32 Aramaʉ̃ne ãzhi bitabai jãbadꞌe wãsidꞌa miõ ne ẽãĩnu.
Mawũẽ izha jʉrʉkuadꞌaa jarasia jãbata erukꞌopanamarẽã kꞌabanaba izhita pẽũsua edadꞌa ẽbamarẽã.
Kꞌabanata wãbidꞌape Jesús edesidꞌa jãba izhi kꞌobꞌadꞌadꞌe. Ãzhi daucha wãsia jãba awʉrʉrãsidꞌa.
Mawũãmina wãnata bioba ũdubʉdadꞌera ãzhita kꞌawuasidꞌa, mawũẽ maĩnu bio jẽde wãsidꞌa pʉwʉrʉ tabꞌe maẽba, aramaʉ̃ne jũẽkuasia ãzhi jũẽĩ nawedꞌa, mawũẽ daucha zekuasia Jesús bawara.
Mobebʉrʉ Jesúsbara izha jʉrʉkuadꞌara jãbadꞌe bꞌaribigape izhi naa wãbigasia Betsaida pʉwʉrʉedꞌa kĩrãrã, maʉ̃ẽna izhira wãta jara tebasia kꞌabanata kꞌobꞌea.
Mawũãpe ãzhi bawara jãbadꞌe bꞌaribʉrʉdꞌera pʉ̃ãdrʉra tausia. Mawũẽ ãzhira kꞌãbãẽã perabʉdaba bia akʉdruasidꞌa.
Maʉ̃ tẽã Jesús kĩrãrã wãsia Galilea dota jedꞌea õbꞌʉdꞌe, maʉ̃ dora abꞌaʉta Tiberia abada.
