Salomo birye nyabuk yupu ara ani. Nun ni Allah, an si Yahweh ati, ‘Anda pia telebe,’ nyapkiyabe. Ancuk nun Israel ninye ati pia kalikuka meliamsulum touk, tuba melisilyame. Anda nun ni Allah tonok ulyame. Na ni koproba Daud biti, an Allah arye, ‘Wininamkine,’ nyapdeiplume. An si bam bol arye nyaplum yupu ara, wini talak an taruk aryuk akunum winipmalame. Nong akunum upmasile. Nun ni Allah, ance nyapdeiamsulum yupu ara ani.
1 Peterus 1:3 - Eipomek3 Nun Deiyoknye Yesus Kristus, el Li Koprop Allah ati, “Telebe,” nyabuka, el si pia erenamabe. ‘Telebe’ tenen, nun malye winina ati, adiparyuk wenebuka opsutu bukni, bico tenepsukce namin kipsuke. Winipsukce, winiryuk ninye atonun akunum kipdeipsukce, pia kam una deiyok ning akunum arepsuke. Winiryuk ninye kipsuka ara, Yesus Kristus dibuk bukni, kam bukeibuka deice arye, el mapu kilisulule. Winisululbuk, nun kanye talima Allah el deiceuk deibuka, kam pia unamabe. Wininap ning ati, kanye teniltona kum aniryuk, ‘Aning ara, pia dipkoprop unamabe’ tenen, kanye deibuka unyabe. 參見章節 |
1 Peterus 1:3
56 交叉參考
Ayupu nirya akunum nyabuka Allah ati morobukopura, ninye deiyoknye Raja Daud birye, sik amutuku noutam bulubuka wekmek nang ati nyabuk. “Nun ni koproba Allah el si Yahweh, nun melisilye Allah ati, ‘Telebe,’ nyabuka kinamlume.” Daud birye nyabukopura, sik awekmek nang, Allah el ‘Naʼ tenen nang, el mapu koproba Israel nang nirya arye, “Allah Yahweh ara, nun ni koproba Allah, nun apu yapu sik melilamlumnye, anda pia telebe,” nyabik. Nyabikopura, sik anang nirya arye kutam tuku dipdongobuka, sik kisok babye tuku deice kanupdongobik. Ara, ‘Nun ni koproba Allah Yahweh ap, tonda nun deiyoknye Raja Daud ap ati, pia kanye deibuka, si erebuka kipnuyapʼ tenen, winibik.
Arelyangalamik ning ara, pia weik kibukba, Raja Hizkia ap, el amu tam pil dona deiyok nang ap, sik nirya arye eibuka bikikce, Allah ati, “Telebe,” nyabuka, el si erebik. Tonda, Allah el mapu, Israel mutuku ulamik nang nirya ati, ‘Allah arye Israel nang ati, teleb kipdeipnamleʼ tenen, teleb yupu nyapdeibik.
Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
Allah arye Musa tikmokak urasin tam yayukce nyabuk. “Na si ara Yahweh, Allah unune. Narye ninye ati bico tenebuka, weikto arye melinune. Malye ubica babye, min pola arye yu kum unulule. Tonda min pola aryuk kum wenesunune. Aning kum bukni, narye, ‘Wininamsine,’ nyapsise touk, ninye ati bico tenena ap, batakna kum diparyuk melina ap, weik unune.
Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Allah el mapu kililamsuk nyapmasina ara, talye ninye arye deibiceba, dadeipdanin yangalamak ninye atonun ati kume. Tonda, ninye sik kanye aryuk, ‘Mapu deipnuyap,’ tenelamak atonun winina deice arye kume. Tonda sal arye, ‘Nun kilapu arye mapu deipnamsiyak,’ tenelamaka atonun ati kum nyapne. Aning kum bukni, aninye nirya ara, Allah arye sikti, ‘Na mapu unamak’ tenen, wipdeiamsuk deice arye, Allah el mapu koprop kililamsuke.
‘Allah arye melinamnil’ tenen, kintinibuka dinauk unamlum talak nirya ara, kanye deibuka pin-pin asauk unamlulume. Ikin upsiliba, imun kanye bopmunye talak nirya ara, ‘Se, aning ara, adiparyuk minopce kum upnutue,’ tenena kum diparyuk, ‘Aupmanilya babye, telebuk wininamne,’ tenebuka, kanye lamapdongobuka unamlulume. Allah morona ayala-ayala nirya ati ara, batakna kum arye, pia Allah moronauk unamlulume.
Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.
Aning ara talye kum nyapsine. Kume, nun ninye nirya arye, ‘Allah ati nun like’ tenen, pia malye-malyeuk ulamubu talak noutamak arye, Allah el Mi Kopropa Yesus arepsukba, nun pununa ati dibuka deice arye, Allah ap, nun ap, teleb kibuka ansinibdeipsukce, wini talak ara Allah ap, nun ap neika uptibye. Winipsuka ati, nun kanye kum boktopsutue. Pia dipkoprop tenebuka kel kinyabe. Kristus arye Allah ap, nun ap, ansinibdeipsukce, akunum teleb kipdeipsuka ati, Kristus pia kam unamla deice arye, el ap nun ap kanye talima dukdongobuka unyaba deice arye lyepnamsile. Aminyan talak Allah arye kum bataknamsile. El ap neika pia ati unamabe.
Tonda, Yesus dibukba, elti, kam bukdeibuknye Allah, El Dib Kanye arye, anggun talima pum tam usilye ninye ara, aminyan talak anggun dipmunya babye, Allah arye kam bukeipnamsile. Ara, Yesus dibukba, kam bukeibuknye, Allah arye anggun diba tenelulum ninye babye, aminyan talak kam bukeipsilyeba, kam pia unamlume. Anggun kam bukeipnamsila ara, anggun talima pum tam usilinye, Allah El Dib Kanye melipsilya deice arye, kam bukeipnamsile.
Allah lyepsuk talak arye dipdongobuka, wini talak anoutamak talak nirya ara, ‘Allah arye nun tukwak nong punupsilirye, im deice pia teleb ninguk arepnamsile’ tenen, kanye deibuka dinauk unyabe. Bukni, ‘Wininamsile’ tenen, kintinibuka dinauk ulamibya ani, aminyan talak aning akunum arepsiliba eibibyopura, akunuma. Wini talak arye dipdongobuka doryanamle talak ara, ‘Dan talak winipnamsil do?’ tenen, dinauk kum unamabe. Akunum doprobibye ning ati ara, ‘Se, dan talak arye doproptinye do?’ tenen, dilamak touk kum unyabe. Yatanye do nirya, ‘Se aning ara na doproptinye’ tenen, patalyeba dinauk ululnye bira, akunum doproplyopopura, ‘Dan talak do?’ tenen, dinauk pia unamle do? Kume.
Wini talak ara, tukwak mutuku unamap talak ara, mambul ning ton winilye pia wininamle. Ara, dib tenena ap, ‘Aminyan talak ara, Yesus arye, dolyanamsile’ tenen, batakana kum aniryuk, pia dinauk una ap, yuk nang ati bico tenebuka melina ap, ara awinilye ning pia aunamle. Awinilye aupmal bukni, weik mambul ning ara, yuk nang ati bico tenebuka melinauk ulule. Na Paulus arye, nyapsine.
Bukni, na kayapo, moubuka teniplulume. Arup nyapmasin yupu ara, Allah arye, Kristus ati, kum kam bukeiamtopura, weik kanye imun kanye boptibye, nyapmasin bukni, aning kum wininamabe. Dipkoprop ning ara nyapnusine. Ara, Kristus dibuk bukni, Allah arye kam bukdeibukba, wini talak ara, dipkoprop pia kam ulule. Ara, wa wibuka kouamikibuk, wisiplyopura, winiryuk kwaning minopce yongobuka libikirye, dilamak atonun, Allah arye, minopce kam bukeibuknye bira, Yesus aulule. Winiryuk kwaning minopce libikirye, bai kwaning aminyan lilamak touk, dib tenenyak nang akunum diamikca ani, aminyan ara, Allah arye, kam bukeipnamle.
Ayupu nyapmasin touk, diba tenebuka dobolbanamak ninye ara, ‘Allah arye aninye ati, kanye teniltona kumce, pia kanye deibuka teleb una ap, nun malye wininyap touk, adiparyuk wenebuka kum osulul bukni, bico tenesilirye, el kanye aniryuk melisilye ning ap arenamsile’ tenen, anggunti Allah morosunune. Tonda, Allah arye, ‘Aninye nirya ara, na wiyamse ninye Israel ninye atonun unyake,’ tenesilye ninye nirya ati, ‘El kanye aniryuk melisilye ninguk arenamsile’ tenen, anggunti Allah moronune.
Anggunti Allah morosinye talak arye, moronye ning ara, laka nyapnusine. Ara, ani. ‘Nun Deiyoknye Yesus Kristus arye, si erelamuk Allah ara, nun pia mambul kopropnye Allah arye, anggunti, melipsilirye, anggun kanye talima noutamak, weik kel kina deiyok ning ap, Allah tenesilye ning moubuka kekena deiyok ning ap, arenamsile’ tenen, Allah morosunune. ‘Aning arisilya deice arye, Allah el ulul ning nirya, weika arye, kel kibuka, el ap, kanye talima dukdongobuka unamlum’ tenen, Allah morosunune.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.
Nunce Allah ati, ‘Winipsutue’ tenen, yupu deice moronyap ning ap, nun kanye talima noutamak tenenyap ning ap ati, ‘Anirya ara, pia weik,’ tenenyap bukni, nun ni Allah ara, weik mambulnye, mikip pia weiknye ulula anya arye, nun morolamap ning ap, tenelamap ning ara, mitik tonunuk ulule. Elce nun kanye talima noutamak pil dosilye mikip deice arye, nun kum tenelamap ning ara, pia mambul weik ning, pil dopsutue.
‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Nun ni Allah moronyap talak nirya ara, anggun ulamlum ning nirya tuba tenenyabe. Tenenyap ning ara, ani. Ara, anggun diba tenelulum deice arye pil dolulum ning ap, yuk nang ati bico tenelulumak arye melilamlum ning ap, anggun pi dobuka, pil dolulum ning ap, tuba tenenyabe. Anggunda, ‘Nun Weik Deiyoknye Yesus Kristus, elce dipkoprop melinamsil’ tenen, kanye lamabuka elti, dinauk umunya deice arye, pil batakna kum aniryuk, pia pi dobuka pil dolulume.
Nun Deiyoknye Yesus arye, el kanye aryuk nati, bico tenyamnukce, pia weik arye melilamnuke. Mitikanun arye kume, elti, dib tenena deiyok ning ap, yuk ninye ati, bico tenena deiyok ning ap, abitinye weik arye areamnuke. Yesus Kristus ap, kanye dukdongobuka ulamap talak noutamak arye, abitinye ning arisulule.
Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.
Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.
Allah el kanye tenena deice aniryuk, dopropsukce, el dipkoprop yupu deice arye, el mapu kipdeipsuke. El dipkoprop yupu deice arye, el mapu kipdeipsuka ara, aning-aning nirya kwepdeibuk noutam arye, utenyamuk. ‘Na mapu koprop kipdeipse nang ara, sikda minop nang atonun, weik mambul unamake. Aning-aning nirya ara, winiryuk ning kintinibuka deipnamne bukni, na mapu ara, minop atonun unamake,’ tenyamsuke. Utenyamsukce, nun dobuka, el mapu kipdeipsuke.
Aning ati ara, diksukumuk una ati, anggun kanye moupmunce, ‘Allah el piluk donamap’ tenen, kintinibuka dinauk unamlulume. Tonda, ‘Malye ubibyak’ tenen, kanye moubuka kalikildanamlulume. Aning pia wininamlulume. Allah arye, Yesus laka kiplibuk, Yesus Kristus tamubuka yanamle talak ara, bico tenepsilirye, talyeuk arenamsil ning ati, ‘Dipkoprop wininamsil’ tenen, diba tenebuka, anggun kanye Allah deiceuk delinamlulume.
Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.
Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.
Ilil kum unamsil bukni, anggun talima noutamak ara, ‘Yesus Kristus na Deiyoknye eluk unamnile’ tenen, wibuka kintinilinamlulume. Anggun kanye talima ara, Yesus deiceuk delinamlulume. Sik asilenamsiak nang nirya ati ara, ‘Allah arye lyepnamnil’ tenen, ‘El deice kanye delinuna ara, laka nyabuka deipnamne’ tenen, kintinilinamlulume. Yesus el lyen yupu laka nyanamlum bukni, yuk nang nirya ati, si erebuka, nimalye aryuk nyanamlulume.
Weik mekwen deice aninye lyebuka ara, ‘Dip tenepnamak’ tenena ati upsuke. Ara, diba tenebibibuk, Allah lyepsilyopura, mek dongolamsiaka atonun ulule. Dib tenebibibuk, mek dongosinyaka ara, nun nong bol deice nininga usilye ning, mek liksilirye, kum danalisulul bukni, mek dongopnusikce talak ara, na tenena kum arye, ‘Allah arye lyebuka melipnilibuk, malye un ning nirya batakuka diksukumuk unamne’ tenen, lak akarye nyanyabe. Mek dongolamsiaka deice arye kum lyesulul bukni, Yesus Kristus dibukura, Allah arye, Yesus kam bukeibuka deice aryuk lyesulule.
Aning ara, talya ati kum nyapsine. Deiyok ara, minop talak diksukumuk ulamik kilapu arye, Allah deice kanye deibuka ulamikce, sik talima noutam teleb ulamika deice aryuk, urasin teleb kilapu ubuka delilalamika ati, sik ulamik touk, anggun wini talak ululum kilapu babye, atouk unamlulume. Sik minop talak diksukum ulamik kilapu ara, sik nin yapu amutamak pia nimalye arye ulamik.
Anggun kele, Yesus ara malye ning tonok babye kum winilule. Pia telebuk ulula ati, el mapu ababye telebuk unyake. Ara, yata nang do, nirya, sik teleb-telebuk unyak ninye ara, sik nong ara kam ulamik bukni, sik kanye tenen ning ap, sik talima ap, dipna atonun ulamukbuk, Yesus lyepsukce kam bukeipsuka ati, wini talak ara, telebuk unyake, nyapne. Ara, nun nirya babye wininyaba ati, na Yohanes arye nyapne.
Allah el lyeplirye, winiryuk kanye tenen ning ap, winiryuk talima ap, dongolul ninye ara, Allah el kanye sik talima ak tuba ulula ati, aninye arye tuba-tuba el yupu yanibuka, malye kum uptinge. Sik kanye tenen ning ap, talima tenen ning nirya ap, Allah lyebukce winibuk ninguk akunum arepsuka ati, sikce tuba malye kum uptinge.
Na kayapu, nun nirya arye, bico tenebuka melilanauk unamabe. Ara, bico tenena ap, melina ap, deiyok ning ara, Allah arye arisulula ati, nyapne. Anggunce yuk ninye ati, bico tenebuka makulamak ninye ara, Allah arye sik kanye tenen ning, akunum kam bukeibukura, sikce ‘Allah diba’ tenen, talibuka unyake.
‘Ninye mutuku-mutuku nirya lyeplirye, taliplibuk, dobolbanamaknye, Yesus eluk ulule’ tenen, diba tenenyak ninye nirya ara, sik kanye tenen ning ap, sik talima ap, dipna atouk ulamuk bukni, Allah arye akunum kam bukeibuk. Tonda nun Na ni Allah ati, sik kanye deibice ninye nirya ara, el Mi Koprop babye, sik kanye deilinyake.
Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.
Yata ninye do, nirya, sikce diba tenebikbuk, Allah arye sik talima kam bukeibuk ninye nirya ara wininyake. Ara, talye diba tenena kum ninye, sik wininyak ning ap, tenen ning ap, patalamle ning ap, diba tenena ninye arye, aning nirya yaniptabik. Allah diba tenenyak nang arye, tukwak malye ning ara, akunum yaniptabik ati, ‘Allah el yupu nirya dobolbana ara, ikine usulule,’ kum tenenyake. Allah el yupu uk dobolbanyake. Allah arye sik kanye tenen ning ap, talima ap, akunum kam bukeibuka ati, Allah el yupu kanam aryuk dobolbanyake. Ikine kume. Amalye winina nirya yaniltana deiyok ning ara, nun diba tenebibya deice aryuk, aning nirya bisibuka yaniltanyabe.
廣告