Memep deipmunyeba, aKerup bitinye, sik urasin ara, tonok noutamuk kipdeipmunyeura, dilanamdake. Winipdikirye, sik pol epdadikirye, anoutamuk, pol kup-kup dukdongopdanamdake. Winipdikirye, sik urasin babye, tonok tam noutam bisikuk kipdikirye, dilanamdake. Ara, amarikna pum peti, el deice tam bublan, el si Kalulongona Perdamaian, asukumuk dilanamdurake. Akalulongona deice arye, sik pol ara, apeti yo pum tam bukni, noutam bisikuk, atam ap, otam ap, mining damuk dipdongopdanamdake.
1 Peterus 1:12 - Eipomek12 Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake. 參見章節 |
1 Peterus 1:12
56 交叉參考
Narye anggunti, “Aning ara malye winipmalame,” nyabuka, wenepsise ning ara, kum kekenululume. Narye, anggunti, “Aning ara, malye umunye ning ara batakso,” nyabuka wenelamse ning, akunum kekepnutum toura, narye anggunti bico tenebuka, pia weik kel kiamsa deice arye, na kanye talima pum tam tenenun ning nirya laka nyapsitinyeba, akunum bikamtume. Bukni, na nyasinye yupu nirya ara, pia kum kekenululume.
Anggun ulamlum mutuku ara, malyeuk dauamlya ani, Allah arye el Dib Kanye im deice weika arye arepnamsile. Arepsiliba, mek pia una kum mutuku nirya, tuku teleb kiplirye, wa tuku pia teleb upnamle. Teleb upliba, wa wibuka koubikiba, paplirye, duk moun ning ayala-ayala nirya pabuka duk mouplirye, pia weik upnamle anya arye, talye bai mutuku palamla atonun unamle.
Raja Kores birye, Persia mutuku talibuka ulamuka ani, keting tamun winilye noutam arye daulamukba, atalak ara, Daniel el bidamnye si ton ara, Beltsasar nyalamik. El anye deice, Allah el dipkoprob yupu yanuka nyapdeibuk. Ayanuka yupu nyapdeibuk ning ara, Daniel lukunyan lengdar mabuka deice arye, yanuka laka nyapdeibuk. Ati Daniel birye, ‘Aning ara, moubuka kel biktinyeʼ tenen, piripdeyukce, ayupu ara, kanye imun olan ning ati eibukce, ayupu ap, lukunyan lengdar mabuka deice eibuk ning ap bikukce, ‘Nong ara, ani,’ tenebuk. Aning nirya ara, Daniel birye nyabuk yupu ara, ani.
Ati, wini talak Daniel anda, ayupu batakna kumce, ayupu pia talibuka ulaminya ani, aminyan talak ara, an adiparyuk dipnalame. Bukni, aminyan talak, mutuku nirya sirya daknamle talak ara, anda tamubuka kam bukminba, Allah arye anti, dekna teleb ning ton arepkiliba, dopropnalame.” Amalaikat arye, na Daniel biti, winibuka laka nyapnuke.
Asipdesiba, anye birye tamubuka, nati nyapnuk, “Kume Danielo, anda, ‘Aning kel biktinyeʼ tenena kume. Ayupu nong laka upnamle ning ara, kum laka nyapkitinye. Deiyok ara, ayupu ara, akunum siknipdongopmana ati, kum biktume. Sirya daknamle talak aryuk, laka kibuka ayupu deiyok ning ton, nong lak upnamle. Wini talak ara, kum biknamlame. Ati, an wini talak aryuk binulyame.
Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk.
Winibukopura, na kekenmasiba, Allah el pil donanye, im deice malaikat tonok arye, yuk malaikat ati, malye nyabuka, ayupu nyabuka asipdeyuk. “Se, awininmalba eipmap ning ara, yata wiribuka talak arye, tuba winipnin balamlya ani, akunum winibuka sirya dakanamle do? Tonda, yata wiribuka talak ton noutam arye, amikip weik malye deiyoknye birye, Allah ati malye nyaplirye, asum-asum nirya, Allah el si erena ati arelbanyak ning ara, ‘Bataknulyame,’ nyabuka, yupu seklirye, kum kipdeipnamle do? Elda yata wiribuka talak ton, mikip weik kiplirye, aning nirya malye kibuka, talibuka tiknamle do? Tonda, yata wiribuka talak ton ap, im deice yin talen nang ap, sik yin talen deiyoknye ap, malye kiplirye, yaninauk unamle do? Tonda, im deice weik deiyoknye, el si eren aik ati, pia malye kibuka yanipdongopmal ning ara, yata wiribuka talak ton, malye kipdeipnamle do?” nyabuka, asipdeyuk.
Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.
Allah arye Israel ninye ati nyabuk. “Na tenepse talak, akunum dam uplyopura, narye anggun tukwak ninye nong deice, na Dib Kanye arepnamsine. Arepnamne talak, anggunce deipnamlum sal mapu ap, kilmapu ap nirya ara, na yupu nyapniba, kekebikirye, sikce laka nyanamake. Tonda, sik wisi-wisi nang unam noutamak arye, tonok-tonok nang ton, lengdar deice mabikirye, na arenamne ning lak kipniba, eibikirye, ayupu ton laka nyanamake. Tonda, wel nang, sik deice arye dotalak unamle ning, sik dam arepneba, sikce kel kibikirye, laka nyanamake.
Dipkoprop Allah Yahweh elda, Weik Erena Deiyoknye, aning-aning nirya talibuka, deice tam ulule. Winilula anya arye, Allah elce, ‘Aning nirya ara, winipnamne,’ nyabuka, el yupu lak nyan nang, ‘Nabi-nabi arye kekepnamak’ tenen, lak nyaliba kekenyake. Sikda, el amu tam pil don nang unyake. Allah arye, sik dam lak kum nyapdeiamturye, el pil dolye ning nirya, talye mangkau kibuka kum pil dolule. ‘Winipnamna arye,’ nyabuka, laka nyaliba, nabi nang akunum kekebiceura, Allah arye apil dolule.
Ura, Daud birye deibukba, deipdanin yanganyak nang nirya ap, Yerusalem mutuku weik asik noutam unyak nang nirya ap ara, narye sikti, kanye talima namin una deiyok ning arepnamne. Ara, aning arepnyeura, sikce, ‘Seʼ tenen, bico tenebuka, talima lamapdongobuka unamake. Tonda, sikda talima erelana kum aryuk, nemalyap aryuk, na Allah ati, moronuk unamake. Winipnamsina deiyok ara ani. Ara, aminyan talak ara, sik tam nang arye, nati lukuka opnamniake. Aminyan talak ara, sikce lukuka opnikirye, anang nirya arye eipnamniake. Tonda, eipnikirye, ‘Se, bicoeʼ tenen, engepnamake. Nati, engenamniaka ara, sik mi tonok deiamikcak, ami diplyeba, ami ati weik arye engelamak touk, unamake. Tonda, sik anang nirya arye, engenamniaka ara, sik min yuma deiamikce mi tonok, diplyopura, atonok mi ati, engelamak touk, na eipnikirye, atonun weik arye engenamake.
Yesus arye, ayupu nirya nyabukopura, el li Allah ati moronmaka deice arye ayupu nyabuk. “Naie, anda im deice ap, tukwak mutuku nirya ap, talyamlumce, aning nirya deice tam weik deiyoknye ulyama ati, narye anti, ‘Telebe,’ nyabuka an si erepkine. Tonda, an nyasiminye yupu noutamak ning ara, kel bikna kanam nang ap, weik kel nang ap ati, deiyok dunulul bukni, mitik mapu atonun unyakce, talima mitang arye unyak nang ati, deiyok noutamak ning ara laka kibuka laka nyasilyame.
Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.
Atalak ara, Yesus elce wipdeiamuk nang, awekmek nang, sik 11 tuba unmek nang ati ayupu nyabuk. Anggunda mutuku sirya im sirya nirya ap, mutuku-mutuku nirya ap, na laka teleb yupu, ninye lyena yupu dobuka peterepra balamunyebuk, ‘Mutuku sirya im sirya unyak ninye nirya ayupu kekenamak’ tenen, peterelbilulume.
Yesus arye ayupu nyabukopura, kekebik, ninye nirya sik kanye talima malye tenelamika ap, sik malye ulamika ap batakikirye, kanye tamubikirye, diba tenebiceura, ‘Allah arye sik kanye talima talinamle’ tenen, Allah yupu peterepra balamik. Tonda, amutuku-amutuku nirya peterepra balamikce, uk dilamuk ninye weik kwetelamik.
“Narye, na Ni Koprop Allah, el un dam arye dopdeipnamsinanye bira, Allah El Dib Kanye ulule. Elda anggun talima melina ati, melinanye unamsile. Dopdeipnamsinanye bira, Allah El Dib Kanye ara, Allah arye dopdeipsilba balule. Elda, Dib Koprop Yupu nyalulnye ulule. Anye bira Allah El Dib Kanye arye, na Yesus ati, yupu nyabuka peterenamsile.
Paulus arye alengdar atonun ning deice aning eibukce, laka nyabukura, nun nirya arye tenebupe. ‘Kume, Allah arye Paulus lengdar eibuk deice arye akunum lak nyapmasile atia. Nunce Makedonia tam ninye, Yesus ninye lyen yupu peterepnamabe Allah arye aning akunum, tenepmasila ara, akunum kel kipmapa ati, adiparyuk, ‘Makedonia mutuku peterelbinuyap’ tenen, kintinibupe.’
Simon ulamuk mutuku Allah yupu peterelamrika ani, ‘Tamubuka Yerusalem mutuku binamanam’ tenen, bisik mapnin balamrika ani, Samaria mutuku noutamak ninye asik domikak anyasik-anyasik weik peterepnin balamrik. Ura, Yesus ap, neika ulamik talak arye, sik elilamrik ning ap, sik kekelamrik ning ap ati, ‘Yesus arye el yupu dib tenen, nang lyepnamle,’ nyabuka peterepnin balamrik.
Anyapmasin yupu ara talye ati kume. Deiyok ara, minop talak Allah yupu deice arye, ayupu ton sekamik. ‘Allah arye el diksukumuk ulul touk, elce diksukum kililul ninye ara, sik dib tenenyak deice aryuk, kam pia unamake.’ (Habakuk 2:4) Habakuk arye ayupu sekuka deiamuk touk, Allah arye diksukum una deiyok ning, kintinipsuk ara, el laka teleb yupu, ninye lyena yupu noutamak arye, lakak nyasulule. Adiksukum una deiyok ning arisulul ning ara, deiyok kouna talak arye dipdongobuka, doryanamle talak nirya ara, dib tenenyap deice arye arisulule.
Tonda, sik peterelbana deiyok nang ati, yuk nang arye, ‘Sik peterelbanamak’ tenen, anang sik melina ning ap, melibuka kum doprobikirye, anang dobuka kum dopkwetebicopura, yata ubuka peterelbiting do? Kume, aning nirya kum winipmanto. Allah yupu noutamak sekeipsik touk, ‘Allah arye ninye lyena ati, el laka teleb yupu peterena ati, ayupu dobuka boyasice nang ara, sik yan babye urasin pia teleb ulule, tenenyabe.’ (Yesaya 52:7)
Aning ara, na mikip deice arye kume. Allah El Dib Kanye mikip deice arye melyamnukba, amambul pil nirya dolamse. Ara, aninye nirya arye, ‘Allah elcuk apil dosulule,’ tenebuka, ‘Diba tenenamak’ tenen, etekdop ubuka don pil ap, ninye kum winipmanto pil ap, dolamsirye peterelamsiba, sik Yahudi yala kum ninye arye, Allah ati diba tenelamikce, el yupu kekebuka dobolbanyake. Winibuka apil dolamse ning ara, keting wekelban tam, weik asik dolamikak, Yerusalem mutuku arye dipdongobuka anyapce, keting panalyangan tam, mutuku si Ilirikum mutuku tam noutamak nirya ara, Kristus el laka teleb yupu, ninye lyena yupu bobuka peterelbalamse. El yupu ara tonok ning babye kum bataklamse.
Yesaya arye, ayupu sekamuk bukni, wini talak ara, Allah arye nyapdeibukba, Allah El Dib Kanye arye, nun talima pum tamak pil dosilya deice arye, laka kilisulule. Yata ning do nirya, ara, Allah elce minop talak duknyamuk ning babye, el yuk datenelul ning babye, Allah El Dib Kanye arye, aning nirya bobuka kel kililulce, peteresulule.
Winipmanto ning ara, basam amul sekikceba, yuk nang eibikirye, ‘E abasam ara, el ning’ tenen, kel biklamak touk, Allah arye nunti lakilin ning arepsuke. Ara, yuk ninye arye, nunti, ‘Anang ara, Allah el ning, tenepnamak’ tenen, Allah arye el lak kilin ning nun deice deipsuke. Winipsukce, ‘Aminyan talak ara, winipnamle ning, dipkoprop winipnamsile, tenepnamak’ tenen, kil taruk muruna atonun ning ati, minopce el Dib Kanye dobuka, nun talima ak dongopsuke. Ara, minopce areamsuk ning ati nyapsine.
Yuk nang nirya arye, ‘Anang ara teleb nanguk unyake, tenenamsiyak’ tenen, wininyap ning ara, ani. Nun kanye talima noutamak ara, malye winina pia kum, diksukumuk una ap; ‘Deiyok ani’ tenen, moubuka kekena ap; kel bikna ap unyabe. Tonda, ikin usilye ning do, malye winisinyak ning do, aning ati pola-pola yu una kumce, nimalye arye winina ap; yuk ninye sik patana ati melina ap wininyabe. Tonda, Allah El Dib Kanye mikip deice winina ap; tenepce arye winina kum bukni, yuk ninye ati dipkoprop bico tenebuka melina ap wininyabe.
Atalak noutam nirya, Allah arye, ‘Wininamne,’ tenyamsuk ning ara, winira akunum lak kipmasile. Ara, ani. Allah arye, lyepsukura, elti, dib tenenyap ninye noutamak pil dosilye ning nirya arye, im deice unyakce, ninye deiyok nang ap, im deice mikip weik unyak nang ap, eipsikirye, ‘Se, Allah ara, aning-aning nirya moubuka teneplirye, pia weik mambulnye, ulule’ tenen, kel bikinamake.
Nun kayapu, anggun dipkoprop tuba tenelulume. Anggun ap neika ulamubu talak noutamak ara, nunce weik pil dolamubu ning ap, ikin ulamsuk ning ap ara, kum lupakeipsulume. Winilamupa deiyok ara, nunce, Tesalonika mutuku ninye ati, Allah el laka teleb yupu, ninye lyena yupu peterenamap talak nirya ara, ‘Nun patan ning ati, arepsikibuk, sik ikin upnul’ tenen, keting noutam ap, lukunyan ap, pia pil dolamubu.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Ura, anyapmasin ninye nirya ara, pia diba tenenauk ulamik ani, aminyan talak diamik. Allah arye, “Wininamsine, winibuka aning arenamsine,” nyabuka, sikti, nyalilamuk ning ara, min kum areamukba, kum dolamik. Nong kum dolamik bukni, ‘Kume, Allah arye nyalilamsuk ning ara, dipkoprop arenamsile’ tenen, kanye deibuka peratoto arye, kintinibuka dinauk ulamik. Tonda, sikce nyalamik. “Kume, nunda, yuk pera mutuku ninye, asik nang atonun kibuka unyabe. Nunda, tukwak mutuku unyap bukni, asukum ara nun mutuku kopropa kume,” nyalamik.
Tonda, Allah arye nunti, ‘Na yupu, ninye lyena ati kai teleb yupu ara, tukwak ninye diba tenepnamak’ tenen, sik peterelamsik talak ara, mambul pil weik dolamsuke. Ara, ‘Allah aryuk apil donmasile, tenepnamniting’ tenen, talye nang arye kum winipmanto ning ap, weik mambul pil ap, ninye kum winipmanto pil ap dolamsukba, ninye weika arye, ‘Se, aning ara dipkoprop Allah elca,’ tenelamubu. Tonda, elce tenelamsuk touk, Allah El Dib Kanye arye el mikip deice arye arisilye pil dona deiyok ning ton, bokuka areamsuke.
Ura, sik minop talak diba kum tenyamik ninye ara, yuk nang arye, Allah el yupu dobuka peterelamikba, ayupu kekelamik bukni, ayupu ati diba kum tenyamika anya arye, talye amul deiceuk kekeltaklamika ati, nong kum uamuk. Sikce diba kum tenelamika ati, Allah arye dikdik senak teleb mutuku kintinipdeibukak kum wekik. Ati, nun babye atonun, yuk nang arye Allah yupu peterelamsikba, kekelamubu bukni, ‘Sik minop tam ninye diba kum tenyamik touk winibibyak’ tenen, kanye moupnamabe, nyapsine.
Yesus arye akunum diplamik ninye dam binuka, Allah el laka teleb yupu peterelbiyuka deiyok ara, nyapnusine. Ara, ninye tukwak ninye atonun ubuka ulamika anya arye, ninye nirya malye ubica deice dibilamak touk, anang babye, akunum diamik bukni, sik kam ulamik talak ulamik ning ati, Allah arye bokuka wenepnamle. Bukni, diba tenelamik nang babye, diamik bukni, Allah pia kam ulye touk, diba tenebika ati, sik nong dibik bukni, sik kanye pia kam unamak. ‘Wininamak’ tenen, Yesus el ninye lyen yupu peterelamikbuk, anang arye diba tenelamik.
Anirya kekepseura, adiparyuk yuk yupu ton kekepse. Kekenmasirye dinmasiba, im deice pil donanye, malaikat-malaikat yupa weik nukmanto kum, pia weik beribu-ribu unmek. Sik yupa ara, 10 ribu kali 10 ribu, 100.000 atonun pia weik unmek. Weik ninye deiyoknye bun ning dana-dana nirya antanapdongobuka tikmek. Sikti kmekak danoutam ara, sik dumbarye kam unyak ning ap, sik 24 wisi deiyok nang ap, tikmekba, sik amalaikat nirya arye mot deice arye ayupu nyanmek.
廣告