Yowanane 15:16 - MUKANDA WA MYIDI MUKULU

¹⁶ Nuenu kanuvua bansungule, kadi meme mvua munusungule, munutumine diyi bua nuye kukuama bimuma, bimuma bidi bishala kashidi. Nenku Tatu neanupeshe tshionsu tshinuamulomba mu dina dianyi.

Mukanda wa Nzambi Dihungila Dikulukulu ne Dihungila Dihia-dihia 2003

¹⁶ Nuenu kanuakunsungula, nakunusungula, nakunujadika bua nuenu kuya kukuama mamuma ne bua mamuma enu ikale tshiendelele, bua tshintu tshionso tshinualomba Tatu mu dina dianyi yeye anuhetshi.

Yowanane 15:16 交叉引用

Yowanane 15:19

Bu nuenu bikale ba pa buloba, ba pa buloba batua mua kununanga bu bana babu. Kadi mvua munusungule, munusomone munkatshi mua ba pa buloba, bualu kanuena ba pa buloba to. Ke padi ba pa buloba banukina.

Efeze 2:10

Bualu amu Mvidi Mukulu ke udi mutufumbe, mutufuke bua tuetu kudisanga ne Yezu Kristu, bua tukumbaje malu mimpe akavuaye mudianze kulongolola bua tuetu kuenza.

Luke 6:13

Butshia kubikilaye balongi bende. Kusungulaye munkatshi muabu dikumi ne babidi, kubinyikaye ne: mbapostolu.

Ngalate 1:15

Kadi bu mudi Mvidi Mukulu munnange, ukavua mudianze kunsungula, kabayi banji kundela, bua meme kumukuatshila mudimu.

1 Yone 4:19

Kadi tuetu tudi tunangangana, bualu Mvidi Mukulu uvua mudianze kutunanga.

Bienzedi 22:14

Kuambaye kabidi ne: “Mvidi Mukulu wa bankambua betu mmukusungule, bua wewe kumanya tshidiye musue, kumona Muntu umue epele uvua mukumbaje tshidiye musue, kudiumvuila ne diyi diende menemene.

2 Timote 2:2

Biuvua mumvue meme mulongeshe, bantu ba bungi bavua babiumvue, babijadike. Nanku ubilongeshe bantu ba nsongu, badi bamanye mua kubilongesha bakuabu.

Yowanane 13:18

Tshiena ngamba buenu bonsu to. Ndi mumanye bandi musungule. Kadi mbimpe ikumbane miaku ivuabu bafunde mu Mukanda wa tshijila ne: “Muntu utuvua tudia nende diampa, ukadi unduisha.”

Yowanane 6:70

Yezu kubandamuna ne: — Tshivua munusungule bonsu buenu dikumi ne babidi anyi? Kadi umue wenu ndiabolu!

1 Petro 3:15

Kadi mu mioyi yenu nunemeke Kristu bu Mfumu wenu. Diba dionsu nuikale amu ne muoyi wa kuandamuna bonsu badi banukonka ne: nu-tumvuije ditekemena didi munda muenu.

Misambu 71:18

Mvidi Mukulu wanyi, nkadi ne nsuki mitoke, kadi kundekedi. Nanku nemmone mua kumanyisha bana banyi ne biikulu banyi, muudi ne bukole, wenza malu a dikema.

1 Yone 4:10

Dinanga didi nenku: ki ntuetu bavua banange Mvidi Mukulu to. Kadi Yeye ke uvua mutunange, mufume Muanende bua adilambule bualu buetu, bua kutujimijila mibi yetu.

Nsumuinu 11:30

Bidi muntu udi utshina Mvidi Mukulu wenza, bidi bipetesha muoyi. Muntu wa meji udi usankisha bakuabu.

Bienzedi 1:24

Ke bonsu pamue kutendelela, bamba ne: — Mfumu, wewe udi mumanye muoyi wa muntu yonsu. Nanku ku babidi aba utuleje uudi musungule.

Yeshaya 27:6

Matuku adi kumpala, bena Izrayele, bena tshisamba tshia Yakobe, nebeele miji mipiamipia. Nebeele bilongu, nebasampile, nebuwuje buloba bujima ne bimuma biabu.

1 Petro 3:2

nebamone munudi nubanemeka, nuenza amu malu mimpe.

Rome 15:4

Nenku bionsu bitudi tubala mu Mikanda ya tshijila mbabifunde bua kutulongesha. Mikanda ya tshijila idi kukolesha ku muoyi, bua tunanukile, tupete bitudi tutekemena.

Bienzedi 9:15

Ke Mfumu kumuandamuna ne: — Uye. Bualu muntu awu ke tshiamu tshia mudimu tshindi musungule, bua kumanyishaye bisamba bikuabu, bakalenga ba matunga, ne bena Izrayele, dina dianyi.

Matayi 21:22

Bu nuenu nuitaba, nenupete bionsu binudi nulomba mu ditendelela.

Misambu 145:4

Ndelanganyi yonsu imanyishangane biudi muenze, yambilangane bukole buebe.

2 Timote 1:11

Mvidi Mukulu mmumpeshe mudimu wa bupostolu, bua kumanyisha ne kulongesha bantu Lumu lua Disanka elu.

1 Korente 10:11

Makenga awu avua mabakuate bua kutulongesha bualu. Bayua batufundilewu bua kutubela. Bualu tudi mu tshikondu tshia nshikidilu.

Rome 9:21

Mufumbi wa luesu udi mua kufumba dima mudiye musue. Udi mua kuenza ne dima dia mushindu umue luesu lua mushinga mukole, nansha lua patupu.

Yakobe 3:18

Lutete lua meji ludi lutoloka munkatshi mua badi bakeba ditalala. Ke muaba udilu lukuama bimuma bia malu mimpe.

Ebrewu 11:4

Amu bua ditaba, Ebele uvua mulambule Mvidi Mukulu mulambu mupite wa Kayine ku buimpe. Bua ditaba diende Mvidi Mukulu uvua mumubingishe bualu Mvidi Mukulu uvua muanyishe malambi ende. Amu bua ditaba diende, Ebele utshidi wakula nansha yeye mumane kufua.

Tite 1:5

Mvua mukushiye mu tshidila tshia Kreta, bua wewe kulongolola bimvua meme tshiyi mujikije. Nanku mu tshimenga tshionsu uteke bakulu ku mutu kua Tshisumbu tshia bena ditaba. Uvuluke meyi ne mikandu bimvua mukushile.

Kolose 1:6

Lumu lua Disanka ludi lutangalaka, lutuadila bantu ba buloba bujima diakalenga. Diakalenga edi ke divua Lumu elu lunutuadile nuenu kabidi, bituadije ku dituku divuabu banumanyishe musangu wa kumpala dinanga didi Mvidi Mukulu utunanga nadi. Nuenu kujadika bimpe mudi Lumu alu.

Rome 1:5

Kudiye ke kudi Mvidi Mukulu mumpeshe dipa dia kuikala mupostolu, bua meme kusaka bantu ba bisamba bionsu, bua bitabe Lumu lua Disanka, batumikile Mvidi Mukulu, bua dina dia Yezu dipete lumu.

Bienzedi 10:41

ki mbantu bonsu to, kadi amu tuetu bajadiki bavua Mvidi Mukulu mudianze kusungula. Mvidi Mukulu mumane kumubisha ku bafue, tuvua badie, banue nende.

1 Timote 2:7

Ke padibu bantume bu mupostolu ne mulongeshi, bua kufikisha bena bisamba bikuabu ku ditaba ne ku bulelela. Tshiena nshima to. Ndi ngamba malu mudiwu.

Kolose 1:23

Kadi nudi ne bua kunanukila mu ditaba, bashindamemu, kanuyi nutenkakana. Kanujimiji ditekemena dinu-vua bapete, katshia banumanyisha Lumu lua Disanka. Ke Lumu lua Disanka luvuabu balongeshe bantu bonsu, kabidi lundi meme Polu ngenzela mudimu, muvua Mvidi Mukulu musue.

Mika 5:7

— Bena Izrayele badi bashala ne muoyi munkatshi mua bisamba bia bungi, nebikale ne bukole bu bua nyama wa ntambue munkatshi mua nyama ya muitu, nansha munkatshi mua tshisumbu tshia mikoku. Muaba onsu udiye upita, udi uyikuata, uyisunsula, kakuyi muntu umunyengayi.

Genese 18:18

bualu ndelanganyi yende neikale tshisamba tshinene ne tshia bukole. Nengele bisamba bionsu bia pa buloba lupemba mu dina diende.

Rome 1:13

Bana hetu, ndi musue mmanye ne: mvua mujadike misangu ne misangu bua kufika kuenu aku. Kadi too ne lelu bavua amu bampumbishe. Mvua mujinge bua mudimu undi nkuata upete tshipeta ne kuenu kabidi, bu mudiwu wenda udiunda mu matunga makuabu a pa buloba.

Bienzedi 1:8

Kadi nenupete bukole, diba dianupuekela Mueyelu wa Tshijila. Nanku nenumone mua kujadika malu anyi mu Yerushalayime, mu ditunga dijima dia Yudeya ne dia Samariya, kabidi too ne ku ndekelu wa buloba.

Matayi 7:7

— Lombayi, nebanupeshe; kebayi, nenusangane; kokolayi, nebanunzuluile tshiibi.

Yowanane 15:5

Ndi mutshi wa nwinyo. Nuenu nudi matamba. Muntu udi ushala mudisange nanyi, kabidi undi ndisanga nende, neakuame bimuma bia bungi. Bualu nuenu kanuyi nanyi, kanuena mua kuenza bualu nansha bumue.