Ayub 19:26 - Eipomek

²⁶ Winira, na kam unya noutamak arye, nong dipniba, lyupnilya babye, na kele. Aminyan talak tamubuka kam buknirye, aunye nong atonun nong kipnyopura, Allah el dam eipnamnarya. Ara, na bol deice suse weik dinilirye, bol dikinilya babye, na tamubuka kam buknirye, kam tuba unyeura, nong dipkoprob unirye, Allah el tibuk dipkoprob dinamne.

Ayub 19:26 交叉參考

Matius 5:8

Sik kanye deibuka, telebuk un nang ara, ani. Ara, sik kanye talima bitinye bokoltona kum diparyuk, ‘Na talima ap, nonge ap nirya, Allah akunum arepsa ati, malye winin ning tonok ning babye, kum wininamne,’ tenenyakce, el yupu uk kekebuka unyak nang ara, Allah eipnamake. Ara, sik talima kanye dukdongopra, Allah ap, neika ulamikirye, Allah ap epdakirye, kanye deibuka epdanamke. Aning ati ara, sik kanye deibuka telebuk unyaka atonun, pia unamake.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

Mazmur 17:15

Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.

Wahyu 1:7

Anggun moubuka kekenululume. Aminyan talak dua kan-kan noutamak yanamsil talak ara, ninye mutuku-mutuku nirya arye eipnamake. El obik ninye babye, eipnamake. Yesus yaliba, el obik ninye ap, yuk ninye nirya ap, sik asing eibikirye, el obikba, dibuk ning ati malye kanye bobuka engenamake. ‘Dipkoprop Yesus Kristus eibikirye engenamak’ tenen, na Yohanes arye, “Amin,” nyapsine.

1 Korintus 13:12

Ayupu nyapmasina ara, deiyok ani. Mek kwen pum bisik dipdekirye, sik mining urasinuk yalyopura, kanya eibikirye, mitik teleb ubuka elilamak touk, wini talak ara, aning-aning nirya mitik anun kanya atonun elinyabe. Bukni, ninye epdanduka miningdam epdakirye, pia teleb ubuka urasin laka elilamak touk, aminyan sirya talak ara, aning-aning nirya lakak aryuk eibibirye, teleb ubuka nong noutamak ning moubuka kel kipnamabe. Wini talak ara, mitik anun bikamse, ton ning ara, kum bikamse bukni, Allah arye nati, na wininye ning ap, tenenun ning nirya ap, teleb ubuka kel bikinilye touk, aminyan sirya talak ara, na babye aning-aning nirya, moubuka kel bikuka unamne.

Mazmur 16:11

Tonda, Allah ancuk pia kam una ati, diksukum bisik peterepnilyamura, biknune. Winipniminyopura, an damuk yanirye, pia kanye deibuka unamne. Winipniba, an sirik tam dam unun talak nirya, pin-pin kanye dobuka un ning, pia aunamle ning ara, ance na dam tabakuka arenamnilame.

Pilipi 3:21

Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.

1 Korintus 15:53

Ninye dipnopura, lyulamle ning ara, adiparyuk diplirye, kum lyupmanto ning kintinibuka arisilyopura kam pia unamabe. Wini talak dipmanto ning nirya ara, aminyan talak ara, kum dipmanto ning pia kam unamle ninguk arisilyopura, kam pia unamabe. Aning ati ara, “Nun urasin ap, nong ap, urasin yuk ning kintinibuka arepnamsil,” nyapsine. Aning ara, talye ati kum nyapsine. Dib yupu uk nyapne.

Mazmur 16:9

Ati ara, na talima pum tam, teleb kanye deipnirye, narye anti, kanye deibuka an siuk erenamkine. Tonda, ‘Na nong nirya, Allah atibuk arepnune,’ tenebuka arepnyopura, nara ilil una kum aryuk, pia kanye darapdongobuka unamne.