Daniel 11:30 - Eipomek

³⁰ Siria mutuku taleamlye Raja arye, Mesir mutuku kum obuka, sirya daknamla deiyok ara, ani. Ara, Sitim mutuku nang ara, Siprus mutuku arye mekwen deice balamle kapal bukuka yakirye, el Siria mutuku Raja ati, yanuka obikiba, el ilil weik upnamle. Ilil weik uplyopura, Mesir mutuku bataklirye, tamubuka bindopnamle. Bukni, elda yu weik uplyopura, Israel nang unamak mutuku tamubuka binamle. Winiplyopura, el yu ati, ‘Allah el si erenyak aik pil dona deiyoknye, imam-imam nang, sik deiyoknye biti, adiparyuk obuka, kum kipdeipnamle,’ tenyamuk ning tuba teneplirye, Yerusalem mutuku tamubuka benamle. Tonda, Allah ati diba tenena kum nang, amutuku noutam unamak nang arye, Raja ati nyapnamak yupu kekeplirye, ‘Sikda teleb,’ tenebuka, sikce nyanyak yupu kekeplirye, anang ati melibuka unamle.

Daniel 11:30 交叉參考

Kejadian 10:4

Yafet el mi Yapan birye deiamuk mapu ara, Elisa ap, Tarsis ap, Kitim ap, Dodanim ap deiamukba, amapu nirya sik babye, mapu weik delilamikce, ninye weik ulamik.

1 Tawarikh 1:7

Tonda, Yafet elce deiamuknye Yawan ulamuk. Yawan birye deibuk nang, sik si ara, ani. Elisa ap, Tarsis ap deibuknye bira, (el si ton Spanyol nyalamik). Tonda, Kitim ap, Dodanim ap, deiamukak daulamik.

Nehemia 6:12

Semaya birye nyapnuk yupu kekepsirye, kel bikse. ‘Kume anye birye nyapmanil yupu ara, elcuk tenibuka kum nyapmanile. Tonda Allah arye, anye biti, “Ayupu bobuka Nehemia dam lak nyalbinulame,” kum nyapdeibuk. Ayupu nyapnuk ning nirya ara, sik yuk nang Sanbalat ap, el kwit Tobia ap, sik kayapu ap arye, ‘Ayupu nyapminba, uang yo bok arepnamkiyabe,’ nyabika deice arye, tilila yupu uk yanuka nyapmanile. Ati Semaya birye nati talye minin yupu deice arye, na dam yanuka nyapdeipmanile,’ tenepsirye kel bikse.

Yesaya 23:1

Tirus mutuku nang wenebuka malye kipdeipnamle ning ati, Allah arye na Yesaya dam yanuka nyapdeipnuke. Ayupu ara, ani. Weik laut mekwen deice balamle kapal, Tarsis pia mambul kanye bobuka engenamlume. Deiyok ara, Tirus mutuku weik asik domik ning ara, akunum ulubuka daklobikce, sice buklobik. Sik laut mekwen deice kapal talin nang ara, otam laut mekwen dana-dana tam dukdongamuk mutuku, el si pulau Siprus arye binamuka, Siprus mutuku dam mekwen deice yanuka deipmek talak ara, Siprus mutuku nang arye anggunti, “Se, otam keting kumulban tam, weik asik Tirus mutuku ara, akunum obuka bataklopnamake,” nyanmikak kekenmek. Tonda, “Tirus mutuku laut mekwen deice ban kapal delilbanak ap, amutuku ninye aik nirya ap ara, dakuka sice buklopnamak,” nyanmekak, sik Tarsis mutuku kapal laut talin nang arye, ayupu kekebuka bikik.

Yesaya 23:12

Allah arye ayupu nyabuk. “Se, anggun Sidon mutuku nango! Anggun ton kanye deibuka, pin-pin asa arye kum unamlume. Anggunda akunum obuka bataksise. Anggun Sidon mutuku ululum nang nirya ara, ikin ning weik, anggun nong deice akunum deiamseba, weik ikin kanye bobuka ululume. Anggunda, ‘Yuk karin mutuku bibirye, otamuk teleb uptibye tenen, anggun mutuku batakuka, otam mutuku, laut mekwen antanap dongobuk mutuku, pulau Siprus mutuku binuka unamluma babye, amutuku noutam ton, dikdik sebuka telebuk pia kum unamlume. Ikinuk unamlume.

Yeremia 2:10

Keting wekelban tam, Siprus mutuku bukni, weik laut mekwen kup-kup tam dilbinamlulume. Winipmunyeura, ninye ton Wibuka deipmunba, pera mutuku el si Kedar mutuku, keting yangan tam dilbinamlule. Dilbilyopura, amutuku-amutuku noutamak nirya moubuka dipdelirye, kel biknamlule. Ara, anggun Israel ninye arye pia malye ulamluma atonun, yuk mutuku ninye babye, atonun malye wininyak do? Yata mutuku ninye arye, anggun malye ulamlum touk unyak do? Tukwak mutuku nirya dipdebuka elbitum bukni, anggun malye ulamlum atonun ninye ton, anggunce pia kum eipnamlume.

Yehezkiel 27:6

Amekwen deice balamuk kapal, el mek bukna ati yo ara, Basan mutuku noutam kat weik yo tikamuka deice arye, kintinibuka domik. Aning atouk, akapal el ninye tikinak ap, bunak ap, tikuka banak ati, lan yo ara, Siprus mutuku arye, keipyal yo boyanuka domik. Tonda, keipyal yo lamik deice ara, el urasin teleb una ati ara, gaja el yang arye, urasin teleb ning memebuka, aning dobuka, yo labik deice deibuka domik.

Daniel 11:28

Ati ara, Siria mutuku talibuka, Raja unamlanye ap, el yin talin nang nirya ap, Mesir mutuku batakuka, sik mutuku tamubuka binamake. Tamubuka binamak talak ara, yuk-yuk mutuku nang ati, mal olalbikirye, alubuka dopropnamaka bona nirya ap, bobinamake. Tonda, Raja el kanye ara, ‘Allah el si erenyak aik pum tam pil dolirye, imam-imam nang, sik deiyoknye bira, oplopnirye pia kum kipdeipnamne,’ tenelye kanye ara, tuba aupmalibuk, el mutuku tamubuka binamle. Tonda, elce, ‘Winipnamne,’ teneplye ning nirya ara, Israel mutuku noutam arye, aning tuba teneplye touk, unamle. Bukni, Mesir mutuku batakuka bilye talak ara, Israel nang ati teninamle ning nirya ara, tuba aupmalibuk, el mutuku tamubuka binamle.

Daniel 11:29

Dabinuka daulamlya ani, like weikto uplyeura, daulamlya ani, minop talak Allah arye, ‘Atalak ani,’ akunum tenyamuk touk, atalak akunum uplyopura, Siria mutuku taleamlye Raja ara, tonap tamubuka, arah selatan tam, Mesir mutuku talibuka ulamlye Raja ati, ‘Anye oplopnirye, el mutuku alubuka dopropnamne,’ teneplirye, tamubuka Mesir mutuku olbinamle. Winipnamle bukni, minop talak winyamlye ning ara, urasin yuk, aminyan talak upnamle ning ara, urasin yuk upnamle. Min yuma talak Mesir mutuku olyanamuk talak ara, ninye weik omukce, sik ning weik tonun, alubuka dopropmok ning atonun, abitinye talak ara, kum winipnamle.

Daniel 7:25

Winipnamle talak ara, el anye birye, Weik Erena Deiyoknye Allah, aning-aning nirya deice tam ululnye, Allah ati, malye yupu nyanamle. Malye yupu nyaplirye, Allah el wipdeiamuk nang ati, pia ikin ning, sik nong deice tuba delinamle. Winiplirye, Allah arye, ‘Aning wininamlulume. Aning ara, pia kum wininamlulume,’ nyapdeiamuk mem yupu ati ara, amalinye birye yanipnamle. Tonda Allah arye, ‘Na tenyamse talak ani,’ nyabuka, el si eren ati nyapdeiamukba, el mapu arye, el si erenamak keting tamun ap, wala ap, asum ara, ‘Kum kipdeipnamle’ tenen, piripdenamle. Winibuka unamle talak noutamak ara, Allah arye, el mapu dobuka, amalye weik deiyoknye ati, arepnamle. Ara, pia diba kum bukni, tia talak ati, Allah el mapu pirilena ati, anye el amu tam deipnamle. Atalak ara, keting tamun winilye ap, tonok ning noutamak ap deice arye, amalye deiyoknye birye, Allah el mapu talinamle.

Bilangan 24:24

Tonda weik laut mekwen deice arye, weik mek liya yo, el si ara kapal laut, Kitim mutuku arye yanamake. Anang uk bukni, ton si ara Siprus mutuku nang nyanyake. Anang yacopura, Asyur mutuku ninye ap, Heber mutuku ninye ap ati, obuka sirya daknamake. Winipnamak bukni, aminyan talak, sik Kitim mutuku yin talina nang babye, kum upnamake. Ara, dotalak sik Israel ninye arye, amutuku nang nirya obuka sirya dakikirye, bisipnamak ati nyapkine,” nyabuk. Bileam birye nyabuk.

Matius 24:10

Anyapmasin ning winipnamle talak ara, diba akunum tenepnik ninye bukni, na yupu ap, na ap ati batakukabikirye, sik yuk diba tenenyak ninye ati, ‘Anang ara, nun like,’ tenepdakirye, sik kayapu nang kopropa bukni, ‘Weik nang arye, aninye ati tapu koubuka opnamak’ tenen, wenen deiyok nang dam yukubuka bobanamake.

Wahyu 12:12

Winibuka ulamika ati ara, im deice tam noutamak umunye ninye nirya ara, kanye deibuka pin-pin asauk unamlulume. Bukni, anggun tukwak mutuku ap, laut mekwen kup-kup ap, mekwen noutamak ap, umunye ninye nirya ara, anggun tonok ara bicoe. Allah arye Isa Mutuku Dongonye dobuka, im deice arye dokwetebukba, anggun dam tukwak mutuku saka yanmale. Malaikat arye, Isa Mutuku Dongonye dopkwetepmakba, tukwak mutuku koluku yanmala anya arye, el ap anggun tukwak mutuku ninye ap neika unamluma ati, imun kanye bobuka unamlume. Isa Mutuku Dongonye ara, ‘Se, na tuba talye luparabuka batinye tenepmal talak, tuba aupmanil ning ara, lo mitik tonunuka’ tenen, akunum kel kipmala ati ara, yu pia weik upmala ati, anggun tukwak mutuku tuba ululum ninye ara bicoe.” Tonok im deice ululnye birye nyabukba, kekepse.