II Tim 2:22 - Sơ̆p Hlabơar Nơ̆r 'Bok Kei-Dei

²² Pơtih gia bơngai tơdăm sư ling-lang nŏng tơchĕng gah tơdrong akâu sư kơdih, ưh kơ wă tơchĕng tơdrong Kră Yang. Mă ih 'nĕ kơ tơchĕng thoi bơngai 'noh hŏ. Ih athei adrin pơm tơdrong 'lơ̆ng tơpăt, lui mă kơjăp, băt 'mêm mơnat kơ đe păng oei hiôk hơiă hơdai lu bơngai mă đei đon 'lơ̆ng tơpăt, wă khan lu bơngai mă krao khan kơ 'Bok Kei-Dei kơjăp.

II Tim 2:22 交叉參考

Horiso 119:9

Bơngai oei hơmuh hơmŏng pơm liơ wă kơ trong sư 'lơ̆ng rơgoh? Athei arih pơm kiơ̆ nơ̆r Kră Yang.

Horiso 17:1

Ơ Kră Yang! Apinh Ih mơ̆ng tơdrong tơpăt, Mơ̆ng pơnhen nơ̆r inh krao chă; Apinh pơgling đon Ih mơ̆ng nơ̆r inh krao khan. Đơ̆ng 'bơ̆r ưh kơ hơlĕnh.

Tơdrông Pơđơk 15:8

Tơmam soi lu bơngai kơnê̆ pơm 'mê̆ krưp kơ Kră Yang; Mă-lei đei nơ̆r krao khan đơ̆ng lu bơngai tơpăt Kră Yang lăp đon.

Tơdrông Pơđơk 6:5

Pơklaih bĕ ih kơdih thoi kơtŏng klaih đơ̆ng ti lu bơngai lua. Thoi sem klaih đơ̆ng hơđong đe hơ'năk.

Tơdrông Pơđơk 7:8

Sư năm rok trong drong weh tơ hnam drŏ-kăn đi. Sư yak tơklă wă mơ̆t tơ hnam drŏ-kăn đi.

Lêwi 15:18

Tơdah bơngai drŏ-nglo ngôi hăm minh 'nu drŏ-kăn na lĕch đak kơtăk, 'bar 'nu măr sư athei hum lăm đak păng gô jing kơnê̆ 'mê̆-'mach truh kơmăng.

Jang 7:59

Klaih kơ noh lu sư klơ̆m Êtien păng tơmo, wă kơ Êtien lôch. Lăp đơ̆ng ei, Êtien sư krao khan thoi âu: “Ơ Kră Yang Yêsu, apinh Ih iŏk bơhngol inh.”

Jang 9:14

Lu 'bok soi tih kư̆m ăn kơ sư gơh rôp lu bơngai lui kơ Ih oei tơ âu.”

Rom 14:17

Na bơ̆n bơngai mă 'Bok Kei-Dei pơgơ̆r boih, mah kăl kiơ kơ sa 'nhĕm 'nhot thoi noh, mah 'nhĕng kiơ kơ đe sa et tơdrong 'noh. Tơdrong bơ̆n pơm 'lơ̆ng kơ 'Bok Kei-Dei, tơdrong bơ̆n pơm 'lơ̆ng kơ bôl buăl, tơdrong bơ̆n chơt ngă 'nă hal yua kơ đei Yang Bơhngol 'Lơ̆ng, tơdrong noh bơ̆n kăl.

Rom 14:19

Yua kơ thoi noh na bơ̆n athei adrin 'biơ̆ tơdrong pơm hiôk kơ bôl buăl hăm 'nhŏng oh bơ̆n kơdih, rai băt tơgŭm băl lui kơjăp.

I Kor 1:10

Ơ 'nhŏng oh, inh wă bơtho iĕm thoi âu: Đĭ-đăng kơ bơ̆n minh khŭl lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm 'bơ̆r đon mă hơnơ̆ng wă kơ bơ̆n huay kơ tơklah băl.

I Kor 1:2

chih hơpong kơ lu 'nhŏng oh bơngai lui tơ pơlei iĕm Kôrintô. 'Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ-đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ-đăng kơ bơ̆n.

I Kor 10:14

Yua kơ thoi noh na ơ lu 'nhŏng oh mă inh 'mêm kơeng, iĕm athei tŭk lê̆ đĭ dôm tơdrong yang kơnê̆ hŏ, 'nĕ pă kiơ̆ sư.

I Kor 14:1

Na bơ̆n ling-lang athei băt 'mêm kơ 'Bok Kei-Dei hăm bôl buăl bơ̆n păng bơ̆n athei apinh Yang Bơhngol 'Lơ̆ng asong kơ bơ̆n tơdrong hơgei Sư, mă loi gơh pơtruh nơ̆r 'Bok Kei-Dei.

I Kor 6:18

Thoi noh iĕm athei weh bĕ đơ̆ng tơdrong ngôi pơyô kư̆ kă. Tơdrong ngôi pơyô kư̆ kă jing pơrăm akâu kơdih. Dôm tơdrong yoch nai ưh kơ pơrăm akâu kơdih dang tơdrong yoch noh ôh.

I Tim 1:14

Kră Yang bơ̆n Yêsu Krist 'mêm mơnat kơ inh tơpă ăn kơ inh lui kơ Sư păng ăn kơ inh 'mêm kơ Sư hăm đĭ-đăng bơngai. Sư kư̆m ăn kơ đĭ-đăng bơngai lui lei-lăi mơ̆n.

I Tim 1:5

Inh athei ih khă lu sư thoi noh wă kơ lu sư đei đon 'lơ̆ng tơpăt, hăm lui mă trŏ, thoi noh na sư gơh 'mêm kơ 'Bok Kei-Dei hăm bôl buăl tơ ala teh âu mơ̆n.

I Tim 2:8

Tơ rim anih akŭm tơduă iĕm, inh wă kơ lu drŏ-nglo krao khan kơ 'Bok Kei-Dei, lu bơngai drŏ-nglo bu mă đei jơhngơ̆m 'lơ̆ng tơpăt ưh kơ hil kơ đe.

I Tim 4:12

Ih 'nĕ ăn kơ đe pơjăm ih khan ih oei moh đĕch ưh kơ gơh bơtho đe. Lăm ih wă pơma dah ih wă jang ih athei pơm 'lơ̆ng tơpăt wă kơ lu bôl buăl bơngai lui 'bôh ih na lu sư pơm kiơ̆ thoi ih. Ih athei 'mêm kơ 'Bok Kei-Dei păng 'mêm kơ bôl buăl. Ih athei lui mă kơjăp păng pơm jơhngơ̆m mă 'lơ̆ng tơpăt, wă kơ lu bơngai lui gơh lui kiơ̆ thoi ih mơ̆n.

I Tim 6:11

Ơ Timôthê, ih bơngai kiơ̆ 'Bok Kei-Dei, ih athei weh ataih đơ̆ng tơdrong kơnê̆ 'noh, ih adrin pơm đon 'lơ̆ng tơpăt, lui mă kơjăp, 'mêm kơ 'Bok Kei-Dei păng pơm jơhngơ̆m dim 'mêm kơ bôl buăl mơ̆n. Đei tơdrong gleh truh tơ ih ră, mă-lei ih athei adrin pơm kiơ̆ 'Bok Kei-Dei khŏm khŏm.

Hêbrơ 12:14

Bơ̆n athei adrin pơm jơhngơ̆m đon dim hiôk hơiă kơ đĭ-đăng bơngai. Păng athei adrin pơm 'lơ̆ng tơpăt ling-lang. Tơ̆ng ưh, bơ̆n ưh kơ gơh 'bôh Kră Yang ôh.

I Pet 2:11

Ơ lu 'nhŏng oh mă inh 'mêm kơeng, bơ̆n bơngai lui oei tơ ala teh âu dang ei, lu bơ̆n thoi bơngai tơmoi đĕch; teh đak âu teh đak đe, ưh kơ trŏ kơ teh đak bơ̆n ôh. Thoi noh na inh apinh iĕm pơgơ̆t bĕ dôm tơdrong iĕm pơm ưh kơ lăp kơ măt lăng, jơhngơ̆m iĕm oei 'maih pơm, 'maih pơtuah akâu kơdih kuă ăn kiơ̆ tơdrong 'Bok Kei-Dei.

I Pet 3:11

'nĕ pă pơm dôm tơdrong kơnê̆, athei pơm tơdrong 'lơ̆ng ling-lang đĕch, adrin pơhiôk dih băl mă hơiă.

III Yo 1:11

Ơ oh, ih 'nĕ kơ pơm rok lu bơngai mă pơm kơnê̆ thoi noh hŏ, ih pơm rok lu bơngai pơm 'lơ̆ng đĕch. Bơngai bu pơm 'lơ̆ng, bơngai 'noh lĕch đơ̆ng 'Bok Kei-Dei. Bơngai bu pơm kơnê̆, bơngai 'noh ưh kơ lĕch đơ̆ng 'Bok Kei-Dei ôh.