Ekesode 31:15 - MUKANDA WA MYIDI MUKULU

¹⁵ Nuenze mudimu mu matuku asambombu, kadi dituku dia muanda mutekete nuikishe, bualu ndituku dia tshijila dia kunnemeka meme Maweja-Nangila Mvidi Mukulu wenu. Muntu yonsu udi wenza mudimu dituku dia Dikisha, nebamushipe.

Mukanda wa Nzambi Dihungila Dikulukulu ne Dihungila Dihia-dihia 2003

¹⁵ Enzai mudimu wenu matuku asambombo; kadi dituku dia muanda mutekete ndituku dia dikisha dia kuela meji, dituku dia kujidila Yehowa, mundi yonso udi wenza mudimu dituku dia Lumingu nebamushihe bulelela.

Ekesode 31:15 交叉引用

Genese 2:2

Mvidi Mukulu mumane kujikija mudimu uvuaye muenze, kuikishaye dituku dia muanda muteketa.

Lewitiki 23:3

“Nuenze mudimu matuku asambombu, kadi dituku dia muanda mutekete dikale dituku dia Dikisha, dia tshijila. Nuikishe, nudisangishe bua kuntumbisha meme Maweja-Nangila, miaba yonsu inudi basombe. Kanuena ne bua kukuata mudimu dituku adi to.

Ekesode 16:23

Moshe kubandamuna ne: — Maweja-Nangila mmumane kuamba ne: malaba ndituku dia kuikisha, dia tshijila dia Maweja-Nangila. Nanku nulambe biakudia munudi basue. Pikalabi bishale, nubilame bua kudia malaba.

Ekesode 34:21

“Nuenze mudimu anu matuku asambombu. Nuikishe dituku dia muanda mutekete, nansha mu tshikondu tshia kudima, nansha tshia kunowa biakudia.

Luke 23:56

Pashishe kupinganabu kuabu. Kulongololabu mafuta ne manananshi bua kulaaba tshitalu. Dituku dia Dikisha, bakaji abu kuikisha, bilondeshile mikenji ya ditunga.

Luke 13:14

Kadi mfumu wa nzubu wa kutendelela kufika munda, bualu Yezu mua mujikije disama dia mamu awu dituku dia Dikisha. Ke kuambilaye bantu ne: — Kudi matuku asambombu anudi mua kukuata mudimu. Nufike bua kujikija masama a bantu matuku awu, kadi ki ndituku dia Dikisha nansha!

Ekesode 35:2

“Nuenze mudimu matuku asambombu. Kadi dituku dia muanda mutekete ndia Dikisha, bualu ndituku dia tshijila dia Maweja-Nangila. Muntu yonsu udi wenza mudimu dituku adi nebamushipe.

Ekesode 31:17

Dituku edi nedikale tshimanyinu tshia diumvuangana didi pankatshi panyi ne bena Izrayele. Bualu meme Maweja-Nangila mvua mufuke diulu ne buloba mu matuku asambombu, meme kuikisha dituku dia muanda mutekete.

Ebrewu 4:9

Nenku, dikisha difuanangane ne divua Mvidi Mukulu muikishe dituku dia muanda mutekete, ditshidi dindila bantu ba Mvidi Mukulu.

Yezekiyele 46:1

Maweja-Nangila udi wamba ne: “Tshiibi tshia lubanza lua munda mua nzubu wa Mvidi Mukulu tshidi luseke ludi diba dipatukila, tshidi ne bua kushala tshinjila matuku asambombu adibu benza mudimu. Kadi badi mua kutshiunzulula dituku dia Dikisha, ne dia Tshibilu tshia ngondu mupiamupia.

Lewitiki 23:32

Dituku adi, nenuikishe, anu bu munudi nuenza dituku dia Dikisha. Nujile kabidi biakudia. Nunemeke mukenji ewu wa dikisha, bituadije ku dilolu dia matuku tshitema a ngondu, too ne dilolu dia matuku dikumi a ngondu.”

Ekesode 31:14

Nunemeke dituku dia Dikisha, bualu ndienu dia tshijila. Muntu yonsu udi wenza mudimu dituku adi, ne bamumushe munkatshi mua tshisamba tshianyi, bamushipe.

Ekesode 16:26

Nenuikale nupeta biakudia matuku asambombu malondangane. Kadi dituku dia muanda mutekete kanuakubipeta to, bualu ndituku dia kuikisha.

Ekesode 23:12

“Nuenze midimu yenu matuku asambombu. Kadi nuikishe dituku dia muanda mutekete, bua bapika benu ne benyi benu badi banukuatshila mudimu bamone mua kuikisha, kabidi bua nyama yenu ya mpunde ne ya ngombe imone mua kuikisha payi.

Ekesode 31:16

Nanku, bena Izrayele ne ndelanganyi yabu yonsu, bavuluke dituku dia Dikisha, bualu ke diumvuangana dietu nabu dia kashidi.

Ekesode 35:3

Kabidi kanuena mua kutemesha nansha kapia mu nzubu wenu nansha umue dituku adi to.”

Lewitiki 16:29

“Nuenu bena Izrayele, umvuayi mukenji unudi ne bua kulama kashidi: matuku dikumi a ngondu wa muanda mutekete, nuenu, bana benu ne benyi badi munkatshi muenu, nujile biakudia. Kanuena kabidi mua kukuata mudimu.

Dielulula 5:12

“Nuvuluke Dituku dia Dikisha, nudinemeke, bualu ndia tshijila, bu mumvua munuambile.