10 खोक्कोसाआ आन्कान्का ओवाको स़मादोराङाओ क़माकात्तुओदाङ्का ऩलेइसिन्का, खोन्कि खोक्कोसाआ आन्कान्का ऩलेइसिन्का। खोक्कोएदा आन्कान्का सोम्कुवा मुन्युङ्सिन्का, मोवात्नि खोक्कोसाआ आन्कान्का ऩलासिन्लेइसिन्युङ्सिन्का।
अ़ङ्का ओवात्नि निनाम्हाङ्य़ङ खालुसुङ्ओसा खा-खाक्को यहुदिचिआ निनाम्हाङ ब़क्खाखिम्दा अ़ङ्का ऩलावाङ्कि सेत्मा ऩलाप्ताङ।
यामारानिन खोन्ओसा अ़ङ्का यहुदियादाओ साकोङ्छ़ङ मान्मुकादाचिएदाङ्का रात्मान्चिन ऱङाने, खोन्कि यरुसलेम्दाओ अ़ङ्फामायु काचि निनाम्हाङ्ओ अ़चुम़नाचिआ लोक्माखान्तुओ लिने।
अ़नुछ्याङा आन्कान्का ना स़माओ दन्दा तोक्तिन्ओवाङा लुन्का। ओवात्नि लिसाओ ना आन्कान्का आप्पिएदा सोम्कुवा मुन्काने निम्पाङ माआङ, मेन म़सुवादाओचि काखोन्लोन निनाम्हाङ्एदा सोम्कुवा मुन्काने निकिना ओ।
आन्कान्का ऩसिन्तिन्कानुछाङ ऩसिन्तिमिन्येन्कावा म़च़। स़मादामा मुन्येन्कानुछाङ आन्कान्का ह़ङिन्येन्का। दन्दा काआङ्नुछाङ मान्सेत्ऩयुक्तिन्का।
खोत्निओसा आन्कान ओ मित्चिऩङ्आ चात्लो काचि खोन्कि दुखा मुन। देकिनालो झारा म़नाचिओ अ़चुकालेन्पा खोन्कि च़लोक्वा खोक्को साकोङ्छ़ङ कामुचि अ़ह़ङ निनाम्हाङ्दा आन्कान आन्सोम्कुवा युङ्सुम।
मेन झारा निरावाचिआ नुय़ङ्खान एन्मा अ़ऱने निकिना हाङ्पा अ़ङ्काएनान म़युङा, खोन्कि अ़ङ्का सावा ऩपुवाङ। मोवात्नि खोक्कोसाआ अ़ङ्का धिनाराओ अ़दोदाङ्का अ़लेइसाङ।
ओवात्नि निनाम्हाङ काब़क्चि चिन्माखाङ्मादाङ्का लेइसि खोन्कि मान्साम्योक्मिचि दन्दा प़माचि निम्पाङ छ़ङ्छेन्माओ लेन्तारि देत्नि रात्मायुङ्माओ, हाङ्पा म़लेयाङ।
