Yirmeya 23:5 - MUKANDA WA MYIDI MUKULU

⁵ Maweja-Nangila udi wamba ne: Dituku nedifike dindi mbikila muntu wa ku ndelanganyi ya Davide menemene. Neikale mukalenga muakane. Neenze amu malu mimpe. Neakose amu nsambu pa yoyi mu ditunga.

Mukanda wa Nzambi Dihungila Dikulukulu ne Dihungila Dihia-dihia 2003

⁵ Yehowa udi wamba ne, Monai, mu matuku atshidi alua, nensampishile Davidi Lutonga luakane; yeye neakokeshe bu mukelenge, nealeshe bakuabo meji makane, neajadike kulumbulula kuimpe ne buakane mu buloba.

Yirmeya 23:5 交叉引用

Yeshaya 4:2

Dituku dikuabu, Maweja-Nangila neafukishe tshiakabidi buloba. Tshionsu tshidi tshitoloka netshikole. Bantu badi bashala ne muoyi mu Izrayele, nebasanguluke padibu bamona bionsu ebi. Nenku nebapetulule lumu ne butumbi biabu.

Yeshaya 52:13

Maweja-Nangila udi wamba ne: “Muena mudimu wanyi, neapete tshipeta tshimpe mu mudimu wende, neapete lumu lunene.

Yeshaya 9:7

Maweja-Nangila uvua mulumbuluishe ndelanganyi ya Yakobe. Kupishaye bukalenga bua Izrayele.

Zekâya 3:8

“Wewe Yeshuwa, mutuangaji munene, teleja. Nuenu batuangaji badi bakuata nende mudimu, telejayi. Nuenu bonsu nudi tshimanyinu tshidi tshijadika ne: matuku adi kumpala nenupete lupandu. Nentume muntu wanyi, dina diende Lutonga.

Yeshaya 53:2

Bualu Maweja-Nangila uvua musue, bua muena mudimu wende ende ukola bitekete bitekete, bu mutshi wa tshitende, bu mutshi udi wela miji mu buloba buume. Kavua ne buneme, nansha bulenga, buvua mua bantu kumutangidila. Kavua ne tshintu nansha tshimue, tshivua mua kusaka bantu bua bamutangile.

Zekâya 9:9

Yerushalayime, sanka bikole! Wewe tshimenga tshia Siyone, ela tunkunduluila! Tangila mudi mukalenga webe ukuvuila. Udi uvua kukusungidila, kukosa nsambu pa yoyi. Kadi kena uditambisha to! Udi mubande pa nyama wa mpunde, pa muana wa mpunde mukaji.

Didimanyisha 19:11

Pashishe meme kumona diulu diunzuluka, kabalu katoke kamuenekamu. Udi mubandepu badi bamuinyika: Wa diyi dimue, Wa malu malelela; udi ukosa nsambu pa yoyi, uluangana mvita amu pa bualu.

Amosa 9:11

Maweja-Nangila udi wamba ne: “Tshimenga tshia Davide, tshidi bu nzubu mumane kupuka. Kadi dituku dikuabu, nengasulule tshimenga. Nengibakulule bitupa bia tshimana tshiatshi, bivuabu bashimbule mu mvita. Nendongolole nzubu yonsu bimpe, tshimenga tshipete lumu luatshi lua kale.

Yirmeya 30:9

Kadi nebankuatshile mudimu meme Maweja-Nangila Mvidi Mukulu wabu. Nenku nempingaje mu bukalenga bua Davide muana wa ku ndelanganyi yende. Nebamuenzele mudimu, bualu mmukalenga wabu.

Yirmeya 30:3

Bualu ndi nkuambila ne: dituku nedifike, dingapikula bantu banyi bena Izrayele mu bupika, kabidi ne bena Yuda. Nembapingaje mu ditunga dimvua mupeshe bankambua babu. Nebasombemu tshiakabidi. Ke tshindi meme Maweja-Nangila ngamba.

Yirmeya 23:6

Pabuelaye mu bukalenga, kabakukengesha kabidi bena Yuda kudi baluishi babu. Bena Izrayele nebasombe talalaa. Nebinyike mukalenga awu ne: ‘Maweja-Nangila ke musungidi wetu!’ ”

Ebrewu 8:8

Kadi Mvidi Mukulu uvua udiwula bantu bende, padiye wamba ne: “Maweja-Nangila udi wamba ne: matuku adi kumpala, nentue ndondu mupiamupia ne bena Izrayele, kabidi ne tshisamba tshia bena Yuda.

Yowanane 1:45

Pashishe Filipe kusambakena ne Natanayele. Kumuambilaye ne: — Tuvua bamone muntu uvua Moshe mutele mu mukanda wa Mikenji, kabidi uvua bambi bambe. Ke Yezu, muana wa Yozefe, muena mu tshimenga tshia Nazarete.

Osheya 3:5

Pashishe, bena Izrayele nebapingane kudi Maweja-Nangila. Nebapingane kudi Mvidi Mukulu wabu, ne kudi mukalenga wabu wa ku ndelanganyi ya Davide. Matuku atshidi kumpala, bena Izrayele nebakebe Maweja-Nangila, nebamunemeke, nebatekemene bintu amu kudiye.

Danyele 9:24

Mbapeshe tshisamba tshiebe ne tshimenga tshia tshijila tshiudi musombe bidimu makumi muanda mutekete, bua bajikije ditomboka diabu, balekele malu mabi, bafuilangane luse, bakose nsambu pa yoyi kashidi. Nanku malu adi Mvidi Mukulu uleja, adi bambi bambe, neakumbane. Nebajidile tshiakabidi nzubu wa Mvidi Mukulu wa tshijila.

Yirmeya 31:27

Maweja-Nangila udi wamba ne: Dituku adi, nenguwuje Bukalenga bua Izrayele ne bua Yuda ne bantu, kabidi ne nyama, mudibu bamiamina ntete mu budimi.

Yirmeya 22:3

Udi wamba ne: Nukose tshilumbu tshionsu amu pa tshiotshi. Nupatule bantu badibu bakengesha mu bianza bia bantu badi biba bintu biabu. Kankengeshi muena tshimuangi, kanunyengi tshintu tshia muana nshiya, nansha tshia mukaji mukamba. Lekelayi kushipa mwaba ewu bantu kabayi ne bualu.

Yeshaya 53:10

Kadi Maweja-Nangila uvua muanyishe muena mudimu wende uvuabu bakengeshe. Bu nuwuaye mufile muoyi wende pa mutu pa bantu bakuabu, muena mudimu awu neapete muoyi tshiakabidi, neikale ne ndelanganyi mivule, neashale matuku mavule pa buloba. Yeye ke wakumbaja meji adi Maweja-Nangila nawu.

Yowanane 1:49

Nanku Natanayele kumuambila ne: — Mulongeshi, udi Muana wa Mvidi Mukulu, udi mukalenga wa bena Izrayele!

Matayi 2:2

Kukonkabu ne: — Muana udibu balele bua kuikalaye mukalenga wa bena Yuda udi penyi? Tudi bamone mutotu wende luseke ludi diba dipatukila. Ke patudi bafike bua kumukukuila.

Yezekiyele 34:29

Nembapeshe madimi adi ne bufuke bua bungi. Kabakuikala kabidi ne nzala mu ditunga diabu to. Bantu ba bisamba bikuabu kabakubapepeja kabidi to.

Misambu 80:15

Mvidi Mukulu wa bukole buonsu, pingana, mu diulu muudi amu, utangile panshi umone bidi bituenzekela, akuila mutshi wa mvinyo ewu.

Misambu 45:4

Tshilobu, suika mukaba, upayike muela. Ke bidi bileja butumbi ne lumu biebe.

Yirmeya 22:30

Udi wamba ne: “Bafunde muntu ewu mu mukanda wa bakalenga bu muntu udi kayi ne bana! Nsongalume awu mmupange bionsu. Muntu nansha umue wa ku ndelanganyi yende kakusomba pa nkuasa wa bukalenga bua Davide, kakuikala mfumu wa Yuda to.”

Yirmeya 22:15

Udi wela meji ne: udi mukalenga muimpe, bua paudi usungula mabaya a sedre, adi bakalenga bakuabu kabayi nawu anyi? Tatuebe uvua udia unua, anu mudi bantu bonsu benza. Kadi uvua ukosa nsambu amu pa yoyi. Ke muvuaye mupete dikasa dimpe.

1 Korente 1:30

Kadi Mvidi Mukulu mmunusange ne Yezu Kristu. mMuenze Kristu meji etu. Kristu udi utubingisha kumpala kua Mvidi Mukulu, utuenza bantu bende ba tshijila, utupikula kabidi ku bubi.

Yeshaya 42:6

“Meme Maweja-Nangila, mvua mukubikile, bua ukumbaje meji andi nawu. Meme ndi nkuambuluisha. Mvua mukuenze, bua utuadile bantu bupole, ukumbaje bimvua mulaye bantu, wikale butoke munkatshi mua matunga.

Yirmeya 29:11

Bualu meme Maweja-Nangila ndi mumanye meji andi nnuelela. Ndi nnujadikila ne: tshiena ne muoyi wa kunukengesha nansha, kadi amu bua kunufikisha ku diakalenga. Nennukumbajile malu anudi batekemene.

Yezekiyele 21:27

Mukete udi uleja Yerushalayime, udi mu tshianza tshiende tshia balume. Nanku mukalenga neatume diyi bua bena mvita baye ku Yerushalayime, benda bela bibingu bia mvita. Neateke biamu binene bia mvita, bua binyange biibi bia tshimenga. Neele mishiki ya buloba, neumbule mikidi.

Yezekiyele 45:8

Nanku, bakalenga nebapete muaba wabu mu Izrayele. Kabakukengesha kabidi bantu ba Maweja-Nangila to. Nebashile bisamba bia bena Izrayele bitupa bikuabu bia mu ditunga.”

2 Samuele 23:3

Mvidi Mukulu wa Izrayele kuakula, mulami wa bena Izrayele kungambila ne: “Mukalenga udi ulombola bantu bimpe, uludika bantu, ukumbaja bidi Mvidi Mukulu musue,

Misambu 99:4

Batumbishe bukole buebe, wewe mukalenga udi munange buakane. Wewe ke udi muelele bantu mikenji ya nsombelu muimpe, wewe ke udi mujadike buakane, ne bulongolodi mu Izrayele.

Yeshaya 9:5

Eyowa, mbatulelele muana, mbatupeshe muana wa balume. Mvidi Mukulu mmumuteke mukalenga. Nebamuinyike ne: “Muena meji wa dikema, Mvidi Mukulu wa bukole, Tatu wa kashidi, Mukalenga muana wa bupole.”

Yeshaya 9:6

Bukalenga buende nebutangalake, bena ditunga bende nebasombe mu bupole kashidi. Neashindame mu nkuasa wa lumu lua Davide, mpindiewu ne tshiendelele. Bumfumu buende nebutungunuke kashidi, bualu udi ulongolola malu bimpe, amu mudi Mvidi Mukulu ujinga. Ke bidi Maweja-Nangila muena bukole buonsu ukumbaja, bualu udi utunanga, kayi upungila.

Yeshaya 33:5

Maweja-Nangila udi ne bukole, usomba mulu. Udi ukuata mudimu mu Yerushalayime, bua bantu banemekangane, basankishangane.

Yeshaya 45:24

Nebambe ne: “Amu kudi Maweja-Nangila nkayende, ke kutudi tupeta bukole, ke kutudi mua kutshimuna.” Bonsu bavua banduishe, nebafike kundi ne bundu.

Yezekiyele 34:16

Nenkebe mukoku uvua mujimine, nempingaje mu tshikumbi uvua mupambuke, nensuike buanga pa mputa wa uvua mutapike, nemfululule uvua usama. Kadi nembambishe udi ne mafuta mapite bungi, nansha udi ne bukole bua bungi, bua kauyi kutatshisha mikoku mikuabu. Nendame mikoku yanyi anu bimpe.”

Mika 5:3

Yeye ke mfumu uvuabu babalaye. Nealombole bantu bende ne muoyi mukole. Nealeje bukole buende, ne butumbi bua Maweja-Nangila, Mvidi Mukulu wende. Bantu ba tshisamba tshiende nebasombe mu ditalala, bualu nebitabe bumfumu buende too ne ku nshikidilu kua buloba.