Ayub 21:15 - Eipomek

¹⁵ Tonda, sik malye winin ninguk talibuka unyak nang arye, Allah ati nyanyake. Sikce, “Ton nang arye anti, ‘Allah elda, aning-aning talilirye, pia deice tam erebuka, Pia Mikip Weiknye ulule,’ nyabuka, an siuk erenyake. Bukni, nunce, aning tenenyabe. ‘Allah ance nyapdeipsulum yupu, yuk nang arye aninguk talibuka unyaka ara, deiyok ton kume,’ tenenyabe. Tonda, anda Allah ati, ‘Se na nio melipsilyame,’ nyabuka moronyap buk, aning nirya nong pia kum upnamla ati, deiyok ton pia kum ulule,’ tenenyabe.” Sik malye un nang arye winibuka, Allah ati nyanyake.

Ayub 21:15 交叉參考

Ayub 22:17

Sik anang arye, “Kume, Allah ara, weik tonun erebuka, aning-aning nirya talibuka, mikip weiknye ulul bukni, elce yata wiripsutu do? Allah elce nun dam ara, yata ikin ning ton dobuka deipnamsila kume,’ tenelamik. Tonda, “Allah anda nun dam batakuka, yukak kisikuka binamlyame,” nyabuka, Allah ati mania kanye bolamikce, yanilamik.

Ayub 22:3

Yata wiribuka, an diksukum ubuka, pia teleb ulamtuma babye, Allah pia erebuka, aning-aning nirya talibuka, mikip weiknye ulula ati, ance elti, teleb kipdeiptum do? Tonda, elce anti, kanye deipkutu do? Tonda an uminye ning yala-yala nirya, diksukumuk ulamtumba, yuk nang nirya arye, anti, “Dipkoprob elda, pia diksukumnye ulule,” nyabuka, si erebuka kipketinga babye, aning deice arye, Allah ara kanye deipnamkil do? Na kanye ara pia kume.

Ayub 34:9

Aning ara talye kum nyapsine. Nun kele, Ayub elce ayupu ton nyapsukba, kekebupu. Elda, “Ninye arye pi dobuka, ‘Allah el tenelul touk winiptinye, tenelulnye bira, talye ati winiptinye,’ tenelula. Allah ati kanye deiptibye babye, aning ara nong kum upnamle ning uka,” nyapsuke. Nun kwit Ayub birye, ayupu akunum nyapsukba, kekebupu.

Ayub 35:3

Tonda, ance asibuka nyapmasilama ara, ani. “Se, na malye una kum bukni, Allah arye nati wenepnukce, ikin ning weik, na nong deice akunum delinulule. Ati, nara Allah el dam malye akunum upmatinyopura, dipkoprob wenepnamnila ati, wini talak ara, narye malye kum winipmatinye babye, malye akunum winipmatinye babye, yata teleb ning doropnamtinya ati do? Kume, akunum wenenilyama ati, aning ara atonun,” nyabuka nyapnamsilame. Bukni, ance ayupu nyaminye ning ara, an kanye walwal ukilya deice arye nyapmalame.

Mazmur 12:4

Aning ati ara, nunce, ‘Anda Yahweh arye, talye yupu nyanyak ning ara, sik sitang bam bol seklopminyeura, tilila yupu ton tuba kum nyanamak’ tenen, morokinyabe. Maknya kintilanmakirye, sik sitang ap, si bambol ap deice arye, weik dib tenen yupu uk nyanyake.

Mazmur 73:13

Aning nirya elilamsa ati, minop talak arye tenelamse ning ara, ani. Se, sik malyeuk wininyak ninye ara, sik kam unyak talak nirya, talye kanye deibikirye, bona utotoa talin nanguk unyake. Bukni, na ikin unulule. Ati ara, ‘Na kanye diksukumuk unirye, malye winipnyak’ tenen, kalikilanun ning ara, urdem ati wininune. ‘Deiyok ton kum ulule,’ tenelamse. Tonda, yuk nang eibikirye, ‘Anye dipkoprob malye kum winilule, tenepnamniyak’ tenen, malye winilamse ning nirya bataksirye, telebuk winilamse. Winipmanto ara, malye ning nun taruk deice dupsiliba, taruk mek iliklamap touk, malye winin ning nirya bataksirye, telebuk winilamse. Bukni, ‘Aning babye, talye ati winipse,’ tenelamse.

Keluaran 5:2

Nyaprikba, Firaun birye tamubuka nyabuk. “Allah el si Yahweh nyapmarumnye bira, yatato mikipnye ati do? Tonda ‘Na yupu kekepturye Israel ninye bataktue’ tenen, nyanmanil do? Kume. Anggun nyapmarumnye Yahweh ara, na walwalnye. Ati ara, Israel ninye kum batakloptiniba bitinge. Aning kum winipnamne,” nyabuk.

Amsal 30:9

Aning moropmakina ara, talye ati kume. Deiyok ara ani. Nara bona weik talinanye ulamtinye toura, narye anti, “Yo, Allah elda yatanye ulul do? Nara aning-aning ayala-yala nirya talinune anya arye, Allah elda kum patanulule,” nyabuka, mandipna arye nyapkitinye. Tonda, nara pia bona utotoa talina kum ninye ulamak touk ulamtinye toura, aning-aning nirya ara, na ton pia kum ununa anya arye, weik arye pataniliba, narye yuk ninye talinyak ning ubula dopra balamtinye. Winibuka balamtinye toura, yuk ninye eipnitingce, na ni Allah an pia teleb ulyamnye si deice arye, malye-malye yupu nyalinamkiyake. ‘Ati, na malye winipnyak’ tenen, na ni Allah, ancuk melibuka kalikinamnilyame. Na patanamnil touk, pia aninguk melibuka arepnamnilame.

Yesaya 30:11

Tonda nyalulume. “Anyasululum yupu ara, nun lik ati, yuk tam yupu ton nyanamsululume. Nun Israel ninye ap, Yehuda ninye ap, talibuka usilinye Allah ara, Pia Teleb uk Ulinye birye, wenepnamsil yupu ara, tonap kum nyanamsululume.” Anggun Yehuda yala ninye ap, Israel yala ninye ap arye, Allah na yupu lak lena nang ati nyalulume. Allah arye nyabuk.

Yesaya 45:19

Na yupu ara duknubuka kum nyanune. Tonda kunuknak arye duknubuka kum nyanune. Tonda na wiamse ninye Israel ninye ati, ‘Talya urdemuk dibuka banamak’ tenen, kum nyanune. Nara, dipkoprob Allah Yahweh ununa anya arye, ‘Diksukum koprop uk teleb kibuka unamak’ tenen, dipkoprob yupu uk nyalinune.” Allah arye nyabuk.

Yeremia 9:6

Aning atonun, yuk nang ati, ikin ning, sik nong deice pia delinyake. Tonda, talye minin yupu deice arye, tilila yupu uk, pia nyanyake. Anang nirya arye, amalye winin ninguk, tuba-tuba wininyaka ati, anang nirya arye, na Allah Yahweh ati, ‘Elda, dipkoprob nun ni koproba Allah ulule,’ kum nyakirye, nati moubuka kum bikininyake.

Hosea 13:6

Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.

Maleaki 3:14

Ati ara, anggunce nati, malye yupu nyanululum ning ara, nyapnusine. Ara, anggunce nyalulume. “Nunce Allah el si erenyap ning ara, deiyok kum bukni, talye atibuk erenyabe,” nyalulume. Tonda, “Allah elda aning-aning nirya talibuka, im deice yin talin malaikat nirya, sik weik deiyoknye ulul bukni, elce nunti, ‘Wininamlulume, aning ara, kum wininamlulume,’ nyalisilye yupu ara, dobolbanyap bukni, winibibya deice arye, yata teleb ning ton dolonyap do? Urtalya ati wininyaba anya arye, aning ara, nun like,” nyanululume. Tonda, anggun nirya arye, ‘Nunda el nyapdeipsuk yupu talibuka unamap’ tenen, winilelamupu bukni, ila tuba ton malye winibipyopura, Allah el dam ati, “Se, nunda malye wininyap nang anya arye, namin kipsimince, lyepsilyame,” nyabuka, “El dam anyuk binuka loplobibirye, el amu tamuk una ara, deiyok yata ning ati wininamap do? Aning nirya ara, nun like,” nyabuka, malye yupu nyanululume.

Matius 7:7

Yesus arye ayupu nyabuk. Anggun patasilye ning moropmunyopura, Allah kekepsilirye, aninguk arenamsile. Anggun patasilye ning, ‘Danak eipnuyap do?’ tenen, epkirikmunyopura, eipnamlume. ‘Anyasik abuka wektinye’ tenen, bisik lorum-lorum abuka, pitin-pitin upmunyopura, Allah arye buplan kukeipnamsile.

Yohanes 16:24

Nati, diba tenepnulum talak arye diprongobuka, wini talak noutamak nirya ara, aning-aning na si deice arye kum moronululume. Bukni, wini talak ara moronamnulume. Moropmunyopura, dolonamlume. Dopropmunyopura, kanye deibuka pin-pin asa arye unamlume. Yesus arye el mapu ati nyabuk.