Esơra 5:2 - Sơ̆p Hlabơar Nơ̆r 'Bok Kei-Dei

² Đei Serubabel, kon drŏ-nglo Sêathiel păng Jêsua kon tơdăm Jôsađăk, bre sư iung, tơgŭm pơtơm pơjing hnam akŭm kơkuh kơ Kră Yang 'Bok Kei-Dei tơ pơlei Jêrusalem păng đei lu 'bok khan lê̆ adrol Kră Yang 'Bok Kei-Dei wang tơgŭm.

Esơra 5:2 交叉參考

Esơra 3:2

Kơplah noh, Jêsua, kon drŏ-nglo Jôsađăk păng lu 'bok soi hăm Serubabel, kon drŏ-nglo Sêathiel păng lu 'nhŏng oh sư, đĭ-đăng wang iung pơdơ̆ng chơnang soi Kră Yang 'Bok Kei-Dei đe Isơrael, wă pơyơ̆r tơmam soi 'buh tơ noh, kiơ̆ kơ đei chih lăm hla bơar khôi juăt Môis, bơngai Kră Yang 'Bok Kei-Dei.

Esơra 6:14

Thoi noh, lu đe kră pơgơ̆r kon pơlei Juđa pơtơm pơjing ming dơ̆ng hnam akŭm, tơdrong jang pŭn hiôk tơpă, 'blep trŏ thoi nơ̆r Hagai păng Sachari khan lê̆ adrol, kon drŏ-nglo Iđô. Thoi noh lu sư pơm keh hnam akŭm kiơ̆ kơ nơ̆r tơtă đơ̆ng Kră Yang 'Bok Kei-Dei lu đe Isơrael păng kư̆m kiơ̆ kơ nơ̆r tơjur đơ̆ng Sirus, Đarius păng Artaserses pơtao dêh char Phersia.

II Kor 1:24

Mă-lei ưh kơ sĭ nhôn wă pơgŏ pơđep tơdrong lui iĕm ôh. Kơlih kơ nhôn 'bôh iĕm lui kơjăp, na nhôn wă jang hơdai iĕm, wă kơ iĕm chơt.

Sa 6:11

Iŏk jên dah maih đơ̆ng sư, pơm bĕ minh tŏ môk pơtao na pơyơ̆l ăn bĕ tơ kơ̆l Jôsua 'bok soi tơm kon dăm Jêhôsađak.

Esơra 10:18

Păng 'nâu lu anăn lăm 'bok soi kư̆m đei chă akăn lu bơngai tơmoi, lăm lu kon sâu Jêsua, kon drŏ-nglo Jôsađac păng 'nhŏng oh sư: Maasêya, Êliêser, Jarip păng Gêđalia.

Hagai 2:18

Dang ei tơchĕng bĕ; đơ̆ng năr 'nâu tơ adrol ki, wă khan iŏk đơ̆ng năr 'bar-jĭt puăn khei tơsĭn đơ̆ng năr man pơjing hơnă hnam akŭm 'Bok Kei-Dei, tơchĕng bĕ kơ tơdrong noh;

Esơra 1:8

Sirus, pơtao Phersia, athei Mitrêdat, bơngai wei tơmam, iŏk lu tơmam yua lăm hnam akŭm tơlĕch đĭ tơ 'nguaih, jô̆ păng pơjao kơ Sêsbasar kuan tih lăm dêh Juđa.

Esơra 3:8

Sơnăm mă 'bar khei 'bar, đơ̆ng rŏng lu sư brŏk tơ hnam akŭm Kră Yang 'Bok Kei-Dei tơ pơlei Jêrusalem, Serubabel, kon drŏ-nglo Sêathiel păng Jêsua kon drŏ-nglo Jôsađăk, lu 'nhŏng oh, lu 'bok soi păng bơngai Lêwi, hăm đĭ-đăng lu bơngai mă đe rôp pơm bơnă 'nao wih brŏk tơ pơlei Jêrusalem, đĭ-đăng wang pơtơm pơm pơjing hnam akŭm; Lu sư ăn bơngai Lêwi đơ̆ng 'bar-jĭt sơnăm năm tơ kơpal, wă kơ wei-lăng tơdrong jang pơm pơjing hnam akŭm Kră Yang.

Sa 4:4

Inh apinh linh jang mă oei pơma hăm inh thoi âu: “Ơ yŏng inh, dôm tơdrong âu wă khan kiơ?”

Sa 4:14

Sư khan thoi âu: “Noh wă khan đei 'bar 'nu chu tuh đak rơmă, dơ̆ng cheng 'bơ̆t Kră Yang mă Yang kơ đĭ-đăng teh đak.”

Sa 8:9

Kră Yang Tih Hloh khan thoi âu: “Ơ lu iĕm jơ̆ bơngai mă kơtơ̆ng năr 'nâu, kơtơ̆ng dôm lu nơ̆r noh đơ̆ng lu bơngai khan lê̆ adrol lăm năr mă hnam akŭm Kră Yang Tih Hloh đei pơdơ̆ng pơjing boih, na lu iĕm pơm bĕ kơ ti lu iĕm jing pran.