41 चाकावालावाचिछाङ “खानानिन निनाम्हाङ्ओ अ़छा त़युङिन्येन!”निकिना पात्याङ्सा ब़द्धेकापाङ्दाङ्का म़लोन्ता। मेन येसुआ मो चाकावालावाचि म़रेन्तुचिकि चेप्मा मान्प़म़दोचि। देकिनालो खोक्को ख्रिस्त म़युङ्याङ निकिना मो चाकावालावाचिआ अ़सिन्ताङा।
मेन येसु वाइवेत म़युङा। मुलो काब़क्पाआ खोक्को लो, “अ़ह़ङ निनाम्हाङ्ओ अ़चुऩङ्दा खाना लोना, आन्कान्का लोनि, दि खाना निनाम्हाङ्ओ अ़चुछा ख्रिस्त ओ?”
खोन्कि काधान्आ खोक्कोएदा ताकिना लो, “खानानिन निनाम्हाङ्ओ अ़चुछाङा त़युङिन्येन्नालो ओ लुङ्चि पेम्पाक म़लिनेनि लोवानुम्च़म।”
खोन्किना मो अ़नाम्प़क, म़नाचिआ येसुएदा ब़द्धेकापाङ चाकावालावाआ लाउचिओ म़नाचि म़तारुचि। खोन्कि येसुआ अ़चुलोमाय़ङ्लाम्पा चाकावालावाचि म़लोइसुखाइसुचि, खोन्कि झारा कातुक्चि म़नुसुचि।
मोचि ओवात्नि पाराचि, “निनाम्हाङ्ओ अ़चुछा, खानानिन्आ आन्काच्याएदा दि त़लामुम्योम? आन्चुवाओ ग़रि मान्तालामाङ खानानिन्आ आन्काच्या ओदा दुखा प़सि त़तान ओ?”
खोन्कि येसुआ मो अ़लोवा, “एनु खो, साङ्छाङ खामान्एत्दोचि! मेन खारा, खोन्कि आप्पि काब़क्पाएदा खाङ्मुसान्चिन, खोन्कि निनाम्हाङ्य़ङ खाकालु मोसाआ लोमाय़ङ्ओ छुक्दाम पाउ, खोन्कि म़नाचिओ निम्पाङ सालुम्स़ङ लिने।”
मेन येसुआ मो चाकावालावा रेन्याङ्सा अ़लोवा, “वाइवेत युङा, खोन्कि ओ म़नादाङ्का लोन्ताखारा!”
मो अ़नाम्प़क, नाम लुन्ताखाराकिना म़नाचिआ झारा कातुक्चि खोन्कि चाकावालावाआ लाउचिओचि येसुएदा म़तारुचि।
खोन्किना येसुआ ब़द्धेकाखालाओ सारिमाचिआ म़लाउचिओचि झारा कातुक्चि म़नुसुचि, खोन्कि ब़द्धे चाकावालावाचि म़लोइसुखाइसुचि। मेन येसु साङ ओ निकिना मो चाकावालावाचिआ अ़सिन्ताङाओसा खोक्कोसाआ मोचि चेप्मा मान्प़म़दोचि।
पोप्ताओ लावाचिआ म़लाउचिओ म़नाचिआ येसु अ़खाओ ग़रि खोक्कोसोओ अ़चुबुदा मोचि बोम्नान्चिन्सा म़पाराङा, “खानानिन निनाम्हाङ्ओ अ़चुछा ओ।”
येसु मोसोओ अ़च़क्दा म़एवाकि माङ्धिन अ़रेन्ता खोन्कि मो माङ्धिन्आ लेरु, खोन्किना च़क्नि मो पुवालोन्ताकि खोचि ब़रुचि।
मेन ओ य़ङ्चि म़छाप्तायुङ्सा खोन्ओसा खानानिन्आ येसु निनाम्हाङ्ओ अ़चुछा ख्रिस्तओ निकिना साकोङ्छ़ङ मुवानिन, खोन्कि साकोङ्छ़ङ्लाम्पा खोक्कोसोओ अ़चुपाङ्दा खानानिन ह़ङ्म़ङ तोक्तानुम।
खानानिन अ़क्तात निनाम्हाङ म़युङ्याङ निकिना साकोङ्छ़ङ त़मुन। मो अ़नुवाक ओ! चाकावालावाचिछाङ साकोङ्छ़ङ म़मु, खोन्कि अ़चुक़माआ सिन्लुक्लुक्वा धुन्तुचि।
