16 अ़क्छा साकोङ्छ़ङ कामुमा मेत्छामाओ खा-खाक्को अ़म़नाचि मेन्मित्मा म़युङ्याङ्नालो मोसाआ मोचि फामाचिदोत। खोन्ओसा साम्भुङ्आ पाङ्खुन्मा अ़दोत्निन्ने, खोन्कि साम्भुङ्आ अ़नुछ्याओ मेन्मित्माचि खाङ्मा ऱचिने।
मो अ़नुवाक काचि मुवाओसा झारासाआ साया अ़मेत्ताओ मुमादोत। अ़छाचि नुलोक पोइसुचिओ, तावाङ्चि साऩङ्वा मेत्तुचिओ, निनाम्हाङ्ओ अ़चुम़नाचिओ अ़चुलाङ वास़त्तुचिओ, दुखा कातोक्चि फासुचिओ खोन्कि झारा अ़नुवाक काचिदा अ़मिन्मा कापाक काइसाओ मुमादोत।
साङ्आ अ़म़नाचिओ खोन्कि च़लोक्वा अ़खिम्लुम्पा अ़खान्चिन्नालो मोसाआ अ़साकोङ्छ़ङ ऩङाछिरु, खोन्कि साकोङ्छ़ङ मान्मुकादादाङ्का अ़अ़त्पा लि।
साथिकादोङ्दाङ्का धात्निओ मेन्मित्मा मोसोओ अ़क्दु ओन्ङा अ़साया काम्सायुङ्साओनालो मो ओन्ङा मेन्मित्मा रुहुप्दा पाआनुम।
