1 Samuel 22:20 - Eipomek

²⁰ Anang nirya obik bukni, Ahimelek el mi Abiyatar tonok ara, adiparyuk, bai sakuka biyuk. Ara, Daud damuk minopce biyukce, Daud tam kiprobuk.

1 Samuel 22:20 交叉參考

1 Samuel 23:6

Aminyan talak ara, Abimelek el mi Abyatar bira, ‘Daud birye, na melibuka kaliknilirye, melinamnilʼ tenen, Daud dam bikbik abuka yayuk. Elce Kehila mutuku yayuk talak ara, imam nang arye, sik taram deice ongolamik baju, el si efod boyayuk.

1 Samuel 30:7

Winibukba, Daud birye, ninye si Abyatar biti, yupu nyabuk. Abyatar bira, ara Ahimelek el mi bukni, Allah el si eren aik pum tam pil dolamuknye ulamuk. Daud birye, anye biti nyabuk. “Nunce Allah ati, ‘Yata wiripnuyap do?’ tenen, morobibirye, dipdenuyap, ning ara, el si Efod dobuka boyanilyame,” nyabuk. Nyabukura, Abyatar birye, abaju el si Efod dobuka, Daud dam boyayuk.

1 Samuel 23:9

Yayik bukni, Saul birye, ‘Daud biti opnamne,’ tenepmok ning ara, yuk nang arye, Daud dam binuka, lak nyabikba kekebuk. Daud akunum bikuk ati, imam Abyatar biti nyabuk. “Anggun imam nang arye, anggun taram deice ongolulum baju, el si efod bopmalam ning ara, na dam boyalyame,” nyabuk.

Ayub 1:19

Awininmak bukni, talye karin arye, mok ap, mek ap kum ati, buppu weik arye ninye kum ulamik mutuku tam arye, weik kumanya ton yanmokce, anyaik dana-dana nirya yanuka donmalce ulupmalce, an mapu ap, kilmapu ap nirya, teikuka obuka sirya dakmale. Winipmalarye, na tonok batakmanilba, na ni anti nyalyakine,” nyabuk.

1 Samuel 4:12

Aning winibik talak ara, ninye Benyamin yalanye tonok bikbik abuka, Silo mutuku biyuk. Asum aniryuk, Silo mutuku bikbik abuka biyukopura, el ongalamuk baju nirya, kwiribuka kwiliklobukce, batakuk. Tonda, el kisok deice ara, tuku arye likdanmoka kipman biyuk. Ara, ‘Sik Silo mutuku unyak ninye arye, e ara weik mambul kanye bopmalce winipmale, tenepnamake’ tenen, el baju kwiribuka, kisok deice ara, tuku likmok touk biyuk.

1 Samuel 2:33

Eli an yala nang ara, ance deipminba, deipdanin banamak nang ati ara, weik tam ara, na si eren aik pum tam, tuba tamubuka, pil kum donamake. Anang bataknamna atia. An yalauk bukni, ton nang ara, obuka sirya kum daknamne bukni, kam tuba ubikirye, teleb ubuka kum unamake. Anang arye, malye-malye weik winibicopura, an eipmince, weika arye engepnalame. Tonda, an kanye talima pia ikin weik upnamkile. Deiyok ara, an yala nang noutamak, kam nang nirya ara, tonoknye babye wisi kum delinamake. Wel talak aryuk dibinamaka atia. Aning nirya ara, narye anggun yala nang wenepnamsin atia. Allah arye, Eli biti nyabuk.

2 Samuel 20:25

Amutuku noutam yuk mambul ning, sekna pil talibuka dona ati, sekertaris ara, tonoknye el si Seya erepdeibuk. Imam pil dona ati ara, bitinye nang, Zadok ap, Abyatar ap, wipdeibuk.

1 Samuel 14:3

Atalak, sik imam yala nang, sik ongona ati, efod baju bobiyik touk, Saul el melibuka binmek nang kan-kan ara, tonoknye, el si Ahitub, el mi Ahiya unmok. Ahitub el weit bira, Ikabod anya arye, Ikabod elda, Ahiya el mam ulamuk. Sik ni bira, el si Pineas ulamuk. Pineas el mi koproba si ara, imam Eli ulamuk. Elda, Silo mutuku noutam, Allah Yahweh el pil dona ati, imam pil talibuka ulamuk. Amutuku noutam unmek nang nirya, Saul ap, el yin telen nang ap nirya arye, ‘Yonatan bira akunum amutuku batakuka, omutuku sik Pilistin tam nang dam binmalʼ tenen, pia kum bikmek.

1 Samuel 22:21

Biyukopura, adiparyuk Daud biti, “Raja Saul birye nyapdeibukba, el mapu arye, Allah el si Yahweh, el si eren aik pum tam, pil dona deiyok nang, weika arye akunum opmakce, sirya dakmake ati, nyalyakine,” nyabuk.

2 Samuel 15:24

Sik nirya, Yerusalem mutuku batakuka banmek talak ara, ninye si Zadok babye biyuk. Tonda, Allah el si eren aik, pil dona deiyok nang, sik pil melin nang, Lewi yala nang ap banmek. Anang ara, Allah arye, ‘Wininamlume, aning ara ton kum wininamlume,’ nyapdeiamukba, Musa sekeibuk yupu dobuka, yo marikna pum bisik deiamik ning bobanmek. Amarikna yo dobuka bobanmekce, asukum Yerusalem mutuku damuk bobinuka deibik. Deibikba, Allah el si eren aik pum pil dona deiyoknye, el si Abyat birye, Allah el si erena ati, kam ning obukce, Allah arena ati, uku dongobuk. Winibuka apil donmoka ani, sik Israel ninye nirya arye, Yerusalem mutuku dam batakuka banmek talak noutam nirya, Abyat birye, Allah el arin ning arenmok. Sik banmek talak ara, Allah arye, el yupu nyapdeiamukba, Musa sekeiamukba, ayo marikna pum deyamibik ning ara, kum bobinamik.

1 Raja-Raja 1:7

Adaonia daulamuka ani, anoutam talak ara, Zeruya el mi Yoab ap, imam Abyatar ap, sik dam binuka, yupu talipmek. Yupu talipmeka ani, Yoab ap, imam Abyatar ap, sikce el Adonia tenelamuk ning ara, sik babye, ‘Aning ara pia telebe. Raja kipnamle, tenepmarik ning ara, nun ton melipnaname. El tam kipnaname,’ teneprik.

1 Tawarikh 15:11

Anang-anang nirya, akunum bulubuka wekikopura, Daud elce imam Zadok ap, imam Abyatar ap, sik Lewi yala nang tekbarye nang ap ati, yukubuk. Anang sik si ara, ani. Ara, Uriel ap, Asaya ap, Yoel ap, Semaya ap, Eliel ap, tonda Aminadab ap ati, yukubukba yayik.

1 Tawarikh 18:16

Atonun ton, aning-aning pil dolamik ning ap, winilamik ning nirya ap, sekna ati, sekna deiyoknye weik mutuku ara, ‘Sausa pil donamleʼ tenen, wipdeibuk.