5 खोन्किना निनाम्हाङ काफाआ धुपा पाक्खा क़क्तुकि ब़क्खादाओ मिआ मो भेम्सु, खोन्कि हेन्खामादा वेत्तुखाइसु। खोन्किना कुलुङ्धिप्पाचि मुक्तुङुचि, अ़मुक्माचि म़ऱङाङा, नाम्चिम्पिलेक्ओ अ़साम्चि म़लोन्ताङा खोन्कि लुत्लि खारा।
देकिनालो रावाओ अ़देङ्सालाप्पादा रावा खोन्कि हेन्कोप्ओ अ़देङ्सालाप्पादा हेन्कोप पुक्लोन। खोन्कि खादा-खादा स़ङ्साक्वाचि म़लु खोन्कि झारादात्नि लुत्लिचि म़खात।
अ़ङ्का हेन्खामादा मि पाक्सि ताङ्ओ, मेन मो ना बुयाङा लोक्तायुङ्साओ दे नुवाओ!
खोन्कि म़प्च़क़क्दा अ़धिवा लुत्लि खाराकिना छेक्खाखिम्ओ अ़छ़ङ्चि म़ङाङ्सा। मोन्ग़रिङा झारा लाप्तिखोप्चि म़होरा, खोन्कि झारा म़छेक्ताङाओ म़नाचिओ अ़चुछुम्खाचि म़फोङ्साखारा।
याम़माराचिआकिना मोचि म़कोवान्चिन्ओदा ङाङ्सा, खोन्कि मोचि झारा सेङ्लावाआ भेप्तुचिकि मोचिआ निनाम्हाङ्ओ अ़चुय़ङ राक्एनान खाअ़लुसा।
मोन्ग़रिङा अ़धिवाङ लुत्लि खारा, खोन्कि सहराओ दस्कालोक्ओ अ़क लोक लुक्ता, खोन्कि लुत्लिदा सात्हजारा म़नाचि म़सुवा। म़हेनाओ म़नाचिओ अ़चुक़माकाराकि निनाम्मादुओ निनाम्हाङ अ़लोङ्सा।
खोन्किना निनाम्मादु निनाम्हाङ्ओ अ़चुब़क्खाखिम होरा, खोन्कि खोक्कोसोओ अ़चुब़क्खाखिम्दा खोक्कोसोओ हिप्माय़ङ सन्दुका दारा। खोन्कि मोदा नाम्चिम्पिलेक्ओ अ़साम्चि म़लेराङा खोन्कि कुलुङ्धिप्पाओ अ़मुक्माचि म़ऱङाङा। लुत्लि खारा खोन्कि अ़धिवा-अ़धिवा नाङ धा।
मो हाङ्युङ्खादाङ्का नाम्चिम्पिलेक्ओ अ़साम्चि म़लेराङा, खोन्कि कुलुङ्धिप्पाओ अ़मुक्माचि म़ऱङाङा। मो हाङ्युङ्खाओ अ़बुदा मिओ सात्कातात कुपिचि म़लेराङा। मोचि निनाम्हाङ्ओ सात्कातात अ़चुलावाचि ओ।
खाउग़रि खोसाआ छकातात्ओ सेप्खा फोङ्सु, मोन्ग़रि अ़ङ्का अ़धिवा लुत्लि खाराओ खाङ। नाम माक्ताङाओ फुसुवारुक्रुक्ओ तित्वा लिसा, खोन्कि लादिप्मा झारा हालापाक्पाक्ओ ह़वा लिसा।
खोन्किना नितात निनाम्हाङ काफा हाराक्वाओ नाम्नुओ सुङ पाक्खा क़क्तुकि ता, खोन्कि खो हाङ्युङ्खाओ अ़बुदा हाराक्वाओ ब़क्खाओ अ़च़क्दा एवा। झारा निनाम्हाङ काब़क म़नाचिओ अ़चुयामात्माएनान खो ब़द्धे धुपा पाक्मा पुवा।
