1 सोमातुक्नाङ्नानिन्ओ अ़ङ्यावाचि ओ, अ़ङ्का आम्नुओ निम्पाङ ओ ह्वातात्ओतात छाप्लावा छाप्तुङ्युङ्सुङ। ओ ह्वातात्माङ छाप्लावादा अ़ङ्का मो य़ङ्चि मित्मेत्याङ्सा खानानिन नुलोक मिन्मा राक प़नायुङ्नानिन।
सेङ्याङ्ओ अ़चुसाकोङ्वा याक्याङ्ओचि आसिखा कातोक्चि ओ, देकिनालो मोचिआ निनाम्हाङ अ़खाङ।
ह्वादुओदु आम्नुओ रादा युङाङ्याङ्हिदा अ़ङ्का खानानिन चाप्चेत्नानिन्वात्नि हान आम्नुओ रादा अ़ङ्का अ़युङ्ऩङ्ऩङ्हिदाछाङ खानानिन चाप्चेत्नाङ्नानिन। अ़ङ्का लाङाताङाहिदा बुया हेवा कामुचि खोन्कि नि साङ्चिछाङ अ़लेत्ऩङ्च़ङ।
साङ्एदाछाङ छुक युङ्मादा मान्हेङ्दा, खोन्कि साङ्कोछाङ अ़हेवादा मान्होन्दान्चिन। खाना आप्पि अ़च़क़ल़क लिसा।
खोन्ओसा अ़ङ्का खाना मित्मेत्ना, अ़ङ्का खानाएदा अ़ङ्छुक युङ्सुङ्हिदा खाना त़तोक्तुओ निनाम्हाङ्ओ लावामि सावा लेइसुयुङ्सु।
सोमातुक्निङ्निओ यावाचि ओ, आन्कान्का ओवात्नि आम्नुओ तुक्वादा य़ङिन्कानुछाङ आम्नुओ लेन्माएनान च़लोक अ़नुवाक य़ङ्चि खानानिन्एदा म़तानि आन्कान्का सोम्कुवा मुन्का।
हान खानानिन अ़छ़ङ य़ङ्दा लोमाय़ङ्वा त़च़न्किना आम्नुओ मिन्मा त़सेङ्सुम्ओसा आम्नुओ साकोङ्छ़ङ कामु यावाचि सोमातुक्तानुम्च़म। अ़क्छा निएदा साकोङ्वादाङ्का राक्एनान सोम्तुक्मुवानिन।
ओ हेन्खामादा निहेन्कोप्दाओचि खोन्कि तावाङ्चिवात्नि त़मुन्येन्ओ सोमातुक्नाङ्नानिन्ओ अ़ङ्यावाचि ओ, अ़ङ्का खानानिन यायोक प़नाङ्नानिन, आम्नुओ लावाओ अ़देङ्सालाप्पादा ङेन कामु पोक मित्माचिदाङ्का अ़थाया युङानिन।
खोन्ओसा सोमातुक्नाङ्नानिन्ओ अ़ङ्यावाचि ओ, ओ य़ङ्चि काहुङ्चिओसा निनाम्हाङ्ओ अ़चुखाङ्मादा खानानिन थुपि खोन्कि ह़त्माय़ङ मात्द़ङ्ओ सेवाङ्निओ ह़ङ्म़ङ ह़ङानिन।
खोन्ओसा सोमातुक्नाङ्नानिन्ओ अ़ङ्यावाचि ओ, खानानिन ओ झारा य़ङ बुयाङा सिन्तानुम्च़म्कि चाप्चेत्तानिन्चिन। अ़अ़त्पा म़नाचिओ अ़चुफिमादा ऩतित्तिन्खात्तिन्कि आम्नुओ अ़छ़ङ साकोङ्छ़ङ अ़मानिन्ने।
मेन सोमातुक्नाङ्नानिन्ओ अ़ङ्यावाचि ओ, अ़क्तात य़ङ मान्मान्केदानुम: हाङ्पा निनाम्हाङ्ओ निम्पाङ अ़क लेन अ़क हजाराकादोङ्वा, खोन्कि अ़क हजाराकादोङ अ़क लेन्वात्नि मु।
खानानिन्आ ओ झारा य़ङ्चि अ़क्दु त़सिन्तुम्च़म्ओङा ओ, खोन्नुछाङ ओन्ग़रि खानानिन अ़ङ्का मित्मेत्मा स़ङाङा। मिस्र हेन्कोप्याङ्का अ़क्दु झारा म़लेइसुचिकि म़बात्तुचिओ म़नाचिएदाओ साकोङ्छ़ङ मान्मुकादाचि निनाम्हाङ्आ आदेङ म़लुक्तुचि।
