18 खानानिन त़सिन्तुम्योम, आम्नुओ सुन्तुम्चिदाङ्का त़तोक्तुम्ओ सोज्जेओ च़माथाङ्मादाङ्का खानानिन ऩफोङ्सिन। ओ फोङ्मा ना हाराक्वा खोन्कि रुपावाको लुक्खात्ओ सामालाम्पा आम्नुओ लुङ अ़छोराकि त़तोक्तुम्ओ माआङ।
माङ्लो म़नाआ अ़ह़ङ्म़ङ्ओ अ़फान्दा दि प़मा ऱ?
देकिनालो मोचिआ निनाम्हाङ अ़सिन्ताकिछाङ निनाम्हाङ्ओ अ़चुऩङ मान्लोङ्अ़दा, ना मोचिआ आलाङ्ङा अ़पुवा, मेन मोचिओ अ़चुमिन्मा सोज्जेओ लिसा, खोन्कि मोचिओ खामान्सिन अ़चुसाकोङ्वा कुइयामा लिसा।
मोवात्निङा “ताया कातोक्चिओ अ़चुमिन्मा सोज्जेओ मुयाङ निकिना हाङ्पा निनाम्हाङ्आ अ़सिन्याङ।”
खानानिन निनाम्हाङ्ओ अ़चुलुङ अ़छोराकि ऩखिरिन्ओ। खोन्ओसा खानानिन्आ आम्नुओ पोक्दा निनाम्हाङ साया मेत्तानुम।
खानानिन निनाम्हाङ्आ आम्नुओ लुङ अ़छोराकि ऩखिरिन ओ, म़नाचिओ अ़चुहारुक मान्लिदानिन।
आन्निनाम्हाङ पापाओ अ़चुमिन्मावा येसु ख्रिस्तआ आइमित्ओ अ़अ़त्पा हेन्खामादाङ्का आन्कान फोङ्लोइसि आन्हेवाचिओ अ़फान्दा खोक्को आप्पि म़पुवान्चिन।
हान अ़ङ्का हाङ्पाओ अ़चुओ ऩङ्दा क़न्नान्चिन्सा य़ङ्ङा, खोन्कि हाङ्पादा सालुम्स़ङ प़ङ, निरावाचि देत्नि मोचिओ अ़चुमित्माचिओ सोज्जेदा म़ह़ङ, मोवात्नि खानानिन हान्दाङ्का मोह्यात्नि मान्ह़ङ्दानिन।
झाराकापाराओ आन्हेवादाङ्का आन्कान फोङ्सि, आन्कान सेङ्सि, खोन्कि अ़नुवाक काचि मुमा कास़ आप्पिओ अ़चुम़ना मुसि येसु ख्रिस्तआ आन्को निकि अ़चुह़ङ्म़ङ म़पुवा।
मेनेत्पा माङ्लो बोयोङ्ओ अ़ह़आ माआङ, मेन आप्पिओ अ़चुह़आ आन्कान अ़धुन्ओ निम्पाङ लेइसि अ़क्धुवा तोक्पो सेङ्याङ्ओ खोप्हुत्दा खोक्को म़वाङा।
ओ चिन्माखाङ्माचिआ आम्नुओ साकोङ्छ़ङ अ़नुछयाओनि अ़छ़ङ अ़मु, खोन्कि मिलाम्पा हेङ्नुछाङ लुक्खात्ओ हाराक्वादाङ्काछाङ च़लोक अ़च़वाङ निकिना खाङ्म़मु। ओ येसु ख्रिस्त खाङ्म़मुनान्चिन्हिदा ऩङ्चोन्मा, ऩङ्लोङ्मा खोन्कि साया तोक्मा खान्तुओ लिने।
खाराओ लेन्चिदा निरावाचिआवात्नि खानानिन्आ ताङ्लान, अ़अ़त्पा मिन्मा, खाबात्सेत्चाले, ताकावा च़मा, खाबात्दुङ्खा रुहुप्दा खोन्कि चिप्माकात्तुओ सेम्पोक ब़क्मादा आम्नुओ ग़रि च़लोक त़क़प्तुम्युङ्सुम।
आन्हेवा लेत्सि ख्रिस्त म़ताओ य़ङ खानानिन त़सिन्तुम्योम, खोन्कि खोक्कोएदा हेवा मात्द़ङ।
