9 आन्कान्काआ चिन्तुम्च़म्काओ अ़नुछ्याओ तायादा युङ्युङ्ओ खोन्कि नि म़नाचिछाङ ओ ताया प़चिकि राक प़मा काऱ लिमादोत। ओ ताया आन्कान्काआ चिन्निओवात्नि लिमादोत। खोन्किना ओसोओ देङ्सा काच़चिओ अ़चुफिमाछाङ खाङ्मेत्मा काऱ लिमादोत।
देकिनालो खोसाआ साम्कालिन्दाओ य़ङ मोचि खाएत्याङ्सा, “खानानिन्आ त़हुङुम्योम्ओ येसुङा ख्रिस्तओ”नि लोयाङ्सा सावाएनान झारा म़नाचिओ अ़चुबुदा यहुदिचिओ अ़चुदो ह़सुप़चि।
मेन झारासा निनाम्हाङ्य़ङ खाम़लुयाङ्हिदा अ़क्छा साकोङ्छ़ङ मान्मुकादा माङ्लो बुङ्खायाओ म़ना मोदा तानालो मोन्ग़रि खोसाआ एनुकि हेवामि कान्नान्चिन खोन्कि एनुओ य़ङ्चिआ खो छ़ङ्छेन्नान्चिन।
झारा य़ङ्चि चिन्ताखानुम्च़म। खाक्को य़ङ अ़नुवाक मुयाङ, मो य़ङ लावायुङ्सानुम।
खोन्ओसा ब़ब़, नाना खोन्कि निछाचि ओ, आम्नुओ साकोङ्छ़ङ्दा ओह्यात्नि-मोह्यात्नि मान्लिमाङ युङानिन, खोन्कि आन्कान्का लोनिओ य़ङ्दा माङ्लो आन्काओ छाप्लावादाङ्का खानानिन्आ दियाको ताया त़तोक्तुम्युङ्सुम, मो लावायुङ्सानुम।
ताङ्लान कामुचिओ निम्पाङ, दुवाछा-दुवाछा अ़त्लोकाच़चिओ निम्पाङ, हारुक काइन्चिओ निम्पाङ, म़ना काम़प्चिओ निम्पाङ, सोज्जे सालुम्स़ङ काप़चि खोन्कि अ़छ़ङ चिन्माय़ङ्ओ अ़देङ्सालाप्पादा दियाकोछाङ काचि कामुचिओ निम्पाङ मुवा ओ।
ओ य़ङ अ़छ़ङ खोन्कि लोक्माखान्तुओ मुयाङ, हेवामिचि लेइसि येसु ख्रिस्त हेन्खामादा म़ता। खोन्कि मो हेवामिचिदाङ्का अ़ङ्का मुलो ओ।
साकोङ्छ़ङ खोन्कि अ़नुवाक छेन्खाताया मान्लेत्दो। खा-खाक्को म़नाचिआ छेन्खाताया ऩङाअ़छिराकि अ़चुसाकोङ्छ़ङ अ़लुक्तायुङ्सा।
ओ य़ङ सोम्कुवा मुमा खान्तुओ मुयाङ खोन्कि झारासा लोक्माकि साकोङ्छ़ङ मुमादोत।
साङ्आ सोज्जेओ य़ङ्चि चिन्तुचि खोन्कि आन्हाङ्पा येसु ख्रिस्तओ अ़छ़ङ य़ङ्चि खोन्कि साम्योक्मिवात्निओ चिन्माय़ङ्एनान अ़तोङ्निन्नालो,
ख्रिस्त येसुएदा याक्याङ्ओ साकोङ्छ़ङ खोन्कि सोम्तुक्मादा अ़ङ्का चिन्नाओ अ़नुछ्याओ य़ङ्चि खाना त़ङ्मा अ़मात्ऩङ्ओ निम्पाङ रात्तुयुङ्सु।
ब़द्धेकापाङ सालुम्स़ङ्चिओ अ़चुबुदा खाना अ़ङ्काएदाङ्का त़एनुओ य़ङ, निचिछाङ चिन्मा काऱ सोम्कुवा त़मुचिओ म़नाचि चिन्तुचि।
खोन्कि सिम्नान्चिन्सा अ़चुमिन्मालामाकिना फित्चि कामुचि यायोक काप़ लिमादोत। मोवात्नि निनाम्हाङ्आ मोचि अ़छ़ङ तुप्मा मिन्मा म़प़चि हे।
मेन आम्तुक्वादा, त़चिन्तान्चिन्ओ खोन्कि नुलोक साकोङ्छ़ङ त़मुओ य़ङ्चि मुयुङ्सुचि। मो साङ्एदाङ्का त़चिन्तान्चिन्ओ, मो खाना आप्पि त़सिन्तुङु।
देकिनालो ग़रि तायाङ, मोन ग़रि मोचिआ अ़नुवाक चिन्माय़ङ ऩआङ्तुन, मेन मोचिआ अ़चुऩङानुओ चिन्माय़ङ ओन्ङा एन्मा म़लाम खोन्कि मोचिआ आप्पि अ़चुऩङानुओ य़ङ खाकाएत ब़द्धे काचिन्पाचि म़कोउचि।
मोचिओ अ़चुदोदा मान्ह़माङ अ़नुनिन। देकिनालो मोचिआ ना चिन्माङा अ़नुनिन्ओ य़ङ्चि म़चिन्तुचिकि झारा खिम्लुम्पादा अ़चुताकावा च़मा अ़बान्खान्याङ। अ़धुन फेक्वा दुप्मा ओन्ङा मोचि ओवात्नि म़च़याङ्ओ।
मेन खाना ओन अ़नुछ्याओ तायादा म़याक्याङ्ओ य़ङ्चि चिन्याङ्सा मुचि।
सोमातुक्नाङ्नानिन्ओ यावाचि ओ, आन्कान झारासोओ लेन्माओ अ़तुक्वादा छाप्मा अ़न्नुनु लामाङ्युङ्सा। मेन हान मोसोओ अ़फान्दा, निनाम्हाङ्आ अ़चुओ म़नाचि अ़धुन्ओ निकिना म़प़चिओ साकोङ्छ़ङ रात्माओ निम्पाङ चात्लो काचि मुमाओ राक प़मा छाप्लावा छाप्मादोत्नि मिनाङ।
मेन खानानिन्एदा याक्याङ्ओ चिन्माय़ङ अ़ङ्का मान्बान्युक्ङाओन खानानिन नुलोक क़क्तायुङ्सानुम।
अ़ङ्का च़क्नि ताङाङा। खानानिन्एदा याक्याङ्ओ आम्नुओ साकोङ्छ़ङ नुलोक क़क्तायुङ्सानुम, खोन्ओसा खानानिन त़छोसिन्ओ आम्नुओ सिरिफा साङ्आछाङ अ़खात्तुन।
खोन्ओसा खानानिन दियाको चिन्माय़ङ त़तोक्तुम खोन्कि त़एनुम, मो मान्लेत्दानुम खोन्कि हेवाचिदाङ्का लासानिन। खानानिन त़थिन्तिमिन्नालो अ़ङ्का काख़पावा ताङा, खोन्कि खाउग़रि ताङा ओ, मोछाङ खानानिन त़सिन्तिमिन।
