Rom 11:22 - Sơ̆p Hlabơar Nơ̆r 'Bok Kei-Dei

²² 'Bok Kei-Dei 'mêm tơpă kơ kon bơngai, mă-lei Sư kư̆m hil kơ kon bơngai mơ̆n. Sư hil kơ lu bơngai mă kuă kơ lui kơ Sư. Gah lu iĕm Sư ưh kơ hil ôh yua kơ iĕm oei lui păng gơnang kơ Sư tơpă. Dah iĕm kuă kơ lui, Sư kư̆m chre hŭt dơng iĕm mơ̆n.

Rom 11:22 交叉參考

Horiso 31:19

Tơdrong 'lơ̆ng tơpăt Ih tih dêh, Mă ăn boih kơ lu bơngai hli yom kơ Ih păng ăn boih kơ lu bơngai năm kơ'nơp lăm Ih. 'Bơ̆t anăp lu kon bơngai.

Êsai 66:14

Lu iĕm gô 'bôh dôm tơdrong noh, na lăm jơhngơ̆m hiôk-hian, kơting lu iĕm gô bluh thoi 'nhĕt. Đe gô băt ti Kră Yang gô tơgŭm lu đĭch đam Sư, mă-lei tơdrong Sư hil mĭl gô phak lu bơngai ayăt kơ Sư.

Êsêkiên 18:24

Mă-lei tơdah bơngai tơpăt hŭt lê̆ tơdrong tơpăt sư, na sư pơm yoch kơnê̆ krưp thoi lu bơngai kơnê̆ đei pơm, Sư hăm arih ưh? Dôm tơdrong tơpăt ayơ mă sư pơm boih Inh ưh pă 'blŏk dơ̆ng, sư gô lôch yua kơ tơdrong yoch kơnê̆ mă sư đei pơm.

Êsêkiên 3:20

Tơpă, dah minh 'nu bơngai tơpăt lê̆ tơdrong tơpăt sư na pơm yoch, Inh gô ăn đei tơdrong pơgăn 'bơ̆t anăp sư păng sư gô lôch yua kơ pơm yoch, mă-lei yua kơ ih ưh kơ khan khă bơngai noh, thoi noh sư gô lôch lăm tơdrong yoch sư, Inh ưh pă 'blŏk dôm tơdrong tơpăt mă sư đei pơm, mă-lei pham sư oei jô̆ lăm ti ih.

Luka 8:15

Lu găr mă huŏng tơ teh 'lơ̆ng wă pơtih gia kơ lu bơngai kơtơ̆ng đe bơtho nơ̆r 'Bok Kei-Dei na kiơ̆ hloi kơjăp hăm pơm 'lơ̆ng tơpăt. Sư kư̆m adrin lui khŏm khŏm pơyua tơdrong jang 'Bok Kei-Dei tơpă.”

Yo 15:2

Na dôm lu bơngai lui kơ Inh thoi lĕ dơng, tơ'bla, sơdrai mă chăt đơ̆ng Inh. Dơng mơ'nah ưh kơ đei plei, 'Bă Inh chre tŭk. Đei dơng mơ'nah plei mơ̆n, mă ưh kơ trem, Sư sơleh tŭk lu tơ'bla iĕ, wă kơ sư plei trem păng plei tih.

Yo 8:31

Na Yêsu khan kơ lu bơngai Juđê mă lui kơ Sư boih: “Dah iĕm răk kiơ̆ tơdrong Inh bơtho khŏm khŏm, lei iĕm bơngai kiơ̆ Inh tơpă boih.

Jang 11:23

Lăp 'Barna'ba truh boih tơ Pơlei Antiôs, sư 'bôh 'Bok Kei-Dei tơgŭm lu sư tơpă. Na jơhngơ̆m 'Barna'ba chơt hiôk. Na 'Barna'ba pơlung lu sư khŏm khŏm wă kơ lu sư lui kơ Kră Yang Yêsu hăm đĭ jơhngơ̆m klơm klak lu sư kơdih.

Jang 14:22

Tơ rim pơlei ei bre sư bơtho khan kơ lu bơngai lui, wă kơ lu sư lui mă kơjăp. Bre sư khan bơ̆n athei đei lơ tơdrong pơmat-tat adrol 'mơ̆i na gơh mơ̆t tơ dêh char 'Bok Kei-Dei.

Rom 11:21

Lu bơngai Isơrael mơ'nah kuă kơ lui tơpă na 'Bok Kei-Dei chre hŭt dơng lu sư. Mă iĕm kư̆m lei-lăi, tơ̆ng iĕm kuă kơ lui Sư kư̆m chre hŭt iĕm mơ̆n 'bônh loi yua kơ iĕm dơng đơ̆ng nai.

Rom 2:7

Bơngai bu adrin pơm 'lơ̆ng hăm 'Bok Kei-Dei wă kơ 'Bok Kei-Dei lăp đon ăn kơ sư arih hiôk chơt păng wă kơ akâu sư huay kơ lôch hiong, bơngai noh 'Bok Kei-Dei gô ăn kơ sư đei tơdrong arih ling-lang tơpă.

I Kor 15:2

Yua kơ tơdrong 'nao 'lơ̆ng 'nâu, na iĕm gơh klaih. Dang ei đĭ kơ iĕm hăm oei răk tơdrong 'nao 'lơ̆ng mă đêl inh bơtho kơ lu iĕm dah ưh? Tơ̆ng ưh, tơdrong lu iĕm lui ưh kơ đei yua kiơ ôh.

Galati 6:9

Mă-lei bơ̆n athei chu kơ Sư khŏm khŏm wă kơ bơ̆n gơh pơm đon 'lơ̆ng. Thoi noh dah bơ̆n huay kơ achăng lê̆ Sư na mưh trŏ kơ năr 'Bok Kei-Dei pơkă ning-mônh Sư gô ăn kơ bơ̆n tơdrong apah na bơ̆n oei hơdai hăm Sư ling-lang. Kư̆m thoi bơ̆n pơtăm găr, dah bơ̆n ưh kơ hŭt lê̆ tơdrong jang bơ̆n, lei trŏ bơyan plei, bơ̆n đei phĕ iŏk tơpă.

I Tes 3:5

Yua kơ iĕm đei tơdrong đe areh kơ iĕm tơpă, na inh pă kĕ ĕnh, na wơh Timôthê năm tơ iĕm ki, wă kơ sư jet iĕm, wă kơ băt iĕm oei lui kơjăp kơ Kră Yang Yêsu dah ưh. Inh hli dêh kơ yang Satan pơhlŭ iĕm achăng lê̆ tơdrong lui bơ̆n. Yua kơ đêl nhôn mah bơtho gleh tơpă tă ưh kơ yua kiơ, inh 'mêm dêh.

I Tes 3:8

Dang ei nhôn oei hiôk tơpă yua kơ iĕm lui kơ Kră Yang Yêsu Krist kơjăp, na nhôn bơtho đe rai pran dêh.

Hêbrơ 10:23

Bơ̆n athei wei mă kơjăp tơdrong mă bơ̆n chang sơmĕng ei, 'nĕ kơ lui pơngiĕl Sư. Yua kơ dôm nơ̆r Sư pơkă ưh kơ lah tŭk minh nơ̆r.

Hêbrơ 3:14

Tơdah bơ̆n lui kơjăp khŏm khŏm truh năr tôch, bơ̆n gô oei hơdai hăm Yêsu Krist ling-lang. Tơdah bơ̆n ưh kơ kiơ̆ Sư khŏm khŏm, bơ̆n ưh kơ gơh oei hơdai hăm Sư ôh.

Hêbrơ 3:6

Mă Yêsu Krist Sư kư̆m jang trŏ thoi 'Bok Kei-Dei pơkă mơ̆n, mă Sư jang wei-lăng đĭ-đăng kơ hnam dơnŏ 'Bok Kei-Dei hloi, yua kơ Sư Kon 'Bok Kei-Dei. Lu bơ̆n, tơ̆ng bơ̆n oei lui kơjăp, bơ̆n kư̆m hnam dơnŏ Sư mơ̆n, dah bơ̆n oei gơnang kơ Sư tơgŭm bơ̆n khŏm khŏm.

I Yo 2:19

Lu bơngai ayăt kơ Yêsu Krist dang ei, tơm hmơm sơ̆ sư khan sư wă bôl lu bơngai lui tơpă, mă dang ei sư achăng tŭk lu bơ̆n bơngai lui. Dah sư bôl bơ̆n bơngai lui tơpă lei sư bôl bơ̆n ling-lang ưh kơ đei layơ tŭk. Na dang ei sư achăng tŭk bơ̆n tơpă boih, noh bơ̆n băt lơ̆m lu sư ưh kơ đei bu buăl bơ̆n.

Tơdrông Tơ'bôh 2:5

Na dang ei iĕm 'blŏk hơdơ̆r kơ tơdrong iĕm 'mêm sơ̆ dang yơ, iĕm athei 'mêm dang noh, 'nĕ kơ pơhơi. Tơ̆ng iĕm ưh kơ 'mêm dang tơm hmơm iĕm lui sơ̆, lei Inh wă năm hloi pơdrĕo iŏk jơ̆ng kơđeng maih đơ̆ng pơlei iĕm.