Zekâya 9:12 - MUKANDA WA MYIDI MUKULU

¹² Nuenu bena lukanu badi mua kutekemena lupandu mpindiewu, pinganayi mu tshimenga tshienu. Mbamane kuibakulula bimana biatshi. Mpindiewu ndi nnuambila ne: nennuvudijile disanka dipite misangu ibidi dikenga dinuvua nadi.

Mukanda wa Nzambi Dihungila Dikulukulu ne Dihungila Dihia-dihia 2003

¹² Hinganai bienu ku musoko udi ne ngumbu ya mabue, nuenu bena lukanu badi batekemena luhandu; dituku edi mene ndi nnuambila ne, Nennuvudishile disanka tshiakabidi.

Zekâya 9:12 交叉引用

Yobe 42:10

Yobe mumane kutendelela Mvidi Mukulu bua balunda bende abu, Maweja-Nangila kumupingajila bintu biende anu bu muvuabi kale. Kuvudijaye bintu abi misangu ibidi bu muvuabi kale.

Yeshaya 61:7

Maweja-Nangila udi wamba ne: “Nuvua bafue bundu. Bantu bavua banupenda, banupetula, banutuila mate mu mesu. Kadi bu muvuabu banupepeje, nenupete buloba budi bupite buenu bua kale misangu ibidi. Bituadije ku mpindiewu, nenusombemu, nusanke kashidi.

Ebrewu 6:18

Kudi malu abidi adibu kabayi mua kushintulula, malu abidi adi Mvidi Mukulu kayi mua kuvila. Nanku malu abidi aa adi atukolesha bikole ku muoyi, bua tumone mua kutekemena ne muoyi mujima bivuabu batulaye.

Yirmeya 51:10

Maweja-Nangila mmutubingishe. Tuyayi ku Siyone, tumanyishe badimu malu onsu avua Maweja-Nangila mutuenzele.

Yirmeya 31:17

Maweja-Nangila udi wamba ne: Kutekeshi mu maboku to. Bana bebe nebapingane mu ditunga.

Nahume 1:7

Maweja-Nangila udi ne muoyi muimpe. Badi mu dikenga, badi mua kusokomena kudiye. Badi banyemena kudiye, udi ubalama bimpe,

Osheya 2:15

Nemmunyoke nanku, bua matuku avuaye ulambula mvidie Baale ne mvidie mikuabu. Uvua udilengeja ne tukanu, kabidi ne mabue a mu nshingu, ukeba balume ba kuenda nabu tshiendenda. Kadi uvua umpua muoyi. Meme Maweja-Nangila, ndi ngamba nanku.

Yeshaya 40:2

Nukoleshe bena Yerushalayime ku muoyi! Nubele mbila, nubambile ne: “Midimu yenu mikole yajiki! Nudi bafute tshibawu tshienu. Maweja-Nangila mmununyoke misangu ibidi dinyoka dijima dinuvua ne bua kupeta.”

Yezekiyele 37:11

Maweja-Nangila kuamba kabidi ne: — Yezekiyele, mifuba eyi idi ituleja mudi bena Izrayele. Bena Izrayele badi bamba ne: “Tudi bu mifuba miume nyonyonyo. Tshitudi mua kutekemena kabidi ntshinyi? Tshitudi mua kuenza kabidi ntshinyi?”

Mika 4:8

Wewe, mukuna wa Yerushalayime, udi ulama bantu bimpe, bu mudi kaleya ka kutentekela baluishi, neupete tshiakabidi bumfumu buebe, buuvua nabu kale. Yerushalayime neikale tshiakabidi, tshimenga tshikulu tshia bukalenga.”

Yeshaya 52:2

Lupuishi ndukulamate pambidi. Kadi wewe Yerushalayime, ditutula lupuishi elu. Juka kulu, uye kusomba pa nkuasa webe wa bukalenga. Wewe Siyone, uvua muena lukanu, disulula mionji idi mikunjingila mu nshingu.

Yirmeya 31:6

Dituku adi batentekedi nebele mbila pa mikuna ya Efrayime bamba ne: ‘Tuyayi ku mukuna wa Siyone kudi Maweja-Nangila Mvidi Mukulu!’ ”

Yeshaya 38:18

Mu kandondu ka bafue kabena bakutumbisha. Bitalu kabiena bikuela bikashi! Badi bapueka mu kandondu, kabatshiena bakutekemena bua ubavuluke.

Yeshaya 49:9

Ndi ngambila bena lukanu, bantu badi basomba mu miidima ne: ‘Patukayi, numone butoke.’ Nanku nebikale bu mikoku, idi idia bisosa ku muelelu wa njila, idi ipeta tshiakudia tshiayi pa mikuna yonsu.

Yirmeya 50:28

Bantu bavua bapanduke mu mvita, bavua banyema mu ditunga dia Babilone, ke badi bafika mu Siyone, bela mbila ne: Maweja-Nangila Mvidi Mukulu wetu mmudisombuele. Mmunyoke bena Babilone bua nzubu wende wa tshijila uvuabu banyange.

Ebrewu 6:19

Ditekemena adi didi diludika muoyi wetu, mudi luongu luludika buatu pa mayi. Didi dikole, didi dishindame munda muetu. Didi disompoke dia muamua dia tshilamba tshia nzubu wa Mvidi Mukulu wa mu diulu, bua kutufikisha muaba menemene wa tshijila.

Yeshaya 24:22

Nebabasangishe bonsu pamue bu bena lukanu, babela mu dijimba. Nebabakangile mu nzubu wa lukanu. Papita matuku mavule, bonsu aba nebapitshile ku tshilumbu.

Yirmeya 14:8

Kadi bena Izrayele mbakutekemene anu wewe. Bua wewe kubasungidila matuku a dikenga. Kadi wewe kuena muenyi mu ditunga dietu! Wewe kuena muena luendu, udi ulala anu dituku dimue.

Yirmeya 16:19

— Maweja-Nangila, wewe udi umpesha bukole. Wewe udi undama. Mu tshikondu tshia dikenga, ndi mua kunyemena kuudi. Bantu ba bisamba bikuabu nebafike kuudi wewe, bafuma ku nshikidilu wa buloba. Diba adi nebambe ne: “Bankambua betu bavua anu ne mvidie ya dishima. Mvidie yabu ivua anu lupepele, kayivua mua kuambuluisha muntu nansha umue.

Yirmeya 17:13

Maweja-Nangila, bena Izrayele badi bakutekemena amu wewe. Nanku badi bakubenga, bundu buasangana kubakuata anyi? Buabakuata! Bonsu badi bakubenga wewe, mbajimine bu mena adibu bafunde mu lupuishi. Bualu mbumuke kuudi wewe, Maweja-Nangila mpokolu wa muoyi.