13 मोचिआ नि म़नाचि दुखा म़प़चिवात्नि मोचिआछाङ दुखा आङ्मादोत। मोचिओ अ़चुमिन्मादा अ़खोलेन्ङा कुक्भुक्नि चामा खोन्कि दुङ्मा अ़चुऩङानु। आम्नुओ रादा मोचि लेजो खोन्कि सायापेप्माय़ङ ओ। मोचि आम्नुओ यावायोक खाबाचादा चासि त़युङिन्हिदाछाङ धान्मा अ़चुऩङानु।
अ़खोलेन्वा आन्कान नुलोक च़न्ने। ताकावा च़मा, सेत्चावादा, ताङ्लान्दा, लुत्माचामादा, खिमादा खोन्कि ऩङ्च़दा माआङ।
खोन्कि खोक्कोसाआ थुपि मात्द़ङ्ओ खोन्कि मान्चुन्युक्तुओ माङ्लो दियाकोछाङ मान्फिकादा साम्स़रिओ साम्भुङ खोक्कोसाआ आप्पि खाङ्मुमा निम्पाङ ओ, खोन्किना मो सेङ्याङ्ओ खोन्कि थुपि मात्द़ङ्ओ लिने।
आदेङ्माङ निनाम्हाङ्आ मोचि म़लुक्तुचि, अ़चुबुक मोचिओ अ़चुमाङ ओ, खोन्कि मोचि लेजो य़ङ्चि म़मुओदा तोक्पो म़लि, खोन्कि मोचिओ अ़चुमिन्मा हेन्खामादाओ य़ङ्चिदा याक्याङ।
ताबो कादुप्पा अलेक्जेन्दरआ अ़ङ्का ब़द्धे अ़त्लो अ़मुवाङ। निनाम्हाङ्आ खो खोसाआ मुओ अ़काचिवा दन्दा अ़प़।
खानानिन ओ हेन्खामादा आम्नुओ ताकावा युङ्माचामादा खोन्कि आम्नुओ मिन्मावा च़याङ्सा त़युङिन्येन। खानानिन हेन्खोक्वाओ लेन्ओ निम्पाङ खानानिन पुन्दुक्दुक्वाओ त़मुन्युङ्सिन्चिन।
खानानिन मोचिएनान अ़क्नि अ़अ़त्पा काचिदा मान्कोन्त़दान्ओ ऩखान्कि मोचि दोम्तुदाङुचि, खोन्कि खानानिन रुऩफोक्तिन।
मोचिआ अ़नुवाक लाम अ़छिराकि अ़अ़त्पा लाम्दा म़वाङायुङ्सा। अ़अ़त्पादाङ्का तोक्माय़ङ काचिलुङ अ़नुवाक कामित बओरओ अ़छा बालाम मोचिआ अ़त़ङ्तायुङ्सा।
देत्नि नि म़नाचि मुयुङ्सुचि मोवात्निङा मो मुवानुम। मोसाआ मुओ अ़काचिओ ह्वास़रो लासापुवानुम, मोसाआ अ़लाङ्चोक्खुङ्दा चुम्सुओ दुङ्मायुदाङ्का ह्वास़रो च़लोक ऱक्खाक्खाक्वाओ दुङ्मायुआ भेम्सापुवानुम।
