32 Noh jing teh jang mă Môis asong ăn teh lăm thŭng dơnă Môap, gah tơklă kơ đak Krong Jôrđăn, pah hơlĕch pơlei Jêrikô.
Minh puăt char Gileat, pơlei Astarôt, pơlei Êdrei, ('bar tŏ pơlei noh lăm char Ok lăm tơring Basan), pơlei âu đei asong ăn kơ kon sâu Makir, kon drŏ-nglo Manase, wă khan minh puăt lu kon drŏ-nglo Makir kiơ̆ kơ adrĕch adrung lu sư.
Mă-lei Môis ưh kơ đei asong ăn teh jang kơ lu adrĕch Lêwi, yua kơ Kră Yang 'Bok Kei-Dei Isơrael boih jing teh lu sư jang sa kiơ̆ thoi Kră Yang đei pơkă hăm lu sư.
Yua kơ Môis đei asong ăn boih teh jang sa kơ 'bar adrĕch, minh puăt tơ hơlĕch gah kơ đak Krong Jôrđăn, mă-lei sư ưh kơ đei klah asong ăn ôh teh jang sa kơ adrĕch bơngai Lêwi.
