1 Timotius 5:3 - Eipomek

³ Sik dipkoprop youwak kilapu unyakbuk, yuk nang nirya akunum batakamikibuk, sik yuk unyak youwak kilapu ara, kibuka melinalyame. Timotius, ance yuk ninye nirya ati, ayupu peterenalyame.

1 Timotius 5:3 交叉參考

Ayub 29:13

Sik imun kanye uk bobuka, ikin ulamik nang arye, nati kibuka si erelamnikce, Allah arye, ‘Anye bira, teleb kilinamle!’ nyabuka, teleb yupu nyalamnik. Tonda, narye youwak kilapu, sik patan ning ati, melibuka arelamsiba, Sikda kanye lon mot ton nyalamikce, pin-pin kanye bobuka ulamik.

Ayub 31:16

Tonda, bona utotoa talina kum ninye, sik patalamuk ning ati, kum melilamtinyopura, dipkoprob malye winilamtinye. Atonun, youwak kilapu sik kanye imun ulamuk ning ati, bico tenebuka kum melilamtinyopura, aning babye malye winilamtinye. Winiptinyopura, Allah arye wenebuka opnutue.

Mazmur 146:9

Tonda, Allah Yahweh arye, sik mutuku kum unyak bukni, yuk mutuku noutam, ninye asik nang unyak ninye ati, moubuka dilirye, kalikilule. Aning dem kum bukni, Allah arye kwaknamne mapu ap, youwak kilapu ap nirya ati, tuba-tuba melibuka kalikilulce, sik patan ning ati, talye arelule. Bukni, sik pia malye-malye weik wininyak nang arye, ‘Winipnamabe,’ tenenyak ning ara, Allah arye, yupu sekelulba, nong kum ulule.

Mazmur 68:5

Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.

Mazmur 94:6

Anang arye, youwak kilapu ap, tonda nun mutuku noutam ninye asik nang unyak ati, talye lukparabuka onyake. Tonda, sik ni yapu ap, sik nin yapu ap, akunum diamikba, kwaknamne mapu unyak buk, talye yanuka, deiyok ton kum upmalibuk, yu nang arye, amapu talye onyake.

Keluaran 20:12

“Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

Yeremia 49:11

Se, anggun Edom mutuku ululum nango! Anggunce deiplum bukni, aminyan yanuka unamak mapu nirya ara, na damuk batakdopnululume. Winipmunyeba, narye sik kwaknamne mapu ati, moubuka kalikinamne. Aning atonun, youwak kilapu babye, na damuk deipmunyeba, narye kalekuka melinamne.

Matius 15:6

Ayupu nyamunya deice arye, Allah yupu yaniptabuka malye kilulume. Anggun apu yapu peterelamik ning kekelamlumce, peteremunya deice arye, Allah nyalilamuk yupu nirya yaniltamunce, malye-malyeuk winilulume. Yesus arye sik Farisi nang ati nyabuk.

Matius 23:13

Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.

Lukas 7:12

Sik banmeka ani, anyasik dolamik asik dana-dana poka antanabuka denepdongamikce, wiyamik buplan dam banmek talak ara, youwak kil tonok, el mi tonok deiamuk bukni, dipmok ati, ‘Weipnuyap’ tenen, akil ap, amutuku ninye weik ap, kitibuka dobuka bobayikak, Yesus arye eibuk.

Yohanes 1:47

Nyabukura, bisik banmarikbuk, Yesus arye Nataniel yanganmokak, eibukce, elti, nyabuk. “Anye bira, dipkoprop diksukumuk ulule. Anye bira, Israel yalanye ulule. El talima ak ara, tilila ning ap, tenepce winin ning ap, tonok babye ton kum ulule,” nyabuk.

Rasul 6:1

Ura, Yesus yupu kekebuka dib tenebuka dobolbalamik nang weik upnin balamik talak arye, sik anang noutamak arye sik nirya Yahudi yala nang bukni, Yunani yupu nyalamik nang arye, Ibrani yupu nyalamik nang ati, malye kanye bolamikce derelamik. Deiyok ara, youwak kilapu melin ati bokuka asum-asum nirya arilamik ning ati ara nyalamik. “Ibrani tam youwak kilapu arenyak bukni, nun Yunani tam youwak kilapu ton, kum arisinyakce batakaldongosinyake,” nyalamikce dereldalamik.

Rasul 9:39

Anang arye Peterus dobuka yarikopura, Dorkas deipmek aik, alip aik deibik. Alip aik noutamak, Peterus binuka tikukbuk, youwak kilapu weik arye el balye tam nirya tikuka antapdongobik akarya nyabik. Tikra antapdongobikce, Peterus ati, “Akain ara, Dorkas arye el kam ulamuk talak nun neika ulamubu talak arye wiyamsuk baju adipdelyame,” nyabuka engenmekce, laka nyanmek.

Rasul 9:41

Bukukura, Peterus arye akil taruk talibuka tikdeibukce, min arye dib tenebik nang ap, ayouwak kilapu ap, yukubukba yayikura, “Akunuma kam bukuka tekmala dipdelulume,” nyabuk.

Ulangan 10:18

Allah elda, kwaknamne mapu ap, youwak kilapu ap ati, teleb ubuka diksukumuk melilule. Aning atonun, Israel mutuku noutam unyakce, yuk yala ninye asik nang ati, sik patapliba, din ning ap, ongon baju ap, bico tenebuka arelule.

Ulangan 14:29

Akintinip deipnamlum din nirya ara, Lewi yala nang arena ati, deipnamlume. Ara, Allah arye, sik Lewi yala nang ara, sik talibuka wa win tuku ton kum kintinibuka arepnamle. Ati, akintinip deipnamlum din, yala-yala nirya ara, anggun mutuku noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, el li ap akunum dibikba, kwaknan mapu ap, kilapu weiamikce nang ap ati, anggunce, ‘Naʼ tenen, delinamlum din ning, noutam bokuka anyapmasin nang ati arenamlume. Akintinip deipmamunyopura, sik anang yakirye, sik pataplye touk, yanuka doprobikirye, sik weik tonun dinamnyake. Anggun Israel nang arye, aning nirya winipmunyopura, anggun ni koproba Allah Yahweh arye, anggun pil donamlum ning nirya ara, telebuk kilinamsile.

Ulangan 16:11

Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.

Ulangan 16:14

Akwalya kwalibuka dinamlum talak nirya ara, anggun ap, anggun mapu ap, anggun kilmapu ap, anggun pil don nang ap, pil don kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye ap, tonda yuwak kilapu ap, sik nin ap, sik ni ap akunum dibikba, kwaknamne mapu ap, kwangnamne nang ap, anggun nirya arye, teleb kanye uk bobuka ulamunce, kil-kil asa arye, neika unamlume. Anggun nirya arye, neika akwalina kwalibuka dinamlume.

Ulangan 27:19

Tonda, yatanye do nirya, ninye asik nang ap, tonda mitik winiryuk nenmakce nang ap, yuwak kilapu ap, sik ning ubula doproplinye ap, yupu lipsisikuka bokolin talak ara, deiyok kum upmalibuk, malye yupu nyaplyopura, aning ara, “Teleb kum unamle,” nyabuka, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.

1 Tesalonika 2:6

Kume, anggunce do, yuk nang nirya arye do, ‘E, anang arye nunti, kanye deibuka kipdopsikirye, si erepnamsiake’ tenen, pil kum dolamubu. Aning ara, anggun kel biklamsulume. Nunda, talye nang kum unyabe. Kristus arye nunti, ‘Na yupu dobuka peterepnin banamak’ tenen, wibuka deiamsukbuk unyaba anya arye, wininyaba deice arye, ‘E aning-aning nirya ton arepsiting’ tenen, ikin ning anggun nong deice deiamsitibye bukni,

1 Timotius 5:2

Yuk kam nang atonun unyak ninye ara, ‘Na weit yapu atonun,’ tenebuka unamlyame. ‘Wisi kilapu ara, na nin yapu atonun,’ tenebuka, namin arye unamlyame. Yuk kam kilapu ati ara, malye tenena ap, malye winina ap, pia kum arye, ‘Na weit kilapu atonun unyake,’ tenepmince, telebuk wininamlyame.

Yakobus 1:27

Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.

1 Peterus 2:17

Yata ninye do nirya, si erebuka unamlulume. Anggun, Allah diba tenemunya atonun, yuk diba tenenyak nang ati, bico tenebuka melilanauk unamlulume. ‘Allah ati malye ubibyak’ tenen, leibuka unamlulume. Ninye talina weik Deiyok nang, Raja yala nang nirya ati, si erebuka unamlulume.

1 Peterus 3:7

Aning atouk, anggun akanye yapu babye, anggun kilapu ap, talima tonok dukdongobuka neika unamlulum talak nirya ara, anggun kilapu sik pataplye ning moubuka tenebuka, melinamlume. Tonda, ‘Nun kilapu ara, mikip mitik ning,’ tenepmunce, Allah arye bola koplobuka, kam pia una deiyok ning talye aresilya ara, ‘Nun ap, nun kilapu ap, neika dolonamabe,’ tenenamlume. Winibuka unamluluma deiyok ara, anyapmasin touk dipkoprop ulamunyopura, anggun Allah ati morolulum talak nirya ara, aning-aning nirya arye kum sekdongopsutue.