«Yahudiya le nde ri. N sɔrɔnni Silisi Tarisi, kɔni n namɔni Jerusalɛmu yan de. N tɛrɛ karanmɔɔ Kamaliyɛli le bolo. Ale le ka n karan kosɛbɛ an benbailu la sariya la. N fanan tɛsidini tɛrɛ Alla ko la kosɛbɛ, ikomin ai jɛrɛ tɛsidini ɲa mɛn ma bi.
Nba, n ye n lɔla mɛn na i ɲana, wo le ɲin di. N ye an benbailu Maari Alla batola sila kura kan. Ii ka a fɔ ko sila wo tɛ tuɲa ri. Kɔni mɛnilu sɛbɛni sariya kitabu rɔ, a ni mɛnilu sɛbɛni nabiilu la kitabu rɔ, n lani wo bɛɛ la.
N tɛrɛ ye taamala Yahudiyailu la dina sila kan ɲa mɛn ma fɔlɔfɔlɔ, ai ra wo mɛn. N tɛrɛ ye Alla la lemɛniya jama tɔrɔla fɔɔ ka a dan natamin kojuuya. N tɛrɛ ye a ɲininna ka a ratiɲan fewu.
Ka a masɔrɔn n ka faaninta kɛ n sɔrɔn tele seyinna lon de ma. Isirayɛlika le n di, ka bɔ Bɛniyaminu kabila rɔ, Heburuilu la Heburu le nde ri. N fanan tɛrɛ bilani sariya kɔfɛ Farisi mɔɔilu kɛɲa ma.
