1 Peterus 3:22 - Eipomek

²² Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.

1 Peterus 3:22 交叉參考

Mazmur 110:1

Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.

Matius 22:44

‘Allah arye na ni kopropa, Mesiasnye ati nyabuk. Nun bitinye nang arye, ninye nirya talibuka unamnama ati, na sirik tam, weik mambul ak buknamlame. Abukaminyeba, aminyan ara, an yupu yanikinyak ninye ara, narye dobuka an amu tam deipniba, an talinamlame. An yan baripra delin ning deice yan baripra delilbiminye touk, an yupu kum kekekinyak ninye ara, an amu tam deipnyeura, ance anang ati bisibuka anang talinamlame. Anang nirya ara, an amu tam unamake.’ Allah arye nyabuk. (Mazmur 110:1) Allah arye nyapdeibukba, Daud arye sekamuk yupu dobuka nyapmasine. Yesus arye nyabuk. Nyabukopura, ayupu tonap nyabuk.

Matius 28:18

Yesus sik dam yayukce ayupu nyabuk. “Im deice ulye ning ap, tukwak mutuku ulye ning nirya ara, Allah arye na amu tam akunum deipnuke. ‘Aning-aning nirya talibuka weik ninye deiyoknye unamle’ tenena ati, Allah arye el mikip weike akunum arepnukba, talinune.

Markus 12:36

Allah El Dib Kanye arye, Raja Daud el talima ak talibuka deice arye, Daud elcuk Mesias yanamuknye ati, ayupu nyabuk. ‘Allah arye na ni kopropa Mesiasnye ati nyabuk. Nun bitinye nang arye ninye nirya talibuka unamnama ati, na sirik tam buknamlyame. Abulaminyebuk, aminyan, an yupu yanikinyak ninye ara, narye dobuka an amu tam deipnibuk, ance aninye nirya pia talinamlyame.’ (Mazmur 110:1) Daud arye sekamuk yupu dobuka nyapmasine,” Yesus arye nyabuk. Nyabuk ning, ayupu tonap, nyabuk.

Markus 16:19

Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule.

Lukas 20:42

Allah El Dib Kanye Daud el kanye talima ak talibuka deice arye, Daud elcuk ayupu sekamuk. Ara Mesias yanamuknye ati, Mazmur sekamuk yupu noutam arye ayupu sekamuk. Ayupu ara, nyapnusine.” ‘Allah arye na ni koprop Mesiasnye ati nyabuk. Nun bitinye nang arye ninye nirya talibuka unamnama ati, na sirik taruk tam bunamlyame.

Yohanes 13:32

Na winipnaman deice arye, Allah el si weik arye erebikirye, kibuka si erenamaka anya arye, Allah arye nati pia teleb kipdeipniliba, na si babye weik arye erenamake. Allah arye anirya winipnamala ara, adiparyuk minopce winipnamale.” Yesus arye nyabuk.

Rasul 1:11

Tikilyarikura, ayupu nyaprik, “Anggun Galilea mutuku nango, anyaka tuba yata ati im tam pia dinmalum do? Anggun dam Allah arye Yesus dobuka im deice welepmalanye bira, anggun asing arye eipmalumbuk, welepmala atonun, aminyan ara, eluk tamubuka yanamle,” nyaprik.

Rasul 3:21

Minop talak arye, Allah el aminyan winipnamuk ning laka nyalamik nang, el yupu uk kekebuka, el piluk dobuka, pia teleb-teleb kibuka dolamik nang ara, sik nabi nang arye nyalamik yupu deice Allah arye, ‘Aning-aning minop ning nirya ati, tuba punubukapnirye, winiryuk ninguk kintinipnirye arepnamsine,’ nyalilamuk. Anyalilamuk ning min kum winipmalye talak ara, Yesus im deiceuk pia ulamlya ani, anyalilamuk ning kintinibuka delin talak akunum uplyopura, Allah arye Yesus dopkwetepnamle.

Roma 8:34

Aning atonun, yatanye birye, nunti wenebuka oplopnamsil do? Kume. Yesus Kristus arye nun lyena ati dibuk. Yesus dipsuka ara aupmal bukni, weik mambul ning ara, Yesus dibukba, Allah arye tamubuka kam bukeibukba, Yesus ara Allah el sirik taruk tam bulbiyuk. Allah el dam bul biyukce, Yesus nun melina ati, melibuka Allah ati morosulule. Aning ati ara, yatato nang arye, nunti, “Anggun malye winimunye ning ati, Allah weik arye wenepnamsila ati, el ap neika pia kum unamlume,” nyabuka wenepsitingce, yupu lepsisikuka bokeipsiting do? Kume, aning ara kum nyapsiting.

Roma 8:38

Aning ara talye ati kum nyapsine. Na kele, kanye teniltona pia kum diparyuk unamabe. Allah arye nunti kanye talima arilamsukce, bico tenesilye ning ara, nun Deiyoknye Yesus Kristus ap, talima dukdongobuka unyaba deice arye pia usulule. Aning ara, min kum winipsutue. Yata ikin ning do nirya arye, nun ap, Kristus ap, wilibuka yuk-yuk kum deipsutue. Dibina ap, kam unyap talak ikin usilye ning ap, im deice melin nang malaikat ap, isa mer ap, wini talak mambul usilye ning ap, aminyan talak winipnamsil ap, nirya ati mikip kibuka unamabe.

1 Korintus 15:24

Allah arye, tenyamuk talak akunum uplyopura, tukwak mutuku-mutuku nirya noutamak, ninye deiyok nang malye ning ap, im deice weik ninye deiyok ninye malye ning nirya ap, aning-aning talilya malye deiyok ning nirya ap, mikip aning-aning nirya malye ning ap ara, Yesus Kristus arye, aning nirya atu sung-sunga atonun kiploplirye, kum daneipnamle. Anirya ara, ‘Allah ati, nun lik’ tenen, yaninyak ninye nirya ati nyapne. Amikip ulul ning nirya ap, ninye deiyok ning nirya ap, Yesus arye, akunum kum daneiplyopura, elce aning-aning nirya, el talilye ning nirya ara, dopdoplirye, el Li Koprop Allah ati, tamubuka arepnamle.

Kolose 3:1

Ara, Allah arye Kristus kam bukeibuk talak ara, anggun ap, neika kam bukeipsuke. Ara, diba teneplum ati, Allah arye bol kobuka pia kam una deiyok ning akunum areamsuk ning ati nyapsine. Anggun ap, Kristus ap, akunum arepsuka anya arye, im deice ulul ninguk tenebuka, aning deiceuk anggun kanye talima delinamlulume. Im deice ara, Kristus arye Allah el sirik taruk tam bukukce, aning-aning nirya talibuka, im deice tam Deiyoknye ulule.

Ibrani 1:13

Allah el im deice pil don nang malaikat weik aunyakba, Allah arye tonok ning wibuka, asukum nyapnusin yupu nyabuk do? Kume. Allah arye, el Mi Kopropa ati ayupu nyapdeibukba, sik Mazmur noutamak sekamik yupu ara ani. ‘Anda, na sirik taruk tam buklyame. Winipminyeba, malye ninye arye anti, ‘Malye kiptibye’ tenen, an yupu yanikinyak ninye nirya ara, na Allah arye malye kipnirye, an amu tam deipnamne. Winipniba, ninye arye sik yane dikdik sena ati, atika yo deice, yan erebuka delilamak touk, ance amalye nang yanibuka, sik deice tam unamlame.’ (Mazmur 110:1) Allah arye ayupu nirya ara, el Mi Kopropa ati, nyabuka anya arye, el Mi Kopropa ara weik mambule bukni, sik malaikat ara, mitik mambuluk unyake.

Ibrani 1:3

Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.

Ibrani 1:6

Arup nyapmasin touk, Allah arye, el minyuma deibuk Mi Kopropa ati, tukwak mutuku dopkwetepsuk talak ara, ami ati ayupu nyabuk. Ayupu ara ani. ‘Na im deice pil donyak nang, sik malaikat nirya ara, na Mi Kopropa ati, el siuk kibuka si erenamake,’ Allah arye nyabuk. (Ulangan 32:43)

Ibrani 10:12

Sik tukwak ninye arye winibuka pil donyak bukni, anye Yesus ara, sik pil dolamak touk kum winibuke. Aning ara kume. Elda, dipkoprop Allah ap, ninye ap, dana-dana ansinilina weik deiyoknye ulula anya arye, minop talak ara, ninye malye winin ning kum kilina ati, tonok ninguk aribuk. Aning like tonok talak arye, aribuka deice arye, akunuma. Ninye malye winin ning minop ning babye, wini talak ning babye, aminyan doryanamle talak ning babye, amalye winin ning nirya ati, akunum kum daneipsukce sirya daksuke. Winibukce, adiparyuk Allah el taruk sirik tam bukukce, el ap Allah ap, aning-aning nirya talinamrake.

Ibrani 12:2

Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

Ibrani 4:14

Allah dan tam, ninye dan tam ansinilina deiyoknye bira, Yesus eluk ulule. Weik mambulnye Yesus ara, Allah el Mi Kopropa ulule. Elda Allah el ulyak im deice noutamak akunum biyuk. Aning ati ara, nunce diba tenebuka, ninye kekenyakak arye, laka nyanyap yupu nirya ati, batakna kumce, pia talibuka unamabe. Batakna kum diparyuk, diba tenebuka unamabe.

Ibrani 6:20

Yesus ara, Pia Teleb Aik menekuka biyuk ning ara, nun lyena ati wekuk. Ura, Yesus ara, Allah dantam, ninye dantam, ansinilina weik deiyoknye akunum upsuke. Ara, Melkisedek arye apil dolamuk touk, Yesus ara, Melkisedek el yala atonunye ubukce, Allah ap, nun ap, teleb kibuka neika una ati, ansinilina deiyoknye pia unamsile.

Ibrani 8:1

Ura, na kayapo, arup nyapmasin yupu nirya, deiyok ara nyapnusine. Allah ap, ninye ap dana-dana Ansinilina Deiyoknye, weik mambulnye akunum usulule. Anye bira, Allah el Mi Kopropa Yesus eluk ulule. Aning-aning nirya deice tam, im deice ululnye, Allah el weik deiyoknye bunak sirik tam, Yesus bulbiyuk.

Ibrani 9:24

Im deice ning arena ara, pia teleb ning uka nyapmasina ara, deiyok ani. Kristus weklamuk aik, pia noutamak aik ara, ninye taruk deice arye domik aik kume. Ninye arye, ‘Dipkoprop ning kum bukni, winipmanto ning dopnamap’ tenen, ninye taruk talibuka domik aik, kukia atonun ning ara, kum wekuk. Aning kum bukni, Kristus ara, im deiceuk wekelbiyukce, wini talak ara, ‘Allah arye tukwak mutuku unyak ninye melinamle’ tenen, nun melina ati, Allah el un dam binuka ulirye, Allah ati morosulule.