnamle mapu nirya ara, an mapu kopropba kum unamake. Yuk nang arye, an dopnalam kil ap neika ukirye, talye yoldakiba, akil arye, sik yuk nang mapu ton deipnamle. Amapu ara, talye yoltanyak kilapu arye delinyak ninye, sik yala ton unamake. Wininamluma deiyok ara, ani. Ara, winipmantonye wininamlama atia. Deiyok ara, malye kilapu arye, sik minop dolamik nang batakuka, yuk talye daunyak nang ap, talye-talye yoldalamak touk, na mapu koprop, Israel ninye arye, nati batakaninyake. Batakaninyakce, yuk talye ning ati, ‘Nun ni koprop ani,’ nyabuka, Isa Mutuku Dongonye, si erenyake. Wininyaka deice arye, na Allah ati batakaninyake. Tonda, aisa si erenyaka deice arye, sal ap, kilapu ap, talye yoldalamak touk wininyake. Israel nang babye, atonun wininyake. Sikda diksukum teleb kibuka una kumce, malye-malyeuk wininyakce, nara sik ni koprop Allah Yahweh ati, batakuka bindopnike.” Allah arye, Hosea biti nyabuk.
Anggun apu yapu nang ulamik arye dipdongobuka, atalak-atalak noutamak nirya ara, narye, ‘Wininamlulume, aning ara kum wininamlulume,’ nyapdeiamsise yupu, yanibuka batakalulume. Narye nyasinye yupu uk, talibuka dukdongobuka, kum dobolbalulume. Ati ara, anggun adiparyuk, tamubuka na dam yanululume. Yamunyopura, narye bataksise ning ara, ila tamubuka anggunti, dilyanamsine. Na Allah Yahweh, aning-aning nirya talibuka, im deice yin talin malaikat nirya, sik weik deiyoknye birye nyapsine. Bukni, anggunce nyalulume, ‘Se, nunda nun ni koproba Allah, el dam arye batakuka, yukak kum bindobupa anya arye, yata wiribibirye tamubuka, Allah dam binamap do?’ nyalulume.
Anyapmasin yupu aubuka anya arye, na weitcapu atonun ninyeo, anggun babye, anggun bidamang ati, pia moubuka kalekelanamlulume. Ara, ‘Nun kan-kan tonoknye do, tonok kil do, sik kanye talima noutamak ara, malye winin ning weik upliba, diba kum tenekirye, Pia Kam Una Deiyoknye Allah ati, urasin tamubuka yukak bicak’ tenen, moubuka kalekelanamlulume.