1 Peterus 1:17 - Eipomek

¹⁷ Anggun Allah morolulum talak arye, nun Ni nyalulumnye Allah ara, ninye tukwak ninye nirya, sik wininyak ning dipdesilirye, sik wininyak ning atonun yupu bokeipsilirye, wenesulule. Ninye yuk-yuk ulamak touk, yupu bokuka kintinilisulule. Allah arye ninye urasin dipdebuka, ‘Na ka,’ tenena kum aniryuk, nun wininyap touk, yupu yuk-yuk bokuka kintinilisulul anya arye, anggun tukwak mutuku tia unamlum talak nirya ara, ‘Allah elda weik mambule. Malye winibibyopura wenepnamsile’ tenen, ilil uplibuk,pia leibuka diksukumuk unamlulume.

1 Peterus 1:17 交叉參考

Kejadian 47:9

Asipdeyukura, Yakub birye, “Nara tukwak mutuku noutam balamse talak ara, keting tamun yupa weik 130 tahun akunum ulamsirye, wisi deipse. Na ulamse talak ara ikin uk ulamnuk bukni, na apu yapu ara keting tamun yupa pia weik ulamik. Nara mitik tonun uka,” nyabuk.

1 Tawarikh 29:15

Aning ara, talye ati kum nyapne. Ara se, Allah Yahweh anda, an kele. An disiminyeba, nun apu yapu nirya babye, ninye asik nang atonun an dam arye boyanamikce, dana-dana boyanuka obinmana, ayanmana kiltolamikba, an babye bikamlume. Ati, nun amutuku noutam unyap nang babye atouk, tiya mutuku uk unyabe. Winipmanto ara, keting deiplye talak arye, ninye kanya lake kipmalya ani, tamubuka tunim alamle touk unyabe. Ati na nio, ‘Nun babye pia teleb unamabe, aminyan kum dipnamabe,’ kum teneptibye. Aning ara, dipkoprob kum winipmanto anya arye, aning ara, pia kum teninamabe.

2 Tawarikh 19:7

“Ati ara, ayupu bokuka nyanamlum talak ara, Allah el si Yahweh ati, ilil tenalume. ‘Aning ara, winipnuyap do, yuk ning winipnuyap do, kum do?’ tenen, moubuka teininamlume. Deiyok ara, nun deiyoknye Allah el si Yahweh aryuk, yuk nang nirya ati, dipkoprob sik ulamikce touk yupu lipsisikuka bokolilule. Ton tam nang ati, ‘Na kanye deipne,’ tenebuka, yuk tam nang ati, ‘Aning ara na like,’ tenena kumce, atouk teleb kibuka yupu bokolilule. Elce ninye mutuku sirya, im sirya nirya ati, malye kum kilule. Tonda, ‘Aning ara, na like,’ tenena kumce, ton tam nang ati, ikin kipdeiplirye, ton dana tam nang ati, cakman ning kum arelule. Moul ning dolona kumce, ninye nirya ulamikce touk tenebuka, yupu lipsisikuka bokolilule. Sikda, el tonok apil talebuka donamluma ati, sik babye, el ulye touk kibuka, teleb yupu lipsisikuka bokolin pil dona deiyok ning talebuka, pil teleb don nang unamlume,” nyabuk.

Ayub 34:19

Allah elce, “Se, ara Rajanye, tonda anye ara, bona weik talinanye biti, sik tam kipnirye, talye bona utotoa talina kum nang malye unyak ninguk, lipsisikuka yupu bokeipnamne,’ pia kum tenesulule. Allah elcuk nun nirya kwepdeisuka ati, nun nirya ara, el amu tamuk unyabe.

Mazmur 39:12

Nun tukwak nang nirya ara, malye ubibiba, ance, ‘Sik bikinamak’ tenen, wenepsimince, ikin ning aresilyame. Winisiminye talak ara, nunce, ‘Se, aning ara, pia teleb ning,’ tenen, talinyap ning ara, malye kipdeipmince, nun talinyap ning nirya ara, minopce kum danasulule. Winipmanto ara, sikce, baju deibikiba, dilirye, minop malye kipnin balamle touk unyabe. Diba, nun tukwak mutuku unyap nang ara, isin aryuk unyaba ati, nun adiparyuk dibinyabe. Winipmanto ninye isin ara, mok puru yo bok deice palipmalya ani, miklamle touk usulule.

Mazmur 89:26

Na Allah arye elti, mikip weika arye arepneba, Daud birye talinamle mutuku ara, keting kumulban tam deibuk. Pia weik laut mekwen arye dipdongobuka, keting yangan tam Efrat mek ap, Tigris mek ap, otam nirya ara, talinamle. Anyapman mutuku nirya ara, elti, arepneba, elcuk talinamle.

Amsal 14:16

Weik arye kel kinyak nang ara, Allah atibuk ilil tenebuka ukirye, tuba-tuba el siuk erebikirye, malye winin ning ap, malye wininyak nang ap unyakak nirya batakuka, teleb winin ninguk unamake. Sikce, ‘Malye ubipyak’ tenen, malye un ning ap, malye unyak nang ap unyakak nirya, pia leilonyake. Bukni, ninye ton walwal uk ululnye bira, moubuka tenipdelirye, yupu kum nyalula anya arye, ‘Yuk talak ara, yata wiripnamnil do?’ kum tenelule. Lik uk ulula ati, el kanye talima noutamak minopce yu welepliba, yuk nang ati, weik arye derelirye, sikti, malye ulilule.

Amsal 28:14

Aning atonun, yata ninye do nirya, malye upmace talak ara, adiparyuk sik kanye talima noutamak arye, ‘Se, nun malye upmabe,’ tenebikirye, adiparyuk amalye un ning bataklamaka ninye ara, Allah arye aninye ati melibuka teleb ulinamle. Bukni, yuk nang ara malye ubikiba, deiyok nang arye, “Nun kayapu, anggunda malye upmalume,” nyabuka wenebicopura, aninye ara, pia talima kat ninye unyaka anya arye, ‘Awenen yupu nun like, kum kekenamabe,’ tenekirye, awenen yupu ara yaninauk unyake. Aninguk wininyak ninye ara, aminyan talak weik ikin ning dopdopnamake.

Yeremia 3:19

Allah Yahweh arye nyabuk. “Israelo, anggunda narye anti dobuka, na mi koproba akunum kipdeipkise. Tonda, pia teleb mutuku nirya tuku aubuk bukni, pia teleb tuku arepnamsine. Na tenepse ning ara, ance nati, “Elda na ni koproba,” nyapnamnilame. Utenepminye ura, na dam arye batakuka kum binamlame.

Zefanya 3:9

Bukni, aning nirya wenen ning, akunum areplyopura, narye sik tukwak noutam unyak nang nirya ati, kanye tamubuka deipnyopura, sikce na Allah atibuk, moronamniake. Tonda, sikce malye nyanyak yupu nirya ara, kum kipdeipnamne. Winipnyopura, ninye im sirya, mutuku sirya ati, teleb nyan yupu dem, sik kanye pum tam deipnyopura, teleb yupu uk nyanamake. Winipnamna deiyok ara, sik tonok kanye deice aryuk, na Allah Yahweh ati, na siuk erenamniaka ati, wininamne. Sik nirya arye, nati, ‘Se Allah ancuk melibuka lyepropnamsilame,’ nyabuka, moronamniake. Tonda, sik tonok kanye talima deice arye, ‘Kume, nun ni Allah atibuk, el piluk donamabe,’ nyanamake. Yuk talye isa ati, ton kum si erenamake. Aning kum bukni, tukwak mutuku nang nirya ara, narye nyapnye ninguk, moubuka talibikirye, na siuk erenamniake.

Matius 16:27

Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.

Matius 22:16

Yayikce, Yesus ati ayupu asipdeyik. “Anda peterenanye umince, yupu diksukumuk nyalyame. Tonda, an petereminye talak ara, ‘Na peterenunba kekepnikirye, derenuniyak do? Kanye deipnuniyak do?’ kum tenelyame. An petereminye talak ara, ‘Anang ara bona weik talin nang do? Anang ara weik ninye deiyok nang do? Anang ara yuk sisinanye do?’ tenena kum diparyuk, Allah yupu deice arye, ‘Wininamlulume,’ nyasilye touk, diksukumuk peterelyame.

Matius 6:9

Anggunce Allah moronamluma ara, ani. Nun ni Allah im deice ululye birye, ‘Nun babye, yuk nang nirya babye, an siuk erebuka unamap’ tenen, moropkiyabe. Tonda, ance mutuku-mutuku nirya ap, nun tukwak nang nirya ap, talisilyamce, ‘Nun Weik Deiyoknye, an tonok unamsilam’ tenen, moropmabe.

Roma 11:20

Ura, aning ara nyapnitinge bukni, luba kina meme. Minyuma yo taruk seklobuk ning deiyok ara, sik Israel ninye diba kum tenyamika deice arye batakuk. Aminyan dukdongobuk yo taruk ara, anggun Yahudi yala kum ninye, tuba-tuba diba tenemunya deice aryuk, tuba ululume. Aning ati ara, ‘Nunda, akunuma. Teleb ninyeuk unyabe’ tenen, anggun bidamang kanye talima erelana meme. Aning kum bukni, ‘Nun diba tenenyap ning ara lik upsilyeba, batakipyak’ tenen, adiparyuk ilil asa arye unamlulume.

2 Korintus 1:2

Nun Ni Koprop Allah ap, nun Deiyoknye Yesus Kristus ap, sik bitinye arye anggun dib tenen ninye ati, sik kanye aryuk bico tenesurudakce, urdem aryuk melisururak ning ap, teleb una ati, kanye deibuka teleb una deiyok ning ap, ‘Abitinye pia arenamsirak’ tenen, Allah morosinyame.

2 Korintus 5:6

Aning ati ara, atalak-atalak nirya ara, kanye teniltona kum aniryuk, ‘Pia dipkoprop unamsile’ tenen, lamapdongobuka pi dobuka unyabe. Tonda, nun kele, tukwak deice ninye nong noutamak tuba unyap talak ara, nun yuk mutuku unyabe. Tonda, nun Deiyoknye Yesus yukak ulule.

2 Korintus 7:1

Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.

2 Korintus 7:11

Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.

Galatia 2:6

Ura, na peterelamse yupu, Allah el kai teleb yupu, akunum langdibuka anya arye, kum suktalipnuke. Ati, sik mambul nang, Yerusalem mutuku peterena deiyok nang ara, yuk yupu ap tabakuka kum peterepnike. Tonda, ‘Anang ara, weik nang do, kum do?’ kum tenenyake. Na kanye ara, atenena atonun ning ara mambul kume. Allah arye ninye winilamice ning nong bol deiceuk elcuk, ‘Anang ara weik mambul nang, anang ara mambul kum nang’ tenen, yupu kum bogolisulule. Allah arye ninye nirya ati talima kum wililule.

Efesus 1:17

Anggunti Allah morosinye talak arye, moronye ning ara, laka nyapnusine. Ara, ani. ‘Nun Deiyoknye Yesus Kristus arye, si erelamuk Allah ara, nun pia mambul kopropnye Allah arye, anggunti, melipsilirye, anggun kanye talima noutamak, weik kel kina deiyok ning ap, Allah tenesilye ning moubuka kekena deiyok ning ap, arenamsile’ tenen, Allah morosunune. ‘Aning arisilya deice arye, Allah el ulul ning nirya, weika arye, kel kibuka, el ap, kanye talima dukdongobuka unamlum’ tenen, Allah morosunune.

Efesus 3:14

Ara, na kayapu, Allah tenyamsukce, pil dolamsuk ning nirya ara, tenepne ning ara, nun Ni Kopropa Allah ati, ‘Anda pia teleb’ tenen, urasin kanupdongobuka moronune.

Efesus 6:9

Ara, anggun pil deiyok nang ati ara, ayupu nyapnusine. Arup ara, anggun pil melin nang ati, “Winipnamlulume,” nyabuka sekmasin touk, anggun deiyok nang arye, sik amu tam unyakce, anggun pil melibuka donyak ninye ati, teleb ubuka neika unamlulume. Anggun melin nang ati, ‘Ilil upnul’ tenen, “Amapo, na nyapmasin touk, pil kum dopnumunyopura, ikin ning, anggun nong deice adiparyuk deipnamsine,” nyabuka, wenena kume. Ayupu ara, talye kum nyapsine. Ara, anggun kele, anggun amu tam talye pil melin nang ap, anggun deice tam pil deiyok nang ululum ninye ap, anggun Weik Deiyoknye bira, tonokuka. Elda im deice ulirye, tukwak mutuku ninye nirya dipdebuka, yupu bokeipnamsil ning ara, ansinibuka unamsile. ‘E anang ara, na kayapu nang ati, kum wenepnamne’ tenen, kanye kum wilisulule. Weik nang babye, mitik nang babye atonun, tenepsilirye, nun winilamap atonun dekna arenamsile. ‘Ton nang ara, mambule, ton nang ara, mambul kume,’ kum tenesulule. Nun winilamap atonun, yupu lepsisikuka bokolisulule.

Ulangan 10:17

Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.

Pilipi 2:12

Aning ati ara, na kayapu, minop talak dipdongobuka, anoutam talak nirya, na yupu kekebuka, teleb kibuka winimunya atonun, pia wininamlume. Tonda na ap, neika ulamubu talak babye, wini talak nun yuk-yuk unyap talak babye, Allah el yupu uk kekebuka, el yupu uk talibuka dobolbalulum touk, apia wininamlulume. Allah arye, ‘Apil winibuka donamak’ tenen, teleb kibuka tenyamsuk touk, ‘Aninguk pataplya ati, apiluk tenebuka donamak’ tenen, anggun kanye talima noutamak melibuka pil dosulule. Winibuka anggun talima noutamak pil dosulul anya arye, anggunce atouk, yuk-yuk tenepmunce, ‘Allah arye lyepnamnil ara, weik mambule,’ tenenamlume. Tonda, ‘Na mikip kumnye birye malye winipnun’ tenen, kanye pia moupnamlulume, na Paulus arye, nyapsine.

Kolose 3:25

Yata nang do nirya, sik tuba malye wininyakba, sik malye wininyak ning ati, Allah arye yupu bokeipsilirye, wenepnamsile. Elce, ‘Aning ani, anang ani,’ tenen, talima wililina kum aryuk, dipkoprop malye wininyaka atouk, wenepnamsile.

Ibrani 12:28

Aning ati ara, na kayapo, Allah arye nun diba tenenyap ninye talibuka, weik Ninye Deiyoknye unamsila nirya ap, elce arisiliba, talibuka unamap ning nirya ap ara, luluktuba, kum kum uptua anya arye, nun nirya arye Allah ati tuba-tuba, “Telebe,” nyabuka unamabe. Tonda, Allah arye, ‘Aning telebe,’ tenesilye touk, ‘Se, Allah ara weik mambule’ tenen, elti, ilil usiliba, el siuk pia erenamabe. Nun ni Allah ati, ‘Telebe,’ nyabuka, el siuk erebibyopura, Allah arye nunti kanye delinamsile. ‘Allah ati, ilil unamsile,’ nyapmasin yupu ara, talye ati kum nyapsine.

Ibrani 4:1

Ura, na kayapo, Allah arye el mapu nirya ati, “Na ap, neika dikdik sena ati, kintinipdeipsise mutuku ara, dolonamlulume,” nyabuka, nyalilamsuk yupu tuba aupmasila anya arye, aning ati ara, kanye moubuka unamabe. Ara, aminyan talak nun kan-kan arye tonoknye ati do, tonok kil ati do, Allah arye, “Kume, aninye ara, na nyamse touk kum wininyaka anya arye, na ap neika dikdik sena ati, kintinipdeipsi mutuku ara, kum dopdoptinge,” nyabuka, ‘Yupu lepsisikuka bokeipsilyak’ tenen, kanye moubuka unamabe.

1 Peterus 2:11

Na kayapu, bico tenesunune. Anggun mutuku sirika ara, im deice ulula anya arye, tukwak mutuku noutamak, ninye asik ninye atouk ubuka ululum talak nirya ara, malye winin ning patasilye ning nirya ara, batakuka lubakilongonamlulume. Amalye winin ning patasilye deice arye, nun kanye talima ap, kanye ap opbisibuka, malye ulisulule. Ati amalye winin ning nirya ara, batakanamlulume.

1 Peterus 3:15

Ilil kum unamsil bukni, anggun talima noutamak ara, ‘Yesus Kristus na Deiyoknye eluk unamnile’ tenen, wibuka kintinilinamlulume. Anggun kanye talima ara, Yesus deiceuk delinamlulume. Sik asilenamsiak nang nirya ati ara, ‘Allah arye lyepnamnil’ tenen, ‘El deice kanye delinuna ara, laka nyabuka deipnamne’ tenen, kintinilinamlulume. Yesus el lyen yupu laka nyanamlum bukni, yuk nang nirya ati, si erebuka, nimalye aryuk nyanamlulume.