Mi 7:3 - Sơ̆p Hlabơar Nơ̆r 'Bok Kei-Dei

³ Ti lu sư hrăn nŏng kơ pơm kơnê̆. Yŏng pơgơ̆r chă apinh mŭk tơmam, 'bok sek tơlang kư̆m hrăn chă sa pơgâm, gah bơngai pran kơtang 'maih pơm kơnê̆ kiơ̆ kơ jơhngơ̆m kơdih; thoi noh na lu sư pơđâu hơdai.

Mi 7:3 交叉參考

Tơdrông Pơđơk 16:30

Lu bơngai gơ'mreh măt băt wă chă hơlĕnh, Bơngai bu kăp mơ̆m pơŏm hơkŭng noh pơm kơnê̆ boih.

Tơdrông Pơđơk 17:23

Bơngai kơnê̆ iŏk sa pơgâm. Wă pơlơ̆m tơdrong tơpăt.

Êsai 1:23

Lu yŏng pơgơ̆r iĕm tă kơ blơ̆ blĕch ngăl, pơm buăl hăm lu bơngai tơtông, rim 'nu lu sư tă kơ 'maih chă pơgâm sa tơmam, 'maih druh kiơ̆ mŭk tơmam đe ăn, ưh kơ dŏng tơgŭm lu bơngai mơti, pă 'maih lăng dŏng tơgŭm lu drŏ-kăn adro.

Êsai 26:21

Lăng to, Kră Yang lĕch đơ̆ng anih Sư jur wă phak kon bơngai oei kơpal teh âu, yua kơ tơdrong yoch lu sư. Kơplah noh kơnh teh gô pơdah tơ'bôh pham đêl lu đe pơlôch păng ưh kơ gơh ôn dơ̆ng lu bơngai đêl đe pơlôch.

Êsai 3:5

Kon pơlei pơjuă pơđep băl tơduă, rim 'nu tơblah băl, tơduă rông 'bôt tơblah băl, lu hơ'lơ̆p pơrăm lu kră. Lu bơngai răm-'băm pơm plơ̆ kơ lu bơngai mă đe ư-ang.

Êsai 32:7

Lu bơngai hơlĕnh pơdăr yua tơdrong kơnê̆; pơđâu pơm tơdrong kơnê̆, wă pơrăm lu bơngai dơnuh hăm nơ̆r pơma hơlĕnh Mă khan lu bơngai dơnuh hoh roi khan trŏ.

Êsai 5:23

Lu sư achăng lê̆ lu bơngai pơm kơnê̆ yua kơ đei iŏk pơgâm sa tơmam đe răt, sơngah ưh kơ pơm tơdrong 'lơ̆ng tơpăt kơ bơngai ưh kơ đei yoch.

Je 3:5

Ih oei hil mĭl ling-lang hă? Ih oei blĕk khŏm khŏm hă?’ 'Nâu, mă iĕm pơma, mă-lei iĕm pơm boih tơdrong kơnê̆ kiơ̆ thoi iĕm wă.”

Je 4:22

“Tơpă kon pơlei Inh bơlŭk, lu sư ưh kơ băt kơ Inh. Lu sư oei 'lơ̆p nge kơhlôh, lu sư ưh kơ wao, lu sư nŏng kơ pơm kơnê̆, mă ưh kơ băt pơm minh tơdrong 'lơ̆ng.

Je 8:10

Thoi noh Inh gô ăn kơ đe nai iŏk akăn lu sư, chŭn mir lu sư kư̆m ăn kơ đe nai jang. Iŏk đơ̆ng lu bơngai pơm iĕ truh tơ lu bơngai pơm tih, tă kơ chă lơi kơdih ngăl. Đơ̆ng lu 'bok khan lê̆ adrol truh tơ lu 'bok soi, rim 'nu kơ lu sư tă kơ sa pơgâm ngăl.

Êsêkiên 22:12

Lăm ih đei bơngai iŏk sa pơgâm wă pơm tơdrong đei tuh pham, ăn đe tŏk iŏk đei iŏk lơi adrol păng iŏk jên kon lơ dêh; ih pơjuă sa lu bơngai jê̆ ih păng ih hiơt kơ Inh, Kră Yang khan thoi noh.

Êsêkiên 22:27

Lu yŏng pơgơ̆r oei lăm lu sư nhen thoi kŏ-so kăp sa sem bri, pơm tuh pham pơlôch bơngai, wă tơgar iŏk tơmam.

Êsêkiên 22:6

To, lu yŏng Pơgơ̆r Isơrael oei lăm ih, rim 'nu yua tơdrong pran kơtang kơdih pơm tuh pham pơlôch đe.

Êsêkiên 34:21

Lu iĕm yua kơiĕng păng hơngiĕng na tŭn, iŏk hơke tơ̆m lu triu tơrăn dĭng mah lu sư jing tơklah tơklang.

Êsêkiên 9:9

Kră Yang tơl inh: “Tơdrong yoch lăm adrĕch Isơrael păng Juđa tih dêh tơpă; teh 'bĕnh kơ pham pơlôch băl, lăm pơlei 'bĕnh kơ tơdrong kơnê̆ pơrăm băl. Lu sư khan: ‘Kră Yang achăng lê̆ boih teh âu, Kră Yang ưh kơ 'bôh.’

Hôsia 4:18

Wă sik lu sư đĭ boih, lu sư oei pơm pơyô kư̆ kă; lu kră pơgơ̆r lu sư lăp đon pơm tơdrong mơlâu.

Hôsia 7:3

Lu sư pơm tơdrong yoch wă pơhiôk kơ pơtao, păng yua tơdrong hơlĕnh lu sư pơhiôk lu kră pơgơ̆r.

Am 5:12

Yua kơ inh băt boih kơ tơdrong yoch lu iĕm lơ pă băt dang yơ, tơdrong yoch iĕm tih dêh, lu iĕm pơmat lu bơngai tơpăt, iŏk sa pơgâm, tơ anih 'măng jang pơlei lu iĕm sơngah kơ tơdrong trŏ tơpăt lu bơngai dơnuh hin lăm năr sek tơlang.

Mi 2:8

Mă-lei 'nao brei mơsơ̆ lu kon pơlei Inh blah plơ̆ thoi ayăt, lu bơngai mă yak rok trong 'nâu hiôk-hian, ưh kơ wă tơblah ôh, lu iĕm athei plôh iŏk ao tai 'nguaih đơ̆ng lu sư, lê̆ lăi kơ lu sư ao lăm đĕch.

Mi 3:11

Lu bơngai sek tơlang sek pơgâm, lu 'bok soi bơtho tơ'bôh yua kơ jên đe apah, bê̆ gah lu bơngai khan lê̆ adrol pơma tơ'bôh kư̆m yua kơ jên. Mă-lei lu sư pơm gơnang kơ Kră Yang na khan: Kră Yang ưh kơ oei lăm lu bơ̆n hă? Tơdrong răm huay kơ truh tơ lu bơ̆n ôh!

Mi 3:2

Ơ lu areh kơ tơdrong 'lơ̆ng wă kơ tơdrong kơnê̆, lu iĕm lŏng akar lu kon pơlei Inh, hleh sĕch đơ̆ng kơting lu sư.

Mathiơ 26:15

Sư khan: “Dah inh đei rôp ăn kơ iĕm Yêsu, iĕm apah inh dôm yơ?” Na đe noh jô̆ ăn kơ sư jên, pêng-jĭt hlak jên hu so sơ̆.

I Kor 4:5

Thoi noh mă bu bu bơngai thoi yơ bơ̆n 'nĕ chă sek pơma tơdrong sư, gô mơ̆ng kơ Kră Yang jur đĕch, Sư gô tơbăt hơdah ăn tôm tơdrong kon bơngai mă oei ôn pơhrĕp păng tôm tơdrong kon bơngai tơchĕng wă. Hơtai ei kơnh đĭ-đăng rim 'nu kơ bơ̆n mă pơm kiơ̆ kơ Sư wă gô đei nơ̆r Kră Yang bơnê.