Mi 7:8 - Sơ̆p Hlabơar Nơ̆r 'Bok Kei-Dei

⁸ Ơ lu ayăt kơ inh, 'nĕ mah chhôk kơ inh dêh mă khan inh pơ̆k huŏng boih; kư̆m gô iung dơ̆ng; mă khan inh tơoei lăm anih măng mu, 'Bok Kei-Dei gô pơchrang kơ inh hơdah.

Mi 7:8 交叉參考

Jop 31:29

Tơdah inh hiôk chơt yua kơ bơngai areh kơ inh đei tơdrong răm truh, Păng chhôk hơnôk kơplah lu sư đei tơdrong pơmat-tat,

Horiso 112:4

Hơdah pơchrang tơ anih măng mu, kơ bơngai tơpăt. Bơngai 'lơ̆ng băt mơnat, đei jơhngơ̆m 'mêm mơnat păng 'lơ̆ng tơpăt.

Horiso 143:3

Lu ayăt druh bơhngol inh, pơjuă bơhlơ̆r tơdrong arih inh tơ teh; Sư ăn kơ inh oei tơ lăm măng mu. Thoi bơngai lôch đĭ đunh boih.

Horiso 20:8

Lu đe noh kơdŭn pơ̆k hraih đang, Gah lu nhôn iung păng dơ̆ng tơpăt hloi.

Horiso 27:1

Kră Yang boih tơdrong hơdah păng tơdrong dŏng pơklaih inh: Inh wă hli kơ bu dơ̆ng? Kră Yang anih kơjăp kơ tơdrong arih inh: Inh wă hli kơ bu dơ̆ng?

Horiso 35:19

'Nĕ ăn kơ lu bơngai pơm kơnê̆ kơ inh tơdrong kơ đei chơt hiôk. Kŭm 'nĕ kơ lê̆ lu areh kơ inh, kơ'mreh măt tơdrong kơ đei yua kơ Ih.

Horiso 37:21

Lu bơngai kơnê̆ tŏk iŏk, na pơdrâu ưh kơ kĕ. Gah lu bơngai tơpăt hơmrah păng asong tŏk iŏk.

Horiso 37:24

Mă sư kơtơih, kư̆m huay kơ pơ̆k; Yua kơ Kră Yang gô pôk tơiung sư.

Horiso 38:16

Inh khan: “'Nĕ ăn kơ lu sư chơt hiôk yua kơ inh! Pơư hloi kơ lu sư kơdih, mưh jơ̆ng inh tơpling.”

Horiso 84:11

Kră Yang 'Bok Kei-Dei jơ̆ măt 'năr păng khêl; Kră Yang ăn tơdrong mơnat păng ư-ang, Sư ưh kơ đei sơngah ôh ăn tơdrong 'lơ̆ng rŏ. Kơ bu mă oei arih sa tơpăt.

Horiso 97:11

Tơdrong hơdahb pơchrang kơ lu bơngai tơpăt. Păng chơt hiôk kơ lu bơngai đei jơhngơ̆m tơpăt.

Êsai 2:5

Ơ adrĕch Jakôp, bĕ lu bơ̆n yak kiơ̆ lăm tơdrong hơdah Kră Yang.

Êsai 49:9

Wă khan kơ lu bơngai bơnă: ‘Lĕch bĕ,’ păng khan kơ bơngai oei lăm măng mu: ‘Pơdah bĕ akâu iĕm!’ Lu sư gô sŏng sa rok trong păng lu sư gô đei tơmăn 'nhĕt tơ kơpal kông groi mơ-mlưch.

Êsai 50:10

Bơngai bu lăm lu iĕm băt hli yom kơ Kră Yang, păng chu kiơ̆ kơ nơ̆r đĭch đam Sư Mă năm lăm măng mu păng ưh kơ đei hơdah. Gơnang bĕ kơ Anăn Kră Yang păng gơnang kơ Kră Yang 'Bok Kei-Dei sư kơdih.

Êsai 9:2

Kră Yang ăn kơ kon pơlei âu chek lar rai lơ păng pơthim ăn kơ lu sư chơt hiôk. Rim 'nu chơt hiôk 'bơ̆t anăp Kră Yang, thoi đe chơt hiôk kơ bơyan yuă 'ba, thoi lu bơngai jreo hiôk klah song băl tơmam đơ̆ng blah tơgar iŏk.

Je 48:27

Hăm trŏ lu iĕm sơ̆ kư̆m hiĕk ăr kơ Isơrael? Tam đei đe tơ'bơ̆p rôp Isơrael hơdai hăm lu bơngai tơtông ưh? Lei liơ mah mưh iĕm pơma 'bơm sư iĕm tơtreh kơ̆l che bơle?

Je 50:11

Ơ lu bơngai mă blah iŏk mŭk tơmam Inh. Mă lu iĕm chơt hiôk 'nă hal, Mă lu iĕm pơplŏng thoi kon rơmo adruh lăm tơmăn 'nhĕt.a Hmoi thoi aseh tơno.

Je 8:4

“Ăn kơ ih roi bĕ kơ lu sư: ‘'Nâu Kră Yang khan: ‘Bơngai pơ̆k hăm pă iung dơ̆ng? Bơngai jrok hăm wơ̆t brŏk dơ̆ng?

Êsêkiên 25:6

Na Kră Yang khan thoi âu: Yua kơ ih tap ti, kơtrơ̆m jơ̆ng, jơhngơ̆m chơt hiôk 'nă hal păng pơjăm pơjuă teh đak Isơrael,

Êsêkiên 35:15

Yua kơ ih chơt hiôk mưh mŭk tơmam adrĕch Isơrael jing juơ pă đei, na Inh kư̆m gô pơm kơ ih thoi noh. Kông Seir păng đĭ kơ Eđôm, gô jing juơ pă đei păng lu sư gô băt Inh boih Kră Yang.’”

Êsêkiên 36:5

Kră Yang khan thoi âu: Lăm tơdrong Inh hil gar tơtŏ thoi ŭnh, inh wă blah lu dêh char mă oei oei păng đĭ kơ char Eđôm, lu dêh char mă đĭ jơhngơ̆m chơt hiôk pơjăm tơgar iŏk teh Inh jing tơmam sư kơdih păng tơgar iŏk lu tơmăn 'nhĕt,

Am 9:11

“Lăm năr noh, inh gô tơiung pơdơ̆ng bơsŭn Đawit, mă đêl păk boih păng hơmet ming lu bơlôh hiah sư. Inh gô pơdơ̆ng ming lu đêl pơchah păng man ming thoi sơ̆,

Ob 1:12

ô! Rŏ kơ ih lê̆ kơ lăng ră năr pơmat-tat truh kơ 'nhŏng oh ih, ih 'nĕ kơ chơt hiôk lăm năr đe pơlôch lu kon sâu Juđa; kư̆m 'nĕ pơma pơang lăm năr lu sư pơmat-tat.

Mi 4:10

Ơ lu drŏ-kăn Siôn, jĭ pơmat gleh hrat thoi drŏ-kăn tơpŭ wă kơ đei hơ'lơ̆p! Yua kơ lu iĕm đe gô tơlĕch weh đơ̆ng lăm pơlei păng lu iĕm gô oei tơ lăm chŭn păng gô năm oei tơ char Babilôn. Oei tơ noh lu iĕm gô đei tơdrong dŏng pơklaih đơ̆ng noh, tơ noh Kră Yang gô huai iŏk iĕm tơlĕch iĕm đơ̆ng ti lu bơngai ayăt kơ iĕm.

Mi 7:10

Lu ayăt kơ inh gô 'bôh tơdrong na lu sư gô mơlâu, sư noh bơngai mă khan kơ inh thoi âu: Tơ yơ Kră Yang 'Bok Kei-Dei ih? Inh gô hiôk măt 'bôh tơdrong truh kơ sư, na 'nâu lu sư đe gô pơjuă bơhlơ̆r thoi teh rơpŭk rok trong.

Sa 12:8

Lăm năr noh, Kră Yang boih Tơ'ngla dŏng tơgŭm kon pơlei oei lăm Jêrusalem păng lăm năr noh lu bơngai mă tơrăn hloh gô pran thoi Đawit, hnam Đawit gô nhen thoi Kră Yang 'Bok Kei-Dei, gô thoi linh jang 'lơ̆ng Kră Yang oei 'bơ̆t anăp lu sư.

Malachi 4:2

Mă-lei gah lu iĕm, lu bơngai hli yom kơ anăn Inh, thoi noh măt 'năr tơdrong tơpăt gô pơchrang ăn, lăm năr noh kơnh gô đei pơklaih tơdrong jĭ jăn; lu iĕm gô lĕch pơplŏng thoi rơmo dăm lĕch đơ̆ng lăm hơdrong.

Mathiơ 4:16

Lu bơngai mă oei lăm măng mu 'noh, Kơnh lu sư gô 'bôh tơdrong hơdah tih tơpă. Tơdrong hơdah 'noh wă pơchrang hơdah kơ lu bơngai mă oei lăm măng mu dang lĕ kơ lôch.”

Yo 16:20

Inh khan kơ iĕm tơpă wă kơ iĕm băt: Pă 'biơ̆ lu iĕm nhơ̆m hmoi ơh ol. Mă-lei lu bơngai ala teh âu 'nă hal. Pă 'biơ̆ mơ̆n jơhngơ̆m iĕm gô sơ'ngon, klaih kơ noh iĕm gô chhơp dơ̆ng.

Yo 8:12

Yêsu bơtho dơ̆ng thoi âu: “Inh pơchrang hơdah kơ kon bơngai jơ̆p-jang kơ teh đak wă kơ sư băt tơdrong 'Bok Kei-Dei. Bơngai bu kiơ̆ Inh sư huay năm lăm măng mu kiơ̆ tơdrong yoch, sư gô đei Inh pơchrang hơdah kơ sư păng ăn sư arih ling-lang.”

Jang 26:18

Inh gô wơh ih wă kơ pơlar măt lu bơngai tơmoi wă kơ lu sư gơh 'bôh Tơdrong 'Nao 'Lơ̆ng, wă kơ lu sư gơh jăk đơ̆ng măng mu, na oei lăm hơdah, wă kơ sư jăk đơ̆ng yang Satan, na năm tơ 'Bok Kei-Dei. 'Bok Kei-Dei gô pơklaih lu sư đơ̆ng dôm tơdrong yoch hăm jô̆ lu sư jing bơngai 'lơ̆ng tơpăt thoi đĭ-đăng lu bơngai lui kơ Inh.’

II Kor 4:6

Kơplah 'Bok Kei-Dei pơjing plĕnh teh sơ̆ Sư khan kơ măng mu athei đei hơdah na đei hloi. Na Sư kư̆m pơchrang tơdrong hơdah Sư tơ jơhngơ̆m đon nhôn, tơ muh măt Yêsu Krist, wă tơbăt kơ nhôn Sư Kră Yang 'Bok Kei-Dei mơsêh tơpă.

II Kor 4:9

Đe pơm kơnê̆ pơmat nhôn, mă-lei 'Bok Kei-Dei ưh kơ lê̆ nhôn; đe teh tơpơ̆k nhôn, nhôn kư̆m huay kơ răm.

Tơdrông Tơ'bôh 21:23

Pơlei noh ưh kơ kăl kơ măt 'năr dah khei pơchrang hơdah ăn ôh, yua kơ tơdrong mơsêh 'Bok Kei-Dei hăm Kon Triu pơchrang ăn hơdah boih.

Tơdrông Tơ'bôh 22:5

Măng klăm ưh pă đei boih păng lu sư ưh kơ kăl kơ măt 'năr dah ŭnh kiơ pơchrang hơdah kơ lu sư dơ̆ng ôh yua kơ akâu 'Bok Kei-Dei oei tơ noh pơchrang ăn kơ lu sư. Lu sư gô pơgơ̆r ling-lang khŏm khŏm tơ noh.